Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 8 2015

 TSHIENA-BUALU TSHINENE MUNTU YEYE MUFUE: UDIKU MUA KUPETULULA MUOYO ANYI?

Ntshinyi tshitu tshienzeka padi muntu ufua?

Ntshinyi tshitu tshienzeka padi muntu ufua?

Lionel udi wamba ne: “Mvua ngela meji ne: kudi miaba isatu idi muntu mua kuya padiye ufua: mu diulu, mu iferno anyi mu mpurgatoriyo. Mvua mumanye ne: tshivua anu muntu muimpe bua meme kuya mu diulu anyi muntu mubi bua kuya mu iferno. Tshivua anu mumanye bimpe tshidi tshienzeka mu mpurgatoriyo to. Tshitu muanji kubala bualu bua mushindu eu mu Bible to. Kadi mvua ngumvua anu bantu babiakula.”

Fernando udi wamba ne: “Bavua bandongeshe ne: bantu bonso badi bafua batu baya mu diulu, kadi kabivua anu bintuishe to. Mvua ngela meji ne: lufu ke ndekelu wa bionso, mmumue ne: kakuena ditekemena nansha dimue bua bafue to.”

Pamuapa ukadi mudiele nkonko eyi: ‘Ntshinyi tshitu tshienzeka mu bulelela padi muntu ufua? Bananga betu bakadi bafue batu bakenga muaba kampanda anyi? Netumonanganaku nabu kabidi anyi? Ntshinyi tshidi tshitujadikila bualu ebu?’ Suaku ukonkonone tshidi Bible ulongesha pa bualu ebu. Tuanji kukonkonona tshidi Bibile wamba bua lufu, pashishe netuakule bua ditekemena didi Dîyi dia Nzambi ditupesha.

 Bafue batu penyi?

TSHIDI BIBLE WAMBA: ‘Badi ne muoyo badi bamanye ne: netufue; kadi bafue kabena bamanye bualu bumue, kabena ne difutu diabo kabidi; kabena babavuluka. Malu onso audi wenza wenze ne bukole buebe buonso; bualu bua kakuena mudimu, kakuena kulongolola kua malu, kakuena lungenyi anyi meji ku Muaba wa Bafue kuudi uya.’ *Muambi 9:5, 10.

Muaba wa bafue udi umvuija mu mêyi makese muaba udi bantu baya padibu bafua; mmuaba wa mu tshimfuanyi udi muntu kayi wela meji anyi wenza mudimu. Mmunyi muvua Yobo muntu wa lulamatu umona muaba wa bafue? Uvua mujimije bintu biende bionso ne bana bende bonso mu dituku dimue, pashishe kupetaye disama dikole dia mabuba amujuka pa mubidi mujima. Wakasengelela Nzambi ne: “Unteke nansha mu muaba wa bafue [“mu iferno” bilondeshile nkudimuinu wa bena Katolike wa Douay], unsokokemu.” (Yobo 1:13-19; 2:7; 14:13, MMM) Bushuwa Yobo kavua wela meji ne: muaba wa bafue uvua iferno wa kapia, muaba uvua makenga ende mua kuvula kabidi bikole to. Kadi, uvua umona muaba eu bu muaba wa kuikishila.

Kudi mushindu mukuabu wa kumanya tshidi tshienzeka padi muntu ufua. Tudi mua kukonkonona mifundu mifudindisha ku nyuma wa Nzambi idi yakula bua bantu 8 bavuabu babishe ku lufu.—Bala malu adi mu kazubu ka ne: “Bible udi wakula bua dibishibua dia bantu muanda mukulu ku lufu.”

Mu bantu 8 aba, muntu nansha umue kavua muambe ne: uvua muye mu muaba wa masanka anyi wa makenga to. Bu bantu aba baye mu miaba ya nunku pavuabu bafue, kabavuaku mua kulondela bantu bakuabu malu avua enzekamu anyi? Kabavuaku mua kufunda malu aa mu Bible bua bantu bakuabu kuamanya anyi? Mu Bible ki mbalonde bualu nansha bumue bua mushindu eu to. Mu bulelela, bantu 8 abu kabavua balonde bualu nansha bumue bua kuvuabu baye to. Bua tshinyi? Bualu kabavua bamanye bualu nansha bumue to, bavua anu bu balale tulu tukole. Bushuwa Bible utu imue misangu utela tulu bua kumvuija mutu lufu. Tshilejilu, udi wamba ne: Davidi ne Stefano bantu ba lulamatu ‘bakalala tulu mu lufu.’—Bienzedi 7:60; 13:36.

Nunku nditekemena kayi didiku bua bafue? Nebajukaku ku tulu etu anyi?

^ tshik. 7 Mu Nkudimuinu wa bulongolodi bupiabupia, tshiambilu tshia ne: “Muaba wa bafue” ntshifumine ku muaku “Sheol” wa mu tshiena Ebelu ne “Hades” mu tshiena Greke. Mu imue nkudimuinu ya Bible badi bakulamu bua muaku “iferno,” kadi lungenyi lua muaba kampanda wa kapia udibu bakengeshila bafue ki ndua mu Bible to.