Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 7 2015

 TSHIENA-BUALU TSHINENE | MUA KUPITA NE TUNYINGANYINGA

Tunyinganyinga tua malu a makuta

Tunyinganyinga tua malu a makuta

Paul tatu wa bana babidi udi wamba ne: “Pakabanda mushinga wa bintu mu ditunga dietu, biakudia biakalua mushinga mukole ne kabiyi nansha bimueneka to. Tuvua tuela mulongo mêba a bungi, kadi misangu ya bungi biakudia bivua bijika tuetu katuyi banji kupeta to. Bantu bavua banyana bikole bua nzala, bakuabu bine bakuluka ne mu njila. Mushinga wa bintu bivua bantu nabi dijinga wakabanda kuya mu miliyo pashishe miliyare. Ndekelu wa bionso makuta kaatshivua kabidi ne mushinga to. Ngakajikija makuta anyi onso a mu banke, meme kujimija makuta amvua ntekesha ne a pansio.”

Paul

Paul uvua mumanye ne: bua dîku diende kupanduka, uvua ne bua kuikala ne ‘meji adi akuatshisha.’ (Nsumuinu 3:21) Udi umvuija ne: “Mvua mulongolodi wa nzembua, kadi mvua ngitaba bua kuenza mudimu wonso umvua mpeta nansha difutu diodi dikese. Bamue bavua bamfuta biakudi anyi bintu bivuabu balama mu nzubu. Bobu bamfute turton tua nsabanga tunayi, mvua mua kupana tubidi ne ndama tukuabu. Ndekelu wa bionso meme kupeta tuana tua nzolo 40. Pakakolatu, meme kutupana ne kusumba tukuabu 300. Pakapita matuku, ngakashintakaja nzolo 50 ku mifuku ibidi ya bukula bua nseke, mufuku umue uvua ne kilo 50. Bukula ebu buakangambuluisha bua kudisha bena mu dîku dianyi ne mêku makuabu munkatshi mua matuku a bungi.”

Paul uvua kabidi mumanye ne: bualu bua mushinga budi muntu ne bua kuenza nkueyemena Nzambi. Patudi tuenza malu adi Nzambi musue, udi utuambuluisha. Bua dikeba dia bintu bitudi nabi dijinga, Yezu wakamba ne: “Lekelayi kutamba kusamisha mutu, Tatu wenu mmumanye ne: Nudi dijinga ne bintu ebi.”Luka 12:29-31.

Diakabi, Satana muluishi munene wa Nzambi mmudinge bantu ba bungi, ubasaka bua kukeba anu bintu bia ku mubidi. Bantu badi batamba kuditatshisha bua majinga abu too ne adibu bafuikakaja mu mitu; badi kabidi bafuila anu bua kupeta bintu bidibu kabayi nansha nabi dijinga to. Ba bungi badi babuele mabanza, mbafike ku dimona ne: ‘Musombi wa bintu udi mupika wa mumusombeshi.’Nsumuinu 22:7.

 Bamue bantu badi bangata mapangadika mabi. Paul udi wamba ne: “Bena mutumba banyi ba bungi mbashiye mêku abu ne midimu ivuabu benza ne balunda babu bua kuya kukeba vi muimpe mu matungu makuabu. Bamue bavua baya kabayi ne mabeji adi abanyishila to; nunku kabavua ne mushindu wa kupeta mudimu to. Bakavua badimona benzejibue bua kunyema bampulushi ne bobu bine balala too ne mu njila. Kabavua bapesha Nzambi mpunga wa kubambuluisha to. Kadi tuetu tuvua badisuike bua kutantamena ntatu ya malu a makuta pamue mu dîku ne diambuluisha dia Nzambi.”

KUTUMIKILA MUBELU WA YEZU

Paul udi utungunuka wamba ne: “Yezu wakamba ne: ‘Kanuditatshishi bua dituku didi dilonda, bualu dituku adi nedikale ne yadi ntatu. Dituku ne dituku didi ne yadi ntatu idi midikumbanyine.’ Nunku, disambila dianyi dia dituku dionso divua anu dia ne: Nzambi ‘atupeshaku lelu tshiakudia tshia dituku edi’ bua tuikale ne muoyo. Wakatuambuluisha anu muvua Yezu muambe. Katuvua misangu yonso tupeta anu tshivua muoyo musue to. Umue musangu ngakela mulongo bua kusumba biakudia, kadi tshivua mumanye tshivuabu bapane to. Pakafika dîba dia meme kusomba, ngakamona bavua bapana mabele a yawu. Panyi tshitu munange yawu to. Kadi yeye ke tshiakudia tshitvuaku, nunku tuakamudia dilolo adi. Ndi ngela Nzambi tuasakidila bualu tshikondo atshi tshionso bena mu dîku dianyi kabavua balale ne nzala to.” *

Nzambi mmulaye ne: “Tshiakukushiya nansha kakese, tshiakukulekela nansha kakese.”Ebelu 13:5

“Bua mpindieu malu mmapepelaku. Kadi patuvua mu lutatu elu tuakamona ne: kueyemena Nzambi ke buanga buimpe mu tshikondo tshia ntatu. Yehowa * neatungunuke ne kutuambulusha tuetu tutungunuka anu ne kuenza disua diende. Tudi badimuene dikumbana dia mêyi adi mu Musambu wa 34:8 a ne: ‘Teta, ulabule, umvue ne: Yehowa udi muakane; disanka didi kudi muntu udi unyemena kudiye!’ Mpindieu katuena kabidi tutshina lutatu lua makuta nansha kakese.”

Nzambi udi wambuluisha bantu ba lulamanatu bua kupeta ‘tshiakudia tshiabu tshia ku dituku ne dituku’

“Mpindieu tudi tumvua bimpe ne: tshidi bantu natshi dijinga bua kushalabu ne muoyo ki mmudimu anyi makuta, kadi mbiakudia. Tudi bindile ne muoyo kuulu kuulu tshikondo tshiakumbana mêyi a Nzambi aa: ‘Biakudia nebivulangane pa buloba.’ Kadi mu dindila tshikondo atshi, ‘bituikala ne biakudia ne bia kuvuala, tusanke ne bintu ebi.’ Tudi tupetela bukole mu mêyi a mu Bible aa: ‘Nsombelu wenu kikadi wa dinanga dia makuta, kadi nusanke ne bintu binudi nabi. Bualu mmuambe ne: “Tshiakukushiya nansha kakese, tshiakukulekela nansha kakese.” Bua tuikale ne dikima dikole ne tuambe ne: “Yehowa mmuambuluishi wanyi; tshiakutshina nansha.”’” *

Bua ‘kuenda ne Nzambi’ bidi bikengela kuikala ne ditabuja dilelela anu bu Paul ne bena mu dîku diende. (Genese 6:9) Nansha tuetu ne ntatu ya malu a makuta lelu anyi balue kuyipeta mu matuku adi alua, tshilejilu tshia Paul tshia ditabuja ne tshia meji malelela tshidi tshitulongesha malu a bungi.

Kadi netuambe bishi pikala ntatu ya mu dîku itukebela tunyinganyinga?

^ tshik. 10 Yehowa ke dîna dia Nzambi bilondeshile Bible.