Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 7 2015

Mu bulelela tudiku mua kusankisha Nzambi anyi?

Mu bulelela tudiku mua kusankisha Nzambi anyi?

Pamuapa ukadi mubale miyuki ya bantu badi Bible wakula bimpe bua bualu buabu ne mudiambile ne: ‘Tshiena mua kuikala bu bobu to!’ Udi mua kudiambila ne: tshiena muntu wa muoyo mutoke, tshiena muakane ne tshiakukumbana bua kuenza misangu yonso malu mimpe.’

Yobo uvua “muntu wa mutshima mutoke ne wa malu makana.”Yobo 1:1

Bible udi wamba ne: Yobo uvua muntu wa “mutshima mutoke ne wa malu makane.” (Yobo 1:1) Udi ubikila Lota ne: “muntu muakane.” (2 Petelo 2:8) Udi wamba bua Davidi ne: uvua wenza “malu mimpe” ku mêsu kua Nzambi. (1 Bakelenge 14:8) Kadi, tuanji tukonkononayi bimpe nsombelu ya bantu aba. Netumone ne: 1) bavua benze bilema, 2) tshilejilu tshiabu tshidi mua kutulongesha malu a bungi ne 3) bantu bena mapanga badi mua kusankisha Nzambi.

BAVUA BENZE BILEMA

“[Nzambi] wakasungila Lota muntu muakane, uvua unyingalala bikole bua bikadilu bibi bia dikamakama bia bashipi ba mikenji.”2 Petelo 2:7

Yobo wakatuilangana ne malu makole a bungi pabi bimueneka ne: kavua muenze bualu. Lungenyi lubi luakamuluila, kuelaye meji ne: nansha bu yeye muleje ditabuja kudi Nzambi anyi kayi mudileje, Nzambi kavua anu umutabalela to. (Yobo 9:20-22) Yobo uvua mutuishibue ne: uvua muntu muakane, kusakabi bantu bakuabu bua kuela meji ne: uvua udileja muakane kupita Nzambi.Yobo 32:1, 2; 35:1, 2.

Lota wakelakana bua kuangata dipangadika divua dimueneka dimpe ne dipepele. Bivua bimubungamija  bikole pavuaye umona malu a buendende avua bantu ba mu Sodome ne Amola benza, bienzedi bia bantu abu bivua “bitondesha muoyo wende muakane.” (2 Petelo 2:8) Nzambi wakamanyisha ne: uvua musue kubutula bimenga bibi abi, kupeshaye Lota mpunga wa kupanduka yeye ne bena mu dîku diende. Udi mua kuela meji ne: bu muvuabi bimutonde uvua ne bua kuikala muntu wakumpala ku dinyema mu musoko au. Kadi mu tshikondo tshikole atshi Lota wakajingakana. Banjelu bavua Nzambi mutume bua kumupatula yeye ne dîku diende, ke bakamukuata ku tshianza bua kubapatula mu musoko yeye ne dîku diende.Genese 19:15, 16.

Davidi ‘wakalonda [Nzambi] ne mutshima wende wonso, wakenza malu akadi mimpe ku mêsu kuende.’1 Bakelenge 14:8

Musangu mukuabu Davidi wakaleja muvuaye kayi ne kudikanda, kuendaye masandi ne mukaji wa bende. Pakasuaye kusokoka bualu abu, wakenza kabidi bibi bitambe: kushipeshaye bayende wa mukaji au. (2 Samuele nshapita wa 11) Bible udi wamba ne: bualu buvua Davidi muenze “kabuakasankisha mutshima wa Yehowa.”2 Samuele 11:27.

Yobo, Lota ne Davidi, buonso buabu bavua benze bilema, bikuabu bine bivua bibi bitambe. Kadi anu mutuabimona, bavua basue kuenzela Nzambi mudimu ne kumutumikila ne muoyo mujima. Bavua baleja ne muoyo umue ne: bavua banyingalala ne bavua basue kushintulula mushindu wabu wa kuenza malu pavuabi bikengela. Nunku, Nzambi uvua ubanyisha, ke bualu kayi Bible udi ubabikila ne: bantu ba lulamatu.

MALONGESHA ATUDI TUPETA

Bu mutudi bena mapanga, katuena mua kupanga kuenza bilema to. (Lomo 3:23) Kadi patudi tubienza, tudi ne bua kuleja ne: tudi tunyingalala ne tudienzeja bua kuakaja malu adi akengela.

Mmunyi muvua Yobo, Lota ne Davidi badienzeje bua kulekela bilema biabu? Munda muende, Yobo uvua muntu wa  muoyo mutoke. Pakamueleshisha Nzambi meji, Yobo wakakajilula ngelelu wende wa meji ne kunyingalalaye bua malu avuaye muakule. (Yobo 42:6) Mushindu uvua Lota umona malu mabi a bena mu Sodome ne Amola uvua umvuangana ne mikenji ya Nzambi. Anu dijanguluka diende adi ke divua ne bualu. Ndekelu wa bionso wakanyema mu misoko ayi kupandukaye ku dilumbuluisha dia Nzambi. Wakatumikila dîyi dia Nzambi dia kubenga kutangila bintu bivuaye mushiye panyima. Nansha muvua Davidi muenze tshilema tshinene pavuaye mushipe mukenji wa Nzambi, wakaleja tshivua munda muende menemene pakanyingalalaye ne muoyo mujima, kulombaye Nzambi luse.Musambu wa 51.

Mushindu muimpe uvua Nzambi umona bantu aba udi umvuangana ne malu atuye ulomba ne nkatshinkatshi bua bantu bena mapanga benze. Nzambi ‘mmumanye buntu buetu, udi uvuluka ne: tudi dimfuenkenya.’ (Musambu 103:14) Nunku, bu mudi Nzambi mumanye ne: katuena mua kuepuka dienza dia bilema, ntshinyi tshidiye utulomba bua kuenza?

Nzambi ‘mmumanye buntu buetu, udi uvuluka ne: tudi dimfuenkenya.’Musambu 103:14

MMUNYI MUDI BANTU BENA MAPANGA MUA KUSANKISHA NZAMBI?

Mubelu uvua Davidi mupeshe muanende Solomo udi utuleja tshitudi mua kuenza bua kusankisha Nzambi. Wakamuambila ne: ‘Wewe, muananyi Solomo, umanye Nzambi wa tatuebe, umukuatshile mudimu ne mutshima mutoke.’ (1 Kulondolola 28:9) Mutshima mutoke ntshinyi? Mmuoyo udi munange Nzambi ne musue kumanya disua diende ne kuditumikila. Ki mmuyo mupuangane to, kadi ngudi musue kuenzela Nzambi mudimu ne ditumikila dionso ne musue kuitaba mibelu. Dinanga dia Nzambi ne dijinga dia kumutumikila biakavuija Yobo muntu wa ‘mutshima mutoke,’ Lota “muntu muakane” ne Davidi muntu uvua ‘wenza malu makane’ ku mêsu kua Nzambi. Nansha muvuabu benze bilema, bavua anu bafike ku disankisha Nzambi.

Mutshima mutoke udi utusaka bua kuenza disua dia Nzambi basakibue kudi dinanga ne dijinga dia kumuenzela mudimu ne ditumikila dionso

Nunku, bikalaku meji kampanda mabi atudi basue bua kaatuvuidi kabidi mu mutu, bituikale bambe bualu budi butuenze bundu anyi benze malu kampanda atudi balue kumona pashishe ne mmabi, malu atudi tufuma ku dikonkonona aa atupeteshe muoyo mukole. Nzambi mmumanye ne: katuena mua kulua bapuangane matuku etu aa to. Kadi udi utulomba bua kumunanga ne kuenza muetu muonso bua kumutumikila. Tuetu benze nunku ne muoyo mujima, netutuishibue ne: tuetu petu tudi mua kusankisha Nzambi.

Manya malu makuabu

Bible utu ulongesha tshinyi menemene?

Tuikalayi ne nsombelu udi usankisha Nzambi