Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 7 2015

 TSHIENA-BUALU TSHINENE | MUA KUPITA NE TUNYINGANYINGA

Tunyinganyinga bua njiwu

Tunyinganyinga bua njiwu

Alona udi wamba ne: “Pantu ngumvua mpungi udila, tshia pa muoyo tshitu tshituadija kuntuta lukasa lukasa ne ntu nya lubilu bua kusokoma. Kadi, nansha nanku ntu anu ne buôwa. Ntu ngumvua bibi bitambe pantu pambelu, tshiyi ne muaba wa kusokomena. Dimue dituku, pamvua ngenda nya mu njila, ngakatuadija kudila, tshiyi mua kupuyakana to. Ngakenza mêba a bungi bua meme kudituije. Pashishe mpungi kutuadijaye kudila kabidi.”

Alona

Mvita mbumue bua ku malu a bungi atu akebesha njiwu. Tshilejilu, wewe mumvue ne: wewe anyi muntu uudi munange udi ne disama dia lufu, bidi mua kukusama ku muoyo bikole. Bakuabu badi ne buôwa bua matuku atshilualua. Badi badiebeja ne: ‘Bana betu anyi bankana betu nebikale mua kukolela mu mvita, tshinyangu, dinyanga dia kapepa, dishintuluka dia mivu ne bipupu bia masama anyi?’ Mmunyi mutudi mua kupita ne ntatu ya nunku?

Bu mudiye mumanye ne: malu mabi atu afikila bantu, “muntu mudimuke udi utangila dikenga diamba kumukuata, udi usokoma.” (Nsumuinu 27:12) Anu mutudi basue kukuba mubidi wetu, ke mutudi ne bua kutabalela mushindu utudi tuela meji ne utudi tudiumvua. Kutangila malu a tshikisu, nansha ngumu idi miuwule tente ne bimfuanyi bibi menemene bidi bivudija tunyinganyinga tuetu ne tua bana betu. Kubenga kutangila bimfuanyi ebi kakuena kumvuija ne: katuena bamanye ne: bidiku nansha. Nzambi kavua mufuke ngenyi yetu bua ikale mituma ku malu mabi  to. Kadi, tudi ne bua kuyuwuja ne “malu onso adi malelela, makane, makezuke, a kunanga.” Tuetu benze nunku, “Nzambi wa ditalala” neatupeshe ditalala dia mu lungenyi ne dia mu muoyo.Filipoyi 4:8, 9.

MUSHINGA UDI NAWU DISAMBILA

Ditabuja dilelela didi dituambuluisha bua kutantamena ntatu. Bible udi utukankamija bua ‘tuikale badimuke bua kudifila mu masambila.’ (1 Petelo 4:7) Tulombe Nzambi bua atuambuluishe ne meji ne dikima bua kutantamena ntatu yetu, bashindike ne: “udi utumvuila bua tshintu tshionso tshitudi tulomba.”1 Yone 5:15.

Ne bayende Avi

Bible udi umvuija ne: Satana ke “mukokeshi wa buloba ebu,” ki nNzambi to, kabidi ne: “ba pa buloba bonso badi ku bukokeshi bua mubi.” (Yone 12:31; 1 Yone 5:19) Nunku Yezu wakaleja ne: Satana udiku bulelela ne kabidi Yehowa utu usungila bantu bushuwa. (Matayi 6:13) Alona udi wamba ne: “Misangu yonso itu mpungi utuadija kudila, ntu ndomba Yehowa bua angambuluishe bua kumbusha buôwa. Bayanyi utu kabidi umbikila bua tusambile nende. Disambila ditu dingambuluisha bikole.” Anu mudi Bible wamba: ‘Yehowa udi pabuipi ne bonso badi bamubikila, kudi bonso badi bamubikila mu bushuwa.’Musambu 145:18.

DITEKEMENA DITUDI NADI BUA MATUKU ATSHILUALUA

Mu muyuki wende wa pa mukuna, Yezu wakalongesha bayidi bende bua kusambila ne: “Bukalenge buebe bulue.” (Matayi 6:10) Bukalenge bua Nzambi nebumbushe tunyinganyinga tuonso tudi tuenzela bantu bibi bua kashidi. Nzambi ‘nealekeshe mvita bua ijike too ne ku nfudilu kua buloba’ ku diambuluisha dia Yezu ‘Mukalenge wa ditalala.’ (Yeshaya 9:6; Musambu 46:9) ‘Yeye [Nzambi] nealumbulule bilumbu bia munkatshi mua bantu ba bungi. Tshisamba tshikuabu tshia bantu katshiena tshibisha muele wa mvita bua kuluisha nawu tshinga tshisamba; kabena mua kuyila lungenyi lua kuluangana nalu mvita kabidi. Kakuena muntu wabakuatshisha buowa.’ (Mika 4:3, 4) Bena mu mêku nebikale ne disanka, ‘Nebase nzubu, nebashikamemu; nebatentule mionji ya tumuma tua nvinyo mu madimi, nebadie tumuma tuayi.’ (Yeshaya 65:21) ‘Muena musoko kena wamba ne: Ndi ne disama.’”Yeshaya 33:24.

Nansha mudi bantu bababidila malu, kabena anu mua kupangisha “bikondo bidi malu abatulukila” mu mpukapuka bua kufikabi anyi kuepuka bua kudisangana muaba mubi mu tshikondo tshibi. (Muambi 9:11) Mvita, tshikisu ne masama mbitungunuke ne kushipa bantu bimpe anu bu mudibi bienzeka kukadi nkama ya bidimu. Bantu badi kabayi bualu aba badi ne ditekemena kayi?

Bantu miliyo kayiyi kubala badi anu Nzambi nkayende mumanye nebapetulule muoyo, bualu mpindieu mbalale tulu balamibue mu meji mapuangane a Nzambi too ne dîba ‘diapatuka bantu bonso badi mu nkita.’ (Yone 5:28, 29) Bible udi utujadikila bua dibishibua ku lufu wamba ne: “Tudi ne ditekemena edi bu luongo lua muoyo, dikole, dishindame.” (Ebelu 6:19) Nzambi “mmupeshe bantu bonso tshijadiki bualu mmubishe [Yezu] ku lufu.”Bienzedi 17:31.

Matuku etu aa, nansha bantu badi benza ne muabu muonso bua kusankisha Nzambi nebatuilangane anu ne ntatu. Bu mudi Paul, Janet ne Alona benza malu adi akengela kuenza, basemena pabuipi ne Nzambi mu disambila ne bakolesha ditabuja diabu mu ditekemena didi Bible ufila bua matuku atshilualua, badi batantamena tunyinganyinga tuabu bimpe. “Nzambi udi ufila ditekemena anuwuje tente ne disanka ne ditalala dionso bualu nudi numueyemena,” anu mudiye muenzele Paul, Janet ne Alona.Lomo 15:13.