Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 6 2015

Muluishi wa Kristo nnganyi?

Muluishi wa Kristo nnganyi?

Mbapatule filme mukuabu wenza buôwa matuku mashale aa bamubikila ne: Muluishi wa Kristo (Antichrist).

Bimbi ba misambu kampanda bamanyike bikole, mbafunde pa umue wa ku bande yabu ne: Muluishi wa Kristo (Antichrist).

Friedrich Nietzsche, muena nkindi kampanda wa mu bidimu bia 1800 wakinyika umue wa ku mikanda yende ne: Muluishi wa Kristo (Antichrist).

Bamfumu ne ba amperere ba mu bikondo bia kale bavua babikila bena lukuna babu ne: Baluishi ba Kristo (Antichrists).

Martin Luther, muena malu a dishintuluka wa mu Allemagne wakinyika ba papa bena katolike ba mu lomo ne: Baluishi ba Kristo (Antichrists).

BU MUDIBU batele tshiambilu “muluishi wa Kristo” kudi bamfumu too ne kudi filme, tudi mua kudiebeja ne: Muluishi wa Kristo nnganyi? Tshiambilu etshi tshidiku tshitutangila petu lelu eu anyi? Bushuwa, mu Bible ke mutudi mua kutuadijila kukeba bua kumanya tshidi muluishi wa Kristo, bualu mbatelamu dîna edi misangu itanu.

BADI BATANDULA MULUISHI WA KRISTO

Mu Bible mujima anu mupostolo Yone ke udi mutele tshiambilu “muluishi wa Kristo.” Udi umvuija ne: muluishi wa Kristo eu nnganyi? Tangila mêyi adi mu mukanda wende wa kumpala aa: “Bana banyi, edi ke dîba dia ndekelu, anu munuvua bumvue ne: muluishi wa Kristo udi ulua, ne mpindieu baluishi ba Kristo ba bungi mbamueneke; bua bualu ebu tudi bamanye ne: ndîba dia ndekelu. Bavua bumbuke kutudi, kadi kabavua ba kutudi. Nnganyi udi muena dishima? Ki mmuntu udi uvila ne: Yezu kena Kristo anyi? Yeye mmuluishi wa Kristo, muntu udi uvila Tatu ne Muana.”1 Yone 2:18, 19, 22.

Mupostolo Yone wakajingulula ne: muluishi wa Kristo, mmuntu yonso udi wamba malu a dishima bua Yezu Kristo ne bua malu avuaye mulongeshe

Tudi tupeta dilongesha kayi mu mêyi aa? Yone udi utela “baluishi ba Kristo ba bungi,” uleja ne: muluishi wa Kristo ki mmuntu umue to, kadi mbantu mu tshibungi. Malongolodi a bana ba bantu anyi bantu badi benza muluishi wa Kristo badi batangalaja mashimi, bavila ne: Yezu ki nKristo anyi masiya to, badi bateta kabidi bua kukonyangaja mudi malanda adi pankatshi pa Nzambi ne Muanende Yezu Kristo. Bantu badi benza muluishi wa Kristo badi badiamba mudibu Kristo peshi baleji mpala bende, kadi pabu katshia “bumbuka kutudi,” bavua bakonyangaje malongesha malelela a mu Bible. Kabidi, bantu aba bavuaku mu tshikondo tshivua Yone ufunda mukanda wende eu, mu “dîba dia ndekelu,” pamuapa ku ndekelu kua tshikondo tshia bapostolo.

Ntshinyi tshikuabu tshivua Yone mufunde bua muluishi wa Kristo? Yone wakadimuija bua baprofete ba dishima wamba ne: “Dîyi dionso diamba ku bukole bua nyuma didi ditaba ne: Yezu Kristo uvua mulue mu mubidi, didi difumina kudi Nzambi. Kadi dîyi dionso diamba ku bukole bua nyuma didi kadiyi ditaba Yezu, ki ndifume kudi Nzambi to. Kabidi, edi ndîyi diamba ku bukole bua nyuma dia kudi muluishi wa Kristo, dinuvua bumvue bualu buadi ne: didi dilua ne mpindieu dikadi pa buloba.” (1 Yone 4:2, 3) Pashishe Yone wakambulula bualu ebu mu mukanda wende muibidi wamba ne: “Bena mashimi ba bungi mbapatuke pa buloba, bantu badi kabayi bitabuja mudi Yezu Kristo mulue mu mubidi. Eu ke muena dishima ne muluishi wa Kristo.” (2 Yone 7) Bushuwa, Yone wakajingulula ne: muluishi wa Kristo, mmuntu yonso udi wamba malu a dishima bua Yezu Kristo ne bua malu avuaye mulongeshe.

“BAPROFETE BA DISHIMA” NE “MUSHIPI WA MIKENJI”

Yezu wakadimuija ne: baprofete ba dishima bavua ne bua kulua ‘bu mbua ya ditu idi ne lumpukusu mivuale biseba bia mikoko’

Bidimu bia bungi kumpala kua Yone kufundaye bua mashimi aa, Yezu Kristo ukavua mudimuije bayidi  bende ne: “Nudimukile baprofete ba dishima badi balua kunudi bu mikoko, kadi munda bikale mbua ya ditu idi ne lumpukusu.” (Matayi 7:15) Mupostolo Paulo wakadimuija pende bena Kristo ba mu Tesalonike ne: “Muntu nansha umue kanusesuishi mu mushindu nansha umue, bualu dituku adi kadiakulua ditontolola kadiyi dianji kulua, ne kabayi banji kuela mushipi wa mikenji patoke, muana wa dibutuka mene.”2 Tesalonike 2:3.

Nunku, mu bidimu lukama bia kumpala baprofete ba dishima ne batontolodi bakavuaku, benza ne muabu muonso bua kutekesha tshisumbu tshia bena Kristo. Bonso bavua bamuangalaja mashimi bua Yezu ne bua malongesha ende ke bavua Yone mubikile ne: “muluishi wa Kristo.” Paulo udi uleja mudi Yehowa ubamone padiye ubabikila ne: “muana wa dibutuka mene.”

DIMUKILA MIDIMU YA MULUISHI WA KRISTO LELU

Netuambe tshinyi bua matuku etu aa? Malongolodi a bana ba bantu ne bantu badi benza muluishi wa Kristo badi babenga Kristo ne malongesha ende. Badi bayisha malu adibu bamanye bimpe ne: nga dishima, anu bua kupangisha bantu bua kumanya Tatu, Yehowa Nzambi ne Muanende Yezu Kristo. Ke bualu kayi tudi ne bua kudimukila mashimi a nunku. Tuangatayi bilejilu bibidi.

Kukadi bidimu bia bungi bidi bitendelelu bitangalaje dilongesha dia busatu bunsantu didi diamba ne Tatu ne Muana mmuntu umue. Muluishi wa Kristo udi ubuejakaja ne usokoka bumuntu bulelela bua Yehowa Nzambi ne bua Yezu Kristo. Tshibuejakaji etshi tshidi tshipangisha bantu ba muoyo muimpe bua kuidikija Yezu Kristo ne kusemena pabuipi ne Nzambi bu mudi Bible ubalomba bua kuenza.1 Kolinto 11:1; Yakobo 4:8.

Bitendelelu bidi kabidi bifila tshibuejakaji padibi biumusha dîna dia Nzambi, Yehowa, mu nkudimuinu ya Bible idibi bipatula. Bidi bienza nunku nansha mudi dîna Yehowa dikale misangu mitue ku 7000 mu mifundu ya Bible ya ku ntuadijilu. Bualu ebu mbufikishe ku tshinyi? Kudi tshibuejakaji tshia bungi pa bidi bitangila bumuntu bua Nzambi mulelela.

Pabi kumanya dîna dia Nzambi, Yehowa, nkuambuluishe batendeledi ba muoyo muimpe ba bungi bua kusemena pabuipi ne Nzambi. Ebu mbualu buvua Richard mumone, udi uvuluka muvuaye muyukile ne Bantemu ba Yehowa babidi. Richard udi wamba ne: “Bakandeja mu Bible ne: Yehowa ndîna dia Nzambi mulelela. Mvua ne disanka dia bungi dia kumanya ne: Nzambi udi ne dîna, bualu buntu katshia tshiyi muanji kumvua.” Pakamanyaye bualu ebu, wakashintulula nsombelu wende bua kuenza malu adi umvuangana ne mikenji ya mu Bible ne kusankisha Yehowa. Richard udi wamba kabidi ne: “Kulonga tshidi dîna dia Nzambi diumvuija nkungambuluishe bua kukolesha malanda anyi nende.”

Muluishi wa Kristo mmubueje miliyo ya bantu mu mîdima ya mu nyuma kukadi nkama ne nkama ya bidimu. Kadi patudi tulonga Bible dîyi dia Nzambi, tudi tumanya bumuntu bulelela bua muluishi wa Kristo eu ne tudi tumbuka ku mashimi ne ditekeshibua mu mikolo bia bitendelelu bia muluishi wa Kristo eu.Yone 17:17.

Manya malu makuabu

MIKANDA & BROSHIRE

Buloba ebu budi mu bianza bia nganyi menemene?

Tshidi Bible wamba tshidi mua kukukemesha. Manya bua bidi ne mushinga ne tshidi bualu ebu bumvuija bua matuku atshilualua.