Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 6 2015

 MALU A MU NSOMBELU

Bumpianyi bupeta too ne kudi bana ba tshipungu tshia muanda mutekete

Bumpianyi bupeta too ne kudi bana ba tshipungu tshia muanda mutekete

Bantu badi bamba ne: ndi mufuane tatuanyi bikole. Mushindu undi, mudi mêsu anyi ne mushindu undi ngelesha bantu bilele, ndi anu bu yeye. Kadi mmunshile kabidi tshintu tshikuabu: muyuki wa mudi bena mu dîku dietu benzele Yehowa mudimu katshia ku kale. Ndi musue kunulondelawu.

Tudi tulonga ne tatu malu a bumpianyi bua mu dîku dietu

Nkambua wanyi Thomas 1) * Williams uvua muledibue mu dia 20/1/1815, mu tshimenga tshia Horncastle mu Angleterre. Mamuende wakafua bidimu bibidi pashishe, ke tatuabu John Williams kubakoleshaye yeye ne bana babu basatu. John wakalongesha Thomas mudimu wa mabaya, kadi Thomas yeye uvua munange mudimu mukuabu.

Pinapu malu a ntendelelu kusakukawu mu Angleterre. Mpasata John Wesley wakapatuka mu ekeleziya wa mu Angleterre, kuenzaye tshitendelelu tshia ba-Metodiste, tshivua tshikankamija didilongela dia Bible ne mudimu wa kuyisha. Malongesha a Wesley akatangalaka ne lukasa, ke bena mu dîku dia Williams kuitabujabu. Thomas wakalua muyishi muena Wesley, kudifilaye diakamue ku budisuile bua kuya bu missionere ku sud kua Mbuu wa Pacifique. Mu ngondo wa 7 wa 1840, yeye ne mukajende mupiamupia Mary, 2) bakaya ku tshidiila * tshia Lakeba, mu Fidji, tshidiila tshia mikuna ya kapia, muaba wakaluabu kusombela kudi bantu batu badiangana.

KUSOMBA NE BADIANGANYI

Munkatshi mua bidimu bia ku ntuadijilu, Thomas ne Mary bakatuilangana ne ntatu mikole. Bavua benza mudimu mukole mêba a bungi anu ne bianza biabu mu munya mukole. Bavua kabidi bapetangane ne malu adi enza buôwa bua bungi bu mudi: mvita ya bukua bisamba, dishipa dia bakaji bakamba, dishipa dia bana batekete ne didia dia bantu; ne bantu ba tshitupa atshi bavua babenga malu avuabu babayisha. Mary ne John muanende wa kumpala, bakasama bamba kuafua. Mu 1843, Thomas wakamfunda wamba ne: “Muoyo wakannema bujitu munda muanyi. Meji akavua manshikile, tshiyi ne tshikuabu tshia kuenza.” Kadi yeye ne Mary bakantatamena lutatu alu, kupetelabu bukole mu ditabuja divuabu nadi kudi Yehowa Nzambi.

Mu tshikondo atshi, Thomas wakenza mudimu muimpe ne dimanya diende dia mudimu wa mabaya. Yeye ke muntu wa kumpala wakasa nzubu mu Fidji mufuanangane ne ivuabu basa mu mputu. Nzubu eu uvua ne tshiamu tshia kuela natshi lupepele tshiasa mulu, uvua kabidi ne bintu bikuabu bivua bikoke ntema ya bena mu Fidji. Kumpala kua nzubu eu kujika, Mary wakalela Thomas Whitton 3) Williams, muanende muibidi. Yeye au ke kakuanyi menemene.

Mu 1843, Thomas mukulumpe wakakudimuna evanjeliyo wa Yone mu tshiena Fiji, mudimu uvuaye muenze mu lutatu lua bungi. * Kadi, uvua ne tshipedi tshia kulonga malu a mu nsombelu wa bantu ne kuamanya anu mudiwu. Uvua mulonde bimpe menemene malu avuaye mukebulule mu mukanda wende udi ne  tshiena-bualu tshia ne: Fidji ne benamu (1858), mukanda uvua mumanyike bikole mu Fidji mu bidimu bia 1800.

Ndekelu wa bionso, Thomas wakatshioka bikole bua mudimu mukole uvuaye muenze mu Fidji munkatshi mua bidimu 13, ke yeye ne dîku diende kuyabu mu Australie. Panyima pa Thomas mumane kuenza mudimu wa bungi wa bupastere uvua mumanyike bikole eu, wakafuila mu Ballarat, mu Victoria, mu 1891.

OR KU OUEST

Mu 1883, Thomas Whitton Williams ne mukajende Phoebe 4) bakaya ne dîku diabu ku Perth, ku Ouest kua Australie. Muanabu muibidi Arthur Bakewell 5) Williams,muakunyi wa kaku uvua mumulonde, utshivua ne bidimu tshitema musangu au.

Pavua Arthur ne bidimu 22, wakapeta bubanji ku Kalgoorlie, katshimenga kavuabu bumbuila or kavua ku Est kua Perth mu mutantshi wa kilometre mitue ku 600. Muaba eu ke wakabadilaye imue mikanda ivuabu bapatule kudi Balongi ba Bible ba pa buloba bujima bakaluabu kubikila ne: Bantemu ba Yehowa. Wakafila makuta bua bikale bamutuadila Tshibumba tshia Nsentedi tshia Siyona misangu yonso. Bu muvua malu mapiamapia avua Arthur mupete mu dibala aa mamusankishe bikole, wakatuadija kuambila bantu bakuabu ne kutuadijaye kuenza bisangilu bua kulonga Bible. Malu makese aa ke akenza ntuadijilu wa mudimu wa Bantemu ba Yehowa ba matuku etu aa ku Ouest kua Australie.

Arthur wakambila kabidi bena mu dîku diabu malu avuaye ulonga. Tatuende Thomas Whitton uvua musue bulunda buvua Arthur mudie ne Balongi ba Bible, kadi wakafua matuku makese pashishe. Mamuende Phoebe ne bana babu ba bakaji Violet ne Mary bakalua pabu Balongi ba Bible. Violet wakatuadija kuenza mudimu wa kuyisha bikole udibu babikila ne: mudimu wa bumpanda-njila. Arthur wakamba ne: “Bua ku Ouest kua Australie mujima, Violet ke uvua mpanda-njila muimpe ne wa tshisumi uvua wenza mudimu ne muoyo mujima.” Arthur uvua pamuapa utamba kuanyisha Violet kupita bakuabu, kadi tshisumi tshivua natshi Violet tshiakambuluisha bena mu dîku dia Williams bakuabu bakalonda bikole.

Pakapita matuku, Arthur wakasela, kuyaye kusombela mu Donnybrook, tshimenga tshia ku Sud-ouest kua Australie wa ku Ouest tshivua tshienda tshilubuluka. Kuntu aku bakamutua dîna ne: “Mukulumpe 1914,” bualu uvua umanyisha milayi ya mu Bible ivua yakula bua tshidimu atshi ne tshisumi. * Bantu bakalekela kumubikila nanku pakatuadija Mvita ya kumpala ya buloba bujima. Arthur uvua ne tshibidilu tshia kuyisha bantu bavua balua kusumba bintu mu makazen ende muaba uvuaye uteka mikanda ya malu a mu Bible mu lumuenu. Lumuenu elu luvua kabidi ne tshimanyinu tshivua tshileja bungi bua makuta avua muntu mua kupeta bu yeye mua kumvuija dilongesha dia busatu bunsantu, dilongesha didi kadiyi dia mu Bible divua Arthur ubenga ne muoyo mujima. Muntu nansha umue kakapeta makuta aa to.

Nzubu wa Williams ke muaba uvuabu benzela Dilonga dia mukanda ne bisangilu bia tshisumbu tshia mu Donnybrook. Panyima pa matuku, Arthur wakibaka Nzubu wa Bukalenge, muaba wa bisangilu, umue wa ku nzubu ya kumpala ya mu tshimenga, mu Australie wa ku Ouest. Pakakumbajaye bidimu 70, ukavua uvuala  nkotshi ne kalavanda, uteka tshiseba pa kabalu kende kavuaye muinyike ne: Doll, uya kuyisha kule mu tshitupa tshinene tshia distrike dia Donnybrook.

Ngikadilu ya Arthur ivua ilenga bana bende ku muoyo bikole. Uvua muntu wa ditalala, muena malu malenga ne uvua ne tshisumi tshia bungi. Muanende wa bakaji Florence 6) wakenza mudimu wa bumisionere mu Inde. Arthur Lindsay 7) ne Thomas bana bende ba balume, bakashala bakulu munkatshi mua bidimu bia bungi anu bu tatuabu.

BIMUMA BIA POME MISHÊME

Arthur Lindsay Williams kakuende wa tatu uvua mumanyike bikole ne bantu bavua bamunange bua malu ende mimpe. Uvua misangu yonso ne dîba dia kuyukila ne bantu ne uvua ubanemeka. Uvua kabidi tshilobo mu dienza mudimu ne kasuyi, wakapatuka wa kumpala mu dikosa dia mitshi misangu 18 munkatshi mua bidimu 12.

Kadi kabivua bikemeshe Arthur pavua muanende wa bidimu 2 Ronald 8) (kakuanyi), mukose kamutshi ka pome kavua pabupi ne kumbelu ne kasuyi. Mamuende wa Ronald wakasuika kamutshi aku ne lelu eu kadi kakuama pome mishême bikole. Mushindu mupiamupia wa mutshi wa pome uvuabu babikila ne: Lady Williams eu ke udi mupatule pome mikunze itubu babikila ne: Cripps Pink. Pome eyi ke idi mitambe kumanyika lelu.

Pashishe Ronald, umvua meme mbikila ne: Gramp wakatuadija kuenza mudimu kampanda uvua ne mushinga wa bungi. Yeye ne kaku muntu mukaji bakenza mudimu wa dibaka dia Nzubu ya Bukalenge ya Bantemu bu badisuile mu Australie ne mu bidiila bia Salomon. Lelu eu Gramp udi ne bidimu bitue ku 80, utshidi anu mukulu mu tshisumbu ne udi wambuluisha mu midimu ya diakajilula Nzubu ya Bukalenge ku Ouest kua Australie.

NDI NNEMEKA BUMPIANYI BUANYI

Bua kulama bumpianyi bua dîku dietu, tatuanyi Geoffrey 9) ne mamuanyi Janice 10) Williams, bakenza mudimu wa bungi bua kungambuluisha meme 11) ne muanetu wa bakaji Katharine 12) bua kuangata mikenji ya buena Kristo ne mushinga mu dikola dietu. Pamvua ne bidimu 13, ngakakolesha malanda anyi ne Yehowa. Pangakabuela mu tshisangilu tshinene tshia Bantemu ba Yehowa, ngakumvua muvua John Barr, muena mu Kasumbu kaludiki ka Bantemu ba Yehowa ukankamija bansonga wamba ne: “Kanunyakaji bintu bilenga binudi nabi to, mmumue ne: diakalenga ditudi nadi dia kumanya Yehowa ne kumunanga.” Dilolo adi, ngakadilambula kudi Yehowa. Bidimu bibidi pashishe, meme kutuadija mudimu wa bumpanda-njila.

Lelu eu, ndi munange kuyisha bikole ne mukajanyi, Chloe, mu Tom Price, tshimenga tshia kule tshivua ne bubanji bua muinshi mua buloba ku Nord-Ouest kua Australie wa ku Ouest. Tudi tuenza mudimu wa mêba makese bua kudiambuluisha. Baledi banyi, muanetu wa bakaji Katharine ne bayende Andrew mbampanda-njila ku Nord kua Port Hedland, ntanta wa kilometre mitue ku 420. Meme ne tatu tudi petu bakulu mu tshisumbu.

Nkambua wanyi Thomas Williams wakangata dipangadika dikole dia kuenzela Yehowa Nzambi mudimu kukadi mpindieu bipungu 7 bia bantu. Bumpianyi bua ditabuja ebu ne mudimu wa kuyisha biakansambulukila panyi. Ndi bushuwa ndiumvua mubeneshibue bua kuikala ne bumpianyi bua mu nyuma ebu.

^ tshik. 5 Nomba idi ipetangana ne bantu badi mu foto idi ilonda eyi.

^ tshik. 6 Bavua babikila tshidiila etshi ne: Lakemba. Tshidi ku Lau Group udi ku Est kua Fidji.

^ tshik. 10 Misionere John Hunt wakakudimuna tshitupa tshinene tshia mikanda ya mu Dipungila dipiadipia divuabu bapatule mu 1847 mu tshiena Fiji. Nkudimuinu eu uvua ne mushinga wa bungi bualu uvua utela dîna dia Nzambi, “Jiova” mu Mâko 12:36, Luka 20:42, ne mu Bienzedi 2:34.

^ tshik. 16 Tangila tshisakidila tshidi ne mutu wa bualu ne: “1914 ntshidimu tshinene tshia mu milayi ya mu Bible,” mu mukanda wa Bible utu ulongesha tshinyi menemene? mupatula kudi Bantemu ba Yehowa, udi mua kuupetela kabidi ku Enternete mu adrese wa www.jw.org.

Manya malu makuabu

LUMU LUIMPE LUA KUDI NZAMBI!

Mêyi manene a mu Bible adi atuambuluisha mushindu kayi?

Yezu wakumvuija bua tshinyi mbimpe batulombole, mêyi manene abidi a mu Bible adi mapite makuabu.

MIKANDA & BROSHIRE

Nuidikije ditabuja diabu

Mmunyi mudi kulonga malu a bantu balume ne bakaji ba lulamatu badi Bible mutele mua kutuambuluisha?