Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 5 2015

 TSHIENA-BUALU TSHINENE

Nshikidilu ukadi pabuipi anyi?

Nshikidilu ukadi pabuipi anyi?

Nzambi nealekele bantu batungunuka ne kumuenena bakuabu ne kunyangakaja nsombelu wa bantu mu matuku adi alua kumpala eku anyi? Tòo, anu mutukadi bamone, Nzambi neangate malu mu bianza ne neajikije makenga ne ntatu bidi bikuate bantu mu nkama ne nkama ya bidimu. Mufuki wa bantu ne buloba mmusue bua umanye ne: tshikondo tshidiye mulongolole bua kuenza nunku tshikadi pabuipi. Mmunyi mudiye utumvuija bualu bua mushinga ebu?

Tuangatayibi tshilejilu etshi: Wewe musue kuenza luendu lule ne mashinyi, udi ne bua kuanji kukeba adrese ku Enternete, mu tuarte nansha mu mikanda. Nunku paudi umona bimanyinu ne bintu bidi bipetangana ne malu auvua mubale, bidi bikujadikila ne: ukadi pabuipi ne kuudi uya. Bia muomumue, Nzambi mmutupeshe Dîyi diende didi dituambila malu avua ne bua kumueneka mu nsombelu wa bantu pa buloba. Patudi tumona bimanyinu bia malu aa bienda bikumbana, tudi tutuishibua ne: tukadi mu tshikondo tshia ku nshikidilu.

Bible udi uleja ne: mu malu a bukua bantu muvua ne bua kufika tshikondo tshia pabuatshi tshivua ne bua kufikisha too ne ku nshikidilu. Mu tshikondo etshi, malu avua ne bua kuenzeka pa buloba bujima mutubi kabiyi bianji kuenzeka. Tumonayi amue a kudiwu adibu bakuile mu Dîyi dia Nzambi.

1. BIMVUNDU PA BULOBA BUJIMA Mulayi wa buprofete udi mu Matayi nshapita wa 24 udi utela malu adi enzeka pa buloba avua ne bua kuikala tshimanyinu. Tshimanyinu etshi ke tshivua ne bua kuleja “nshikidilu wa ndongoluelu wa malu eu” ne kufikisha ku tshikondo tshivua ‘nshikidilu ne bua kulua.’ (Mvese 3, 14) Mu malu aa mudi: mvita ya bungi, biyole bia nzala, bikumina bilondangane ku muaba ne ku muaba, divulangana dia malu mabi, dipangila dia dinanga ne mayele adi bamfumu ba bitendelelu baluka mu musokoko bua kupambuisha bantu. (Mvese 6-26) Bushuwa, amue a ku malu aa mmatuadije kuenzeka kukadi nkama ne nkama ya bidimu, kadi bu mudi nshikidilu wenda usemena pabuipi, malu aa onso avua ne bua kuenzeka mu tshikondo tshimue. Malu aa avua kabidi ne bua kulondangana ne bimanyinu bisatu bidi kuinshi eku.

2. NGEZELU WA MALU WA BANTU Bible udi wamba ne: “matuku a ku nshikidilu,” mmumue ne: tshikondo tshivua ne bua kufikisha ku nshikidilu, avua ne bua kumuenekela ku dinyanguka dibi dia ngenzelu wa malu wa bantu. Tudi tubalamu ne: “Bantu nebikale badinangi, banangi ba makuta, bena diambu, badibandishi, bapendi ba Nzambi, kabayi batumikila baledi babu, kabayi ne dianyisha, kabayi ne lulamatu, kabayi banange bana babu, kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji, kabayi banange malu mimpe, batungidianganyi, bena mutu mukole, badiuwuja ne didisua, banangi ba masanka pamutu pa kuikala banangi ba Nzambi.” (2 Timote 3:1-4) Dipanga kanemu bua bantu netu ki mbualu buenyi to, kadi mu “matuku a ku nshikidilu” lungenyi elu luvua ne bua kumueneka bikole, ke bualu kayi Bible udi ubikila matuku aa ne: “bikondo bidi bikole mua kupita nabi.” Ukadi pebe mumone mudi ngenzelu wa malu munyanguke bibi bitambe mu bikadilu bia bantu anyi?

3. BANTU BADI BENDA BANYANGA BULOBA Bible udi wamba ne: Nzambi ‘neabutule bantu badi babutula buloba.’ (Buakabuluibua 11:18) Mmu mishindu kayi muvua bantu ne bua kubutula buloba? Bible udi ufuanyikija tshikondo tshietu etshi ne matuku a Nowa wamba ne: ‘Bantu bakadi babi ku mêsu kua Nzambi ne buloba buakadi buule tente ne malu mabi. Nzambi wakatangila buloba ne monayi, buakadi bunyanguke’. Ke Nzambi kuambaye bua bantu babi abu ne: ‘nembajimije.’ (Genese 6:11-13) Ukadi pebe mumone tshijadiki tshinene tshia mudi buloba buenda buula tente ne malu mabi anyi? Kabidi bantu mbafike mu tshikondo tshia pa buatshi tshia katshia ne katshia: Bakadi ne mushindu wa kunyanga buloba pa kubutula muoyo wa bantu bonso badipu. Badi ne bingoma bia mishindu yonso. Badi kabidi banyanga buloba mu mushindu mukuabu. Dipanga kulama bimpe bintu bidi biambuluisha muoyo bu mudi: kapepa katudi tueyela,  mitshi ne nyama nansha mâyi didi dienza bua binyanguke anu bikole.

Diebeja ne: ‘Munkatshi mua bidimu lukama bidi bipite ebi, bantu bavuaku ne bukole bua kudibutula nkayabu anyi?’ Kadi mpindieu bantu bakadi benza nanku bua bungi bua bingoma binene bidibu benda bapatula ne bua dinyanga dia muaba udibu basombele. Bu mudi malu a biamu enda aya kumpala ne lukasa, bidi bimueneka ne: mbikole bua bantu kudimukila imue njiwu idibi bikebesha. Kadi ki mbantu badi ne bukokeshi bua kuamba tshiafikila buloba nansha. Bantu kabayi banji kubutula mioyo yonso idi pa buloba, Nzambi neabutule badi babutula buloba. Ke tshidiye mulaye bua kuenza!

4. MUDIMU WA KUYISHA PA BULOBA BUJIMA Tshitupa tshikuabu tshia tshimanyinu tshia nshikidilu tshiakakula bua mudimu utu kauyi muanji kuenzeka ne: “Nebayishe lumu luimpe elu lua Bukalenge pa buloba bujima budi bantu basombe bua luikale bujadiki kudi bisamba bionso, pashishe, nshikidilu nealue.” (Matayi 24:14) Mudimu munene wa kuyisha eu uvua ne bua kuikala mushilangane bikole ne malongesha avua bitendelelu bia bungi bilongeshe munkatshi mua bidimu bia bungi. Mu matuku a ku nshikidilu, bavua ne bua kuyisha mukenji musunguluke: “lumu luimpe elu lua Bukalenge.” Udiku mumanye tshitendelelu kampanda tshidi tshiyisha mukenji wa pabuawu eu anyi? Nansha mudi bamue mua kuamba mudibu bayisha mukenji eu, badi bayishila lumu luimpe elu anu muaba umue anyi badi balumuangalaja “pa buloba bujima budi bantu basombe bua luikale bujadiki kudi bisamba bionso”?

Badi bayisha Bukalenge bua Nzambi pa buloba bujima mu miakulu nkama ne nkama

Site wa Enternete wa www.jw.org mmuimanyine pa “lumu luimpe elu lua Bukalenge.” Mu site eu mudi mikanda idi yumvuija mukenji eu mu miakulu mipite pa 700. Udiku mumanye site mukuabu udi umuangalaja anu lumu luimpe lua Bukalenge pa buloba bujima mushindu eu anyi? Bidimu bia bungi kumpala kua Enternete kupatukaye, Bantemu ba Yehowa bakavua bamanyike bua mudibu badienzeja bua kumuangalaja lumu luimpe lua Bukalenge bua Nzambi. Katshia mu 1939, badi bafunda pa tshizubu tshionso tshia tshibejibeji tshia Tshibumba tshia Nsentedi ne: “Tshidi tshimanyisha Bukalenge bua Yehowa.” Mukanda kampanda wa malu a bitendelelu wakamba bua mudimu wa kuyisha wa Bantemu ba Yehowa ne: “bua bungi bua mudimu wabu ne bua miabia idibu bayishila, kakuena bantu batudi mua kubafuanyikija nabu to.” Kuyisha eku nkuimanyine pa lumu luimpe lua ne: Bukalenge bua Nzambi nebuenze bua ‘nshikidilu kuluaye.’

TSHIKONDO TSHIA PA BUATSHI TSHIA KATSHIA NE KATSHIA

Udiku mumone ne: bimanyinu bionso binayi bia mu Bible bidibu baleje mu tshiena-bualu etshi mbikumbane mu nsombelu webe anyi? Kukadi bidimu bipite pa lukama bidi babadi ba tshibejibeji etshi bapetamu mamanyisha a malu adi enzeka pa buloba bujima bua kubambuluisha bua badimuene ne: tukadi mu  matuku a ku nshikidilu. Bushuwa, bamue badi babenga kutshitaba bamba ne: malu aa adi alondesha mudi muntu ne muntu uamona, ne kabidi muntu yonso udi uumvuija mudiye musue. Badi bamba kabidi ne: bu mutshidi malu a biamu enda aya amu kumpala, nsombelu wa bantu pa buloba bujima neende anu unyanguka. Nunku, kudi tshijadiki tshinene tshidi tshileja ne: tukadi ku ndekelu kua tshikondo tshia pa buatshi mu nsombelu wa bukua bantu.

Bamue bamanyi mbamona ne: tudi tuenda tusemena ku dishintuluka dinene dia malu pa buloba apa. Tshilejilu, mu 2014 tshibejibeji kampanda tshia bena sianse ne tshia malu a bukubi tshiakadimuija Tshibambalu tshia bulongolodi bua Matunga masanga tshidi tshitangila malu a bukubi bua njiwu minene idi mua kukuata bukua bantu. Bena malu a sianse aba bakajadika ne: “Patudi tukonkonona bimpe njiwu eyi bidi bitusaka bua kuamba ne: njiwu idi ifuma ku dilubuluka dia malu a biamu mibi yoyi bikole.” Bantu ba bungi badi bitaba pabu ne: tudi bafike mu tshikondo tshia pa buatshi tshia katshia ne katshia.Bapatudi ba tshibejibeji etshi ne bantu bakuabu ba bungi badi batshibala kabena bela mpata ne: tshikondo tshia pa buatshi etshi tshidi bushuwa matuku a ku nshikidilu, anyi ne: nshikidilu ukadi pabuipi to. Kadi pamutu pa kutshina matuku atshilualua, udi mua kuikala ne disanka bua bipeta bialua. Bua tshinyi? Bualu udi pebe mua kupanduka!