Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 5 2015

 TSHIENA-BUALU TSHINENE | NSHIKIDILU UKADI PABUIPI ANYI?

“Nshikidilu” Udi imvuija tshinyi?

“Nshikidilu” Udi imvuija tshinyi?

Pautu umvua bamba ne: “Nshikidilu ukadi pabuipi,” ntshinyi tshitu tshikuluila mu lungenyi? Utu wela meji bua muyishi kampanda munene uyisha ku tshiakuidi ne dîyi dikole, mêsu matonona ne uzakeja mubidi, Bible mukuate ku tshianza anyi? Peshi utu udifuanyikijila tatu mukole ne muedi ku tshibanga muimane mu masangu a njila muvuale muzabi mule musuike mukaba mu tshimonu, mukuate tshimanyishilu tshia mukenji wa nshikidilu. Patu bantu badifuanyikijila malu aa mu mutu, bamue bitu bibenza buôwa, kadi bakuabu baamona bu malu a dishima anyi pamuapa bibenza tuseku.

Bible udi wamba ne: “Nshikidilu nealue.” (Matayi 24:14) Bible udi ubikila bualu bumue bumue abu ne: “dituku dinene dia Nzambi” anyi ne: “Armagedone.” (Buakabuluibua 16:14, 16) Bushuwa, bitendelelu bidi bibuejakaja malu adibi bilongesha pa bualu ebu, ne malongesha mapiamapia adi kaayi umvuika mmavule bikole. Kadi pabi Bible udi wakula patoke bua nshikidilu, uleja tshidiye umvuija ne tshidiye kayi umvuija. Dîyi dia Nzambi didi kabidi dituambuluisha bua kumanya bikala nshikidilu ukadi pabuipi. Bualu bua mushinga budi ne: Bible udi utulongesha mutudi mua kupanduka! Nunku, tuanjayi kumanya tshidi nshikidilu kayi umvuija, nunku netumvue bimpe tshidiye umvuija. Bilondeshile Bible, “nshikidilu” udi umvuija tshinyi menemene?

 TSHIDI NSHIKIDILU KAYI UMVUIJA

  1. KI NDIBUTUKA DINENE DIA BULOBA MU KAPIA TO.

    Bible udi wamba ne: ‘[Nzambi] wakajadika buloba pa bishimikidi biabu, bua kabunyungi too ne kashidi.’ (Musambu 104:5) Mvese eu pamue ne mikuabu idi itujadikila ne: Nzambi kakubutula buloba ebu to, ne kakuitaba bua bantu babubutule kashidi to.Muambi 1:4; Yeshaya 45:18.

  2. KI MBUALU BUA MU MPUKAPUKA BUDI KABUYI BULONGOLOLA TO.

    Bible udi utuambila ne: Nzambi mmulongolole dituku disunguluke dikala nshikidilu ne bua kulua. Tudi tubalamu ne: “Bua dituku adi ne dîba adi, kakuena muntu udi mumanye, nansha banjelu badi mu diulu nansha Muana, kadi anu Tatu. Nuikale badimuke, nutabale, bualu kanuena bamanye dîba diakumbana tshikondo tshijadika.” (Mâko 13:32, 33) Bushuwa, Nzambi (“Tatu”) mmulongolole tshikondo bua nshikidilu kuluaye.

  3. KI MBUALU BUKEBESHA KUDI BANTU ANYI KUDI BUKOYA BUDI MU TSHIBUASHIBUASHI TO.

    Mmalu kayi enzeka palua nshikidilu? Buakabuluibua 19:11 udi wamba ne: “Ngakamona diulu dibululuke, ne tangila, kabalu katoke. Badi babikila muntu uvua mubandapu ne: Muena Lulamatu ne Mulelela.” Mvese wa 19 udi usakidila ne: “Ngakamona nyama wa luonji ne bakalenge ba pa buloba ne biluilu biabu badisangishe pamue bua kuluisha yeye uvua mubande pa kabalu ne tshiluilu tshiende.” (Buakabuluibua 19:11-21) Nansha mudi mêyi a bungi a mu mvese eyi mikale a mu tshimfuanyi, tudi mua kujingulula bimpe ne: Nzambi neatume tshiluilu tshia banjelu bua kubutula baluishi bende.

Mukenji wa mu Bible udi utangila nshikidilu ki mmukenji mubi nansha, kadi ndumu luimpe

TSHIDI NSHIKIDILU UMVUIJA

  1. NDEKELU WA MBULAMATADI YA BANTU IDI MIPANGILE.

    Bible udi umvuija ne: ‘Nzambi wa mu diulu neajadike bukalenge [mbulamatadi] bukuabu budi kabuyi  bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makelenge aa onso bitupa bitupa, nebuabutule, ne buobu nebujalame tshiendelele.’ (Danyele 2:44) Anu mudibi bileja mu bualu 3, nekuikale dituku dikale “bakalenge ba pa buloba ne biluilu biabu” mua ‘kudisangisha pamue bua kuluisha yeye uvua mubande pa kabalu ne tshiluilu tshiende.’Buakabuluibua 19:19.

  2. NDEKELU WA MVITA, TSHIKISU NE MALU MABI.

    Bible udi wamba ne: ‘[Nzambi] udi ulekesha mvita bua ijike too ne ku mfudilu kua buloba.’ (Musambu 46:9) ‘Bualu bua badi ne mitshima miakane nebashikame mu buloba, badi ne mutshima umue mutoke nebajalame. Kadi nebajimije bantu babi pa buloba, nebumushapu bena tshitungu.’ (Nsumuinu 2:21, 22) “Tangilayi! Ndi mvuija bintu bionso bipiabipia.”Buakabuluibua 21:4, 5.

  3. NDEKELU WA BITENDELELU BIDI KABIYI BIENZE TSHIVUABI MUA KUENZELA NZAMBI NE BANTU.

    Bible udi wamba ne: ‘Baprofete badi bamba mêyi mu mena a nzambi ya tshianana, bakuidi badi balombodibua ku bianza bia baprofete; kadi nenuenze tshinyi ku nshikidilu kuawu?’ (Yelemiya 5:31) “Bantu ba bungi nebangambile dituku adi ne: ‘Mukalenge, Mukalenge, katuvua bamanyishe bantu malu mu dîna diebe anyi? Katuvua bipate bademon mu dîna diebe anyi? Katuvua benze malu a kukema mu dîna diebe anyi?’ Kadi dîba adi, meme nembambile ne: Tshiena munumanye to! Umukayi kundi, nuenu benji ba malu mabi.”Matayi 7:21-23.

  4. NDEKELU WA BANTU BADI BATUA NDONGOLUELU WA MALU EU MPANDA.

    Yezu wakamba ne: “Badi balumbuluisha bantu bua bualu ebu: Butoke buakalua pa buloba, kadi bantu bakananga mîdima pamutu pa butoke, bualu midimu yabu ivua mibi.” (Yone 3:19) Bible udi umvuija muvuabu babutule bulongolodi bua kale mu tshikondo tshia Nowa muntu uvua ne ditabuja dikole. “Bakabutula bantu ba tshikondo atshi bavua pa buloba pavua mâyi muwule pa buloba. Ku dîyi diodimue, diulu ne buloba bidiku mpindieu mbilamibue bua kapia ne mbitekibue too ne ku dituku dia dilumbuluisha ne dia dibutuka dia bantu babi.”2 Petelo 3:5-7.

Mona ne: badi bafuanyikija “dituku dia dilumbuluisha ne dia dibutuka dia bantu babi” ditudi bindile kumpala eku ne dibutuka dia “boloba” bua mu tshikondo tshia Nowa. Mbuloba kayi buvuabu babutule? Kabavua babutule dibulunge dietu edi tshikondo atshi to; kadi anu “bantu babi” anyi bena lukuna ba Nzambi ke bavuabu ‘babutule’. Bia muomumue, bantu badi badivuija bena lukuna ba Nzambi ke babutudibua mu “dituku dia dilumbuluisha” didi dilua. Kadi balunda ba Nzambi nebapanduke anu bu Nowa ne ba mu dîku diende.Matayi 24:37-42.

Elabi meji mualengela buloba ebu pikala Nzambi mujimije malu mabi onso! Mukenji wa mu Bible udi utangila nshikidilu ki mmukenji mubi nansha, udi bushuwa lumu luimpe. Kadi udi mua kudiebeja ne: ‘Bible udiku uleja tshikondo tshikala nshikidilu mua kulua anyi? Ukadiku pabuipi anyi? Mmunyi mundi panyi mua kupanduka?’