Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 5 2015

 BIBLE UTU USHINTULULA BANTU

Ngakalonga ne: Yehowa mmuena luse ne mubuikididianganyi wa mibi

Ngakalonga ne: Yehowa mmuena luse ne mubuikididianganyi wa mibi
  • MULELA MU 1954

  • DITUNGA DIABU CANADA

  • TSHIVUAYE MUDI WA BINTU BIA BANTU NE MUNAYI WA MANAYA A MFRANGA

TSHIMVUA KALE:

Mvua mukolele mu tshimenga tshipele tshia Montréal. Tatu wakafua mpantshivua ne ngondo isambombo, ke mamu kushalaye ne bujitu buonso bua dîku. Meme ke uvua wa mukala mu bana muanda mukulu.

Mu dikola dianyi, nsombelu wanyi wa dituku dionso uvua unyungulukila anu pa dinua dia bintu bia lulengu, dinaya manaya a mfanga, tshikisu ne didisanga ne benzavi. Pamvua ne bidimu dikumi, ngakatuadija kuenda bundumba ne kusombeshangana makuta, ndomba kasombela kapite bungi. Mvua ndinga bantu bikole ne nsanka pamvua mbatatakaja bua kuibila pavuaku mushindu. Pamvua tshiyi ngenza nanku tshivua ngumvua bimpe to.

Pankavua ne bidimu 14, ngakalua kupiluka mu dinaya ne lungenyi lua bantu bua kubiba. Tshilejilu, mvua mua kusumba mêba, bikanu bia ku maboko ne mpeta bia bungi bia bilamika tu-or tua mafi mafi, ndua kutuapu tshitampi tshishindika bikole bilua bu ne: mbia or wa bujitu bua kara 14, pashishe ndua kubisumbisha mu njila ne mu miaba ya dimanyikila mashinyi mu miaba minene ya disumbishila bintu. Mudimu eu uvua unsankisha bikoIe bualu uvua umbuejila makuta bipepele. Dituku diakuabu, ngakabueja dolare 10000 mu dituku dimue!

Pamvua ne bidimu 15, bakangipata mu kalasa ka dishintulula bikadilu, meme kupanga kua kusombela. Nkavua ndala mu njila, mu mpangu minene itu bantu baya kuikishila, peshi kua balunda bamvua mua kupetangana nabu.

Bampulushi bavua bankuata misangu ne misangu bua midimu yanyi ya diibila eyi. Kadi kabavua bangele mu buloko nansha musangu umue, bualu tshivua nsumbisha bintu biiba to. Nansha nanku, ndi mufute bibawu bipite bunene bua diibila, dipanyisha bantu bintu bidi kabiyi biobi ne bua dipana bintu tshiyi ne mukanda udi unganyishila. Mvua kabidi nsangisha makuta anyi a kasombela tshiyi ntshina muntu. Kuenza nunku kuvua ne njiwu, imue misangu mvua ngenda ne tshingoma. Amue matuku, mvua mpatuka ne tshisumbu tshia benzavi tshivua tshimanyike.

MUSHINDU UDI BIBLE MUNSHINTULULE:

Ngakatuadija malu a Bible bua musangu wa kumpala mpamvua ne bidimu 17.Tuvua basombele ku nzubu umue ne mulunda wanyi mukuabu wa bakaji  pakatuadijaye kulonga Bible ne Bantemu ba Yehowa. Kadi tshiakitaba bua kulekela malu a buenzavi adi Bible ukandika to; ke meme kubengangana ne mulunda wanyi au ne kuya kusomba ne mukaji mukuabu umvua mpatuka nende.

Malu akashintuluka pakatuadija mulunda wanyi wa bakaji muibidi au kulonga pende ne Bantemu! Yeye kushintulula nsombelu wende, ne kunkemeshabi bikole bua muvuaye wenda ulua muena ditalala ne muena lutulu. Dikuabu meme kuitaba dibikila dia kuya mu Nzubu wa Bukalenge wa Bantemu ba Yehowa. Bakangakidila kudi bantu bavua bena malu mimpe ba musangelu. Bavua bashilangane bikole ne bantu bamvua mumanye! Tshitu muanji kudiumvua munangibue kudi bena mu dîku dianyi to; katshia ku buana buanyi, mvua ndimona muntu udibu kabayi banange ne kabayi batabalela. Disanka divua Bantemu ba Yehowa bansankidile nadi ke dimvua njinga ne muoyo mujima. Pakangambila Bantemu bua kulonga nabu Bible, ngakitaba ne disanka dionso.

Malu a mu Bible amvua ndonga ke avua mua kuikala mapandishe muoyo wanyi. Tukavua badilongolole ne balunda banyi babidi bua kuya kuiba bua kumona mua kufuta dibanza dia makuta mapite pa dolare 50000 dimvua mubuele mu manaya a mfranga. Kadi ndi ne disanka dia bungi bua mumvua mubepuke! Bena dianyi abu bakatungunuka bobu ne buivi. Bakakuata umue, mukuabu kumushipabu.

Pamvua ntungunuka ne kulonga Bible, ngakalua kumona bungi bua malu amvua ne bua kushintulula. Tshilejilu, ngakamanya tshidi Bible wamba mu 1 Kolinto 6:10 ne: “Bivi anyi bena lukuka anyi bakuatshiki ba maluvu anyi bapendianganyi anyi banyengianganyi ba bintu kabakupiana Bukalenge bua Nzambi to.” Pangakabala mvese au, ngakapuekesha binsonji bua bungi bua malu anyi mabi. Ngakajingulula ne: bivua bikengela bua meme kushintulula nsombelu wanyi mujima. (Lomo 12:2) Mvua ne tshikisu ne luonji, ne mu malu onso mvua anu nshima.

Kadi, ngakalonga kabidi mu Bible ne: Yehowa mmuena luse ne mubuikididianganyi wa mibi. (Yeshaya 1:18) Ngakasambila bikole, meme kusengelela Yehowa bua angambuluishe bua ndekele nsombelu wanyi wa kale au. Ngakatuadija kulengeja ngikadilu yanyi ku kakese ku kakese ne diambuluisha dia Nzambi. Ngakela tshidia tshinene pangakafundisha dibaka dianyi ne mulunda wanyi au kua mbulamatadi.

Lelu ndi ne muoyo bua ditumikila mikenji ya mu Bible

Mvua ne bidimu 24, muikale ne mukaji ne bana basatu. Mpindieu bivua bikengela bua meme kukeba mudimu uvua upetangana ne mikenji ya mbulamatadi. Kadi mvua mulonge kalasa kakese ne tshivua ne wa kungakuila bua kupeta mudimu to. Ke meme kulomba kabidi Yehowa mu disambila ne muoyo mujima. Pashishe, meme kuya kukeba mudimu. Meme kuambila bamfumu ba midimu ne: mvua musue kushintulula nsombelu wanyi ne musue kupeta mudimu bu muntu wa nsongo. Imue misangu mvua mbambila ne: ndi ndonga Bible ne mvua ne dijinga dia kulua muana muimpe wa mu ditunga. Bamfumu ba midimu ba bungi kabavua basue kungangata ku mudimu to. Ndekelu wa bionso, meme mumane kuamba patoke malu anyi onso mabi pavuabu bankonke ku mudimu, muedi wa nkonko eu wakamba ne: “Tshiena anu mumanye ne: mbua tshinyi to, kadi kudi tshintu kampanda tshidi tshingambila ne: nkuangate ku mudimu.” Ndi ngitabuja ne: etshi tshivua diandamuna ku masambila anyi! Mu bungi bua matuku, meme ne mukajanyi tuakatambula kulua Bantemu ba Yehowa.

MASANKA ANGAKAPETA:

Lelu ndi ne muoyo bua ditumikila mikenji ya mu Bible ne bua dikala ne nsombelu wa buena Kristo. Nkadi ne dîku dianyi dimpe. Bu mundi mujadike ne: Yehowa mmumfuile luse, bidi bimpetesha kondo ka muoyo katoke.

Mu bidimu 14 bishale ebi, ndi muenze mudimu wa kuyisha bikole (mudimu wa ku dîba ne ku dîba), ngambuluisha bantu bakuabu bua kumanya tshidi Bible ulongesha, ne mu matuku adi panshi aa, mukajanyi mmuditue pende nanyi mu mudimu eu. Mu bidimu 30 bidi bishale panyima ebi, ndi ne disanka bua mundi muambuluishe bena mudimu nanyi 22 bua kutuadijabu pabu kutendelela Yehowa. Ntshitu anu nya miaba ya disumbishila bintu ayi, kadi ki mbua kuibila bintu bia bantu bu kale to. Mpindieu, pantu nyaku ntu misangu yonso ngambila bantu malu andi ngitabuja. Ndi musue kubapesha tshintu tshikuabu: ditekemena dia kupeta muoyo mu bulongolodi bupiabupia muikala biibidi kabayimu kabidi to.Musambu 37:10, 11.