Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 5 2015

 NUIDIKIJE DITABUJA DIABU | JOZEFE

‘Meme ndi pa muaba wa Nzambi anyi?’

‘Meme ndi pa muaba wa Nzambi anyi?’

FUANYIKIJA Jozefe muimane mu budimi buende pavua butuku buenda buila. Pamuapa uvua ubandila mabue a kankinda, mitshi mikuabu ya bimuma, ne bisonsa bia ku mpenga kua bijibajiba bia mâyi; dia muamua dia bimanu bia nzubu wende udi umona dibalasa dia Palô. Elabi meji, Jozefe muikale umvuila lua pa bule mudi muanende Manashe usekesha muakunyende Efelayima. Jozefe uvua mua kuikala udifuanyikijila tshivua tshienzeka mu nzubu, mukajende useka ne disanka malu avua bana benza. Jozefe uvua utua mimuemue, mumanye ne: uvua muntu mubeneshibue.

Jozefe wakapesha muanende wa kumpala dîna dia Manashe bualu divua diumvuija tshipua muoyo. (Genese 41:51) Mabenesha a kudi Nzambi avua Jozefe mupete mu bidimu bishale avua bushuwa makepeshe kanyinganyinga ka muvuaye uvuluka kuabu, bana babu, ne tatuende. Dimukina dia bakulu bende diakashintulula nsombelu wende. Bavua bamukengeshe, bamuelele tshifufu bua kumushipa ne pashishe kumupanyishabu bangenda-mushinga bu mupika. Katshia anu pine apu, kutuadijaye kutuilangana ne nsombelu mikole yenda ilondangana. Munkatshi mua bidimu bitue ku 12, bakamukuata mu bupika, kumuelabu mu buloko, ne tshimue tshikondo bavua bamusuike ne nkanu. Kadi mpindieu, ukavua mulombodi tshindondi wa Palô mu bukalenge bunene bua Ejipitu. *

Mu bidimu bia bungi, Jozefe wakamona muvua malu enda akumbana anu muvua Yehowa mudianjile kuamba. Ejipitu uvua munkatshi mua bidimu muanda mutekete bia dinowa bintu bia bungi anu mukavuabi bimana kuamba, Jozefe ke uvua utangila nzubu wa dilamina biakudia bia pa mutu bia mu Ejipitu. Mu tshikondo atshi, mukajende Asenata wakamulelela bana babidi ba balume. Kadi Jozefe utshivua anu utuma meji kudi dîku diende divua ntanta mule, nangananga kudi muakunyende wa balume Benyamina ne tatuende Yakoba uvuaye munange bikole. Jozefe uvua mua kuikala udiebeja bikalabu bavua bimpe ne bikale mu bukubi. Uvua mua kuikala kabidi pamuapa udiebeja bikala bakulu bende bakavua bashintulule bienzedi biabu bia tshikisu anyi bikalaye uvua mua kulengejangana ne bana babu ne kudisanga nabu kabidi.

Pikala mukawu, ditungilangana peshi lukinu bikosolole dîku dienu, nsombelu webe udi mua kuikala mufuanangane ne wa Jozefe. Ditabuja dia Jozefe didi mua kutulongesha tshinyi bua muvuaye utabalela bena mu dîku diabu?

‘NDAYI KUDI JOZEFE’

Jozefe uvua ne malu a bungi a kuenza matuku au, ne bidimu bivua bienda biya lukasa. Anu mukavua Yehowa mumanyishe mu tshilota tshia Palô, bidimu muanda mutekete bia dinowa bintu bia bungi biakalondangana ne mashintuluka manene. Bia pa madimi biakakepela bikole. Nzala yakakuata diakamue matunga onso avua madie nabu mutumba. Kadi anu mudi Bible wamba: “Mu Ejipitu muakadi mushale bintu bia kudia.” (Genese 41:54) Kakuyi mpata, mêyi avua Jozefe muambe ku bukole bua nyuma muimpe ne tshilejilu tshiende tshia kulongolola malu bimpe biakambuluisha bena Ejipitu.

Yehowa wakatungunuka ne kuenza mudimu ne Jozefe bualu uvua mushale anu ne budipuekeshi

Bena Ejipitu bavua mua kuikala baleja Jozefe dianyisha ne bamutumbisha bua muvuaye mumanye  kulongolola malu bimpe. Kadi, Jozefe uvua musue bua butumbi buye anu kudi Yehowa Nzambi nkayende. Tuetu ne budipuekeshi patudi tuenza mudimu ne tshipedi kampanda tshitudi natshi mu mudimu utudi tuenzela Nzambi, udi mua kutuambuluisha bua kuenza natshi mudimu mu mushindu utuvua katuyi belela meji.

Kadi mu bungi bua matuku, bena Ejipitu bakatuadija pabu kumvua bukole bua tshiyole tshia nzala. Pakatuadijabu kudidila Palô balomba diambuluisha, wakabambila ne: ‘Ndayi kudi Jozefe, nuenze malu adiye wamba.’ Ke Jozefe kutuadijaye kukangula nzubu ivuabu balamine biakudia bia pa mutu ne bantu kutuadijabu kusumba bivuabu nabi dijinga.Genese 41:55, 56.

Kadi miaba mikuabu bantu kabavua ne biakudia to. Dîku dia ba-Jozefe divua mu Kanâna mutantshi wa kilometre ya bungi, divua padi ne lutatu elu. Yakoba ukavua mukulakaje wakumvua lumu lua ne: mu Ejipitu muvua biakudia, ke yeye kutuma bana bende bua kuyamu kusumba biakudia.Genese 42:1, 2.

Yakoba wakatuma bana bende dikumi, pa kumbusha Benyamina, muanende wa mukala. Yakoba uvua uvuluka malu onso avua menzeke tshikondo tshivuaye mutume Jozefe muanende uvuaye munange nkayende bua kuya kutangila bakulu bende. Au ke uvua musangu wa ndekelu uvua Yakoba mumone muanende Jozefe. Bana ba Yakoba bavua bamutuadile muzabi muimpe wa Jozefe uvua tshimanyinu tshia muvua tatuende mumunange ne umuanyisha; muzabi eu uvua mupandike ne mukunze ne mashi. Bakafikisha mukulakaje uvua ne kanyinganyinga kakole ku muoyo eu bua kuitaba ne: nyama wa luonji uvua mudie Jozefe.Genese 37:31-35.

‘JOZEFE WAKAVULUKA’ DIAKAMUE

Panyima pa luendu lule, bana ba Yakoba bakafika mu Ejipitu. Pakebejabu bua kusumba biakudia, bakabambila bua kuya kudi mukokeshi munene uvuabu babikila ne: Sefenata-panea. (Genese 41:45) Pakamumonabu, bavuaku bamanye ne: uvua Jozefe anyi? Nansha kakese. Bobu bavua bamone muntu uvua ne muanzu munene mu Ejipitu, uvuabu bajinga ne: abambuluishe. Bua kumuleja kanemu, bakenza tshivua bantu bonso benza, tuambe ne: ‘kumuinaminabu, mpala yabu mitue panshi.’Genese 42:5, 6.

Jozefe yeye wakabamanya musangu umue. Kabidi pakabamonaye bamuinamina, wakavuluka ku buana buende. Bible udi wamba ne: Diakamue ‘Jozefe wakavuluka bua bilota biende’ bivua Yehowa mumuloteshe patshivuaye muana, bivua bileja tshikondo tshivua bana babu mua kumuinamina. Ke tshivuabu benze menemene. (Genese 37:2, 5-9; 42:7, 9) Ntshinyi tshivua Jozefe mua kuikala muenze? Uvua mua kubela mu tshitupa anyi? Peshi uvua mua kudisombuela?

Jozefe uvua mumanye ne: kabivua bimpe kuenza malu ne tshiji to, nansha yeye natshi tshia bishi. Bushuwa, Yehowa ke uvua ulombola dienzeka dia malu a mushinga au. Uvua musue kukumbaja disua diende. Ukavua mulaye bua kuvuija kankanunuina ka Yakoba tshisamba tshinene. (Genese 35:11, 12) Bu bana babu ne Jozefe batshikale anu ne tshikisu, budinangi ne bapange bululame, malu aa avua mua kupatula bipeta bibi mu bule bua matuku. Kabidi, bu Jozefe muenze malu ne tshiji, uvua mua kutatshisha  bavua bashale kumbelu ne pamuapa kuteka too ne tatuende ne Benyamina mu njiwu. Tatuende ne Benyamina batshivua ne muoyo anyi? Jozefe wakabenga kudimanyisha kudi bana babu bua kubateta ne bua kumona bikalabu bakavua bashintuluke. Nunku uvua mua kumanya tshivua Yehowa musue bua yeye kuenza.

Pamuapa kabitu bianji kukufikila bua kudimona ne muanzu wa pa buawu wa nunku to. Kadi, lelu eu tshimvundu ne ditapuluka dia mêku bidi bienzeka bikole pa buloba. Patudi tutuilangana ne nsombelu ya nunku, lungenyi luetu ludi mua kutusaka bua kulonda muoyo wetu ne kuenza malu bilondeshile majinga etu a dipanga bupuangane. Mbimpe menemene bua kuidikija Jozefe ne kujingulula mudi Nzambi musue bua tuetu kuenza malu. (Nsumuinu 14:12) Tumanye ne: bidi ne mushinga wa bungi bua kuikala mu ditalala ne Yehowa ne Muanende anu mudibi ne mushinga bua kukeba ditalala ne bena mu dîku dietu.Matayi 10:37.

“NENNUTETE”

Jozefe wakaditua mu diteta bana babu bua kumanya tshivua munda muabu. Wakatuadija kuakula nabu ne dîyi dibi ku diambuluisha dia muntu uvua ubakudimuina malu avuaye wamba, ubabanda muvuabu balue bua kutentekela ditunga. Bua kudibingisha, bakamuambila malu a mu dîku diabu, kumulondelabu too ne bualu menemene buvua muanabu wa mukale mushadile kumbelu. Jozefe wakateta bua kusokoka disanka divuaye nadi. Muakunyende utshivua bushuwa ne muoyo anyi? Mpindieu Jozefe kupetayi pa kubuelela. Wakamba ne: “Nennutete ku bualu ebu,” ne pashishe kubambilaye ne: uvua musue kumona muanabu wa mukala au. Ndekelu wa bionso wakabitabila bua kupinganabu kumbelu bua kukeba muanabu wa mukala, kadi anu bikala umue wabu muitabe bua kushala bu muena buloko.Genese 42:9-20.

Bu muvua bana babu ne Jozefe bayukila kabayi bamanye ne: uvua mua kumvua bivuabu bamba, bakatuadija kudipisha bua tshilema tshinene tshivuabu benze kukavua kupite bidimu 20. Bakambilangana ne: ‘Tuetu tuakudipisha bulelela mu bualu bubi butuakenzela muanetu patuakatangila kanyinganyinga ka mutshima wende pakadiye utusengelela, kadi tuetu katuakamumvuila; bua bualu ebu dikenga diakatukuata.’ Jozefe uvua mumvue bivuabu bamba, ne wakabela nyima bua kabalu kumona binsonji biende. (Genese 42:21-24) Kadi uvua mumanye ne: dinyingalala dilelela ndishilangane bikole ne kudiumvua bibi patupu bua bipeta bibi bidi bifumina ku bualu bubi buenza. Nunku wakatungunuka ne kubateta.

Jozefe wakabalekela bua kupinganabu, yeye kulama Simeona mu buloko. Uvua kabidi musokoke makuta mu bibombi bia biakudia bivuabu bapingana nabi kuabu. Bana babu bakapingana kumbelu, kuenzabu ne muabu muonso bua kuitabijija Yakoba bua abalekele baye mu Ejipitu ne Benyamina, muana uvuaye munange bikole. Pakafikabu mu Ejipitu, bakambila muena mudimu wa Jozefe patoke bua makuta avuabu bapete mu bibombi biabu, kumulombabu bua baafute onso. Dilomba edi divua dimpe, kadi Jozefe yeye uvua musue kumona tshivua bumuntu buabu bulelela. Ke yeye kubapingaja kumbelu ne biakudia, kadi uvua musokoke dikopo diende dia arjan mu tshibombi tshia Benyamina.Genese 42:26–44:2.

Pashishe Jozefe udi upetela pa kubuelela. Kutumaye bantu bua kulondakajabu bana babu ne kubakuatabu bamba ne: mbibe dikopo. Bu muvuabu badipetele mu tshibombi tshia Benyamina, bakabapingaja bonso kudi Jozefe. Mpindieu, Jozefe uvua ne mpunga wa kumanya tshivua bana babu menemene. Yuda ke uvua wakula pa muaba wabu. Wakalomba luse, kulombaye kabidi bua bobu bonso 11 bashale bapika mu Ejipitu. Jozefe wakabenga, kuambaye ne: Benyamine nkayende ke uvua ne bua kushala mu Ejipitu bu mupika, kadi bakuabu bonso bavua ne bua kupingana.Genese 44:2-17.

Yuda wakakula ne mêyi a luse wamba ne: ‘Anu yeye muana umuepele kua mamu wende udi mushale; ne tatu wende udi umunanga.’ Mêyi aa avua ne bua kuikala malenge Jozefe, bualu yeye ke uvua muanabute wa Lakele, mukaji uvua Yakoba munange bikole wakafua pavuaye ulela Benyamina. Jozefe uvua uvuluka Lakele bikole anu bu tatuende. Pamuapa, ke tshivua tshienze bua Jozefe anange Benyamina bikole.Genese 35:18-20; 44:20.

Yuda wakatungunuka ne kusengelela Jozefe bua kalami Benyamina bu mupika to. Wakalomba bua alue yeye mupika pa muaba wa Benyamina. Pashishe wakajikija ne mêyi adi enza luse aa: ‘Ndi mua kuya kudi tatu wanyi bikala nsongalume kayi nanyi munyi? Bua tshitangidi bualu ebu bubi budi bulue  kudi tatu wanyi.’ (Genese 44:18-34) Mpindieu, etshi ke tshijadiki tshinene tshidi tshileja mudi muntu mushintuluke. Kavua anu munyingale patupu to, kadi uvua kabidi muleje muvuaye uditeka bikole pa muaba wa bakuabu, kayi ne budinangi.

Jozefe wakamona ne: bana babu bavua banyingalale bua tshivuabu bamuenzele

Jozefe kavua ukumbana kabidi to. Uvua muenzejibue bua kupatula muadi uvuaye mutshinta munda muende. Wakambila bena mudimu bende bua bumbuke, yeye kudila muadi mukole, kumvuikawu too ne kua Palô. Ke yeye kudimanyisha pashishe ne: ‘Ndi bianyi Jozefe, muakunyenu.’ Wakupukila bana babu bavua bimane bibapitshile ne kubafuilaye luse ne muoyo mujima bua malu onso avuabu bamuenzele. (Genese 45:1-15) Nunku, wakaleja lungenyi lua buena lua Yehowa utu musue kubuikidilangana. (Musambu 86:5) Tutu tuenzaku petu nanku anyi?

“WEWE UTSHIDI NE MUOYO”

Pakumvua Palô bualu buonso buvua buenzeke kua Jozefe, wakamuambila bua abikidishe tatuende ukavua mukulakaje pamue ne dîku diende dionso. Kuakapita matuku makese tshianana, Jozefe wakatuilangana ndekelu wa bionso ne tatuende uvuaye munange. Yakoba wakadila wamba ne: “Mpindiewu ndi mua kufua, bualu ndi mukumone wewe mutshikale ne muoyo.”Genese 45:16-28; 46:29, 30MMM.

Nunku, Yakoba wakalala kabidi bidimu 17 mu Ejipitu. Wakashala ne muoyo matuku bungi bukumbane, tshikondo etshi tshiakamuambuluisha bua kubeneshaye bana bende 12 ne mêyi a buprofete. Wakapesha Jozefe, muanende wa 11 bitupa bibidi bia dibenesha bivuabu bapesha muanabute. Bisamba bibidi bia mu Isalele bivua ne bua kufumina kudiye. Kadi netuambe bishi bua Yuda, muanende muinayi wakapita bana babu bua muvuaye muleje lungenyi lua dinyingalala? Wakapeta yeye dibenesha dinene; Masiya uvua ne bua kupatukila mu ndelanganyi yende.—Genese, nshapita wa 48, ne wa 49.

Pakafua Yakoba ne bidimu 147, bana babu ne Jozefe bakatuadija kutshina bela meji ne: muanabu uvua ne bukokeshi eu uvua mpindieu mua kukeba bua kudisombuela. Kadi Jozefe wakabakolesha ku muoyo ne dinanga dionso. Uvua mushale mulame lungenyi lua ne: bu muvua Yehowa ke uvua muenze bua bena mu dîku diabu bafike mu Ejipitu, bana babu bavua ne bua kulekela kudipisha bua tshivuabu benze. Ke yeye kuela lukonko lua mushinga elu: ‘Meme ndi pa muaba wa Nzambi anyi?’ (Genese 15:13; 45:7, 8; 50:15-21) Jozefe wakamona ne: Yehowa uvua mulumbuluishi muimpe. Yeye uvua nganyi bua kunyoka bantu bavua Yehowa mufuile luse?Ebelu 10:30.

Bituku bikukolela bua kufuilangana luse anyi? Bidi mua kuikala nanku nangananga padi muntu mutuenzele bualu bubi ku bukole. Kadi tuetu bafuile bantu badi banyingalala luse ne muoyo mujima, netubumbushe bobu ne tuetu bine ku tunyinganyinga tua bungi. Netuidikije ditabuja dia Jozefe ne tshilejilu tshia Yehowa, Tatuende mufuidianganyi wa luse.

^ tshik. 4 Bala biena-bualu bia “Nuidikije ditabuja diabu” bidi mu Tshibumba tshia Nsentedi tshia dia 1/8/2014; tshia dia 1/11/2014; ne tshia dia 1/2/2015.