Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 4 2015

Uvua mumanye anyi?

Uvua mumanye anyi?

Mmudimu kayi uvua nawu kamanda ka masalayi lukama mu tshiluilu tshia bena Lomo?

Dibue didibu basonge lupingu lua marcus favonius facilis kamanda ka masalayi lukama

Mifundu ya bena Kristo ya tshiena Greke idi yakula ndambu bua tumanda tua masalayi lukama ba bena Lomo. Mfumu wa basalayi uvua ne bua kutangila muvuabu bashipa Yezu uvua ne muanzu eu, nansha Kôneliyo, muntu wa kumpala wa mu bisamba bikuabu uvua mulue muena Kristo. Mfumu wa basalayi uvua ne bua kutangila muvuabu ne bua kuela mupostolo Paulo mfimbu ne Yuliyo uvua muye ne Paulo ku Lomo, bavua pabu tumande tua basalayi lukama.—Mâko 15:39; Bienzedi 10:1; 22:25; 27:1.

Muntu uvua kamanda ka masalayi lukama uvua misangu ya bungi utangila tshisumbu tshia basalayi tshivuabu babikila ne: santiri, tshivua ne basalayi bavua benda ku makasa kubangila ku 50 too ne ku 100. Uvua ne mudimu wa kulongesha bantu bende mudimu, kubapesha dinyoka, kutangila bilamba biabu ne bia mvita, ne kubatumina dîyi pavuabu baya mu mvita.

Bua musalayi wetu wa tshianana eu, bukamanda ka masalayi lukama ke muanzu wa ndekelu uvuaye mua kupeta. Bantu bavua benza mudimu eu bavua basalayi ba matuku a bungi bavua ne bua kuikala balombodi bimpe. Bobu ke bavua benza bua tshiluilu tshia bukole tshia bena Lomo tshikale mu bulongame ne tshikumbane bua kuluangana mvita bimpe. Bilondeshile mukanda kampanda, bantu bavua batumanda tua masalayi lukuma “ke bavua bamanye mudimu wa busalayi bikole ne ke bavua bamanye malu bikole mu tshiluilu tshia bena Lomo.”

Mmushindu kayi uvua mmuenu idibu batele mu Bible mishilangane ne ya lelu?

Lumuenu lua mu ejipitu lua kale

Mmuenu idibu batele mu Bible mmishilangane ne mmuenu ya talatala ya lelu bualu bavua batamba kuyenza ne tshiamu tshivuabu bapela bikole. Bavua bayenza nangananga ne tshiamu tshia bronze, kadi pamuapa kabidi ne tshiamu tshia mitaku, tshia arjan, tshia or anyi tshia electrom. Badi batela mmuenu bua musangu wa kumpala mu Bible padibu bakula bua diasa dia ntenta wa tshitendelelu uvua muaba wa kumpala uvua bena Isalele batendelela. Bantu bakaji bavua bafile mmuenu bua kuenza nayi dilongo dinene dia tshijila dia tshiamu tshia mitaku ne tshitekelu tshiadi. (Ekesode 38:8) Bidi bimueneka ne: bavua banji kuengulula mmuenu ayi bua kuenza nayi dilongo adi ne tshitekelu tshiadi.

Mmuenu ivuabu bapete pavuabu bumbule maloba a mu Isalele ne a kumpenga kuende ivua misangu ya bungi pamue ne bilengejilu ne bintu bikuabu bitu bantu bakaji badilengeja nabi. Misangu ya bungi, mmuenu ayi ivua ya tshijengu, mikale ne tshikuatshilu tshilengeja tshia dibaya, tshia tshiamu anyi tshia mubanga tshivuabu batamba kuenza mu tshimfuanyi tshia mutu wa muntu mukaji. Kabavua batamba kulengeja luseke lua lumuenu luvua kaluyi lupela to.

Mmuenu ya kale kayivua ileja bimpe patudi tuyifuanyikija ne mmuenu ya talatala ya lelu to. Bualu ebu budi bumvuija pamuapa tshivua mupostolo Paulo wakuila pakambaye ne: “Mpindieu tudi tumona bintu bibuitshidile mu lumuenu lua tshiamu.”—1 Kolinto 13:12.