Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 4 2015

 MUNTU UYUKILA NE NTEMU WA YEHOWA

Bua tshinyi bidi bikengela kuvuluka lufu lua Yezu?

Bua tshinyi bidi bikengela kuvuluka lufu lua Yezu?

Bualu budi bulonda ebu, mmuyuki udi Ntemu wa Yehowa mua kuenza ne muntu kampanda. Tutekabi ne: Ntemu wa Yehowa udi ne dîna ne: Melanie udi uya kumbelu kua muntu mukaji mukuabu diende Charli.

“TUNGUNUKAYI NE KUENZA NUNKU BUA KUMVULUKA”

Melanie: Charli wetuawu. Mvua ne disanka dia bungi bua kukumona mu Tshivulukilu tshia lufu lua Yezu lumingu lushale. * Uvua mumone bishi tshibilu atshi?

Charli: Mvua musanke bua kuikalamu, kadi mu kuamba kuimpe tshivua mumvue bimpe bionso bivuabu bambamu to. Nkadi mumvue bakula bua bantu basekelela diledibua dia Yezu mu Nowele ne bua dibika diende ku lufu mu Pasaka, kadi tshitu muanji kumvua bakula bua muntu uvuluka lufu luende to.

Melanie: Mmuomu, Nowele ne Pasaka mbibilu bidi bitangalake pa buloba bujima. Kadi Bantemu ba Yehowa badi bamona ne: bidi ne mushinga bua kusekelela lufu lua Yezu. Wewe muikale ne ndambu wa minite, nengikale ne disanka dia kukuleja tshitubu benzela nanku.

Charli: Eyowa, ndi ne ndambu wa minite.

Melanie: Mu tshikoso, Bantemu ba Yehowa batu bavuluka lufu lua Yezu bualu uvua muambile bayidi bende bua kuenza nanku. Mona tshivua tshienzeke butuku bua muladilu wa lufu lua Yezu. Ukadiku mumvue bakula bua didia dia pa buadi divuaye mudie ne bayidi bende ba lulamatu anyi?

Charli: Udi usua kuakula bua Didia dia dilolo dia ndekelu anyi?

Melanie: Menemene. Batu kabidi badibikila ne: Didia dia dilolo dia Mukalenge. Pavuabu munkatshi mua didia adi, Yezu wakambila bayidi bende amue malu masunguluke a bobu kuenza. Udiku mua kubala mêyi ende adi mu Luka 22:19 anyi?

Charli: Eyowa. “Wakangata kabidi diampa, kusakidilaye Nzambi, kuditshibula, kubapeshaye wamba ne: ‘Etshi tshidi tshileja mubidi wanyi wafidibua bua bualu buenu. Tungunukayi ne kuenza nunku bua kumvuluka.’”

Melanie: Tuasakidila. Tangila mu tshiambilu tshia ndekelu tshia mvese eu umone tshidi Yezu muambe bua kuenza: “Tungunukayi ne kuenza nunku bua kumvuluka.” Kabidi kumpala mene kua Yezu kuambila bayidi bende bua kumuvuluka, wakaleja patoke tshivuabu ne bua kuvuluka bua bualu buende. Wakamba ne: uvua ne bua kufila muoyo wende bua bayidi bende. Yezu wakaleja lungenyi lua muomumue elu mu mêyi adi mu Matayi 20:28. Mvese au udi wamba ne: “Muana wa muntu kavua mulue bua bamuenzele mudimu to, kadi wakalua bua kuenzela bakuabu mudimu ne kufila muoyo wende bu tshia kupikula natshi bantu ba bungi.” Mu tshikoso, Bantemu ba Yehowa batu badisangisha tshidimu tshionso dituku dia mufikilu wa lufu lua Yezu bua kuvuluka mulambu wa kupikula nawu bantu uvua Yezu mufile. Lufu luende ludi mua kupetesha bantu bonso badi batumikila muoyo.

BIVUA BIKENGELA KUFILA TSHINTU TSHIA KUPIKULA NATSHI BANTU BUA TSHINYI?

Charli: Nkadi mumvue bantu bamba ne: Yezu uvua mufue bua tupete muoyo. Kadi mu bulelela, tshitu muanji kumvua bimpe mudi bualu abu mua kuenzeka to.

Melanie: Charli, kuena nkayebe to. Dilongesha dia mulambu wa Yezu udi upikula bantu ndilongesha dikole  bua kudiumvua. Kadi didi kabidi munkatshi mua malu mimpe ne malelela adi mu Dîyi dia Nzambi. Udi mumone bishi, utshidi ne ndambu wa minite anyi?

Charli: Tshidi ne ndambu wa minite.

Melanie: Mbimpe. Ndi mfuma ku dibala tshiena-bualu tshidi tshiakula bua mulambu wa kupikula nawu bantu, ne nentete kukumvuijatshi mu mushindu mupepele.

Charli: Kakuena bualu.

Melanie: Bua tuetu kumvua bimpe tshidi mulambu wa kupikula nawu bantu umvuija, tudi ne bua kuanji kumvua nsombelu uvua Adama ne Eva bakebeshe pavuabu benze bubi mu budimi bua Edene. Bua tuetu kumvua tshivua tshienzeke, tuanji tubale Lomo 6:23. Udiku mua kubala mvese eu anyi?

Charli: Eyowa. Udi wamba ne: “Difutu dia bubi ndufu, kadi dipa didi Nzambi ufila mmuoyo wa tshiendelele mu Kristo Yezu Mukalenge wetu.”

Melanie: Tuasakidila. Tukonkononabi mêyi aa bimpe. Tshia kumpala, mona mudi mvese eu ubanga: “Difutu dia bubi ndufu.” Ebu mbualu bupepele buvua Nzambi muambe katshia ku ntuadijilu wa bukua bantu, mmumue ne: difutu anyi tshibawu tshia bubi ndufu. Mu bulelela, ku ntuadijilu kakuvua muntu nansha umue uvua muena bubi to. Adama ne Eva bavua bafukibue bapuangane, ne bana babu bonso bavua pabu mua kuledibua bapuangane. Nunku kakuvua mua kuikala bualu buvua mua kuenza bua muntu afue to. Adama ne Eva ne ndelanganyi yabu yonso bavua ne ditekemena dia kuikala ne muoyo wa kashidi mu nsombelu wa disanka. Kadi anu mutudi bamanye, malu kaavua menzeke mushindu au to, ki mmuomu anyi?

Charli: Mmuomu. Adama ne Eva bakadia tshimuma tshivuabu babakandike.

Melanie: Mmuomu. Pavua Adama ne Eva badie tshimuma, mmumue ne: pavuabu basungule bua kubenga kutumikila Nzambi, bavua benze bubi. Mu bulelela, bavua basungule bua kulua bantu bapange bupuangane, bua kulua bena mibi. Disungula diabu adi kadivua ne bua kupatula bipeta bibi anu kudi Adama ne Eva to, kadi kabidi kudi ndelanganyi yabu yonso.

Charli: Udi usua kuamba tshinyi?

Melanie: Ndi mua kukupesha tshilejilu. Anji ngambilabi, utu musue kuosha mampa anyi?

Charli: Eyowa!

Melanie: Tufuanyikijabi ne: udi ne kashete kapiakapia kimpe ka kuoshela mampa. Kadi wewe kuyi muanji kuoshelamu mampa musangu nansha umue, kadi kadituta panshi ne kabondakana. Ngambila, ntshinyi tshienzekele mampa onso audi woshelamu? Wowu pawu kaakulonda mudi kashete kabondakane anyi?

Charli: Eyowa, kemuikalawu.

Melanie: Bia muomumue, pavua Adama ne Eva basungule bua kutombokela Nzambi, “bakabondakana” anyi bakanyanguka bua bubi ne dipanga bupuangane. Bu muvuabu balue bena mibi kumpala kua kulelabu bana, bana babu bonso bavua ne bua kuledibua pabu babondakane. Bavua ne bua kuledibua bonso mu bubi. Mu Bible, muaku “bubi” kawena uleja anu tshienzedi patupu to, kadi udi uleja kabidi nsombelu utudi bapiane. Tshipeta tshia ndekelu tshidi ne: nansha mutuvua tuetu nebe katuyi benze bualu bubi nansha bumue (bualu katuvua nansha banji kuledibua) pavua Adama ne Eva benze bubi, bavua batukebele tuetu ne ndelanganyi yabu yonso ne yetu dipanga bupuangane ne bubi bidi bifikisha ku lufu. Anu mutudi tubala mu Lomo 6:23 difutu dia bubi ndufu.

Charli: Abi si mbibi. Bua tshinyi bantu bonso badi mua kukenga kashidi bua bubi bua Adama ne Eva?

Melanie: Udi muambilamu, bidi bimueneka bu ne: mbibi. Kadi kakuena anu atshi to. Nzambi, mu buakane buende bupuangane, wakapangadija bua Adama ne Eva bafue bua mibi yabu, kadi kavua mutushiye tuetu ndelanganyi yabu tshianana katuyi ditekemena to. Nzambi wakatulongoluela mushindu wa kutumbusha mu dikenga edi. Ke muaba udi mulambu wa Yezu wa kupikula nawu bantu ubuelela mu tshialu. Tangila kabidi mvese wa Lomo 6:23. Panyima pa Bible mumane kuamba ne: “Difutu dia bubi ndufu,” udi wamba kabidi ne: “Kadi dipa didi Nzambi ufila mmuoyo wa tshiendelele mu Kristo Yezu Mukalenge wetu.” Nunku lufu lua Yezu ke ludi lutunzuluila njila wa tuetu kupanduka ku bubi ne ku lufu. *

 TSHINTU TSHIA KUPIKULA NATSHI BANTU NDIPA DITAMBE BUNENE DIA NZAMBI

Melanie: Kudi kabidi bualu bukuabu mu mvese eu bundi musue kukuleja.

Charli: Mbualu kayi abu?

Melanie: Mona, mvese udi wamba ne: “Dipa didi Nzambi ufila mmuoyo wa tshiendelele mu Kristo Yezu Mukalenge wetu.” Nunku bikalabi ne: Yezu ke udi mutukengele ne mutufuile, mufile muoyo wende bua bualu buetu, bua tshinyi mvese eu udi wakula bua tshia kupikula natshi bantu bu “dipa didi Nzambi ufila?” Bua tshinyi kena wamba ne: “ndipa didi Yezu ufila”? *

Charli: Hmm. Tshiena mumanye to.

Melanie: Nzambi uvua mufuke Adama ne Eva, ne yeye ke uvuabu benzele bubi pavuabu babenge kumutumikila mu budimi bua Edene. Uvua ne bua kuikala munyingalale bikole pavua bana bende ba pa buloba babidi ba kumpala bamutombokele. Kadi Yehowa wakaleja diakamue muvuaye mua kujikija bualu abu. * Wakalongolola bua umue wa ku bana bende ba mu diulu alue pa buloba, ikale muntu mupuangane ne ndekelu wa bionso afile muoyo wende bu mulambu wa kupikula nawu bantu. Nunku mu bulelela, malu onso avua atangila difila dia mulambu wa kupikula nawu bantu avua dipa didi difuma kudi Nzambi. Kudi kabidi bualu bukuabu budi buleja mudi tshintu tshia kupikula natshi bantu tshikale dipa didi difuma kudi Nzambi. Ukadiku muele meji bua tshivua Nzambi mua kuikala mumvue pavuabu bashipe Yezu anyi?

Charli: Tòo, tshitu muanji kuela meji bua bualu abu to.

Melanie: Ndi mumone bintu bia bana kunaya nabi kumpala kua nzubu webe. Udi ne bua kuikala ne bana.

Charli: Mmuomu, ndi ne bana babidi, wa balume ne wa bakaji.

Melanie: Bu muudi muledi, anji elabi meji bua muvua Tatuende wa Yezu udi mu diulu, Yehowa Nzambi, ne bua kuikala mumvue dituku divua Yezu mufue. Ndi nsua kuamba ne: Nzambi uvua mua kuikala mumvue bishi mu diulu pavuaye mumone bakuata muanende munanga, bamufuisha bundu ne bamukuma mankomo? Mmunyi muvua Tatu mumvue kabidi pavuabu bapopele muanende misonso ku mutshi ne bamulekelaku wenda ukenga bua kukula muoyo?

Charli: Uvua ne bua kuikala mumvue bibi be!Tshitu muanji kuelela bualu abu meji to!

Melanie: Mmuomu, mbikole bua tuetu kumvuija menemene muvua Nzambi mumvue dituku adi. Kadi tudi bamanye ne: utu pende unyingalala anyi usanka, ne tudi bamanye kabidi tshivuaye mulekeele malu au enzeka. Mbatumvuije bualu abu bimpe mu mvese udi bantu batambe kumanya wa Yone 3:16. Udiku mua kumubala anyi?

Charli: Eyowa. Udi wamba ne: “Bu muvua Nzambi munange ba pa buloba bikole menemene, wakabapesha Muanende mulela umuepele bua muntu yonso udi uleja ditabuja kudiye kafu, kadi ikale ne muoyo wa tshiendelele.”

Mulambu wa kupikula nawu bantu udi uleja dinanga ditambe bunene dia katshia ne katshia

Melanie: Tuasakidila. Tangila kabidi ku ntuadijilu kua mvese eu. Udi wamba ne : ‘Nzambi uvua munange ba pa buloba.’ Dinanga ke mamuende wa bualu. Dinanga divua disake Nzambi bua kutuma Muanende pa buloba bua kutufuila. Bushuwa, mulambu wa kupikula nawu bantu udi uleja dinanga ditambe bunene dia katshia ne katshia. Bualu ebu ke budi Bantemu ba Yehowa badisangishila bua kuvuluka tshidimu tshionso dituku dia mufikilu wa lufu lua Yezu. Malu atudi bakonkonone aa mmakuambuluishe anyi?

Charli: Eyowa, mmangambuluishe. Tuasakidila bua dîba diudi mupitshishe bua kukonkonona nanyi bualu ebu.

Udiku ne lukonko lua malu a mu Bible ludi lukutatshisha anyi? Udiku ne bualu kampanda buudi musue kumanya pa bidi bitangila Bantemu ba Yehowa anyi? Biobi nanku, kuelakanyi bua kuebeja Ntemu wa Yehowa yonso uwapetangana nende. Neikale ne disanka bua kuyukila nebe.

^ tshik. 5 Bantemu ba Yehowa batu badisangisha musangu umue ku tshidimu dituku dia mufikilu wa lufu lua Yezu bua kuvuluka mulambu wende. Tshidimu etshi, mufikilu wa lufu luende eu newikale mu ditanu dia 3 ngondo 4.

^ tshik. 32 Tshiena-bualu tshikuabu tshia mu biena-bualu ebi netshileje mudi mulambu wa Yezu udi upikula utupandisha ku bubi, ne tshitudi ne bua kuenza bua kutuambuluishawu.

^ tshik. 36 Bilondeshile Bible, Nzambi ne Yezu mbantu babidi bashilangane. Bua kumanya malu makuabu, bala nshapita 4 wa mukanda wa Bible utu ulongesha tshinyi menemene? mupatula kudi Bantemu ba Yehowa.