Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 4 2015

 TSHIENA-BUALU TSHINENE UDIKU MUSUE KULONGA BIBLE ANYI?

Bua tshinyi kulonga Bible?

Bua tshinyi kulonga Bible?
  • Bua tshinyi tudi ne muoyo?

  • Bua tshinyi bantu batu bakenga ne bafua?

  • Ntshinyi tshidi tshituindile kumpala eku?

  • Nzambi utuku uditatshisha bua bualu buanyi anyi?

Kutuku muanji kudiela nkonko ya buena eyi anyi? Biwikala ukadi mudielayi, umanye ne: kuena nkayebe to. Pa buloba bujima, bantu batu badiela nkonko ya mushinga pa bidi bitangila muoyo. Udi mua kupeta mandamuna ayi anyi?

Bantu miliyo ya bungi badi mua kuandamuna ne: “Eyowa!” Mbua tshinyi? Bualu mbapete mandamuna a nkonko yabu adi mabasankishe mu Bible. Udiku musue kumanya tshidi Bible wamba anyi? Nanku witabe bua kulonga Bible ne Bantemu ba Yehowa kuyi ufuta kantu. *

Tshidibi, patutu tuyila bantu bua kulonga nabu Bible, bamue batu bamba ne: “Ndi ne bia bungi bia kuenza.” “Bible mmukole bua kumumvua.” “Tshitu musue kubuelakana mu bintu bienu abi to.” Kadi bakuabu bobu batu bamona malu mushindu mukuabu. Batu banyisha bua kulonga bua kumanya tshidi Bible wamba. Mona bimue bilejilu:

  • Gill mamu kampanda wa mu Angleterre udi wamba ne: “Mvua mubuele mu Katolike ne mu Mishionyi, mu tshitanda tshia bena Sikh ne mu bitanda bia bena Buddha, meme kulonga ne teoloji mu iniversite. Kadi tshivua mupete mandamuna a nkonko yanyi ya bungi pa bidi bitangila Nzambi to. Dimue edi, Ntemu wa Yehowa kuluaye kuanyi. Bu muvua mandamuna a mu Bible avuaye mumpeshe mankemeshe, ngakitaba bua kulonga Bible.”

  • Koffi wa mu Bénin udi wamba ne: “Mvua ne nkonko ya bungi pa bidi bitangila muoyo, kadi mandamuna avua pastere wetu mumpeshe kaavua mantuile to. Kadi Ntemu wa Yehowa kampanda wakandamuna nkonko yanyi anu ne Bible nkayende. Pavuaye mungebeje ni mvua musue kulonga malu makuabu, ngakitaba ne disanka dionso.”

  • José wa mu Brésil udi wamba ne: “Mvua nkeba kumanya tshitu muntu padiye ufua. Mvua ngitaba ne: bafue badi mua kuenzela badi ne muoyo bibi, kadi mvua musue kumanya tshitu Bible yeye wamba. Ke meme kutuadija kulonga Bible ne mulunda wanyi uvua Ntemu.”

  • Dennize wa mu Mexique udi wamba ne: “Mvua nteta bua kubala Bible, kadi tshivua ngumvuamu kantu to. Dimue edi, Bantemu ba Yehowa kuluabu kunyisha, bobu kungumvuija milayi ya buprofete ya bungi ya mu Bible bimpe. Mvua nkeba kumanya malu makuabu kabidi amvua mua kulonga.”

  • Anju wa mu Népal udi wamba ne: “Mvua ndiebeja bikala Nzambi uditatshisha bushuwa bua bualu buanyi. Nunku, ngakangata dipangadika dia kusambila Nzambi wa mu Bible. Dituku diakalonda, Bantemu ba Yehowa bakakokola kuanyi, meme kuitaba bua kulonga Bible.”

Bilejilu ebi bidi bituvuluija mêyi a Yezu a ne: “Badi bamanye ne: mbapele mu malu a mu nyuma mba diakalenga.” (Matayi 5:3) Eyowa, bantu badi ne dijinga dia ku tshileledi dia kumanya malu a mu nyuma. Anu Nzambi ke udi mua kukumbaja dijinga edi, ne udi udikumbaja ku diambuluisha dia Bible udi Dîyi diende.

Kadi kulonga Bible kudi kumvuija tshinyi? Mmunyi mudiku mua kukuambuluisha? Mbandamune nkonko eyi mu tshiena-bualu tshidi tshilonda.

^ tshik. 8 Yehowa ke dîna dia Nzambi didi Bible utuleja.