Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 3 2015

 NKONKO YA BABADI . . .

Pasaka ndifesto dia bena Kristo anyi?

Pasaka ndifesto dia bena Kristo anyi?

Mukanda kampanda udi umvuija Pasaka bu “difesto dinene dia bitendelelu bia bena Kristo bidi bisekelela dibika dia Yezu Kristo ku lufu.” (Encyclopædia Britannica) Kadi nansha nanku, ndifesto dia bena Kristo anyi?

Bua kumanya buimpe bua tshintu kampanda, bitu bikengela kutshikenketa bikole. Bia muomumue, bua tuetu kumanya bikale Pasaka difesto dia bena Kristo, bidi bikengela tukonkonone malu adi atangila difesto edi.

Tshia kumpala, Yezu uvua mulombe bayidi bende bua kuvuluka lufu luende kadi ki ndibishibua diende ku lufu to. Mupostolo Paulo wakabikila tshibilu etshi ne: “Didia dia dilolo dia Mukalenge.”—1 Kolinto 11:20; Luka 22:19, 20.

Tshibidi, mukanda mukuabu udi wamba ne: Malu a bungi adibu benza mu Pasaka “kaena umvuangana” ne dibishibua dia Yezu ku lufu to, kadi adi “afumina mu bilele bia bantu.” Tshilejilu, mukanda kampanda udi wamba bua bintu bitubu benza nabi mudimu bikole mu difesto dia Pasaka bu mudi mayi ne kalulu ne: “Diyi didi dileja muoyo mupiamupia udi muntu upeta, wanji kupitshila ku lufu ludi bu tshizubu tshia diyi.” Udi usakidila kabidi ne: “Kalulu katu kamanyike bua mudiku kalela bana ba bungi, nanku kadi kaleja dilua dia muvu wa luya.” (Encyclopedia of ­Religion)

Philippe Walter, mulongeshi kampanda wa malu a kale udi umvuija muvua bilele bia bantu bifike ku dibuela mu difesto dia Pasaka. Wakafunda ne: “bu muvuabu bajinga bua bitendelelu bia bampangano bilue bu bia bena Kristo,” bivua bipepele bua kulamakajabu difesto dia bampangano divuabu basekelela “dijimina dia muvu wa mashika ne diledibua dia muvu wa luya” ne dibishibua dia Yezu ku lufu. Walter udi wamba kabidi ne: tshivua tshikondo tshinene tshia kubueja “mafesto a bena Kristo” mu a bampangano, bua kusaka bantu ba bungi ku dilua bena Kristo.

Malu au kaavua menzeke patshivua bapostolo ne muoyo to, bualu bavua ‘bapangisha’ bilele bia bampangano bua kabibuedi mu tshitendelelu tshia bena Kristo. (2 Tesalonike 2:7) Mupostolo Paulo wakamba ne: pavuaye ne bua ‘kumbuka,’ bantu bavua ne bua ‘kujuka ne kuakula malu makonyangale bua kukoka bayidi mu nyima muabu.’ (Bienzedi 20:29, 30) Ku ndekelu kua bidimu lukama bia kumpala, mupostolo Yone wakamba mukavua bamue bantu bapambuisha bena Kristo. (1 Yone 2:18, 26) Mushindu eu ke uvua bilele bia bampangano bibuele mu ntendelelu wa bena Kristo.

“Lekelayi kulamakanangana ne bantu badi kabayi bena kuitabuja mu mushindu udi kawuyi muakanangane.”—2 Kolinto 6:14

Bamue bantu badi mua kuela meji ne: ki mbibi bua kuanyisha bimue bilele bia Pasaka, bualu bivua biambuluishe bampangano bua kumvua bimpe mudi dibishibua dia Yezu ku lufu ne mushinga. Kadi, Paulo kavua mua kuikala muitabe bualu abu nansha kakese. Nansha muvuaye mutuilangane ne bilele bia bampangano bia bungi pavuaye wenza ngendu mu Lomo, kavua mubitabe bua kumona mua kumvuija bantu bimpe malu a Yezu to. Kadi wakadimuija bena Kristo ne: “Lekelayi kulamakanangana ne bantu badi kabayi bena kuitabuja mu mushindu udi kawuyi muakanangane. Bualu mmalanda kayi adi pankatshi pa buakane ne dishipa dia mikenji? Anyi ndipetangana kayi didi pankatshi pa butoke ne mîdima? ‘Nunku umbukayi munkatshi muabu, nuditapulule kudibu,’ ke mudi Yehowa wamba, ‘lekelayi kulenga tshintu tshia bukoya.’”—2 Kolinto 6:14, 17.

Malu atudi bakonkonone mu tshikoso aa adi aleja tshinyi? Mmatuleje patoke ne: Pasaka ki ndifesto dia bena Kristo to.