Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 2 2015

 TSHIENA-BUALU TSHINENE MUUDI MUA KUNANGA MUDIMU WEBE

Mua kunanga mudimu mukole

Mua kunanga mudimu mukole

‘Muntu yonso adie biende, anue biende, asanke biende mu midimu yende yonso, bua eku nkupa kua Nzambi.’ (Muambi 3:13) Bikala Nzambi musue bua tunange mudimu utudi tuenza, kabienaku bimueneka ne: udi mua kutuleja mutudi mua kuikala ne disanka dia mushindu eu anyi? (Yeshaya 48:17) Diakalenga, udi wenza nanku ku diambuluisha dia Bible, Dîyi diende. Konkonona mibelu ya mu Bible idi ilonda eyi, idi mua kukupesha disanka mu mudimu webe.

IKALA NE MMUENENU MUIMPE BUA MUDIMU

Nansha mudimu webe ukulomba lungenyi lua bungi anyi makanda a bungi peshi bionso bibidi, ikala mumanye ne: “mudimu wonso mukole udi ne difutu.” (Nsumuinu 14:23) Difutu dia mushindu kayi? Bualu bua kumpala, mudimu mukole udi utuambuluisha bua kukumbaja majinga etu a ku mubidi. Bushuwa, Nzambi mmulaye bua kukumbajila bantu badi bamutendelela ne muoyo mujima majinga abu. (Matayi 6:31, 32) Kadi mmutekemene bua tuenze mudimu ne bululame bua kupeta bia kudiambuluisha nabi mu nsombelu.—2 Tesalonike 3:10.

Nunku, tudi mua kumona mudimu wetu bu mushindu wa tuetu kudiambuluisha. Mudimu mmushindu muimpe wa kukumbaja majitu etu. Joshua udi ne bidimu 25 udi wamba ne: “Kudikumbajila majinga kudi kuambuluisha. Wewe mukumbane bua kusumba tshiudi natshi dijinga, mmumue ne: mudimu uudi wenza mmukumbane.”

Bualu buibidi, mudimu mukole udi wambuluisha bua tuetu kudipesha bujitu. Mu mishindu yonso, mudimu mukole utu anu mukole. Patudi tudienzeja bua kuibidilangana ne mudimu utudi tuenza nansha wowu utonda anyi umueneka mukole, tudi mua kupeta disanka patudi tumanya ne: tudi ne nsombelu wa nsongo. Tudi tulekela lungenyi lua kuepuka mudimu mukole. (Nsumuinu 26:14) Mushindu eu, mudimu udi upetesha disanka dia bungi. Aaron, utudi batele mu tshiena-bualu tshishale udi wamba ne: “Ntu munange bikole mushindu untu ndiumvua meme mumane kuenza mudimu dituku dijima. Ndi mua kudiumvua mutshioke menemene ne mudimu wanyi udi mua kumueneka kauyi ne mushinga ku  mêsu kua bakuabu, kadi ndi mumanye ne: ndi muenze bualu kampanda.”

DIFILA MU MUDIMU WEBE

Bible udi wakula bimpe bua muntu udi wenza ‘mudimu wende ne lungenyi’ ne bua mukaji udi ne ‘disanka dia kuenza mudimu ne bianza biende.’ (Nsumuinu 22:29; 31:13) Bushuwa, muntu kena upiluka mu mudimu diakamue to. Anu bakese ba kutudi ke batu basanka bua kuenza midimu idi kayiyi ibasankisha. Pamuapa ke bualu kayi ba bungi kabatu basue midimu yabu; ki mbasue kudifila bua kupiluka mu mudimu wabu to.

Mu bulelela, bua muntu kunangaye mudimu kayi wonso, anu yeye uwangata ne meji mimpe, mbuena kuamba ne: udifila bua kumanya mua kuwenza bimpe. William udi ne bidimu 24 udi wamba ne: “Paudi udifila ne muebe muonso bua mudimu kampanda ne umona bipeta bidiwu upatula, bidi bienza disanka dia bungi. Kuakuikala wenza mudimu wa pamutu pamutu anyi udilaminyina to.”

IMANYINA PA MUSHINDU UDI MUDIMU WEBE WAMBULUISHA BAKUABU

Epuka lungenyi lua kuimanyina pa bungi bua makuta audi upeta. Kadi diela nkonko eyi: ‘Bua tshinyi mudimu eu udi ne mushinga? Ntshinyi tshidi mua kuenzeka wewe kuyi muenze mudimu eu anyi kuyi muwenze bimpe? Mmunyi mudi mudimu wanyi wambuluisha bakuabu?’

Mbimpe kuela meji nangananga bua lukonko lua ndekelu elu, bualu mudimu udi usankisha bikole patudi tumona mudiwu wambuluisha bakuabu. Yezu nkayende wakamba ne: “Disanka dia kupa ndipite dia kuangata.” (Bienzedi 20:35) Pa kumbusha bantu badi mudimu wetu wambuluisha buludiludi bu mudi bantu badi basumba bintu bitudi tuenza anyi bamfumu betu ba mudimu, kudi bantu bakuabu badi mudimu wetu mukole wambuluisha. Mu bantu abu mudi bena mu dîku dietu ne bantu badi dijinga ne diambuluisha.

Bena mu dîku dietu. Padi mfumu wa dîku wenza mudimu mukole bua kukebela bena mu dîku diende bia kudiambuluisha nabi, udi ubambuluisha mu mishindu ibidi. Tshia kumpala, udi wenza bua ne: bikale ne bintu bia ku mubidi bidi ne mushinga bu mudi: biakudia, bilamba ne muaba wa kulala. Dîba adi, udi ukumbaja mudimu udi Nzambi mumupeshe wa ‘kukumbaja majinga a badiye nabu.’ (1 Timote 5:8) Tshibidi, muenji wa mudimu muimpe udi ulongesha bakuabu mudi mudimu mukole ne mushinga padiye yeye muine uwenza bikole. Shane utuvua betele mu tshiena-bualu tshishale udi wamba ne: “Papa wanyi udi tshilejilu tshimpe tshia muenji wa mudimu. Mmuntu udi ne bululame, utu wenza mudimu bikole mu nsombelu wende mujima, ne mudimu utuye utamba kuenza bikole mmudimu wa mabaya. Ku diambuluisha dia tshilejilu tshiende, mvua mumone mudibi ne mushinga bua kuenza mudimu ne kuenza bintu bidi biambuluisha bakuabu.”

Bantu badi dijinga ne diambuluisha. Mupostolo Paulo wakabela bena Kristo bua ‘kuenza mudimu mukole, bua bikale ne tshintu tshia kuabanyina muntu udi ukengela bintu.’ (Efeso 4:28) Bushuwa, patudi tuenza mudimu mukole tudi tukumbaja majinga etu ne a bena mu dîku dietu, tudi kabidi mua kuambuluisha bantu badi kabayi ne mushindu. (Nsumuinu 3:27)  Nunku mudimu mukole udi mua kutupetesha disanka dia bungi dia kupa.

ENZA MUDIMU WA BUNGI UPITSHISHA

Mu muyuki wa Yezu wa pa Mukuna, wakamba ne: “Bikala muntu udi ne bukokeshi mukuenzeje bua kuya nende ntanta wa kilometre umue, wende nende ibidi.” (Matayi 5:41) Mmunyi muudi mua kutumikila mêyi aa mu mudimu webe wa bianza? Pamutu pa wewe kudilaminyina mu mudimu, keba mushindu wa kuenza bia bungi kupitshisha. Difundila tshipatshila; enza mudimu webe bimpe menemene anyi wenza ne lukasa luonso. Ikala ne disanka nansha mu tumalu tukese tudi tutangila mudimu webe.

Paudi wenza bia bungi, udi unanga bikole mudimu webe. Bua tshinyi? Bualu udi ne malu ebe onso mu bianza. Udi udifila bikole bualu udi musue, kadi ki mbualu muntu kampanda mmukuenzeje to. (Filemona 14) Mu bualu ebu, tudi mua kuvuluka dîyi didi mu Nsumuinu 12:24 didi diamba ne: ‘Tshianza tshia bena tshisumi netshikokeshe, kadi bianza bia bafube nebabienzeje mudimu mukole ku makanda.’ Bushuwa, bamue ba kutudi nebavuijibue bapika bena dîna anyi nebabenzeje mudimu ku makanda. Kadi muntu udi wenza mudimu udilaminyina udi mua kudiumvua bu mupika, misangu yonso muikale ku bukokeshi bua bakuabu. Kadi muntu udi wenza mudimu wa bungi ne wenza nanku bualu mmusue, udi udiumvua muikale ne malu a mu nsombelu wende mu bianza. Udi mmfumu wa malu adiye wenza.

TEKA MUDIMU PA MUABA WAWU

Mudimu mukole mmuimpe, kadi tudi ne bua kuvuluka ne: kudi malu a bungi a kuenza mu nsombelu wetu pakumbusha mudimu. Bushuwa, Bible udi utulomba bua kuikala ne tshisumi. (Nsumuinu 13:4) Kadi kena usaka bantu bua kuenza mudimu kabayi balekela nansha. Muambi 4:6 udi wamba ne: “Tshianza tshimue tshiuwule tente ne dikisha ntshimpe kupita bianza bibidi biuwule tente ne mudimu mukole ne kuipata kua lupepele.” Tshilumbu tshidi penyi? Muntu udi wenza mudimu kayi ulekela kena mua kusanka nansha kakese bua bipeta bidi bifuma ku mudimu wende bikala mudimu wende udia dîba diende dionso ne makanda ende onso. Dîba adi, mudimu wende udi ulua “kuipata kua lupepele.”

Bible udi mua kutuambuluisha bua kuikala ne mmuenenu muimpe bua mudimu. Nansha mudiye wamba ne: tudi ne bua kudifila bikole ku mudimu wetu, udi kabidi utubela bua kukeba “mua kumanya malu adi ne mushinga wa bungi.” (Filipoyi 1:10) Mmalu kayi adi ne mushinga wa bungi? Amue a ku malu a mushinga ngowu aa: kukeba dîba dia kusomba ne bena mu dîku ne balunda. Malu a Nzambi adi pawu ne mushinga wa bungi, tshilejilu: kubala Dîyi dia Nzambi ne kuelelapu meji.

Bantu badi ne nsombelu wa nkatshinkatshi badi basanka bikole bua mudimu wabu. William utudi batele kuulu eku udi wamba ne: “Umue wa ku bamfumu banyi ba mudimu ba kale udi wenza mudimu ne nkatshinkatshi. Udi wenza mudimu bikole ne udi upetangana ne bantu batu basumba bintu biende bua mudiye wenza mudimu muimpe. Kadi ku ndekelu kua dituku pakadiye muenze mudimu, mmumanye mua kumbuka ku mudimu wende ne kutabalela bena mu dîku diende ne kudifila mu malu a ntendelelu. Katshia ngamanya bantu, mmuntu wa disanka dia bungi!”