Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 1 2015

Tudi ne bua kusambila Yezu anyi?

Tudi ne bua kusambila Yezu anyi?

M UKEBULUDI kampanda uvua muele matuku adi panshi aa bana bapite pa 800 ba mu bitendelelu bipite pa dikumi ne bibidi nkonko bua kumanya ni badi bitaba ne: Yezu udi wandamuna masambila abu. Bana bia pa lukama bipite pa 60 bakamba ne: Yezu udi wandamuna masambila abu. Kadi muana umue uvua mubenge ne: Yezu kena wandamuna masambila to, anu Nzambi ke udi wandamuna.

Wewe udi wela meji kayi? Tudi ne bua kusambila Yezu anyi peshi Nzambi? * Bua kuandamuna, tuanji kukonkonona muvua Yezu mulongeshe bayidi bende mua kusambila.

YEZU UVUA MUTULONGESHE BUA KUSAMBILA NGANYI?

Yezu uvua mutulongeshe mua kusambila ne mutuleje utudi ne bua kusambila.

Yezu mmutushile tshilejilu tshia kulonda pavuaye musambile Tatuende wa mu diulu

DILONGESHA DIENDE: Pavua umue wa ku bayidi ba Yezu mumuebeje ne: “Mukalenge, tulongesha mua kusambila,” Yezu wakabambila ne: “Misangu yonso inudi nusambila nuambe ne: ‘Tatu.’” (Luka 11:1, 2) Mu muyuki wende wa pa Mukuna muende lumu, Yezu wakalomba bateleji bende bua kusambila. Wakamba ne: “Usambile Tatu webe.” Wakabajadikila kabidi wamba ne: “Tatu wenu, mmumanye binudi nabi dijinga kumpala mene kua nuenu kumulombabi.” (Matayi 6:6, 8) Mu butuku buende bua ndekele bua pa buloba, Yezu wakambila bayidi bende ne: “Nuenu balombe Tatu tshintu, neanupeshatshi mu dîna dianyi.” (Yone 16:23) Nunku Yezu uvua mutulongeshe bua kusambila Yehowa Nzambi udi Tatuende ne Tatuetu kabidi.—Yone 20:17.

TSHILEJILU TSHIENDE: Bilondeshile muvuaye ulongesha bakuabu mua kusambila, Yezu nkayende wakasambila wamba ne: “Tatu wanyi, Mukalenge wa diulu ne buloba, ndi nkutumbisha kumpala kua bantu.” (Luka 10:21) Dituku dikuabu, “Yezu kutangila muulu, kuambaye ne: ‘Tatu wanyi, ndi nkuela tuasakidila bua muudi munteleje.’” (Yone 11:41) Nansha pakavuaye wenda ukuula muoyo, Yezu wakasambila wamba ne: “Tatu wanyi, ndi nteka muoyo wanyi mu bianza biebe.” (Luka 23:46) Pavua Yezu musambile Tatuende wa mu diulu wamba ne: “Mukalenge wa diulu ne buloba,” mmushile bantu bonso tshilejilu tshimpe tshia kulonda. (Matayi 11:25; 26:41, 42; 1 Yone 2:6) Bayidi ba Yezu ba kumpala bavuaku bumvue dilongesha edi bimpe anyi?

BENA KRISTO BA KUMPALA BAVUA BASAMBILA NGANYI?

Panyima pa mbingu Yezu mumane kupingana mu diulu, baluishi bavua bakengesha bayidi bende bikole. (Bienzedi 4:18) Bushuwa, bavua basambila bua kupeta diambuluisha, kadi bavua basambila nganyi? “Bakabandisha mêyi abu kudi Nzambi mu buobumue,” basambila bua atungunuke ne kubambuluisha ‘mu dîna dia muena mudimu wende wa tshijila Yezu.’ (Bienzedi 4:24, 30) Nunku bayidi ba Yezu bakalonda tshivuaye mubambile bua disambila. Bakasambila Nzambi, kadi ki n’Yezu to.

Bidimu bia bungi pashishe, mupostolo Paulo wakaleja muvuaye yeye ne bena diende basambila. Mu mukanda uvuaye mufundile bena Kristo nende wakamba ne: “Tudi tuela Nzambi Tatu wa Mukalenge wetu Yezu Kristo tuasakidila misangu yonso patudi tusambila bua bualu buenu.” (Kolosayi 1:3) Paulo wakafundila bena Kristo nende ne: uvua ‘wela misangu yonso Nzambi wetu ne Tatu tuasakidila bua malu onso mu  dîna dia Mukalenge wetu Yezu Kristo.’ (Efeso 5:20) Bilondeshile mêyi aa, tudi tumona ne: Paulo uvua usaka bantu bakuabu bua kusambila ‘Nzambi wende ne Tatu bua malu onso,’ kadi mu dîna dia Yezu.—Kolosayi 3:17.

Anu bu bena Kristo ba kumpala, tudi mua kuleja mutudi banange Yezu patudi tulonda mubelu wende bua disambila. (Yone 14:15) Patudi tusambila Tatu wetu wa mu diulu nkayende, mêyi a mu Musambu 116:1, 2 adi alua ne diumvuija dinene kutudi. Adi amba ne: ‘Ndi munange Yehowa, bualu udi umvua dîyi dianyi. Nemmubile matuku onso antshidi ne muoyo.’ *

^ tshik. 3 Bilondeshile Bible, Nzambi ne Yezu kabena mushindu umue to. Bua kumanya malu makuabu, bala nshapita 4 wa mukanda wa Bible utu ulongesha tshinyi menemene? mupatula kudi Bantemu ba Yehowa.

^ tshik. 11 Bua Nzambi kutelejaye masambila etu, tudi ne bua kudienzeja bua kutumikila mikenji yende ne muoyo mujima. Bua kumanya malu makuabu, bala nshapita wa 17 mu mukanda wa Bible utu ulongesha tshinyi menemene?