Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 1 2015

Uvua mumanye anyi?

Uvua mumanye anyi?

Muaku wa mu Bible wa ne: “muntu mutungula” udi umvuija tshinyi?

Amue malu a diumbuka dia muena ashû ku bupika bua ditungula

Imue misangu muaku eu udi mua kuleja muntu uvuabu bapakule. Mu bikondo bivuabu bafunda Bible bavua bapakula bamue bantu balume bu dinyoka anyi bua kuleja mudibu babakuate ku bupika. Bantu balume bavuabu bapakule bavua babateka balami ba bakaji mu nzubu ya bamfumu. Tshilejilu, bantu batungula aba: Hegai ne Shâshagaza bavua balama bakaji basele ne bakaji bakuabu ba Ahashawelosha Mukalenge wa Pelasa, uvua mua kuikala Ahashawelosha I.—Esetê 2:3, 14.

Kadi, ki bantu bonso badi Bible ubikila ne: bantu batungula bavuabu bapakule to. Bamue bamanyi ba malu a mu Bible badi bamba ne: muaku muntu mutungula bavua kabidi benza nawu mudimu bua kuakula bua muanzu wa bantu bavua benza mudimu mu lupangu lua mukalenge. Mushindu eu ke udibu benza nawu mudimu bua Ebede-meleke muena dia Yelemiya ne bua muena Etshiopi uvuabu kabayi bamanye dîna diende uvuabu bayishe kudi Filipo. Ebede-meleke uvua ne muanzu munene mu lupangu lua mukalenge bualu uvua uya kudi mukalenge Sedekiya dîba dionso divuaye musue. (Yelemiya 38:7, 8) Muena Etshiopi bu mulami wa bintu bia mukalenge uvua “muye ku Yelushalema bua kutendelela.”—Bienzedi 8:27.

Bua tshinyi balami ba mikoko ba mu tshikondo tshivuabu bafunda Bible bavua batapulula mikoko ne mbuji?

Pavua Yezu wakula bua dilumbuluisha dienzeka mu matuku atshilualua wakamba ne: “Palua Muana wa muntu mu butumbi buende, . . . neatapulule bantu anu bu mudi mulami wa mikoko utapulula mikoko ne mbuji.” (Matayi 25:31, 32) Bua tshinyi balami ba mikoko bena dîna batu batapulula nyama eyi?

Mu bulelela, bavua mua kusangisha mikoko ne mbuji bua kudia kaba kamue munkatshi mua dituku. Butuku bavua mua kuyela mu bikumbi bua kuyikuba ku nyama ya luonji, bivi ne ku mashika. (Genese 30:32, 33; 31:38-40) Bavua mua kutapulula mishindu ya nyama ibidi eyi mu bikumbi bua kukuba mikoko ivua kayiyi ne bukole nangananga mikoko mikaji ne bana ba mikoko bua kabayenzedi bibi kudi mbuji ivua ne luonji. Mukanda kampanda (All Things in the Bible) udi wamba ne: balami ba mikoko bavua batapulula mikoko ne mbuji mu tshikondo tshivuabu “bayidisha, bakama mabele ayi ne bakosa miosa yayi.” Nunku tshilejilu tshivua Yezu mufile tshivua tshivuluija bateleji bende tshilele tshivuabu bamanye mu bitupa bivuabu balama mikoko mu Isalele wa kale.