Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 1 2015

 TSHIENA-BUALU TSHINENE MBULAMATADI UDI KAYI NE DIKOSA DIA MISHIKU

Mudi dikosa dia mishiku dinyanga mbulamatadi

Mudi dikosa dia mishiku dinyanga mbulamatadi

Dikosa dia mishiku dia mbulamatadi ndimanyike bikole bu bualu budi bunyanga manême a bantu bua kudisankisha. Tshilumbu etshi ki ntshituadije lelu to. Tshilejilu, mu mikenji ya mu Bible mudi mukenji udi ukandika didia dia mishiku ku tubadi, bileja ne: ngikadilu eu uvua mumanyike bimpe kukadi kupite bidimu 3 500. (Ekesode 23:8) Bushuwa, dikosa dia mishiku didi dikonga malu a bungi. Banene ba mbulamatadi badi badia mishiku, batu misangu ya bungi biba bintu, bangata anyi biba makuta mu midimu idibu kabayi ne bukenji. Badi kabidi mua kuenza mudimu ne mianzu yabu bua kubingisha balunda babu ne balela babu mu mushindu udi kawuyi muimpe to.

Nansha mudi dikosa dia mishiku mua kuikala mu bulongolodi buonso bua bantu, bidi bimueneka ne: dikosa dia mishiku mu malu a mbulamatadi ndibi diodi bikole menemene. Tshikandakanda kampanda tshidi tshiamba ne: bantu ba pa buloba bujima badi ne mmuenenu wa ne: bibambalu binene bitanu bidi bidia mishiku bikole, mbia malu a tshididi, bampulushi, bamfumu ba mbulamatadi, bedi ba mikenji ne bakoshi ba bilumbu. Tumonayi imue luapolo idi atangila tshilumbu etshi. The 2013 Global Corruption Barometer.

  • AFRIKE: Mu 2013, bavua babande bamfumu ba mbulamatadi batue ku 22 000 ba mu Afrique du Sud bua didia dia mishiku.

  • AMERIKE: Mu 2012, mu ditunga dia Brézil bavua bakuate bantu 25 bavua biba makuta a mbulamatadi bua kusaka bantu bua babapeshe mianzu mu malu a tshididi. Munkatshi mua bantu bavuabu bakuate abu muvua mulombodi wa bena dia mfumu wa kale, uvua muntu muibidi uvua ne bukole mu ditunga.

  • ASIE: Mu Seoul, mu Korée wa ku Sud, bantu 502 bakafua mu magazin manene avua mupuke mu 1995. Bantu bavua baye kuenza lunketu bavua bamone ne: bamfumu ba mbulamatadi ba mu tshimenga atshi bavua badie mishiku bua kuanyishila bibaki bua kuibaka magazin aa ne bintu bia luibaku bivua kabiyi bimpe ne kudiata mikenji ya luibaku idi ikuba bantu ku njiwu.

  • KU MPUTU: Cecilia Malmström udi utangila tshibambalu tshidi tshitangila midimu ya malu a mu ditunga udi wamba ne: “Mushindu udi dikosa dia mishiku divulangane ku Mputu, bidi bitshiokesha mu lungenyi. Udi wamba kabidi ne: bena mbulamatadi kabena badifila ne muoyo mujima bua kumbusha malu a dikosa dia mishiku to.”

Didia dia mishiku dia bena mbulamatadi ndiele miji. Mulongeshi Susan Rose-Ackerman mumanyi mupiluke wa malu a dibenga kudia mishiku wakafunda ne: bua kujikija tshilumbu etshi “mbulamatadi udi ne bua kuenza mashintuluka manene mu ngenzelu wende wa mudimu.” Nansha mudibi bimueneka bu kakuena ditekemena bua kujikija tshilumbu etshi, Bible udi uleja ne: mashintuluka manene neenzeke bushuwa.