Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 12 2014

Ndi ne bua kusomba makuta anyi?

Ndi ne bua kusomba makuta anyi?

Mu Tshiluba batu bamba ne: “Kusomba makuta nkutekete, kadi kuafuta nkukole.”

MÊYI aa mmamanyike bikole mu Afrike ne adi aleja mutu bantu ba bungi badiumvua pa buloba bujima. Ke muudi udiumvua pebe paudi usomba makuta kudi mulunda webe anyi kudi muntu kampanda anyi? Nansha mudi kusomba makuta mua kumueneka kuimpe imue misangu, ndungenyi luimpe anyi? Njiwu kayi anyi ndutatu kayi ludi mua kumueneka mu disomba dia makuta?

Lusumuinu kampanda lua mu Tshiluba ludi luleja muji wa bualu luamba ne: “Mabanza atu anyanga bulela.” Bushuwa, mabanza adi mua kushipa bulunda ne bulela. Nansha wewe usomba makuta ne meji mimpe, malu adi mua kupanga kuenda muuvua muelele meji. Tshilejilu, dîba diuvua mulaye diodi dikumbane kuyi muanji kufuta makuta, muena dibanza udi mua kufika munda. Musombeshanganyi wa makuta yeye mufike munda, malanda ende ne udi mumusombe makuta adi mua kunyanguka, nansha malanda a bena mu mêku abu. Bu mudi kusomba makuta kukebesha bilumbu, katuena ne bua kukumona bu bualu bupepele to. Bua tuetu kusomba makuta anu tuetu batete tshionso tshia kuenza bapangile.

Kusomba makuta kudi mua kunyanga malanda a muntu ne Nzambi. Mushindu kayi? Tshia kumpala, Bible udi wamba ne: muntu mubi ngewu udi usomba makuta, ubenga kuafuta ku bukole. (Musambu 37:21) Udi kabidi uleja patoke ne: “musombi wa bintu udi mupika wa musombeshi.” (Nsumuinu 22:7) Musombi wa makuta udi ne bua kumanya ne: padiye kayi muanji kufuta makuta utshidi ku bukokeshi bua udi mumusombeshe makuta. Lusumuinu lukuabu lua mu Afrike ludi luamba ne: “Wewe musombe mikolo ya muntu, neuye kuonso kudiye ukutuma.” Lusumuinu eu ludi lusua kuleja ne: muntu udi ne dibanza dia bende kena ne budikadidi bua kuenza tshidiye musue.

Ke bualu kayi muntu udi musombe makuta udi ne bua kumona diapingaja ne mushinga wa bungi. Yeye kayi muenze nanku, ntatu neyimueneke. Kuvudija mabanza kudi mua kukebela muntu ntatu, dipangila tulu, dienza mudimu bikole, bilumbu mu dibaka, bidi nansha mua kufikisha ku dishipa dia dibaka, katuyi tupua muoyo difundibua kua mbulamatadi anyi diedibua mu buloko. Kudi mêyi a meji adi mu Lomo 13:8 adi amba ne: “Kanuikadi ne muntu dibanza dikuabu anu dia kunangangana.”

 BIDI NE MUSHINGA BUA KUSOMBA MAKUTA ANYI?

Bilondeshile bionso bitudi bamone ebi, bidi bikengela kuikala ne budimu bua bungi kumpala kua kusomba makuta. Lukonko lua meji luudi mua kudiela ngelu: ndi bushuwa ne dijinga ne kusomba makuta anyi? Udi usomba makuta bua kuambuluisha dîku diebe bua kuleja muudi uditabalela anyi? Peshi udi usomba ne meji a lukuka pamuapa ujinga kuikala ne bia bungi bipite biudi nabi anyi? Imue misangu, mbimpe kusanka ne bikese biudi nabi pamutu pa kudibueja mu mabanza.

Bushuwa, kudi amue malu adi mua kusaka muntu bua kusomba makuta bu mudi padiku bualu bua tshimpitshimpi ne muntu kayi ne tshikuabu tshia kuenza. Nansha nanku, muntu yeye muangate dipangadika dia kusomba, udi ne bua kuleja mudiye wenza malu ne bululame. Mmunyi mudiye mua kuenza nanku?

Tshia kumpala, kukebi bua kusomba makuta bua kumuenena muntu bualu udi ne makuta a bungi anyi bintu bia bungi to. Katuena ne bua kuela meji ne: bu mudi muntu ne makuta a bungi udi utusombeshawu bua kutuambuluisha to. Anyi kuela meji ne: katuena benzejibue bua kuenza malu ne bululame kumpala kua muntu wa mushindu eu to. Ki mbimpe nansha kualakana muntu wa mushindu eu bua makuta adiye nawu to.—Nsumuinu 28:22.

Pashishe, ikala mutuishibue ne: neufute makuta audi musombe, ne uafute ne lukasa luonso. Bikala mukusombeshi kayi mukukosele tshikondo tshia kuafuta, udi ne bua kumuambila dîba dia kuafuta ne udi ne bua kuafuta pa dîba adi. Mbimpe bua nuenu kufunda diumvuangana dienu edi mu mukanda bua kuepuka dipangilangana ku mêyi. (Yelemiya 32:9, 10) Koku mushindu, upingajile muntu udi mukusombeshe yeye nkayende makuta bua umone mua kumuela tuasakidila. Kufuta tshiudi musombe kudi kulengeja malanda. Yezu wakamba mu Muyuki wende wa pa Mukuna ne: “Panudi nuamba dîyi ne: ‘Eyowa,’ dikale anu eyowa; panudi nuamba ne: ‘Tòo,’ dikale anu tòo.” (Matayi 5:37) Misangu yonso mbimpe kuvuluka Dîyi dia Mushinga mukole edi: “Nunku malu onso anudi basue bua bantu banuenzele, nudi ne bua kubenzelawu penu.”—Matayi 7:12.

MIBELU YA MU BIBLE IDI MUA KUKUAMBULUISHA

Bible udi ufila mubelu muimpe wa kulonda bua kusombangana makuta. Udi wamba ne: “Mu kuamba kuimpe, dilamata Nzambi didi ne dikuatshisha dinene bituikala tusanka ne bintu bitudi nabi.” (1 Timote 6:6) Mu mêyi makuabu, kusanka ne bitudi nabi mmushindu muimpe wa kuepuka bipeta bibi bidi bifuma ku disombangana makuta. Nansha nanku, kabitu anu bipepele bua kusanka ne bitudi nabi lelu eu mu bulongolodi bubi ebu. Ke bualu kayi “dilamata Nzambi” didi ne mushinga. Mu mushindu kayi?

Tuangate tshilejilu tshia bena dibaka kampanda bena Kristo ba mu Asie. Patshivuabu bana, bavua banyisha bikole bantu bavua ne yabu mpangu. Nunku bakangata dipangadika dia kusumba luabu lupangu ne makuta avuabu nawu ne aa avuabu basombe ku banke ne kudi balela babu. Kadi matuku makese pashishe, bakatuadija kumvua bujitu bua kufuta makuta awu ku ngondo yonso. Bakatuadija kuenza midimu ya bungi, ibangata mêba a bungi dituku dionso, ibashila dîba dikese dia kutabalela bana babu. Tatu udi wamba ne: “Bua dibungama, ntatu ne dipanga kulala tulu biakamfikisha bua kudiumvua bu muntu muambule dibue dia bujitu bua bungi mu mutu. Bivua binemene bujitu.”

“Kuikala ne mmuenenu wa mu nyuma bua bintu bia ku mubidi mbukubi”

Mu kupita kua matuku, bakavuluka mêyi adi mu 1 Timote 6:6 ne kuangatabu dipangadika dia kusumbisha lupangu luabu alu. Bivua bibangate bidimu bibidi bua bujitu ebu kumbukabu pambidi pabu. Bena dibaka aba mbapete dilongesha kayi mu bualu ebu? Bavua bambe ne: “kuikala ne mmuenenu wa mu nyuma bua bintu bia ku mubidi mbukubi.”

Bantu ba bungi mbamanye mêyi a mu Tshiluba atuvua batele kuulu eku. Kadi ki mmabapangishe bua kusombangana makuta to. Ku diambuluisha dia mibelu ya mu Bible itudi bakonkonone kuulu eku, ki mbimpe bua kuela meji ne kudiebeja ne muoyo mujima bua ne: Ndi ne bua kusomba makuta anyi?