Udiku ne mulunda webe wa pa muoyo kampanda uudi kuyi mumanye dîna diende anyi? Kabiena mua kuenzeka to. Irina mamu wa mu Bulgarie udi uleja ne: “Muntu kena mua kusemena pabuipi ne Nzambi yeye kayi mumanye dîna diende to.” Diakalenga, anu mudibi bileja mu tshiena-bualu tshishale, Nzambi mmusue bua usemene pabuipi nende. Ke bualu kayi ku diambuluisha dia Bible, mmudileje kuudi wamba ne: ‘Meme ndi Yehowa, adi ndîna dianyi.’—Yeshaya 42:8.

Ku diambuluisha dia Bible, Nzambi mmudileje kuudi wamba ne: ‘Meme ndi Yehowa, adi ndîna dianyi.’—Yeshaya 42:8

Kumanya dîna dia Nzambi ne kuditela anyi kubenga kudimanya bidiku ne mushinga kudi Yehowa anyi? Tukonkonone bualu ebu: dîna dia Nzambi didibu bafunda ne maleta anayi matshintamane a mu tshiena Ebelu didi disanganyibua misangu mitue ku 7000 mu mifundu ya ntuadijilu ya mu Mifundu ya tshiena Ebelu. Mbaditele misangu ya bungi mu Bible kupita mêna makuabu. Ntshijadiki tshidi tshileja ne: Yehowa mmusue bua tumanye dîna diende ne tuikale tuditela. *

Pa tshibidilu bulunda butu butuadija pankatshi pa bantu babidi padibu bambilangana mêna abu. Udiku mumanye dîna dia Nzambi anyi?

Bamue bantu badi mua kuela meji ne: bu mudi Nzambi muikale wa tshijila ne wa bukole buonso, kutela dîna diende nkupanga kanemu. Bushuwa, mbibi bua kutela dîna dia Nzambi mu mushindu mubi anu bu muudi kuyi mua kutela bibi dîna dia mulunda webe wa pa muoyo. Kadi, Yehowa mmusue ne: bantu badi bamunange banemeke dîna diende ne badimanyishe bantu bakuabu. (Musambu 69:30, 31; 96:2, 8) Vuluka ne: Yezu wakalongesha bayidi bende bua kusambila mushindu eu: “Tatu wetu udi mu diulu, dîna diebe ditumbishibue.” Tudi mua kutumbishisha dîna dia Nzambi patudi tudimanyisha bantu bakuabu. Kuenza nunku, kudi kutusemeja pabuipi nende.—Matayi 6:9.

Bible udi uleja ne: Nzambi udi uteya ntema bikole kudi bantu ‘badi banemeka dîna diende.’ (Malaki 3:16) Bua muntu wa mushindu eu, Yehowa udi umulaya wamba ne: “Nemmukube bualu yeye mmumanye dîna dianyi. Yeye neambikile, meme nemmuitabe. Nengikale nende mu dikenga.” (Musambu 91:14, 15, NWT) Kumanya dîna Yehowa ne kuditela kudi ne mushinga tuetu basue kuikala nende mu malanda mimpe.

^ tshik. 4 Bia dibungama, nkudimuinu ya bungi ya Bible kayena ne dîna dia Nzambi nansha mudidi disanganyibua miaba ya bungi mu Mifundu ya tshiena Ebelu itubu babikila ne: Dipungila Dikulukulu. Mbapingaje pa muaba wa dîna dia Nzambi mianzu bu mudi “Mukalenge” anyi “Nzambi.” Bua kumanya malu makuabu bua tshiena-bualu etshi, bala malu adimu dibeji dia 195-197 mu mukanda wa Bible utu ulongesha tshinyi menemene? mupatula kudi Bantemu ba Yehowa.