Satana udi bu kapepe kadi kanyanga ne bintu bia mulungu kadi kakayi kamueneka ne kadi ne njiwu

Mbikole bua kujingulula kapepe kadi kanyanga ne bintu bia mulungu. Bualu kakatu kamueneka ne kakatu ne mupuya. Kadi mua kushipa bantu mu tshimpitshimpi. Badi baleja ne: mu bantu badi bafua pa buloba bua mulungu, bantu bapite pa tshia bibidi badi bafua bua kapepe kabi aka. Kadi kupampakanyi to. Kudi mushindu wa wewe kujingulula kapepe aka ne kudikuba. Bantu ba bungi mbenze ne meji biamu bidi mua kudimuija bantu bua kapepe aka, ne ntema yabu yonso mmituma ku didimuija dia biamu ebi.

Anu bu kapepe kabi kadi kanyanga ne bintu bia mulungu, Satana kena umueneka, mbikole bua bantu kumujingulula ne udi ukebela bantu njiwu mikole. Kadi Nzambi ki mmutulekele mu bualu ebu to. Wewe muenze mudimu ne mapa adi Nzambi mutupeshe aa kuakutshina Satana to:

Bukole bua kudisunguila tshia kuenza. Yakobo 4:7 udi wamba ne: “Nukandamene Diabolo ne yeye neanunyeme.” Nansha mudi Satana ne bukole, kena mua kukuenzeja ku bukole bua kuenza malu audi kuyi musue kuenza to. Wewe ke udi ne bua kudisunguila tshia kuenza. 1 Petelo 5:9 udi wamba ne: “Numukandamene [Diabolo], bashindame mu ditabuja.” Vuluka ne: pavua Yezu mubenge mateta asatu a Satana, Satana wakamushiya. (Matayi 4:11) Nansha wewe pebe udi mua kusungula bua kukandamena Satana.

Bulunda ne Nzambi. Yakobo 4:8 udi utukankamija bua ‘kusemena pabuipi ne Nzambi.’ Yehowa nkayende udi ukulomba bua kudia nende bulunda. Mmushindu kayi uudi mua kuenza bualu ebu? Mushindu muimpe wa kutuadija nkulonga malu adi amutangila mu Bible. (Yone 17:3) Malu audi ulonga bua Yehowa neakusake bua kumunanga ne dinanga edi nedikusake padi bua wewe kuenza disua diende. (1 Yone 5:3) Wewe musemene pabuipi ne Tatu webe wa mu diulu, yeye pende neenze tshinyi? Yakobo udi utungunuka wamba ne: Nzambi ‘neasemene pabuipi nebe.’

Yehowa udi ufila biakudia bia mu nyuma bua kukukuba

Mulayi wa kutukuba. Nsumuinu 18:10 udi wamba ne: ‘Dîna dia Yehowa didi tshibumba tshikole; muntu muakane udi unyemenaku, udi upanduka.’ Bushuwa, kabiena bisua kumvuija ne: dîna dia Nzambi ntshintu kampanda tshidi mua kututshisha muntu dikasa dimpe mu tshishima to. Kadi bidi biumvuija ne: bantu badi banemeka dîna dia Nzambi ne muoyo mujima badi mua kumubikila bua kubakuba dîba dionso.

Tshilejilu tshia kulonda. Bienzedi 19:19 udi utuambila bualu kampanda budi butangila bena Efeso bavua balue bena Kristo ne: “Bantu ba bungi bavua benza malu a majimbu bakasangisha mikanda yabu, kuyoshabu kumpala kua bantu bonso. Bakabadika mushinga wayi yonso, kusanganabu muikale wa makuta a binjanja bia  arjan 50000.” * Bena Kristo aba bakosha bintu bionso bia malu a majimbu nansha muvuabi bia mushinga wa bungi. Tshilejilu etshi tshidi mua kutuambuluisha bikole lelu. Pa buloba apa malu a majimbu ne a ditendelela dia mpingu mmavulangane bikole. Nansha bintu bia majimbu bidibu banaya nabi ne bilele bidi bimuenaka bu kabiena ne bualu, bidi mua kututuangaja ne bademon. Mbia mushinga bua kumbusha bintu bionso ebi mu nsombelu webe nansha biobi bikale bia mushinga bungi kayi.—Dutelonome 18:10-12.

Rogelio, utuvua bakule bualu buende mu tshiena-bualu tshia ntuadijilu tshia mu biena-bualu ebi, kavua witaba dikalaku dia Diabolo too ne pavuaye mukumbaje bidimu 50. Kadi pashishe wakashintulula mmuenenu wende. Bua tshinyi? Rogelio udi wamba ne: “Ngakapeta Bible bua musangu wa kumpala mu nsombelu wanyi. Dimanya dia malu a mu Bible diakantuisha ne: Diabolo udiku. Dimanya edi didi dinkuba bua kubenga kukuluka mu buteyi bua Diabolo.”

“Dimanya dia malu a mu Bible diakantuisha ne: Diabolo udiku. Dimanya edi didi dinkuba bua kubenga kukuluka mu buteyi bua Diabolo”

Udiku musue kumona dituku dikala Satana katshiyiku anyi? Eyowa, udi mua kudimona. Bible mmudianjile kuleja tshikondo tshikala Diabolo udi upambuisha bantu ba bungi mua kuedibua mu “dijiba dia kapia ne sufre.” (Buakabuluibua 20:10) Bushuwa, kapia kena dîna ne sufre kabiena mua kuenzela tshifukibua tshia mu nyuma bualu nansha bumue. Nunku, dijiba dia kapia didi dileja kabutu ka tshiendelele. Satana neajimine bua kashidi. Disankapu kayi dikala nadi bantu badi banange Nzambi tshikondo atshi!

Kadi bua mpindieu, tungunuka ne kulonga malu onso adi atangila Yehowa ne njila yende. * Ela meji wewe muikale ne muoyo mu tshikondo tshikalabu mua kuamba ne dishindika dionso ne: “Satana kenaku kabidi!”

^ tshik. 8 Bu makuta a binjanja awu wowu mikale a bena Lomo, avua mua kuikala bungi bua makuta avuabu bafuta bena mudimu batue ku 50000 ku dituku! Avua makuta a bungi be!

^ tshik. 11 Bua kumanya malu makuabu pa bidi bitangila Satana ne malu a mîdima, bala nshapita wa 10 mu mukanda wa Bible utu ulongesha tshinyi menemene? Lomba Ntemu wa Yehowa yonso bua akupeshe mukanda eu anyi udi mua kuubala ku Enternete mu www.jw.org.