Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 10 2014

 TSHIENA-BUALU TSHINENE | BUKALENGE BUA NZAMBI—BUDI NE MUSHINGA KAYI KUUDI?

Bukalenge bua Nzambi—Budi ne mushinga kayi kudi Yezu?

Bukalenge bua Nzambi—Budi ne mushinga kayi kudi Yezu?

Pavua Yezu wenza mudimu wende wa diyisha pa buloba, wakakula bua biena-bualu bia bungi. Tshilejilu, wakalongesha bayidi bende mua kusambila, mua kusankisha Nzambi, ne mua kuikala ne disanka dilelela. (Matayi 6:5-13; Mâko 12:17; Luka 11:28) Kadi tshiena-bualu tshivua Yezu utamba kuakuila kupita bikuabu, tshivuaye munange bikole, tshivua Bukalenge bua Nzambi.—Luka 6:45.

Anu mutuvua bamone mu tshiena-bualu tshishale, Yezu uvua mudifile bikole mu mudimu wa ‘kuyisha, kuamba lumu luimpe lua Bukalenge bua Nzambi.’ (Luka 8:1) Uvua mudifilamu ne muoyo mujima, wenza ngendu ya kilometre ya bungi mu buloba bua Isalele bua kulongesha bantu bua Bukalenge bua Nzambi. Mudimu wa diyisha wa Yezu udi mu Evanjeliyo inayi idi ne miaba mipite pa 100 idibu bakuila bua Bukalenge bua Nzambi. Ya bungi ya ku miaba idibu bakule bua Bukalenge bua Nzambi eyi idi mu mêyi a Yezu, ne idi ileja anu ndambu mukese wa malu onso avua Yezu muakule bua Bukalenge bua Nzambi.—Yone 21:25.

Bua tshinyi Bukalenge bua Nzambi buvua ne mushinga wa bungi kudi Yezu pavuaye pa buloba? Bualu, Yezu uvua mumanye ne: Nzambi uvua mumusungule bua kuikala Mukokeshi wa Bukalenge abu. (Yeshaya 9:6; Luka 22:28-30) Kadi Yezu kavua ukoka ntema ya bantu ku bukole buende anyi kavua ujinga bua bamutumbishe to. (Matayi 11:29; Mâko 10:17, 18) Kavua uyisha Bukalenge bua Nzambi bua kudisankisha yeye nkayende to. Tshia kumpala, Yezu uvua udifila ne utshidi utungunuka ne kudifila bua Bukalenge bua Nzambi * bua tshikala Bukalenge ebu mua kuenzela bantu badiye munange: Tatuende wa mu diulu ne bayidi bende ba lulamatu.

TSHIKALA BUKALENGE MUA KUENZA BUA TATUENDE WA YEZU

Yezu mmunange bikole Tatuende wa mu diulu. (Nsumuinu 8:30; Yone 14:31) Udi wanyisha ngikadilu ya Tatuende, bu mudi dinanga, luse, ne buakane. (Dutelonome 32:4; Yeshaya 49:15; 1 Yone 4:8) Bushuwa, Yezu mmukine mashimi adibu batangalaja bua Tatuende bu mudi mashimi a ne: Nzambi kena utabalela bantu anyi a ne: mmusue bua tukenga. Bumue bua ku malu buvua busake Yezu bua kuyisha “lumu luimpe lua Bukalenge” buvua ne: uvua mumanye ne: mu matuku atshilualua, Bukalenge ebu nebulongolole lumu lua Tatuende. (Matayi 4:23; 6:9, 10) Mmunyi muikalabu mua kuenza nanku?

Ku diambuluisha dia Bukalenge buende, Yehowa neashintulule malu bua diakalenga dia bantu. “Neakupule tshinsonji tshionso” ku mêsu kua bena lulamatu. Yehowa neumbushe malu adi akebesha binsonji ebi, mutuishibue ne: “lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi.” (Buakabuluibua 21:3, 4) Ku diambuluisha dia Bukalenge ebu, Nzambi neumbushe ntatu yonso idi nayi bantu. *

Kabiena bikemesha bua muvua Yezu mudifile bikole  bua kuyisha bantu Bukalenge bua Nzambi. Uvua mumanye ne: Bukalenge ebu nebuleje bukole ne luse bidi nabi Tatuende. (Yakobo 5:11) Yezu uvua mumanye kabidi ne: pikala Bukalenge ebu mua kuangata malu mu bianza, nebusankishe bantu bakuabu bena lulamatu badiye munange.

TSHIKALA BUKALENGE MUA KUENZELA BENA LULAMATU

Bidimu bia bungi kumpala kua Yezu kuluaye pa buloba, uvua ne muoyo mu diulu pamue ne Tatuende. Tatu uvua muenze mudimu ne Muana bua kufuka bintu bikuabu bionso: kutuadijila ku diulu didi dikemesha ne mitoto idimu bungi kabuyi kubala, bikata bia mitoto too ne ku dibulunge dietu dimpe edi ne bintu bidipu bidi ne muoyo. (Kolosayi 1:15, 16) Pakumbusha malu aa onso, Yezu uvua mulue ‘kutamba kunanga’ bana ba bantu bikole.—Nsumuinu 8:31.

Dinanga divua nadi Yezu bua bantu divua dimuenekela mu mudimu wende wa diyisha. Ku ntuadijilu kua mudimu wende eu, wakaleja patoke muvuaye mulue pa buloba bua ‘kuambila bapele lumu luimpe.’ (Luka 4:18) Yezu kavua anu muambuluishe bantu ne mêyi patupu, kadi uvua mubambuluishe kabidi mu mushindu mukuabu. Misangu ne misangu uvua muleje mu tshienzedi muvuaye munange bantu. Tshilejilu, pavua musumba wa bantu mudisangishe bua kumuteleja, Yezu “wakabumvuila luse, wakuondopa babedi babu bonso.” (Matayi 14:14) Pavua muntu uvua usama muleje muvuaye ne ditabuja dia ne: Yezu uvua mua kumuondopa yeye musue, dinanga diakasaka Yezu bua kumuondopa. Wakondopa muntu au, e kumuambila ne dinanga dionso ne: “Ndi musue. Lengejibua.” (Luka 5:12, 13) Pavua Yezu mumone mulunda wende Mariya udila bua lufu lua muanabu Lazalo, Yezu “wakashikunkila munda muende, kupampakanaye” ne “wakapuekesha binsonji.” (Yone 11:32-36) Pashishe Yezu wakenza bualu bua dikema, pakabishaye Lazalo ukavua mufue kukavua matuku anayi.—Yone 11:38-44.

Bushuwa, Yezu uvua mumanye ne: disulakana divuaye mufile divua dia tshitupa tshîpi. Uvua mumanye ne: mu matuku makese anyi pashishe, bantu bonso bavuaye muondope bavua mua kusama kabidi, ne bonso bavuaye mujule ku lufu bavua mua kufua kabidi. Kadi Yezu uvua mumanye kabidi ne: Bukalenge bua Nzambi nebujikije ntatu ya mushindu eu bua kashidi. Ke bualu kayi Yezu kavua mudifile bikole mu dienza dia bishima; kadi uvua mudifile ne tshisumi mu diyisha “lumu luimpe lua Bukalenge.” (Matayi 9:35) Bishima bivuaye muenze bivua kadiosha ka tshikala Bukalenge bua Nzambi mua kuenza mu matuku makese pa buloba bujima. Tukonkononayi tshidi Bible ulaya bua tshikondo atshi.

  •  Masama kaakuikalaku kabidi.

    Bible mmulaye ne: ‘Mu dituku adi mêsu a mufofo neatabale, matshi a badi ne mapapa neajikuke. Mu dîba adi muntu mulema neatumpike bu ngulungu, ludimi lua kamama neluimbe misambu.’ Udi wamba kabidi ne: ‘Muena musoko kena wamba ne: Ndi ne disama.’—Yeshaya 33:24; 35:5, 6.

  • Lufu kaluakuikalaku kabidi.

    Bible udi wamba ne: ‘Bantu bakane nebapiane buloba, nebashikamemu tshiendelele.’—Musambu 37:29.

    ‘Yeye wakumina lufu tshiendelele; ne Mukalenge Yehowa neakupule binsonji ku mêsu kua bantu bonso.’—Yeshaya 25:8.

  • Bafue nebapingane ku muoyo.

    Bible udi wamba ne: “Dîba didi dilua diumvua bantu bonso badi mu nkita dîyi diende nebapatuke.”—Yone 5:28, 29.

    “Nekuikale dibika dia [bantu] ku lufu.” —Bienzedi 24:15.

  • Bantu nebikale ne nzubu ne midimu ya kuenza.

    Bible udi wamba ne: ‘Nebase nzubu, nebashikamemu; nebatentule mionji ya tumuma tua mvinyo mu madimi, nebadie tumuma tuayi. Kabena basa nzubu bua mukuabu abuelamu; kabena bakuna bintu bua mukuabu abidie; bantu bangakusungula nebasanke musangu mule mu mudimu wa bianza biabu.’—Yeshaya 65:21, 22.

  •  Mvita kayakuikalaku kabidi.

    Bible udi wamba ne: ‘Yeye udi ulekesha mvita bua ijike too ne kunfudilu kua buloba.’—Musambu 46:9.

    ‘Tshisamba tshikuabu katshiena tshibisha muele wa mvita bua kuluisha nawu tshisamba tshikuabu, ne kabena bayila lungenyi lua kuluangana nalu mvita kabidi.’—Yeshaya 2:4.

  • Nzala kayakuikalaku kabidi.

    Bible udi wamba ne: ‘Buloba buakukuamisha bintu biabu bivule; Nzambi, Nzambi wetu mene, neatuvudijile disanka.’—Musambu 67:6.

    ‘Blé ikale mivule pa buloba, too ne pa mitu pa mikuna, miepu yayi ipepe.’—Musambu 72:16.

  • Bupele kabuakuikalaku kabidi.

    Bible udi wamba ne: ‘Bualu bua kabena bapua badi bakengela bintu muoyo tshiendelele.’—Musambu 9:18.

    ‘Neapandishe mukengedi wa bintu padilaye kudiye, neapandishe muntu mupele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi.’—Musambu 72:12, 13.

Paudi ukonkonona milayi eyi idi itangila Bukalenge bua Nzambi, kuenaku umona bua tshinyi Bukalenge bua Nzambi budi ne mushinga wa bungi kudi Yezu anyi? Pavuaye pa buloba uvua wakula misangu yonso bua Bukalenge kudi muntu yonso uvua musue kumuteleja, bualu uvua mumanye ne: Bukalenge bua Nzambi nebujikije ntatu yonso itudi tutuilangana nayi lelu.

Milayi ya mu Bible idi itangila Bukalenge idiku ne mushinga kuudi anyi? Biobi nanku, mmunyi muudi mua kulonga malu a bungi adi atangila Bukalenge ebu? Ntshinyi tshiudi mua kuenza bua kujadika ne: neupete mabenesha a Bukalenge ebu? Tshiena-bualu tshia ndekelu tshia mu biena-bualu ebi netshiandamune nkonko eyi.

^ tshik. 5 Tshiena-bualu etshi tshidi tshiakula bua malu a Yezu bu malu adi enzeka matuku etu aa bualu Yezu udi ne muoyo mu diulu, ne katshia wapingana mu diulu, udi udifila bikole mu malu adi atangila Bukalenge bua Nzambi.—Luka 24:51.

^ tshik. 8 Bua kumanya bua tshinyi Nzambi mmulekele ntatu ikuata bantu bua tshikondo kampanda, bala nshapita 11 wa mukanda wa Bible utu ulongesha tshinyi menemene? mupatula kudi Bantemu ba Yehowa. Udi mua kuupeta kabidi mu adrese eu: www.jw.org.