Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 10 2014

 TSHIENA-BUALU TSHINENE | BUKALENGE BUA NZAMBI—BUDI NE MUSHINGA KAYI KUUDI?

Bua tshinyi kudifila bikole bua Bukalenge bua Nzambi?

Bua tshinyi kudifila bikole bua Bukalenge bua Nzambi?

Bantu miliyo ya bungi pa buloba mbatekemene Bukalenge bua Nzambi. Badi balonda dikasa dia Yezu, uvua mulongeshe bayidi bende bua kusambila ne: “Bukalenge buebe bulue. Disua diebe dienzeke kabidi pa buloba.”—Matayi 6:10.

Padi bantu ba bungi badifila bikole bua Bukalenge bua Nzambi, bitendelelu bia bungi biobi kabiena bidifila nunku to. Herbert George Wells mumanyi wa malu a kale wakaleja mu tshilumbu etshi ne: Yezu uvua wangata ‘dilongesha dia Bukalenge bua mu Diulu ne mushinga wa bungi,’ kadi bitendelelu bia bungi bia buena Kristo ‘kabiena biangata dilongesha edi ne mushinga mu malongesha abi to.’

Bishilangane ne bitendelelu ebi, Bantemu ba Yehowa bobu badi bakula bikole bua Bukalenge bua Nzambi. Tshilejilu: Tshibejibeji tshietu tshiudi ubala etshi badi batshipatula mpindieu mu miakulu 220. Badi bapatula bibejibeji ebi bitue ku miliyo 46 ne babiabanya pa buloba bujima. Mmukenji kayi munene udi mu tshibejibeji etshi? Tshiena-bualu tshiatshi tshidi ne: Tshibumba tshia Nsentedi tshidi tshimanyisha Bukalenge bua Yehowa.  *

Bua tshinyi Bantemu ba Yehowa badi badifila bikole bua kumanyisha Bukalenge bua Nzambi? Bualu tudi tuitaba ne: Bukalenge bua Nzambi ke mukenji munene udi mu Bible mukanda wa mushinga mukole. Tudi kabidi batuishibue ne: anu Bukalenge bua Nzambi ke budi mua kujikija ntatu idi bantu batuilangana nayi lelu.

Padi Bantemu ba Yehowa bakoka ntema ya bantu ku Bukalenge bua Nzambi, badi badienzeja bua kulonda tshilejilu tshia Yezu. Pavua Yezu pa buloba, Bukalenge bua Nzambi ke bualu buvuaye wangata ne mushinga wa bungi mu nsombelu wende ne mu mudimu wende wa diyisha. (Luka 4:43) Bua tshinyi Yezu uvua wangata Bukalenge bua Nzambi ne mushinga wa bungi? Bukalenge bua Nzambi budi ne mushinga kayi kuudi? Tudi tukulomba bua ubale mandamuna adi Bible ufila adi mu biena-bualu bidi bilonda.

^ tshik. 5 Yehowa ke dîna dia Nzambi bilondeshile Bible.