Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 8 2014

 NKONKO YA BABADI

Uvua mufuke Nzambi nganyi?

Uvua mufuke Nzambi nganyi?

Fuanyikija muledi udi uyukila ne muanende wa balume wa bidimu muanda mutekete. Udi wambila muana ne: “Kukadi bidimu bipite bungi, Nzambi wakafuka buloba ne bintu bionso bidimu, kufukaye dîba, ngondo ne mitoto.” Muana udi wela meji ndambu bua bualu ebu, pashishe webeja ne: “Papa, kadi uvua mufuke Nzambi nganyi?”

Muledi udi wandamuna muana ne: “Kakuena muntu uvua mufuke Nzambi to. Uvuaku katshi kuonso eku.” Diandamuna edi didi mua kusankisha muana dîba adi. Kadi padiye wenda ukola, lukonko elu ludi lutungunuka anu ne kumutatshisha. Kena umvua mudi muntu mua kuikala ne muoyo kayi ne ntuandijilu to. Bualu nansha diulu ne buloba bidi ne ntuandijilu. Udi udiebeja ne: ‘Nzambi mmufumine kuepi?’

Mmunyi mudi Bible wandamuna lukonko elu? Anu muvua muledi wa mu tshilejilu tshietu muandamune, Mose wakafunda ne: ‘Yehowa, wewe udi muaba wetu wa kusombela mu bipungu bionso bia bantu. Kumpala kua mikuna kuledibua, peshi kua wewe kupatula buloba pamue ne buloba budi bumenesha bintu, kashidi ne kashidi, wewe udi Nzambi.’ (Musambu 90:1, 2, NWT) Muprofete Yeshaya pende wakafunda ne: ‘Kuakumanya, anyi? Kuakumvua, anyi? Yehowa udi Nzambi wa tshiendelele, Mufuki wa nseke yonso ya pa buloba too ne kunfudilu kuabu.’ (Yeshaya 40:28) Bia muomumue, mukanda wa Yuda udi uleja ne: Nzambi udiku “katataka ne tshiendelele.”—Yuda 25.

Mvese eyi idi ituleja ne: Nzambi udi “Mukalenge wa tshiendelele,” anu muvua Paulo muleje. (1 Timote 1:17) Ebi bidi bileja ne: Nzambi utu anuku kuonso eku, nansha tuetu katuyi tujingulula bualu ebu bimpe bua bungi bua bidimu. Neikale anu koku nansha mu matuku atshilualua. (Buakabuluibua 1:8) Nunku, dikalaku diende tshiendelele nngikadilu wende munene wa Bukole buende buonso.

Bua tshinyi mbikole bua tuetu kumvua bualu ebu? Bualu muoyo wetu muîpi udi wenza bua kuikale dishilangana dinene mu mushindu utudi tumona bungi bua matuku ne mudi Yehowa uamona. Bu mudi Nzambi muikale wa tshiendelele, matuku tshinunu adi anu bu dituku dimue. (2 Petelo 3:8) Tuangata tshilejilu etshi: mpasu udi wenza anu matuku 50, udiku mua kumvua bungi bua bidimu 70 anyi 80 bidi muntu wenza anyi? Tòo, mbualu bukole. Bia muomumue, Bible udi uleja ne: padibu batufuanyikija ne Mufuki wetu Munene, tudi bu mpasu. Nansha ngelelu wetu wa meji mmushadile bikole ku wende. (Yeshaya 40:22; 55:8, 9) Nunku, kabiena bikemesha bua mudiku amue malu adi atangila Yehowa adi bantu kabayi mua kujingulula bimpe to.

Nansha mudi lungenyi lua ne: kakuena muntu udi mufuke Nzambi lumueneka lukole bua kulumvua, tudi mua kumona ne: ludi lumvuika. Bu koku kuikale muntu udi mufuke Nzambi, mumue ne: muntu au ke uvua ne bua kuikala Mufuki. Kadi anu mudi Bible muikala uleja, Yehowa nkayende ke “wakafuka bintu bionso.” (Buakabuluibua 4:11) Bualu bukuabu, tudi bamanye ne: mu tshikondo kampanda diulu ne buloba kabivuaku to. (Genese 1:1, 2) Mbifume kuepi? Mufuki wabi uvua ne bua kuikalaku kumpala. Uvuaku kumpala kua nansha bifukibua bia meji bu mudi Muanende mulela umuepele ne banjelu kuikalaku. (Yobo 38:4, 7; Kolosayi 1:15) Bidi biumvuika patoke ne: uvuaku nkayende kumpala. Kavua mufukibue kudi muntu kampanda to; bualu kakuvua tshintu anyi muntu ne muoyo kumpala kuende uvua mua kumufuka to.

Dikalaku dietu ne dia diulu ne buloba didi dileja muvuaku Nzambi wa tshiendelele. Muntu udi muenze bua bintu bionso bidi mu diulu bikala binyungakana ne udi muele mukenji udi ubilombola, uvua ne bua kuikalaku kuonso eku. Yeye ke udi mulue kupesha bintu bionso muoyo pashishe.—Yobo 33:4.