Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

Mandamuna a nkonko ya malu a mu Bible

Mandamuna a nkonko ya malu a mu Bible

Bitendelelu bionso bidiku binemeka Nzambi anyi?

Paudi uteleja ngumu ya malu adi enzeka pa buloba, imue misangu ukadi mumone ne: bantu badi benza malu mabi mu dîna dia bitendelelu. Bitendelelu bionso kabiena bitendelela Nzambi mulelela to. (Matayi 7:15) Bantu ba bungi mbapambuke.—Bala 1 Yone 5:19.

Bushuwa, Nzambi mmumanye bantu badi banange tshidi tshimpe ne tshilelela. (Yona 4:23) Nzambi udi ulomba bantu ba buena aba bua kulonga bulelela budi bufumina mu Bible Dîyi diende.—Bala 1 Timote 2:3-5.

Mmunyi muudi mua kumanya tshitendelelu tshilelela?

Yehowa Nzambi udi usangisha bantu ba mishindu yonso pa kubalongesha bulelela ne pa kubalongesha mua kunangangana. (Mika 4:2, 3) Nunku, neumanye tshitendelelu tshilelela mu mushindu udi benamu batabalelangana umue ne mukuabu.—Bala Yone 13:35.

Yehowa udi usangisha bantu ba mishindu yonso ku diambuluisha dia ntendelelu mulelela. —Musambu 133:1

Ditabuja ne nsombelu bia bantendeledi balelela mbimanyine mu Bible. (2 Timote 3:16) Badi kabidi batumbisha dîna dia Nzambi. (Musambu 83:18) Badi bayisha bantu ne: anu Bukalenge bua Nzambi ke budi mua kujikija malu mabi adi pa buloba lelu. (Danyele 2:44) Badi balonda tshilejilu tshia Yezu pa ‘kutokesha butoke’ buabu, benzela bantu nabu malu mimpe. (Matayi 5:16) Bena Kristo balelela mbamanyike kabidi mudibu baya kutangila bantu bakuabu ku nzubu yabu ne kipatshila ka kubayisha lumu luimpe lua Bukalenge bua Nzambi.—Bala Matayi 24:14; Bienzedi 5:42; 20:20.