Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 7 2014

 TSHIENA-BUALU TSHINENE BUA TSHINYI MALU MABI ADI AFIKILA BANTU BIMPE?

Malu mabi adi afikila bantu bimpe—Bua tshinyi?

Malu mabi adi afikila bantu bimpe—Bua tshinyi?

Bu mudi Yehowa * Nzambi ke mufuki wa bintu bionso ne wa bukole buonso, bantu ba bungi badi mua kuela meji ne: yeye ke udi ukebesha malu onso adi enzeka pa buloba, nansha malu mabi. Kadi, tukonkononayi tshidi Bible wamba bua Nzambi mulelela:

  • ‘Yehowa udi muakane mu njila yonso.’—Musambu 145:17.

  • ‘Mudimu wa Nzambi wonso udi muakane, bualu bua njila yende yonso idi milulame: Nzambi wa kalolo udi kayi ne bubi, udi ne malu makane a bushuwa.’—Dutelonome 32:4.

  • ‘Yehowa mmuule tente ne luse ne dinanga.’—Yakobo 5:11.

Nzambi ki ngudi ukebela bantu malu mabi to. Kadi udiku usaka bantu bakuabu bua kuenza malu mabi anyi? Tòo. Bible udi wamba ne: “Padi muntu mu diteta kambi ne: ‘Badi banteta kudi Nzambi.’” Bua tshinyi? “Bualu Nzambi kena mua kutetshibua ne malu mabi ne yeye muine kena uteta muntu nansha umue.” (Yakobo 1:13) Nzambi katu uteta muntu mu dimusaka bua atuilangane ne malu mabi. Nzambi katu wenza bua malu mabi afikile bantu anyi asake bantu bakuabu bua benze malu mabi to. Kadi ntshinyi anyi nnganyi utudi mua kubanda bua malu mabi adi enzeka?

KUIKALA PA MUABA MUBI NE DÎBA DIBI

Bua kuleja bumue bua ku malu adi akebela bantu ntatu, Bible udi wamba ne: ‘Bualu tshikondo ne malu adi kaayi matekemena bidi bibafikila bonso.’ (Muambi 9:11) Padi malu adi bantu kabayi batekemene anyi njiwu bienzeka, nansha biobi bienzele muntu bibi anyi kabiyi bimuenzele bibi, njiwu itu itamba kukuata muntu nangananga bilondeshile muaba udiye dîba didiyi yenzeka. Kukadi bidimu bitue ku 2000 bivua Yezu muakule bua njiwu ivua bantu 18 bafue pavua tshibumba tshibakulukile. (Luka 13:1-5) Bantu aba kabavua bafue bua malu avuabu benze mu nsombelu wabu ku kale to; kadi bavua bafue bualu bavua muinshi mua tshibumba dîba divuatshi tshikuluke. Mu bidimu bishale ebi, tshikumina tshikole tshiakakuata bena mu Haïti mu ngondo wa 1/2010; mbulamatadi wa bena Haïti udi uleja ne: bantu bapite pa 300 000 bavua bafue. Bantu bonso aba kabavua bafue bualu mbenji ba malu mabi to. Nansha masama adi mua kukuata muntu yonso mu tshikondo tshionso.

Bua tshinyi Nzambi kena wepula bantu bimpe ku makenga?

Bamue badi mua kudiebeja ne: ‘Nzambi kavuaku mua kuenza bua malu a mushindu eu kaenzeki anyi? Kavuaku mua kuepula bantu bimpe ku malu mabi aa anyi?’ Nzambi yeye muele dîyi mu malu a mushindu eu, bivua mua kuleja ne: mmuamanye kumpala kua kuenzekawu. Nansha mudi Nzambi ne bukole bua kumanya malu atshilualua, tudi mua kuanji kudiela lukonko elu: Nzambi utuku wenza mudimu ne bukole buende ebu dîba dionso bua kudianjila kumanya malu a mushindu eu anyi?—Yeshaya 42:9.

Bible udi wamba ne: “Nzambi wetu udi mu diulu, yeye utu wenza malu onso adiye musue.” (Musambu 115:3) Yehowa katu wenza malu onso bualu udi ne bukole bua kueenza to, kadi utu wenza malu adiye  mumone ne: nga mushinga. Bualu ebu budi butangila kabidi malu atuye ujinga bua kudianjila kumanya. Tshilejilu, pakavula malu mabi mu tshimenga tshia Sodoma ne Amola, Nzambi wakambila Abalahama ne: ‘Nyaya katataka bua kubamona ni badi benza bu mudi muadi wabu wakufika kundi; ne bikalabu kabayi benze nunku, nemmanye bianyi.’ (Genese 18:20, 21) Bua tshikondo kampanda, Yehowa kavua mujinge bua kumanya malu mabi onso avua enzeka mu bimenga abi to. Nunku, bidi bimueneka patoke ne: Yehowa udi mua kusungula bua kubenga kudianjila kumanya malu onso. (Genese 22:12) Bualu ebu kabuena buleja ne: mmupange bupuangane anyi udi upangila mu amue malu. Bu mudi ‘mudimu wende wonso udi muakane,’ Nzambi udi wenza mudimu ne bukole buende ne nkatshinkatshi bua kudianjila kumanya malu atshilualua ne tshidiye mupangadije bua tshienzeka; katu usaka muntu ku bukole bua kuikala ne nsombelu kampanda to. * (Dutelonome 32:4) Kadi tshitudi mua kukuata ntshinyi? Tshia kumanya ntshia ne: Nzambi utu usungula tshikondo ne mushindu wa kukuata mudimu ne bukokeshi buende bua kudianjila kumanya malu.

Bua tshinyi Nzambi kena ukuba bantu bimpe ku malu a tshikisu?

BANTU MBADI BADIKEBELA NTATU ANYI?

Bushuwa, bantu batu badikebela imue ntatu. Tumone mudi Bible uleja amue malu adi afikisha bantu ku dienza malu mabi. Bible udi wamba ne: “Muntu yonso udi utetshibua padi dijinga diende dimukoka ne dimukuata mu buteyi. Pashishe, padi dijinga edi dikola, didi dilela bubi; ne bubi pabu padibu babuenza, budi bufikisha ku lufu.” (Yakobo 1:14, 15) Padi bantu bakumbaja majinga abu mabi anyi benza malu mabi, badi bapeta bipeta bibi bia malu abu mabi. (Lomo 7:21-23) Anu mudi miyuki ya bantu ileja, bantu mbenze malu mabi ne mbakebeshe ntatu ya bungi. Bantu babi badi kabidi mua kukoka bakuabu ku bienzedi biabu bibi, ne kuvudija malu mabi a bungi.—Nsumuinu 1:10-16.

Bantu mbenze malu mabi ne mbakebeshe ntatu ya bungi

Nzambi udiku mua kuela dîyi mu malu a bantu ne kubapangisha mua kuenza malu mabi anyi? Tumonayi mudibu bafuke muntu. Bible udi wamba ne: Nzambi wakafuka muntu mu tshimfuanyi tshiende, mmumue ne: mufuanangane ne Nzambi. Nunku, bantu badi ne mushindu wa kuikala ne ngikadilu ya buena ya Nzambi. (Genese 1:26) Bantu mbafukibue ne budikadidi bua kudisunguila malu ne badi mua kusungula bua kunanga Nzambi ne kumulamata pa kuenza malu adi makane ku mêsu kuende. (Dutelonome 30:19, 20) Bu Nzambi wenzeja bantu bua kulondabu njila kampanda, kavua mua kuikala udiatakaja budikadidi budiye mubafuke nabu anyi? Bu yeye wenza nanku, bivua mua kuikala anu bu ne: bantu mbapuekeshibue milongo bikole balue anu bu robo, biamu bidi bienza malu anu adibu babilongolole bua kuenza. Ke muvuabi kabidi mua kuikala bu tshivua tshimana kulongolola buetu tshikale tshilombola malu atudi tuenza ne onso adi atufikila. Bidi bienza disanka bua kumona mudi Nzambi mututue mushinga padiye mutupeshe budikadidi bua kudisunguila tshitudi basue kuenza. Nunku, ebi kabiena  bisua kumvuija ne: malu mabi adi afumina ku bilema bia bantu ne ku mapangadika abu mabi neatungunuke anu ne kukengesha bantu bua kashidi to.

KARMA KE KADI KAKEBESHA NTATU ANYI?

Wewe muele muena Hindu anyi muena Buddha lukonko ludi pa mutu pa tshibejibeji etshi, udi mua kukuandamuna ne: “Malu mabi adi akuata bantu bimpe bua mukenji wa Karma, mmumue ne: badi bapeta bipeta bia malu avuabu benze mu muoyo uvuabu nawu kumpala kua kuledibua.” *

Bua kumanya bikala dilongesha dia Karma ndilelela, mbimpe kukonkonona tshidi Bible wamba bua lufu. Mu budimi bua Edene muvua bantu ba kumpala basombele, Mufuki wakambila Adama muntu wa kumpala ne: “Udi mua kudia mamuma a mitshi yonso ya mu budimi, bu mûdi musue; kadi mamuma a mutshi wa lungenyi lua kujingulula malu mimpe ne malu mabi kuadi nansha; bualu bua mu dituku diudi wadia wewe neufue bulelela.” (Genese 2:16, 17) Bu Adama kayi muenze mpekatu wa kubenga kutumikila Nzambi, uvua mua kushala ne muoyo kashidi. Lufu ndinyoka dia dibenga kutumikila mukenji wa Nzambi. Nunku, pavuabu balele bana “lufu luakakuata bantu bonso.” (Lomo 5:12) Nunku, tudi mua kuamba ne: “difutu dia bubi ndufu.” (Lomo 6:23) Bible udi umvuija kabidi ne: “Muntu udi mufue mmubingishibue ku bubi buende.” (Lomo 6:7) Mu mêyi makuabu, bantu kabena batungunuka ne kufuta dibanza dia malu abu mabi panyima pa lufu luabu to.

Bantu ba bungi lelu batu bumvuija ne: makenga adi akuata bantu adi atangila kabidi mukenji wa Karma. Misangu ya bungi, muntu udi witaba dilongesha edi udi witaba makenga ende ne a bakuabu kadi kena ualekela amupangisha bua kuenza malu makuabu to. Kuela meji mushindu eu kakuena kupesha muntu ditekemena dia ne: malu mabi neajike to. Bantu aba badi bitabuja ne: disulakana dimue didi muntu upeta ndia kupikudibua ku tshibidilu tshia kuledibua tshia kabidi ku diambuluisha dia ngikadilu mimpe ne ku dikala ne dimanya dia pa buadi dia malu a bena Hindu. Bushuwa, malongesha aa mmashilangane bikole ne tshidi Bible wamba. *

MUKEBESHI MUNENE WA MALU MABI!

Uvuaku mumanye ne: Satana Diabolo “mukokeshi wa buloba ebu” ke mukebeshi wa kumpala wa malu mabi anyi?—Yone 14:30

Nunku, mukebeshi wa kumpala wa malu mabi ki mmuntu to. Satana Diabolo, uvua ku ntuadijilu muanjelu wa lulamatu wa Nzambi, “kakimana mu bulelela” ne wakabueja bubi pa buloba. (Yone 8:44) Wakabueja buntomboji mu budimi bua Edene. (Genese 3:1-5) Yezu Kristo wakamubikila ne: “mubi” ne “mukokeshi wa buloba ebu.” (Matayi 6:13; Yone 14:30) Bantu ba bungi batu balonda Satana patubu bateleja malu ende adi abasaka bua kupua muoyo njila mimpe ya Yehowa. (1 Yone 2:15, 16) Bible udi wamba mu 1 Yone 5:19 ne: “Ba pa buloba bonso badi ku bukokeshi bua mubi.” Kudi kabidi bifukibua bia mu nyuma bikuabu bivua bitombokele Nzambi bilonde Satana. Bible udi uleja ne: Satana ne bademon bende badi ‘bapambuisha ba pa buloba bujima,’ ne bakebesha ‘diakabi pa buloba.’ (Buakabuluibua 12:9, 12) Nunku, muntu wa kumpala utudi mua kubanda bua malu mabi n’Satana Diabolo.

Bidi bimueneka patoke ne: Nzambi ki ngudi mukebeshi wa malu mabi adi akuata bantu to; ne ki nyeye udi ubakengesha to. Kadi mmulaye bua kumbusha malu mabi, anu mudibi bileja mu tshiena-bualu tshidi tshilonda.

^ tshik. 3 Bilondeshile Bible, Yehowa ke dîna dia Nzambi.

^ tshik. 11 Bua kumanya bua tshinyi Nzambi mmulekele makenga atungunuka, bala nshapita wa 11 mu mukanda wa Bible utu ulongesha tshinyi menemene? mupatula kudi Bantemu ba Yehowa.

^ tshik. 16 Bua kumanya tshidi mukenji udibu babikila ne: Karma umvuija, bala mukanda wa Ntshinyi tshidi tshitufikila patudi tufua? mu dibeji dia 8-12, mupatula kudi Bantemu ba Yehowa.

^ tshik. 18 Bua kumanya tshidi Bible ulongesha bua bafue ne bua ditekemena bua bakadi bafue, bala nshapita 6 ne wa 7 mu mukanda wa Bible utu ulongesha tshinyi menemene?