Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo 4 2014

 TSHIENA-BUALU TSHINENE

Mbimpe kusambila anyi?

Mbimpe kusambila anyi?

Udi mua kudiebeja ne: ‘Bua tshinyi mbimpe bua meme kusambila bikala Nzambi mumanye malu onso, mumanye too ne meji anyi ne majinga anyi?’ Lukonko elu nduimpe. Yezu kavuaku muambe ne: Nzambi “mmumanye binudi nadi dijinga kumpala mene kua nuenu kumulombabi” anyi? (Matayi 6:8) Mukalenge Davidi wa mu Isalele wa kale uvua mumanye bualu ebu, ne wakafunda ne: “Kumpala kua ludimi luanyi kupatula dîyi, kadi tangila! Wewe Yehowa ukadi mudimanye bimpe.” (Musambu 139:4) Bua tshinyi tudi ne bua kusambila Nzambi? Bua kuandamuna lukonko elu, tukonkononayi tshidi Bible wamba bua masambila. *

“Semenayi pabuipi ne Nzambi ne yeye neasemene pabuipi nenu.”Yakobo 4:8

 DISAMBILA DIDI DITUSEMEJA PABUIPI NE NZAMBI

Nansha mudi Bible wamba ne: Yehowa * Nzambi mmumanye malu onso, udi uleja kabidi ne: udi wangata ne mushinga bualu budi mutendeledi wende yonso wenza pa nkayende. (Musambu 139:6; Lomo 11:33) Meji ende kaena ne mikalu bu mudi ordinatere udi ulama malu a bantu badiye kayi utabalela. Mu bulelela, Nzambi udi ututabalela mu malu etu bualu mmusue bua tusemene pabuipi nende. (Musambu 139:23, 24; Yakobo 4:8) Ke bualu kayi Yezu uvua mulombe bayidi bende bua kusambila nansha mudi Tatuende mumanye bimpe majinga etu. (Matayi 6:6-8) Patudi tuenda tuleja Mufuki wetu majinga etu, tudi tuenda tusemena pabuipi nende.

Imue misangu bidi mua kutukolela bua kumanya tshitudi mua kulomba mu disambila. Mu nsombelu wa mushindu eu, Nzambi udi mua kumona tshitudi natshi dijinga menemene ne udi mua kuenza mudimu ne dimanya diende dipuangane bua kuandamuna ku majinga etu. (Lomo 8:26, 27; Efeso 3:20) Patudi tumanya ne: Nzambi udi utuambuluisha mu nsombelu wetu mu mishindu itudi katuyi bamanye, bidi bitusaka bua kusemena pabuipi nende.

NZAMBI UTU WANDAMUNA MASAMBILA ONSO ANYI?

Bible udi utujadikila ne: Nzambi wa Bukole Buonso udi wandamuna masambila a basadidi bende ba lulamatu, kadi udi uleja kabidi malu adi asaka Nzambi bua kubenga kuteleja amue masambila. Tshilejilu, mu tshimue tshikondo pavua tshikisu tshipite bungi mu Isalele wa kale, Nzambi wakambila muprofete Yeshaya bua kuambila bantu ne: ‘Nansha nuenu bantendelele ne mitendelelu ya bungi mene, tshiena nnumvuila; bianza bienu bidi biule tente ne mashi.’ (Yeshaya 1:15) Bulelela, bantu badi kabayi banemeka mikenji ya Nzambi anyi basambila ne meji mabi, Nzambi kena mua kuteleja masambila abu to.—Nsumuinu 28:9; Yakobo 4:3.

Kadi Bible udi wamba ne: “Tshintu tshionso tshitudi tulomba bilondeshile disua diende, udi utumvuila.” (1 Yone 5:14) Bidi bisua kumvuija ne: Nzambi neandamune dilomba dionso dia mutendeledi wende anyi? Tòo. Tukonkonone bualu bua mupostolo Paulo uvua mulombe Nzambi misangu isatu bua amumbushile “dieba mu mubidi.” (2 Kolinto 12:7, 8) Bidi bimueneka ne: Paulo uvua mua kuikala usama disama dia mêsu divua kadiyi dijika. Bivua bimutonda bikole! Paulo uvua muenze bishima bia kuondopangana ne mujule too ne muntu ku lufu, kadi uvua ne bua kutantemena disama diende edi. (Bienzedi 19:11, 12; 20:9, 10) Nansha muvua Paulo mupete diandamuna divuaye kayi mutekemene, wakitaba diambuluisha dia Nzambi ne dianyisha.2 Kolinto 12:9, 10.

“Dishindika ditudi nadi kudiye didi ne: tshintu tshionso tshitudi tulomba bilondeshile disua diende, udi utumvuila.”1 Yone 5:14

Bushuwa, bamue bantu badibu batele mu Bible bavua bapete mandamuna mu tshishima ku masambila abu. (2 Bakelenge 20:1-7) Kadi bantu kabavua anu bapeta mandamuna a mushindu eu misangu yonso mu tshikondo tshivuabu bafunda Bible to. Bivua bitonde bamue batendeledi ba Nzambi pavuabu bamone ne: Nzambi kavua muandamune masambila abu. Mukalenge Davidi wakakonka ne: ‘Yehowa, musangu bule munyi wewe neupue bualu buanyi muoyo? Tshiendelele anyi?’ (Musambu 13:1) Kadi pavua Davidi mujingulule muvua Yehowa mumupandishe misangu ya bungi, uvua mukoleshe dieyemena diende kudi Nzambi. Mu disambila dimue dimue edi, Davidi wakamba kabidi ne: ‘Kadi meme, ndi mueyemene dinanga diebe dia lulamatu.’ (Musambu 13:5) Anu bu Davidi, batendeledi ba Nzambi lelu badi mua kusuminyina ne disambila too ne pandamuna Nzambi masambila abu.—Lomo 12:12.

MUDI NZAMBI WANDAMUNA MASAMBILA

Nzambi udi wandamuna ku majinga etu malelela.

Baledi bimpe bobu ne mushindu kabena bapesha bana babu tshidibu balomba anu dîba didibu  batshilomba to. Bia muomumue, imue misangu Nzambi katu wandamuna masambila etu mu mushindu utudi tuetu tuelela meji anyi dîba ditudi batekemene to. Kadi tudi ne bua kuikala batuishibue ne: anu bu muledi wa dinanga, Mufuki wetu neandamune ku majinga etu malelela mu dîba diakanyine ne mu mushindu muimpe.—Luka 11:11-13.

Nzambi udi kabidi mua kuandamuna masambila etu ku diambuluisha dia Bible

Nzambi udi mua kuandamuna mu mishindu itudi katuyi bamanye

Kadi netuambe tshinyi tuetu tusambila bua kupeta disulakana ku lutatu ludi kaluyi lujika? Tudiku mua kuamba diakamue ne: bu mudiku kakuyi diandamuna dia mu tshishima, Yehowa ki mmuandamune disambila dietu anyi? Tòo, tudi mua kuela meji bimpe, bualu Nzambi mmutuambuluishe imue misangu bua kutantamena lutatu luetu mu mishindu itudi katuyi bamanye. Tshilejilu, imue misangu mulunda muimpe mmuenza tshionso tshivua tshikengela bua kutuambuluisha mu dîba dituvua dijinga ne diambuluisha. (Nsumuinu 17:17) Kuenaku mumone ne: Yehowa ke udi mutume mulunda au bua kutuambuluisha anyi? Nzambi udi kabidi mua kuandamuna masambila etu ku diambuluisha dia Bible. Mu Bible tudi mua kupeta meji atudi nawu dijinga bua kutantamena lutatu kampanda.2 Timote 3:16, 17.

Nzambi udi mua kusaka balunda betu ba pa muoyo bua kutukankamija dîba ditudi dijinga ne dikankamija

Pamutu pa Nzambi kutumbushila lutatu lutudi nalu, misangu ya bungi utu utupesha bukole butudi nabu dijinga bua kulutantamena. (2 Kolinto 4:7) Tshilejilu, pavua Yezu mulombe Tatuende bua kumumbushila dikenga divua kumpala kuende utshina bua kadilu kupendeshisha dîna dia Nzambi, Yehowa wakatuma muanjelu bua kukolesha Muanende. (Luka 22:42, 43) Bia muomumue, Nzambi udi mua kusaka balunda betu ba pa muoyo bua kutukankamija dîba ditudi dijinga ne dikankamija. (Nsumuinu 12:25) Bu mudi diandamuna dia mushindu eu dikole bua kudijingulula, tudi ne bua kuikala ne ntema bua kujingulula mudi Nzambi wandamuna masambila etu.

Nzambi udi wandamuna amue masambila mu tshikondo tshiakane

Bible udi wamba ne: Nzambi wa Bukole Buonso udi uleja bantu bapuekele bulenga buende “mu tshikondo tshikumbane.” (1 Petelo 5:6) Nunku biobi bimueneka ne: diandamuna diende didi dinenga, kabiena bisua kuleja ne: Yehowa kena ututabalela to. Kadi bu mudiye mumanye malu onso, kakuyi mpata, Mufuki wetu udi ukonkonona milombu yetu bualu mmumanye tshidi tshimpe buetu tuetu.

“Nunku, nudipuekeshe muinshi mua tshianza tshia bukole tshia Nzambi, bua anubandishe mu tshikondo tshikumbane.”—1 Petelo 5:6

Tuangatabi tshilejilu etshi: Elabi meji muanebe wa balume udi ukulomba bua umusumbile dikalu. Neumuenzele bualu ebu diakamue anyi? Wewe mumone ne: kena muanji kukumbana bua kuendesha dikalu, udi mua kujinga bua kulua kumusumbiladi pashishe. Kadi neumukumbajile dilomba diende paudi umona ne: tshikondo tshimpe tshia kuenza nunku tshiakumbanyi. Bia muomumue, Nzambi udi mua kuandamuna ku ‘majinga a muoyo wetu’ adi mimpe mu tshikondo tshiakane tuetu batungunuke ne kusambila.Musambu 37:4.

IKALA MUTUISHIBUE NE: YEHOWA UDI UTELEJA MASAMBILA

Bible udi ulomba bena Kristo balelela bua kabapu muoyo mushinga udi nawu disambila. Bamue badi mua kuamba ne: ‘mbipepele bua kuamba nunku, kadi mbikole bua kuenza.’ Bidi nanku, nangananga tuetu ne lutatu ludi kaluyi lujika anyi tutuilangana ne malu a kansungansunga, bidi nansha mua kutukolela bua kuindila diandamuna dia Nzambi. Kadi mbimpe tuetu kuvuluka tshivua Yezu mulongeshe bua disuminyina mu disambila.

Yezu wakafila tshilejilu tshia mukaji mukamba mukuabu uvua mutungunuke ne kuya kudi mulumbuluishi kampanda uvua kayi utshina Nzambi bua kukosaye tshilumbu tshiende biakane. (Luka 18:1-3) Nansha muvua mulumbuluishi eu mubenge kumpala bua kuambuluisha mamu eu, wakalua kudiambila ne: “Nengenze  bua kukosa tshilumbu tshiende biakane bua katungunuki ne kulua kuntshiokesha bikole ne dilomba diende.” (Luka 18:4, 5) Bilondeshile muakulu wa ntuadijilu uvuabu bafunde Bible, mulumbuluishi eu uvua mutabalela mukaji mukamba eu bua kalu kumunyangila lumu. * Nansha mudi mulumbuluishi eu muntu mubi, bua kubenga kunyanga lumu luende uvua muambuluishe mukaji mukamba eu, Nzambi wetu wa dinanga kenaku mua kuandamuna masambila a badi “bamudidila munya ne butuku” anyi? Anu bu muvua Yezu muambe, Nzambi neakose ‘biakane tshilumbu tshiabu ne lukasa.’Luka 18:6-8.

“Tungunukayi ne kulomba, nebanupeshe.”—Luka 11:9

Nansha mudibi mua kututshiokesha bua ditungunuka ne dilomba diambuluisha, katuena ne bua kulekela. Patudi tutungunuka ne kusambila, tudi tuleja mutudi basue ne muoyo mujima bua Nzambi atuambuluishe mu nsombelu wetu. Tudi kabidi tulonga mua kujingulula mishindu idi Nzambi wandamuna masambila etu ne bidi bituambuluisha bua kusemena pabuipi nende. Eyowa, tudi ne bua kuikala batuishibue ne: Yehowa neandamune masambila etu mimpe tuetu batungunuke ne kumulomba ne ditabuja.Luka 11:9

^ tshik. 3 Tuetu basue bua Nzambi ateleje masambila etu, tudi ne bua kudienzeja bua kutumikila mikenji yende. Tuetu benze nunku, netumone bukole budi nabu disambila anu mudibi bileja mu tshiena-bualu etshi. Bua kumanya malu makuabu, bala nshapita wa 17 wa mukanda wa Bible utu ulongesha tshinyi menemene?, mupatula kudi Bantemu ba Yehowa anyi udi mua kuupeta mu adrese eu www.jw.org.

^ tshik. 5 Yehowa ke dîna dia Nzambi bilondeshile Bible.

^ tshik. 22 Mu bikondo bivuabu bafunda Bible, Nzambi uvua mutekemene bua balumbuluishi ba mu Isalele bangate bakaji bakamba ne bana ba nshiya ne mushinga.Dutelonome 1:16, 17; 24:17; Musambu 68:5.