Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 1 2014

 BIBLE UTU USHINTULULA BANTU

“Yehowa kavua mumpue muoyo to”

“Yehowa kavua mumpue muoyo to”
  • MULELA MU: 1922

  • DITUNGA DIABU: ESPAGNE

  • TSHIVUAYE: MULONGESHI WA MALU A BENA NTAMBU

TSHIMVUA KALE:

Mvua muledibue mu musoko wa Bilbao ku Nord kua Espagne. Mvua muana muibidi munkatshi mua bana banayi. Bena mu dîku dietu bavua badifile bikole mu Katolike, ne mvua nya mu Mese dituku dionso. Pamvua ne bidimu 23, ngakalua mulongeshi, mudimu umvua munange bikole, meme kuwenza munkatshi mua bidimu 40. Mvua kabidi ndongesha malu a bena Katolike, ne mu dilolo dionso mvua ndongesha malu a bena ntambu, ndongesha bana ba bakaji bua komunyo wabu wa kumpala.

Tuetu bamane kuenza bidimu 12 mu dibaka dia disanka, bayanyi wakafua kunshiya ne bana ba bakaji banayi ba kukolesha. Ntshivua anu ne bidimu 33. Mvua nkeba dikankamija mu tshitendelelu tshianyi tshia Katolike, kadi mvua anu ne nkonko kampanda ivua indubakaja. Mvua ndiebeja ne: ‘Bua tshinyi bantu badi batungunuka ne kufua bikala Kristo mmutupikule? Bua tshinyi tudi tusambila bua Bukalenge bua Nzambi bulue bikala bantu bakane baya mu diulu?’ Mvua kabidi ndiebeja ne: ‘Bikala Nzambi utulumbuluisha patudi tufua, bua tshinyi bidi bikengela kabidi pashishe kumbuka mu diulu anyi mu mpurgatoriyo peshi mu iferno bua dilumbuluisha dia ndekelu?’

Mvua muele ba Abé nkonko eyi. Umue wa kudibu wakangandamuna ne: “Tshiena mumanye. Udi mua kukonka monsenyere. Bua tshinyi bualu ebu budi bukutonda? Si udi witabuja Nzambi, ki mmuomu? Lekela bualu abu!” Kadi ngakatungunuka ne kukeba mandamuna. Pashishe, ngakatuadija kuyukila ne ba-Jezuite, bena Pentekoste ne bena Gnosis. Kadi kabavua anu bandamune nkonko yanyi.

MUSHINDU UVUA BIBLE MUNSHINTULULE:

Pamvua ne bidimu 60 ne bia mu njila, muana wa bakaji wa bidimu muanda mutekete wakambikila mu bisangilu bia Bantemu ba Yehowa. Mvua muanyishe malu amvua mumonemu ne amvua mumvue, kadi bu mumvua ne midimu ya bungi, tshivua ne dîba dia kuyukila ne Bantemu tshikondo atshi to. Bidimu bibidi pashishe, Ntemu mukuabu Juan ne mukajende Maite bakakokola kuanyi. Mu ngondo isatu, tuvua anu tuyukila nabu ngenda mbela nkonko, pashishe meme kulua kuitaba bua kundongeshabu Bible.

Misangu yonso ituvua tulonga mvua ne disanka! Mvua nkonkonona malu onso atuvua tulonga mu nkudimuinu isatu ya  Bible bua kujadika ne: bivua Bantemu bandongesha mbulelela. Matuku makese meme kulua kujingulula ne: bavua banshime ntanta mule mu tshitendelelu tshimvua. Bivua bintonda bikole bua kumona dishilangana dinene divua pankatshi pa malu amvua ngitaba kuonso eku ne amvua ndonga mu Bible. Mvua ne lutatu lukole bua kulekela malongesha a mu tshitendelelu tshimvua bualu akavua mele miji munda muanyi.

Mvua mutuishibue ne: mvua mupete tshintu tshia mushinga mukole

Pashishe, bayanyi muibidi wakasama bikole ne yeye kufua. Mu tshikondo atshi, ngakalekela mudimu umvua ngenza, meme kumbuka mu Bilbao bua tshikondo kampanda. Juan ne Maite bakanji bapu kumbuka mu musoko au. Bia dibungama, ngakalekela kulonga Bible. Kadi mvua mutuishibue ne: mvua mupete tshintu tshia mushinga mukole. Tshivua mua kutshipua muoyo to.

Bidimu 20 pashishe, pamvua ne bidimu 82, Juan ne Maite bakapingana mu Bilbao ne bobu kulua kuntangila. Mvua ne disanka dia bungi dia kutuilangana kabidi nabu. Ngakajingulula ne: Yehowa kavua mumpue muoyo to, meme kutuadija kulonga kabidi Bible. Juan ne Maite bavua bandongesha ne lutulu, nansha pamvua mbela nkonko imue imue ayi misangu yonso. Mvua musue kumvua bimpe malongesha a mu Bible misangu ya bungi bua kumona mua kulekela malongesha a mu tshitendelelu tshimvua kumpala. Mvua kabidi musue kumvua bimpe mushindu uvuabu bangumvuija malongesha a mu Bible bua kumona mua kualongesha balunda banyi ne bena mu dîku dianyi.

Ngakatambula ne bidimu 87, ne divua dituku dia disanka dia bungi mu nsombelu wanyi. Mvua mutambule mu mpungilu wa Bantemu ba Yehowa. Malu avua mu muyuki uvua mukulu muena Kristo muenze avua atutangila tuetu bavua ne bua kutambula. Muyuki eu wakampuekesha binsonji. Mvua mulonde muyuki eu bimpe bienza anu bu ne: Yehowa uvua ungambila malu buludiludi. Pavuabu bantambuishe, ne meme mumane kupatuka mu mâyi, Bantemu ba bungi bakalua kungela tuasakidila, nansha muvua ba bungi bakudibu kabayi bamanye!

MASANKA ANGAKAPETA:

Mvua mumanye kuonso eku ne: Yezu Kristo udi “njila.” (Yone 14:6) Kadi dilonga dianyi dia Bible diakangambuluisha bua kumanya Yehowa muntu udi Yezu mutuleje. Mpindieu ndi mua kusambila Nzambi bu Tatu wanyi ne bu Mulunda wanyi. Mukanda wa Approchez-vous de Jéhovah * uvua mungambuluishe bikole. Mvua muubale mujima mu dilolo dimue. Biakandenga ku muoyo bua kumona mudi Yehowa ne luse lujalame.

Pandi mmona bidimu bia bungi bimvua nkeba bulelela, ndi mvuluka mêyi a Yezu aa: “Tungunukayi ne kulomba, nebanupeshe; tungunukayi ne kukeba, nenupete; tungunukayi ne kukokola, nebanunzuluile.” (Matayi 7:7) Pandi mupete mandamuna ku nkonko ivua intatshisha, ndi ne disanka dia bungi dia kuambila bantu bakuabu malu aa.

Nansha mundi ne bidimu 90, ntshidi ne bia bungi bia kumanya mu malu a Nzambi. Bisangilu bionso bindi mbuela ku Nzubu wa Bukalenge bitu bingambuluisha bua kupeta dimanya ne kupeta dikankamija kudi bana betu ba balume ne ba bakaji. Ndi muindile ne muoyo kuulu kuulu bua kulua kulongesha bantu mu Mparadizu wa pa buloba udibu batulaye. (Buakabuluibua 21:3, 4) Ndi muindile kabidi ne muoyo kuulu kuulu bua kumona muabishabu bantu bandi munange ku lufu ne mungapeta diakalenga dia kubalongesha bulelela bua mu Bible. (Bienzedi 24:15) Disankapu kayi dia kubumvuija diakalenga dinene didi Yehowa mumpeshe ku bukunda edi!

^ tshik. 15 Mupatula kudi Bantemu ba Yehowa.