Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 1 2014

 TSHIENA-BUALU TSHINENE | LUFU NDEKELU WA BIONSO ANYI?

Kalonda ka lufu

Kalonda ka lufu

Lufu mbualu budi butonda. Bantu ba bungi ki mbasue kuakula bua lufu to. Nansha nanku, dimue dituku netutuilangane ne lufu. Kalonda ka lufu nkakole ne kadi kasama.

Kakuena tshintu tshidi mua kutuepula bua kumvua tunyinganyinga tudi tufumina ku dijimija mulela wetu, muena dibaka netu anyi muanetu. Lutatu ludi mua kutukuata mu tshikondo tshitudi katuyi belele meji, anyi tushala nalu ntanta mule. Nansha biobi nanku anyi kabiyi nanku, mbikole bua kuepuka kanyinganyinga kadi kafumina ku lufu, ne ndekelu wa bionso kadi mua kutuenzela bibi.

Antonio uvua mufuishe tatuende mu njiwu ivua mienzeke mu njila kampanda udi wamba ne: “Udi udiumvua anu bu ne: muntu mmukange ku nzubu kuenu ne mmuye ne nsapi. Kuena mua kupingana kumbelu nansha bua tshitupa tshîpi. Udi ushala anu ukumona mu lungenyi. Eu nnsombelu mupiamupia udi mukufikile. Nansha wewe mubenge kumuitaba anyi umona ne: mbualu buvua kabuyi mua kukufikila, ikala mumanye ne: kuena ne tshikuabu tshia kuenza.”

Dorothy uvua mulue mukaji mukamba pavuaye ne bidimu 47, uvua mutuilangane ne lutatu lua muomumue, uvua ujinga bua kumanya tshidiye mua kuenza. Bu muvuaye mulongeshi wa bana mu tshitanda tshiabu mu kalasa ka mu Dia lumingu, kavua umona ne: lufu ndekelu wa bionso to. Kadi kavua mumanye tshia kumvuija mu bualu ebu. Wakakonka pastere wa mu tshitanda tshiabu ne: “Ntshinyi tshidi tshitufikila patudi tufua?” Pastere wakamuandamuna ne: “Kakuena muntu nansha umue udi mumanye tshidi tshitufikila. Tudi ne bua kuindila bua kumona tshienzeke.”

Tudiku benzejibue bua kushala anu bindile bua “kumona tshienzeke” anyi? Kakuenaku mushindu wa kumanya bikala lufu ni ndekelu wa bionso anyi?