Betaniya mmusoko mukese uvua mutantshi wa kilometre mitue ku 3 ne Yelushalema. (Yone 11:18) Bualu bubi buvua kabuyi butekemena buakenzeka mbingu mikese kumpala kua lufu lua Yezu. Lazalo mulunda wa Yezu wakasama bikole ne kufua.

Pavua Yezu mumvue bua musangu wa kumpala lumu lua bualu ebu, wakambila bayidi bende ne: Lazalo mmulale tulu ne uvua musue kuya kumubisha. (Yone 11:11) Kadi bayidi ba Yezu kabavua bumvue tshivuaye musue kuamba, ke bualu kayi Yezu wakabambila patoke ne: “Lazalo mmufue.”Yone 11:14.

Matuku anayi bamane kujika Lazalo, Yezu wakafika ku Betaniya bua kusamba Mâta muanabu ne Lazalo. Mâta wakamba ne: “Bu wewe muikalapu, muanetu kavua mua kufua to.” (Yone 11:17, 21) Yezu wakamuambila ne: “Meme ndi dibika ne muoyo. Muntu udi uleja ditabuja kundi, nansha yeye mufue, neapetulule muoyo.”Yone 11:25.

“Lazalo, patuka!”

Bua kuleja muvua mêyi aa malelela, Yezu wakaya ku lukita kuelaye dîyi dikole wamba ne: “Lazalo, patuka!” (Yone 11:43) Biakakemesha bantu bavua muaba au bualu mufue eu wakabika.

Yezu ukavua mubishe bantu bakuabu babidi ku lufu kumpala kua kuenzaye tshishima etshi. Dimue dituku wakajula muana wa bakaji wa Yailo ku lufu. Kumpala kua Yezu kumujulaye, wakumvuija kabidi ne: nsongakaji eu uvua mulale tulu.Luka 8:52.

Mona ne: bua lufu lua Lazalo ne lua muana wa bakaji wa Yailo, Yezu wakafuanyikija lufu ne tulu. Difuanyikija edi ndimpe. Bua tshinyi? Bualu kulala tulu kudi kumvuija kubenga kumanya tshidi tshipitakana, kuleja tshikondo tshia kuikisha kuyi umvua bisama ne ntatu. (Muambi 9:5; bala kazubu kadi kamba ne:  “Lufu ludi bu tulu tukole.”) Bayidi ba kumpala ba Yezu kabavua bajingulule bimpe tshidi tshifikila bafue. Mukanda kampanda udi wamba ne: bua bayidi ba Yezu, lufu luvua tulu, ne lukita muaba wa kuikisha . . . bua bantu bavua  bafue ne ditabuja.” * Encyclopedia of Religion and Ethics.

Bidi bitukolesha ku muoyo bua kumanya ne: bafue mbalale mu lukita kabayi bakenga. Bu mutuafiki ku dimanya tshidi tshifikila muntu padiye ufua, nunku katuena mua kumvua buôwa bua bafue to.

“BIAFUA MUNTU, NEIKALE NE MUOYO KABIDI ANYI?”

Kadi nansha mututu tuanyisha bua kulala tulu butuku, tudiku mua kuitaba bua kulala bua kashadidi anyi? Ntshinyi tshidi tshitujadikila ne: bafue badi balale mu lukita nebapingane ku muoyo anu muvuabu bajule Lazalo ne muana wa bakaji wa Yailo?

Yobo wakela lukonko lua mushinga mukole elu pakavuaye upunga ne lufu. Wakakonka ne: “Biafua muntu, neikale ne muoyo kabidi anyi?”Yobo 14:14.

Nansha muvuaye wambila Nzambi mêyi aa, Yobo wakadiandamuina nkayende lukonko elu wamba ne: “Wewe mumbikile nengitabe, neumone tshiakabidi mudimu wa bianza biebe.” (Yobo 14:15, MMM) Yobo uvua mutuishibue ne: Yehowa muindile ne muoyo kuulu kuulu tshikondo tshikalaye mua kumubisha ku lufu. Yobo uvuaku mutekemene bualu buvua kabuyi mua kuenzeka anyi? Tòo.

Dijula dia Yezu bantu ku lufu didi difila tshijadiki tshia ne: Nzambi mmupeshe Yezu bukole bua kutshimuna lufu. Bible udi wamba ne: Yezu udi mpindieu ne “nsapi ya lufu.” (Buakabuluibua 1:18) Nunku Yezu neakangule biibi bia lukita anu bu muvuaye mutume dîyi bua bumbushe dibue divua ku lukita lua Lazalo.

Bible udi wakula misangu ne misangu bua mulayi eu wa dibisha bantu ku lufu. Muanjelu wakajidikila muprofete Danyele ne: ‘Newikishe, pashishe neujalame mu bupianyi buebe ku nshikidilu kua matuku aa.’ (Danyele 12:13) Yezu wakambila Basadoke, bamfumu ba bena Yuda bavua babenga dibishibua dia bantu ku lufu ne: “Nudi mu dipanga, bualu kanuena bamanye Mifundu minsantu ne bukole bua Nzambi to.” (Matayi 22:23, 29) Mupostolo Paulo wakamba ne: “Ndi ne ditekemena kudi Nzambi . . . ne: nekuikale dibika dia ku lufu dia bantu bakane ne dia badi kabayi bakane.”Bienzedi 24:15.

NDÎBA KAYI DIABISHABU BAFUE?

Ndîba kayi dienzeka dibishibua edi dia bantu bakane ne badi kabayi bakane? Muanjelu wakambila Danyele muntu muakane ne: neabishibue ‘ku nshikidilu kua matuku aa.’ Mâta uvua pende witaba ne: muanabu Lazalo “neabike pabika bantu ku lufu dituku dia ku nshikidilu.”Yone 11:24.

Bible udi uleja mudiku dipetangana pankatshi pa “matuku a ku nshikidilu” ne dikokesha dia Kristo mu Bukalenge. Paulo wakamba ne: “Bualu [Kristo] udi ne bua kukokesha bu mukalenge too ne pateka Nzambi bena lukuna bonso muinshi mua makasa ende. Muena lukuna wa ndekelu udiye ne bua kujimija ndufu.” (1 Kolinto 15:25, 26) Ebu mbualu bua mushinga mukole budi ne bua kutusaka bua kusambila bua Bukalenge bua Nzambi bulue ne bua disua diende dienzeke pa buloba. *

Anu bu muvua Yobo mumanye, disua dia Nzambi ndia kujula bantu ku lufu. Pikala dituku adi dikumbane, nebajimije bulelela lufu. Muntu nansha umue kakukonka ne: ‘Lufu ndekelu wa bionso anyi?’

^ tshik. 8 Muaku wa mu Anglais udibu bakudimuna ne: “muaba wa bafue” udi ufuma ku muaku wa mu tshiena Greke udi umvuija “muaba wa kulala.”

^ tshik. 18 Bua kumanya malu makuabu adi atangila Bukalenge bua Nzambi, bala nshapita wa 8 wa mukanda wa Bible utu ulongesha tshinyi menemene? mupatula kudi Bantemu ba Yehowa.

Udi kabidi mu adrese eu: www.jw.org.