Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 1 2014

Ditekemena bua bafue dibishibua dia bantu ku lufu

Ditekemena bua bafue dibishibua dia bantu ku lufu

Udiku witaba mulayi wa mu Bible wa dibishibua dia bantu ku lufu anyi? * Ditekemenena dia kumonangana ne bantu batudi banange babishibua ku lufu didi disankisha. Kadi mbimpe bua kuikala ne ditekemena dia mushindu eu anyi? Bua kupeta diandamuna, tukonkononayi tshilejilu tshia bapostolo ba Yezu Kristo.

Bapostolo bavua bitaba ne muoyo mujima dibishibua dia bantu ku lufu. Bua tshinyi? Bua tubingila tubidi. Ka kumpala, ditekemena diabu divua dishindamene pa tshijadiki etshi: Yezu nkayende uvua mubishibue ku lufu. Bapostolo ne “bana betu bapite pa 500 musangu umue” bakamona muvua Yezu mubishibue ku lufu. (1 Kolinto 15:6) Bualu bukuabu, dibishibua dia Yezu ku lufu divua dijadika ne dianyishibue anu mudibu baleje mu Evanjeliyo inayi eyi.—Matayi 27:62–28:20; Mâko 16:1-8; Luka 24:1-53; Yone 20:1–21:25.

Kabingila kibidi, bapostolo bavua bamone muvua Yezu mujule bantu basatu ku lufu: wa kumpala mu musoko wa Naina, muibidi mu Kapênuma ne pashishe mu Betaniya. (Luka 7:11-17; 8:49-56; Yone 11:1-44) Muntu wa ndekelu uvua Yezu mubishe ku lufu, uvua wa mu dîku divua dibidilangane ne Yezu bikole. Tumonayi tshivua tshienzeke.

“MEME NDI DIBIKA”

“Muanenu neabike.” Aa mêyi avua Yezu muambile Mâta muanabu ne Lazalo uvua mufue kukadi matuku anayi. Mâta kavua muanji kumvua tshivua mêyi a Yezu umvuija to. Wakamuandamuna ne: “Ndi mumanye ne: neabike,” kadi uvua wela meji ne: muanabu neabike mu tshikondo kampanda mu matuku atshilualua. Elabi meji disanka divuaye mua kuikala nadi padiye umvua Yezu wamba ne: “Meme ndi dibika ne muoyo,” ne umona Yezu ujula muanabu ku lufu!Yone 11:23-25.

Mmuaba kayi uvua Lazalo munkatshi mua matuku anayi pavuaye mufue? Lazalo kavua muambe bualu nansha bumue buvua buleja ne: uvua ne muoyo muaba kampanda munkatshi mua matuku anayi au to. Lazalo kavua ne anyima udi kayi ufua uvua muye mu diulu to. Pavua Yezu mubishe Lazalo ku lufu, kavua mumuangate mu diulu muaba wa masanka pabuipi ne Nzambi bua kumupingaja pa buloba to. Kadi, mmuaba kayi uvua Lazalo munkatshi mua matuku anayi au? Mu bulelela, uvua mulale tulu mu lukita. Muambi 9:5, 10.

Tuvuluke ne: Yezu uvua mufuanyikije lufu ne tulu tudi muntu ubika ku diambuluisha dia dibishibua. Yezu udi wamba ne: “‘Mulunda wetu Lazalo mmulale, kadi ndi nyaku bua kumubisha.’ Bayidi  bakamuambila ne: ‘Mukalenge, bikalaye mulale, neumvue bimpe.’ Yezu uvua wakula bua lufu lua Lazalo. Kadi bobu bavua bela meji ne: uvua wakula bua dilala tulu bua kuikisha. Nunku Yezu wakabambila patoke dîba adi ne: ‘Lazalo mmufue.’” (Yone 11:11-14) Pakabishaye Lazalo, Yezu wakamupingajila muoyo wende ne kumutuangaja ne bena mu dîku diabu. Dipa bulenga kayi divua Yezu mupeshe bena mu dîku edi!

Dibisha dia bantu ku lufu divua Yezu muenze divua kadiosha patupu ka malu ikalaye ne bua kuenza mu matuku atshilualua bu Mukalenge wa Bukalenge bua Nzambi. * Mu tshikondo tshikala Yezu mu diulu ukokesha pa buloba, neapeshe bantu badi balale tulu mu lukita muoyo. Ke bualu kayi wakamba ne: “Meme ndi dibika.” Elabi meji ku disanka diwikala nadi pawamona tshiakabidi bantu baudi munange! Ela kabidi meji ku disanka dikala nadi babishibua ku lufu.Luka 8:56.

Elabi meji ku disanka diwikala nadi pawamona tshiakabidi bantu baudi munange

DITABUJA BUA MUOYO WA KASHIDI

Yezu wakambila Mâta ne: “Muntu udi uleja ditabuja kundi, nansha yeye mufue, neapetulule muoyo; muntu udi ne muoyo ne uleja ditabuja kundi, kakufua nansha kakese.” (Yone 11:25, 26) Bantu bikala Yezu mua kujula ku lufu mu bukokeshi buende bua bidimu tshinunu nebikale ne ditekemena dia muoyo wa kashidi bobu baleje ditabuja dilelela kudiye.

“Muntu udi uleja ditabuja kundi, nansha yeye mufue, neapetulule muoyo.”Yone 11:25

Yezu mumane kujula Lazalo ku lufu, wakela Mâta lukonko lua mushinga mukole elu: “‘Udi witabuja bualu ebu anyi?’ Mâta wakamuandamuna ne: ‘Eyowa Mukalenge; ndi mufike ku ditabuja ne: wewe udi Kristo Muana wa Nzambi.’” (Yone 11:26, 27) Kadi wewe, neuleje ditabuja dia mushindu eu dia dibishibua dia bantu ku lufu bu muvua Mâta muleje anyi? Bualu bua kumpala buudi mua kuenza nkupeta dimanya dia tshidi Nzambi mulongolole bua bantu. (Yone 17:3; 1 Timote 2:4) Dimanya edi didi mua kukufikisha ku ditabuja. Bua tshinyi kuenaku mua kulomba Bantemu ba Yehowa bua kukulejabu tshidi Bible ulongesha bua bualu ebu? Nebikale ne disanka bua kuyukila nebe bua ditekemena dimpe edi dia dibishibua.

^ tshik. 2 Tangila tshiena-bualu tshia ne: “Lufu ki ndekelu wa bionso to!” mu dibeji 6 dia tshibejibeji etshi.

^ tshik. 9 Bua kumanya malu makuabu pa bidi bitangila mulayi wa mu Bible wa dibishibua dia bantu ku lufu bua matuku atshilualua, bala nshapita wa 7 wa mukanda wa Bible utu ulongesha tshinyi menemene?, mapatula kudi Bantemu ba Yehowa.