Bualu budi bulonda ebu, mmuyuki udi Ntemu wa Yehowa mua kuenza ne muntu kampanda. Tutekabi ne: Ntemu wa Yehowa udi ne dîna ne: Micheline udi uya kumbelu kua mamu mukuabu diende Sophie.

MMUNYI MUDI NZAMBI UDIUMVUA BUA MAKENGA ETU?

Micheline: Wetuawu, Sophie. Ndi ne disanka bua mundi mukusangane kumbelu.

Sophie: Meme panyi ndi ne disanka bua muudi mulue.

Micheline: Musangu mushale tuvua bayukile bua mushindu udi Nzambi udiumvua bua makenga etu. * Uvua mungambile ne: kukadi bidimu bia bungi bidi bualu ebu bukutonda, nangananga bua muvua maman webe mutapike mputa mu njiwu ya mashinyi. Anji kungambila, maman muine udi munyi?

Sophie: Udi anu lelu bimpe makelela bibi. Kadi lelu mmulale bimpe.

Micheline: Ndi ne disanka bua kumvua nanku. Misangu ya bungi bitu bikole bua kuikala ne meji mimpe kumpala kua bualu bua buena ebu.

Sophie: Bidi nanku. Imue misangu ntu ndiebeja dîba kayi dikala lutatu luende elu mua kujika.

Micheline: Udi muambilamu. Utshidi muvuluke ne: tuvua bajikije muyuki wetu wa musangu mushale ne lukonko luvua lulomba bua kumanya bua tshinyi Nzambi mmulekele makenga atungunuka eku pende muikale ne bukole bua kuajikija.

Sophie: Eyo, ndi muvuluke.

Micheline: Kumpala kua tuetu kumona tshidi Bible wamba mu bualu ebu, tuanji kuambulula amue malu atuvua bamone musangu mushale.

Sophie: Bimpe.

Micheline: Tuvua bamone ne: mu bikondo bivuabu bafunda Bible, muntu kampanda uvua ne lulamatu kudi Nzambi uvua pende mudiebeje bua tshinyi Nzambi mmulekele makenga. Kadi Nzambi kavua mumutandishe bua lukonko luende elu, anyi kavua mumuambe ne: kena ne ditabuja dikole.

Sophie: Buvua bualu bupiabupia kundi.

Micheline: Tuvua kabidi balonge ne: Yehowa Nzambi ki mmusue kutumona tukenga. Tshilejilu, Bible udi wamba ne: pavua bantu bende bakenga, ‘wakumvua dikenga.’ * Kabienaku bitukolesha bua kumanya ne: Nzambi udi umvua bibi patudi tukenga anyi?

Sophie: Bidi nanku.

Micheline: Bua kujikija tuvua bamone ne: bua bukole bua bungi budi nabu Mufuki wetu, udi bushuwa ne bukokeshi bua kujikija makenga dîba dionso didiye musue.

Sophie: Ke bualu bundi tshiyi ngumvua abu to. Bua tshinyi Nzambi udi ulekela malu mabi onso aa atufikila pende muikale ne bukole bua kuajikija?

NNGANYI UVUA MUAMBE BULELELA?

Micheline: Bua kuandamuna lukonko luebe eu mbimpe tutangile mu Genese mukanda wa kumpala wa mu Bible. Udiku mumanye muyuki wa Adama ne Eva ne wa tshimuma tshivuabu babakandike anyi?

Sophie: Eyo, tuvua baulonge mu tshitanda tshietu mu Dia lumingu. Nzambi uvua mubakandike  bua kudia tshimuma tshia mutshi kampanda, kadi bakatshidia anu.

Micheline: Mmuomu. Mpindieu tuanji kutangila tshivua tshisake Adama ne Eva ku mpekatu. Malu avuabu benze adi apetangana ne lukonko luetu lua kumanya bua tshinyi tudi tukenga. Suaku ubale Genese nshapita 3, mvese 1 too ne 5.

Sophie: Mbimpe. ‘Nyoka wakatamba nyama yonso yakafuka Yehowa Nzambi budimu. Nyoka wakakonka mukaji ne: Nzambi wakamba ne: Kanudi mamuma a mitshi yonso idi mu budimi, anyi? Mukaji wakambila nyoka ne: tudi mua kudia mamuma a mitshi yonso idi mu budimi kadi mamuma a mutshi udi munkatshi mua budimi, Nzambi wakamba ne: Kanuadi, kanualengi, bua kanufu. Nyoka wakambila mukaji ne: Kanuena nufua bulelela; bualu bua Nzambi udi mumanye ne: Panuadia mamuma au, mêsu enu neabuluke, nenuikale bu Nzambi, nenumanye malu mimpe ne malu mabi.’

Micheline: Tuasakidila. Tuanji kukonkonona bimpe mvese eyi. Tshia kumpala, udi mumone ne: nyoka ke uvua muyukile ne Eva. Mvese mikuabu ya mu Bible idi ileja ne: Satana Diabolo ke uvua muyukile ne Eva ku diambuluisha dia nyoka. * Satana wakebeja Eva bua mukenji wa Nzambi uvua utangila mutshi kampanda. Udiku mumone tshivua Nzambi muambile Eva bua tshivua mua kubafikila yeye ne Adama bobu badie tshimuma anyi?

Sophie: Bavua ne bua kufua.

Micheline: Bidi nanku. Mpindieu mu mêyi ende adi alonda, Satana udi ushiminyina Nzambi bualu bunene. Anji tangila tshidiye wamba: “Kanuena nufua bulelela.” Mu mêyi aa, Satana uvua musue kuleja ne: Nzambi mmuena dishima.

Sophie: Tshivua muanji kumvua bualu ebu mushindu eu to.

Micheline: Pavua Satana muambe muvua Nzambi muena dishima, uvua mujule tshilumbu tshivua tshilomba matuku a bungi bua kutshijikija. Kuena mumone ne: bivua nanku anyi?

Sophie: Hmm. Tshiena mutuishibue to.

Micheline: Mbimpe, ndi mua kufuanyikija bualu ebu mushindu eu. Fuanyikija ne: dimue dituku, ndi nkuambila ne: ndi ne makanda a bungi mapite ebe. Mmunyi muudi mua kundeja ne: kabiena nanku?

Sophie: Si tudi mua kutetangana bukole ku tshintu kampanda.

Micheline: Anu muudi muambe amu. Imue misangu tudi mua kuangata tshintu tshidi ne bujitu bua bungi ne kumona nganyi wa kutudi udi mua kutshiambula. Bulelela, mbipepele bua kumona muntu udi ne makanda mapite a mukuabu.

Sophie: Ndi mumvue tshiudi muambe.

Micheline: Kadi elabi meji ne: pamutu pa meme kuamba ne: ndi ne makanda mapite ebe, ndi ngamba ne: ntu anu ngamba bulelela misangu yonso kukupita wewe. Kuenaku umona ne: bualu ebu mbukole anyi?

Sophie: Eyo, bidi bimueneka nanku.

Micheline: Kuleja muutu wamba bulelela ki mbualu budibu mua kuleja bipepele bu mudibu baleja makanda to.

Sophie: Ki mbipepele.

Micheline: Bulelela, mushindu umue muimpe wa kujikija bualu ebu nkulekela tshikondo tshile tshipita bua bantu bakuabu bamone pankatshi petu nebe bua kumanya udi wamba bulelela misangu yonso.

Sophie: Mbiumvuike bimpe menemene.

Micheline: Mpindieu tuanji kutangila kabidi muyuki wa mu Genese. Satana uvuaku muambe ne: udi ne bukole bupite bua Nzambi anyi?

Sophie: Tòo.

Micheline: Nzambi uvua mua kuikala muleje diakamue ne: Satana mmushime. Kadi, Satana uvua muambe mudiye wamba bulelela ne mudi Nzambi ushima. Mu bulelela, mu mêyi makuabu Satana uvua musue kuambila Eva ne: ‘Nzambi mmunushime, kadi meme ndi nnuambila bulelela.’

Sophie: Ke muvuabi nanku?

Micheline: Bu mudi Nzambi ne meji a bungi, uvua mumanye ne: mushindu muimpe wa kujikija tshilumbu etshi nkulekela tshikondo tshile tshipita. Dîba adi bivua mua kuambuluisha bantu bua kumanya uvua wamba bulelela ne uvua ushima.

LUKONKO LUA MUSHINGA

Sophie: Lufu lua Eva kaluvuaku luleje ne: Nzambi uvua muambe bulelela anyi?

 Micheline: Bidi nanku mu mushindu kampanda. Kadi kuvua malu a bungi avua Satana mujule. Tangila kabidi mvese 5. Udiku mumone tshivua Satana muambile Eva anyi?

Sophie: Uvua mumuambile ne: yeye mudie tshimuma, mêsu ende neakanguke.

Micheline: Eyo, ne uvua ne bua kulua ‘bu Nzambi, kumanya malu mimpe ne malu mabi.’ Nunku Satana uvua musue kuleja ne: Nzambi uvua musokoke bantu tshintu tshimpe kampanda.

Sophie: Aang.

Micheline: Bualu ebu kabuvua pabu butekete bua kubujikija.

Sophie: Bidi bisua kuleja tshinyi?

Micheline: Mu mêyi ende aa, Satana uvua musue kuleja ne: Eva ne bantu bakuabu bonso bavua mua kuikala ne nsombelu muimpe bu Nzambi kayi ubalombola. Mu bualu ebu kabidi, Yehowa uvua mumanye ne: mushindu muimpe wa kujikija tshilumbu tshivua Satana mujule etshi, nkumushila tshikondo bua ajadike tshivuaye muambe. Nunku Nzambi wakanyishila Satana bua kukokesha buloba ebu bua tshikondo kampanda. Ebi bidi bileja bua tshinyi tudi ne makenga a bungi, mbualu Satana ke udi ukokesha buloba ebu, ki Nzambi to. * Kadi kudi lumu luimpe.

Sophie: Ndumu kayi alu?

Micheline: Bible udi ulongesha malu mimpe abidi aa bua Nzambi. Bua kumpala, Yehowa udi ututabalela patudi tukenga. Tshilejilu, tukonkonone mêyi a mukalenge Davidi adi mu Musambu 31:7. Davidi uvua mutuilangane ne ntatu ya bungi mu nsombelu wende, kadi tangila tshivuaye muambile Nzambi mu disambila. Udiku mua kubala mvese eu anyi?

Sophie: Eyo. Udi wamba ne: “Nensake bua luse luebe lujalame, bualu bua wakumona dikenga dianyi.”

Micheline: Nansha muvua Davidi mupete ntatu, uvua mukoleshibue ku muoyo pakamanyaye ne: Yehowa uvua umona lutatu luonso luvuaye utuilangana nalu. Bidiku bikukankamija pebe bua kumanya ne: Yehowa udi umona ntatu yetu yonso, nansha idi bantu bakuabu kabayi bajingulula bimpe anyi?

Sophie: Eyo, bidi binkankamija.

Micheline: Bualu buibidi budi ne: Nzambi kakulekela ntatu yetu itungunuka kashidi to. Bible udi uleja ne: mu katupa kîpi emu, Nzambi neumbushe bukokeshi bubi bua Satana ebu. Nzambi neumbushe bua kashidi malu mabi onso adi afikila bantu lelu, nansha lutatu ludi nalu maman webe nelujike. Ndiku mua kulua lumingu ludi lulonda bua kukuleja bua tshinyi tudi tuamba ne dishindika dionso ne: mu katupa kîpi emu, Nzambi neumbushe makenga onso anyi? *

Sophie: Kakuena bualu.

Udiku ne lukonko lua malu a mu Bible ludi lukutatshisha anyi? Udiku ne bualu kampanda buudi musue kumanya pa bidi bitangila Bantemu ba Yehowa anyi? Biobi nanku, kuelakanyi bua kuebeja Ntemu wa Yehowa yonso uwapetangana nende. Neikale ne disanka bua kuyukila nebe.

^ tshik. 7 Tangila tshiena-bualu tshia ne: “Muntu uyukila ne Ntemu wa Yehowa—Nzambi udiku uditatshisha bua ntatu yetu anyi?” tshidi mu tshibejibeji tshia buena etshi tshia 1/7/2013.

^ tshik. 61 Bua kumanya malu makuabu, bala nshapita wa 9 wa mukanda wa Bible utu ulongesha tshinyi menemene? mupatula kudi Bantemu ba Yehowa.