Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 12 2015

 MALU A MU NSOMBELU

Ndi mu ditalala ne Nzambi ne mamuanyi kabidi

Ndi mu ditalala ne Nzambi ne mamuanyi kabidi

MAMUANYI wakangebeja ne: “Bua tshinyi kuena musue kutendelela bankambua bebe? Kuenaku umona ne: bobu ke badi benze bua wikale ne muoyo anyi? Kuenaku mua kubaleja dianyisha anyi? Bua tshinyi udi musue kulekela bilele bidi bankambua betu batushile? Paudi ubenga kunemeka bankambua betu, bidi bisua kuleja ne: ntendelelu wetu udi tshianana.” Pakamba mamuanyi mêyi aa, wakatuadija kudila.

Ngondo mikese kumpala kua bualu ebu kuenzeka, Bantemu ba Yehowa bavua balombe mamuanyi bua kulonga nende Bible. Kavua musue kulonga to, kadi bua kuleja bukalanga, wakabalomba bua balonge nanyi Bible. Kadi mpindieu uvua mumfikile munda, bualu buvuaye kayi wenza pa tshibidilu bu mumvua mmutumikila misangu yonso. Kadi, bu mumvua musue kusankisha Yehowa, tshivua mua kutumikila mamuanyi musangu eu to. Kabivua bipepele to, kadi Yehowa wakampesha bukole.

NDI NDONGA MALU A YEHOWA

Anu bu bantu ba bungi ba mu Japon, bena mu dîku dietu bavua bena Buddha. Kadi ngondo ibidi meme mumane kutuadija kulonga ne Bantemu ba Yehowa, mvua mutuishibue ne: Bible udi wamba bulelela. Pangakalonga ne: mvua ne Tatuanyi wa mu diulu, ngakapeta dijinga dikole dia kumumanya bimpe. Ku ntuadijilu, tuvua tuyukila ne maman malu avuabu bandongesha. Ngakatuadija kubuela mu bisangilu mu Dia lumingu ku Nzubu wa Bukalenge. Pangakalonga malu a bungi, ngakambila maman ne: mvua ne bua kulekela bilele bia bena Buddha. Diakamue, tshilunji tshiende kushintuluka. Wakamba ne: “Kuikala mu dîku ne muntu udi kayi munange bankambua betu ndiakabi.” Wakangambila bua ndekele kulonga Bible ne kubuela mu bisangilu. Tshivua ngela meji ne: maman uvua mua kungambila bualu bua nunku to. Uvua mulue anu bu muntu mukuabu.

Papa uvua mutue ku tshia maman. Mvua mulonge mu Efeso nshapita 6 ne: Yehowa uvua musue bua meme kutumikila baledi banyi. Mvua musue bua dîku dietu dikale anu mu ditalala, ke meme kuela meji ne: meme mubateleje, ndekelu wa bionso nebanteleje panyi. Tshikondo atshi, mvua ndilongolola ku mateta a mu kalasa, nunku ngakangata dipangadika bua kutumikila tshivua baledi banyi bambe munkatshi mua ngondo isatu. Kadi ngakalaya Yehowa ne: mvua ne bua kutuadija kabidi kubuela mu bisangilu pavua ngondo isatu ikumbana.

Dipangadika dianyi divua dibi bua malu abidi aa: Bua kumpala, mvua ngela meji ne: panyima pa ngondo isatu, mvua mua kuikala anu ne dijinga dikole dia kuenzela Yehowa mudimu. Kadi malanda anyi nende akateketa ne lukasa luonso.  Buibidi, papa ne maman bakenza muabu muonso bua kungitabijija bua kulekela kuenzela Yehowa mudimu.

DIAMBULUISHA NE BULUISHI

Ku Nzubu wa Bukalenge ngakapeta Bantemu ba bungi bavuabu baluisha kudi bena mu mêku abu. Bakanjadikila ne: Yehowa uvua ne bua kunkolesha. (Matayi 10:34-37) Bakangumvuija ne: meme mushale ne lulamatu kudi Yehowa, bena mu dîku dietu bavua mua kulonga bua kumumanya. Bu mumvua musue kueyemena Yehowa, ngakatuadija kusambila bikole.

Bena mu dîku dietu bakanduisha mu mishindu ya bungi. Maman wakansengelela bua ndekele kulonga Bible, ne kutuadija kungeleshisha meji. Misangu ya bungi mvua nshala mupuwe. Pamvua nteta kuakula, tuvua misangu ya bungi tukokangana bualu yonso wa kutudi uvua ujinga kuleja ne: tshivuaye wamba ke tshilelela. Mpindieu ndi mmona ne: bu meme munemeke mmuenenu wa maman ne malongesha ende, nsombelu uvua mua kuikala muimpe. Baledi bakampesha midimu ya bungi ya ku nzubu bua tshipatuki lupangu. Imue misangu, bavua bakanga ku nzubu nshala pambelu anyi babenga kunshila biakudia.

Maman wakalomba bantu bakuabu bua bamuambuluishe bua nshintulule mmuenenu wanyi. Wakakuatshila mulongeshi wetu, kadi tshiakashintuluka to. Maman wakaya nanyi kudi mfumuende wa mudimu bua angitabijije ne: bitendelelu bionso kabiena ne mushinga to. Wakabikila kabidi balela betu ku telefone, ubalomba diambuluisha wenda udila. Bualu ebu buakantonda bikole. Kadi mu bisangilu, bakulu bakamvuluija ne: pavua maman wambila bantu bakuabu bua nsombelu wetu, uvua ubayisha.

Baledi banyi bavua basue bua meme kulonga tulasa tua iniversite bua meme kupeta mudimu muimpe. Bu mutuvua tuetu bonso tufika munda  bikole patuvua tuyukila bua bualu ebu, katuyi tukokesha bua kubuyukila mu ditalala, ngakabafundila mikanda bua kubumvuija bipatshila bianyi. Tatu wakafika munda bikole ne kuamba ne: “Wewe wela meji ne: udi mua kupeta mudimu, uwupete malaba, tshianana udi umbuka ku nzubu eku.” Ngakasambila bua kulomba Yehowa diambuluisha. Dituku diakalonda, pamvua nyisha, bana betu ba bakaji babidi bakampesha mudimu wa kulongesha bana babu kumbelu. Tatu kavua musanke to, nunku wakanjila ne kutuadijaye kundengulula. Maman wakamba ne: bivua bimpe wewe kuikala muenzavi pamutu pa kuikala Ntemu wa Yehowa.

Yehowa wakangambuluisha bua kuakaja ngelelu wanyi wa meji ne kumanya tshia kuenza

Mvua imue misangu mmona anu bu ne: Yehowa kavua musue bua nkandamene baledi banyi mushindu eu to. Ke meme kusambila Yehowa ne kuelangana meji bua tshivua Bible wamba bua dinanga diende. Biakangambuluisha bua kuikala ne mmuenenu muimpe ne kujingulula ne: baledi banyi bavua banduisha bualu bavua baditatshisha bua bualu buanyi. Yehowa wakangambuluisha bua kuakaja ngelelu wanyi wa meji ne kumanya tshia kuenza. Bualu bukuabu, bu mumvua ngenza mudimu wa buambi bikole, ngakawunanga bikole. Nunku ngakajinga bua kulua mpanda-njila.

NDI NDUA MPANDA-NJILA

Pakumvua bamue bana betu ba bakaji bena Kristo ne: mvua musue kulua mpanda-njila, bakangambila bua kuanji kuindila bua tshilunji tshia baledi banyi tshituye. Ngakalomba Nzambi meji, kuenza makebulula, kuela meji bua malu avua ansaka bua kulua mpanda-njila ne kuyukila ne bana betu ba balume ne ba bakaji bakadi bamonamone malu. Pashishe ngakangata dipangadika dia kusankisha Yehowa. Ngakajingulula kabidi ne: nansha meme muindile tshikondo kampanda kumpala kua kulua mpanda-njila, baledi banyi bavua anu mua kutungunuka ne kunduisha.

Ngakalua mpanda-njila mu tshidimu tshianyi tshia ndekelu tshia tulasa tua bikadilu. Panyima pa matuku, ngakajinga bua kuya muaba uvuabu dijinga ne bamanyishi ba bungi. Kadi baledi kabavua basue bua ngumbuke ku nzubu to. Ke bua tshinyi ngakindila too ne pangakakumbaja bidimu 20. Pashishe ngakalomba Betele bua ­bantume ku Sud kua Japon, teritware uvua pabuipi ne balela banyi bua kabitondi maman bikole to.

Pamvua mu mudimu eu, mvua ne disanka bua kumona balongi banyi ba Bible ba bungi batambula. Ngakatuadija kulonga Anglais bualu mvua musue kuvudija mudimu wanyi. Pangakamona tshisumi tshivua natshi bampanda-njila ba pa buabu babidi ba mu tshisumbu tshietu ne muvuabu bambuluisha bakuabu, ngakangata panyi dipangadika dia kulua mpanda-njila wa pa buende. Tshikondo atshi, maman wakasama bikole misangu ibidi, ne misangu yonso eyi mvua mpingana ku nzubu bua kumuambuluisha. Biakamukemesha bikole, kutuadijaye kungenzela malu ndambu ne bulenga.

MABENESHA A BUNGI A KUDI YEHOWA

Bidimu muanda mutekete pashishe, Atsushi, umue wa ku bampanda-njila ba pa buabu bankadi muakule bualu buabu wakantumina mukanda. Uvua musue kusela ne kunkonkaye bua kunsela. Tshivua ngela meji ne: Atsushi uvua mua kungebeja bua kunsela to, ne tshivua ngela meji ne: nansha yeye pende uvua ungelela meji a buena aa to. Panyima pa ngondo umue, ngakamuandamuna ne: mvua musue kuanji kumumanya bimpe. Tuakajingulula ne: tuvua ne bipatshila bia muomumue. Tuvua basue kutungunuka ne mudimu wa ku dîba ne ku dîba ne badiakaje bua kuitaba mudimu wonso uvuabu batupesha. Ndekelu wa bionso tuakaselangana. Ngakasanka bikole bua muvua baledi ne balela banyi bakuabu balue mu dibaka dietu.

Népal

Matuku makese pashishe, patuvua tuenza mudimu bu bampanda-njila ba pa tshibidilu, bakateka Atsushi mutangidi wa tshijengu muambuluishi. Panyima pa matuku, tuakalua bampanda-njila ba pa buabu ne pashishe tuetu kutuadija mudimu wa dikumbula bisumbu.  Patuakajikija kukumbula bisumbu bia mu tshijengu tshietu bua musangu wa kumpala, Betele wakatubikila ku telefone. Bakatuebeja bua kumanya ni tuvua mua kuitaba bua kuya mu Népal bua kutungunuka ne mudimu wa dikumbula bisumbu.

Kuenza mudimu mu matunga a bungi nkundongeshe malu a bungi adi atangila Yehowa

Mvua ndiebeja muvua baledi banyi mua kumvua bu meme mua kuya muaba wa kule. Pangakababikila ku telefone, papa wakangandamuna ne: “Muaba uudi uya mmuimpe.” Lumingu lumue kumpala, mulunda wa papa uvua mumupeshe mukanda uvua wakula bua Népal, ne papa uvua mene wela meji ne: uvua muaba muimpe wa yeye kuya kumona.

Tuvua ne disanka dia bungi dia kuikala munkatshi mua bantu bimpe ba mu Népal. Pashishe, bakatukumbajila kabidi ditunga dia Bangladesh mu tshijengu tshietu. Nansha muvua ditunga dia Bangladesh pabuipi ne dia Népal, divua dishilangane nadi bikole. Tuvua bayishamu mu mishindu ya bungi. Panyima pa bidimu bitanu, bakatupingaja mu Japon mutudi tukumbula bisumbu mpindieu.

Ndi mulonge malu a bungi adi atangila Yehowa patuvua tuenza mudimu mu Japon, mu Népal ne mu Bangladesh. Bantu ba mu matunga aa badi ne bikadilu, bibidilu ne bilele bishilangane. Muntu yonso udi wende mushindu. Ndi mumone mudi Yehowa utabalela muntu yonso pa nkayende, umuanyisha, umuambuluisha ne umubenesha.

Ndi ne malu a bungi a kuelela Yehowa tuasakidila. Mmunganyishile bua kumumanya, kumuenzela mudimu ne mmumpeshe mulume muena Kristo muimpe. Nzambi mmungambuluishe bua kuangata mapangadika mimpe, ne mpindieu ndi nende mu malanda mimpe, ne ndi mu malanda mimpe ne bena mu dîku dietu. Ku diambuluisha dia Yehowa, meme ne maman tudi kabidi balue balunda bimpe. Ndi ne disanka dia bungi bua mundi mu ditalala ne Nzambi ne mamuanyi kabidi.

Tudi bapete disanka dia bungi mu mudimu wa dikumbula bisumbu