Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 11 2015

Yehowa udi Nzambi wa dinanga

Yehowa udi Nzambi wa dinanga

“Nzambi udi dinanga.”—1 YONE 4:8, 16.

MISAMBU: 18, 91

1. Ngikadilu munene wa Nzambi, nngikadilu kayi? Kumanya bualu ebu kudi kukusaka bua kumvua tshinyi bua Nzambi?

BIBLE udi utuambila ne: “Nzambi udi dinanga.” (1 Yone 4:8) Bidi biumvuija tshinyi menemene? Dinanga kadiena anu umue wa ku ngikadilu mimpe ya Yehowa to, kadi nngikadilu wende munene. Nzambi kena anu ne dinanga patupu to, kadi udi dinanga. Dinanga ke didi dimusaka bua kuenza malu onso. Tudi ne dianyisha dia bungi bua mudi dinanga disake Yehowa bua kufuka diulu ne buloba ne bintu bionso bidi ne muoyo.

2. Dinanga didi Nzambi utuleja didi ditupesha dishindika kayi? (Tangila tshimfuanyi.)

2 Yehowa udi ne bulenga ne udi umvuila bifukibua biende luse. Dinanga didiye utuleja didi ditujadikila ne: malu adiye mulongolole bua bantu neakumbane mu mushindu mutambe buimpe. Malu aa neapeteshe bantu badi bamutumikila disanka dilelela. Tshilejilu, bu mudi Yehowa ne dinanga, “mmusungule dituku didiye mupangadije bua kulumbuluisha buloba bujima mu buakane ku butuangaji bua muntu udiye musungule,” Yezu Kristo. (Bienzedi 17:31) Tudi bashindike ne: dilumbuluisha edi nedienzeke. Bantu badi bamutumikila  nebapete nsombelu muimpe mu matuku atshilualua bua kashidi.

TSHIDI MALU ADI MENZEKE MALEJE

3. Nsombelu uvua mua kuikala mushindu kayi bu Nzambi kayi munange bantu?

3 Nsombelu wa bantu wa matuku atshilualua uvua mua kuikala mushindu kayi bu dinanga kadiyi ngikadilu munene wa Nzambi? Bantu bavua mua kutungunuka ne kudilombola ne kuikala ku bulombodi bua Satana, nzambi udi kayi ne dinanga ne muena lukinu. (2 Kolinto 4:4; 1 Yone 5:19; bala Buakabuluibua 12:9, 12.) Nsombelu wa matuku atshilualua uvua mua kuikala mubi menemene bu Yehowa kayi mutunange.

4. Bua tshinyi Yehowa wakalekela batombokela bukokeshi buende?

4 Pavua Satana mutombokele bukokeshi bua Yehowa Nzambi, uvua kabidi musake baledi betu ba kumpala bua kutombokelabu Nzambi. Wakelesha mpata bukenji bua Nzambi bua kuikala Mfumu wa diulu ne buloba. Satana wakaleja muvua bukokeshi buende mua kuikala buimpe kupita bua Nzambi. (Genese 3:1-5) Yehowa wakaleja mudiye ne meji pakalekelaye Satana bua akokeshe bua tshitupa tshîpi bua kujadikaye tshivuaye muambe atshi. Kadi malu adi menzeke adi aleja patoke ne: Satana anyi bantu kabena mua kulombola bimpe to.

Yehowa kavua mufuke bantu ne bukokeshi anyi ne bukenji bua kudilombolabu kabayi ku buludiki buende to

5. Malu adi menzeke mu nsombelu wa bantu mmaleje tshinyi?

5 Lelu malu adi enda anyanguka bikole pa buloba. Bidimu 100 bishale ebi, mbashipe bantu bapite pa miliyo 100 mu mvita. Bible udi wamba bua “matuku a ku nshikidilu” ne: “Bantu babi ne badi badinga bakuabu nebatungunuke ne kunyanguka bibi menemene.” (2 Timote 3:1, 13) Bible udi wamba kabidi ne: ‘Yehowa, ndi mumanye ne: njila wa muntu kena munda muende; muntu kena ne bukole munda muende bua kuendesha nabu biendedi biende bimpe.’ (Yelemiya 10:23) Malu adi menzeke mmaleje patoke mudi mêyi aa malelela. Yehowa kavua mufuke bantu ne bukokeshi anyi ne bukenji bua kudilombolabu kabayi ku buludiki buende to.

6. Bua tshinyi Nzambi mmulekele malu mabi atungunuka?

6 Padi Yehowa mulekele malu mabi atungunuka bua tshikondo kampanda, mmuleje kabidi ne: anu yeye ke udi mua kukokesha bimpe. Mu matuku atshilualua, Nzambi ­neabutule bantu babi bonso. Pashishe, muntu wabenga bukokeshi bua Nzambi bua dinanga, Nzambi neatangile bualu buende diakamue. Malu adi menzeke mu nsombelu wa bantu neasake Nzambi bua kubutula bantomboji abu ne lukasa. Kakulekela kabidi malu mabi enzeka to.

MMUNYI MUDI NZAMBI MULEJE DINANGA DIENDE?

7, 8. Mmunyi mudi Yehowa muleje dinanga diende?

7 Yehowa mmuleje dinanga diende dinene mu mishindu ya bungi. Ela meji bua bunene bua tshibuashibuashi tshietu ne bua buimpe buatshi. Ntshienza ne bikata bia mitoto miliyo ya bungi, ne tshikata tshionso tshidi ne mitoto ne mabulunge miliyo ne miliyo. Mu tshikata  tshietu tshia mitoto tshidibu babikila ne: voie lactée, mudi mutoto udibu babikila ne: dîba. Bu dîba kadiyiku, muoyo kawuvua mua kuikala pa buloba to. Bifukibua bionso ebi bidi bileja ne: Yehowa m’Mufuki wetu, ne bidi bileja ngikadilu yende bu mudi bukole, meji ne dinanga. Eyowa, “ngikadilu [ya Nzambi] idi kayiyi imueneka, mmumue ne: bukole buende bua tshiendelele ne Bunzambi buende, idi imueneka bimpe katshia buloba buafukibua, bualu badi bayijinguluila ku bintu bidi bifukibue.”—Lomo 1:20.

Tshintu tshionso tshidi Yehowa mufuke pa buloba tshidi tshiambuluisha bantu ne nyama

8 Yehowa uvua mufuke buloba nangananga bua muoyo wikalapu. Tshintu tshionso tshidi pa buloba tshidi tshiambuluisha bantu ne nyama. Nzambi wakenzela bantu muaba muimpe wa kusomba ne kubapeshaye lungenyi ne mubidi bipuangane bua kuikalabu ne muoyo bua kashidi. (Bala Buakabuluibua 4:11.) Bualu bukuabu, ‘udi ufila biakudia kudi bintu bionso bidi ne muoyo, bua luse luende ludi lujalame tshiendelele.’—Musambu 136:25.

9. Nansha mudi Yehowa Nzambi wa dinanga, ntshinyi tshidiye mukine?

9 Yehowa udi Nzambi wa dinanga, kadi mmukine malu mabi. Tshilejilu, Musambu 5:4-6 udi wamba bua Yehowa ne: ‘Wewe kuena Nzambi udi usanka mu malu mabi, udi ne benji ba malu mabi bonso lukuna.’ Udi kabidi ukina ‘bantu badi bamatshisha mashi panshi ne badi badinga bakuabu.’

MALU MABI AKADI PA KUJIKA

10, 11. a) Ntshinyi tshiafikila benji ba malu mabi? b) Mmunyi muafuta Yehowa bantu badi bamutumikila?

10 Yehowa neajikije malu mabi pa buloba bujima mu tshikondo tshiakanyine bualu udi Nzambi wa dinanga ne mmukine malu mabi. Dîyi dia Nzambi didi diamba ne: ‘Benji ba malu mabi nebabutudibue; kadi badi bindila Yehowa nebapiane buloba. Tshitupa tshîpi katshiyi tshianji kulepa, muntu mubi kena wikalaku kabidi.’ Baluishi ba Yehowa ‘nebajimine bu mudi muishi wa kapia ujimina.’—Musambu 37:9, 10, 20.

11 Dîyi dia Nzambi didi diamba kabidi ne: ‘Bantu bakane nebapiane buloba, nebashikamamu tshiendelele.’ (Musambu 37:29) Bantu badi ne lulamatu ‘nebasanke mu ditalala dikumbane.’ (Musambu 37:11) Bua tshinyi? Bualu Nzambi wetu wa dinanga utu wenzela batendeledi bende ba lulamatu malu mimpe misangu yonso. Bible udi utuambila ne: “Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi. Malu a kale ajiminyi.” (Buakabuluibua 21:4) Nnsombelu muimpe kayipu udi muindile bantu badi batumikila Nzambi ne banyisha dinanga diende!

12. “Muntu udi ne mutshima mutoke” mmuntu wa mushindu kayi?

12 Bible udi utuambila ne: ‘Tangila muntu udi ne mutshima mutoke bimpe, mona muntu udi muakane; bualu bua tunkanunuina netuikale kudi muena ditalala. Kadi batomboki nebabutudibue, buonso buabu mene. Tunkanunuina tua bantu babi netujimijibue.’ (Musambu 37:37, 38) “Muntu udi ne mutshima mutoke” mmuntu udi mufike ku dimanya Yehowa ne Muanende, ne wenza disua dia Nzambi ne muoyo mujima. (Bala Yone 17:3.) Udi witaba ne muoyo mujima ne: “buloba budi bupita ne majinga abu kabidi, kadi muntu udi wenza disua  dia Nzambi, udi ushala kashidi.” (1 Yone 2:17) Bu mukadi nshikidilu wa ndongoluelu eu pabuipi, tudi ne bua ‘kuindila Yehowa ne kulamata njila wende’ ne lukasa luonso.—Musambu 37:34.

TSHIENZEDI TSHINENE TSHIA DINANGA DIA NZAMBI

13. Ntshienzedi kayi tshinene tshia dinanga dia Nzambi?

13 Nansha mutudi bapange bupuangane, tudi mua kutumikila Nzambi. Tudi kabidi mua kudia malanda makole ne Yehowa ku diambuluisha dia mulambu wa Yezu udi utupikula udi tshienzedi tshinene tshia dinanga dia Nzambi. Yehowa mmufile mulambu eu bua bantu badi bamutumikila bapete mushindu wa kupikudibua ku bubi ne ku lufu. (Bala Lomo 5:12; 6:23.) Bu muvua Yezu ne lulamatu kudi Nzambi munkatshi mua bidimu bia bungi mu diulu, Yehowa uvua mutuishibue ne: Muanende uvua ne bua kushala ne lulamatu pa buloba. Bu mudi Yehowa muikale Tatu wa dinanga, bivua bimutonde bikole pavuaye mumone muvua bantu bakengesha Muanende ne tshikisu. Kadi Yezu wakatua bukenji bua Nzambi bua kukokesha nyama ku mikolo ne lulamatu, ne kulejaye ne: muntu mupuangane udi mua kushala ne lulamatu kudi Nzambi nansha yeye mu nsombelu mikole.

Bua dinanga diende, Nzambi wakatuma Muanende (Tangila tshikoso tshia 13)

14, 15. Ntshinyi tshidi lufu lua Yezu luenzela bantu?

14 Nansha muvua Yezu mupete ntatu mikole, wakashala ne lulamatu ne kubingisha bukenji bua Yehowa bua kukokesha. Tudi ne bua kuikala ne dianyisha bualu Yezu wakafua bua kufuta mushinga wa mulambu udi upikula ne kuenza bua bantu bikale ne diakalenga dia kupeta muoyo wa tshiendelele mu bulongolodi bupiabupia bua Nzambi. Mupostolo Paulo wakumvuija mudi dinanga dia Yehowa ne Yezu dimuenekela mu mulambu udi upikula. Wakamba ne: “Patutshivua mu butekete Kristo wakafua bua bantu babi mu tshikondo tshijadika. Mbualu bukole bua muntu kufuila muntu muakane; bulelela, imue misangu muntu udi mua kuitaba bua kufuila muntu muimpe. Kadi Nzambi wakaleja dinanga diende kutudi mu bualu ebu ne: patutshivua benji ba malu mabi Kristo wakafua bua bualu buetu.” (Lomo 5:6-8) Mupostolo Yone wakafunda ne: “Mu bualu ebu, dinanga dia Nzambi diakamueneka bua bualu  buetu, bualu Nzambi wakatuma Muanende mulela umuepele pa buloba bua tupete muoyo ku butuangaji buende. Dinanga mu bualu ebu didi ne: tuetu katuvua banange Nzambi, kadi yeye wakatunanga, kutumaye Muanende bu mulambu wa kubuikidila nawu mibi yetu.”—1 Yone 4:9, 10.

15 Yezu wakamba ne: ‘Nzambi uvua munange ba pa buloba bikole menemene, wakabapesha Muanende mulela umuepele bua muntu yonso udi uleja ditabuja kudiye kafu, kadi ikale ne muoyo wa tshiendelele.’ (Yone 3:16) Nansha muvuabi bisame Yehowa ku muoyo bikole menemene, wakafila Muanende bu mulambu udi upikula. Bualu ebu budi buleja mudiye munange bantu bikole. Dinanga edi nedishale kashidi. Paulo wakafunda ne: “Ndi mutuishibue ne: ni ndufu, ni mmuoyo, ni mbanjelu, ni mbulamatadi, ni mmalu a mpindieu anyi malu atshilualua, ni mmakokeshi, ni mbutumbuke, ni ndondo, ni ntshifukibua kayi tshikuabu tshionso, katshiena mua kutumbusha ku dinanga dia Nzambi didi mu Kristo Yezu Mukalenge wetu nansha.”—Lomo 8:38, 39.

BUKALENGE BUA NZAMBI BUDI BUKOKESHA MPINDIEU

16. Bukalenge bua Masiya ntshinyi? Mbanganyi badi Yehowa musungule bua kukokesha mu Bukalenge abu?

16 Mbulamatadi wa Nzambi anyi Bukalenge bua Masiya budi pabu buleja ne: Yehowa mmunange bantu. Mushindu kayi? Yehowa ukadi musungule Yezu Kristo, Mukokeshi udi munange bantu ne udi mukumbane bua kulombola. (Nsumuinu 8:31) Kudi kabidi bantu 144000 basungula munkatshi mua bukua bantu bakokesha ne Kristo mu diulu. Padibu bababisha ku lufu bua kuya mu diulu, nebikale ne dimanya dia tshivua kuikala muntu kumvuija. (Buakabuluibua 14:1) Pavua Yezu pa buloba, Bukalenge bua Nzambi ke buvua tshiena-bualu tshinene tshia dilongesha diende, ne wakalongesha bayidi bende bua kusambila ne: “Tatu wetu udi mu diulu, dîna diebe ditumbishibue. Bukalenge buebe bulue. Disua diebe dienzeke kabidi pa buloba muomumue ne mu diulu.” (Matayi 6:9, 10) Tudi bindile ne muoyo kuulu kuulu dikumbana dia malu a mu disambila edi pikala Nzambi mua kutuadila bantu masanka a bungi.

17. Leja dishilangana didi pankatshi pa bukokeshi bua Yezu ne bua bantu.

17 Kudi dishilangana dinene pankatshi pa bukokeshi bua Yezu bua dinanga ne bukokeshi bua bantu. Bukokeshi bua bantu mbukebeshe mvita idi mishipeshe bantu miliyo ya bungi. Kadi Mukokeshi wetu Yezu mmutunange bikole ne udi widikija ngikadilu mimpe ya Nzambi, nangananga ngikadilu wende wa dinanga. (Buakabuluibua 7:10, 16, 17) Yezu wakamba ne: “Luayi kundi, nuenu bonso badi batata ne midimu mikole ne bambule majitu manene, nennupeshe bukole. Ambulayi mutshi wanyi wa tshikokedi, nulonge malu kundi, bualu meme ndi mupole malu ne mupuekele mu mutshima, nunku nenupete bukole mu mioyo yenu. Bualu bua mutshi wanyi wa tshikokedi mmuimpe ne bujitu buanyi mbupepele.” (Matayi 11:28-30) Ndilaya kayipu dimpe dia dinanga nunku!

18. a) Ntshinyi tshidibu benda benza katshia ku tshidimu tshia 1914? b) Tshiena-bualu tshidi tshilonda netshiandamune nkonko kayi?

18 Bible udi uleja ne: Bukalenge bua Nzambi mbutuadije kukokesha mu diulu mu 1914. Katshia anu ku tshikondo atshi, badi benda basangisha bantu ba ndekelu bakokesha ne Yezu mu diulu ne bantu ba mu “musumba munene” bapanduka ku nshikidilu kua ndongoluelu mubi wa malu eu bua kubuela mu bulongolodi bupiabupia. (Buakabuluibua 7:9, 13, 14) Mbantu bungi kayi badi benza musumba munene lelu? Ntshinyi tshidi Nzambi ubalomba bua kuenza? Tshiena-bualu tshidi tshilonda netshiandamune nkonko eyi.