Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 10 2015

Udiku umona tshianza tshia Nzambi mu nsombelu webe anyi?

Udiku umona tshianza tshia Nzambi mu nsombelu webe anyi?

‘Tshianza tshia Yehowa netshimanyike kudi bena mudimu bende.’—YESHAYA 66:14, NWT.

MISAMBU: 65, 26

1, 2. Bamue bantu batu bela meji kayi bua Nzambi?

BANTU ba bungi badi bamona ne: malu adibu benza kaena ambila Nzambi bualu. Badi bela meji ne: Nzambi kena uditatshisha bua malu adi abafikila to. Tshilejilu, pavua tshipepele tshikole tshinyangakaje bintu mu tshitupa tshinene tshia mu Philippines mu ngondo wa 11 mu 2013, mulombodi wa tshimue tshimenga tshinene tshia mu ditunga edi wakamba ne: “Nzambi udi mua kuikala muye muaba mukuabu.”

2 Bantu bakuabu badi bela meji ne: Nzambi kena mua kumona malu adibu benza to. (Yeshaya 26:10, 11; 3 Yone 11) Bamue bantu ba mu matuku a mupostolo Paulo bavua bela meji mushindu wa muomumue. Paulo wakamba ne: ‘Kabavua banyishe bua kuikala ne Nzambi mu dimanya dijalame’ to. Bavua ne malu adi kaayi makane, ne muoyo mubi, ne lukuka ne malu mabi.—Lomo 1:28, 29.

3. a) Nnkonko kayi itudi ne bua kudiela? b) Mu Bible, “tshianza” tshia Nzambi tshitu misangu ya bungi tshileja tshinyi?

3 Netuambe tshinyi buetu tuetu? Tudi bamanye ne: Yehowa utu umona malu onso atudi tuenza. Kadi, tutuku tuitaba ne: Yehowa  udi ututabalela anyi? Tutuku tumona mudi tshianza tshiende tshituambuluisha mu nsombelu wetu anyi? Mu Bible, “tshianza” tshia Nzambi tshitu misangu ya bungi tshileja bukole budiye wenza nabu mudimu. Udi wenza mudimu ne bukole buende bua kuambuluisha batendeledi bende ne kutshimuna baluishi bende. (Bala Dutelonome 26:8.) Yezu wakaleja ne: bamue bantu bavua ne bua ‘kumona Nzambi.’ (Matayi 5:8) Udiku umue wa ku bantu aba anyi? Mmunyi muudi mua ‘kumona Nzambi’? Tumonayi bilejilu bia mu Bible bia bantu bavua bamone tshianza tshia Nzambi mu nsombelu wabu ne bia aba bavua kabayi batshimone. Netumone kabidi mudi ditabuja dituambuluisha bua kumona tshianza tshia Nzambi.

BAKABENGA BUA KUMONA TSHIANZA TSHIA NZAMBI

4. Bua tshinyi bena lukuna ba bena Isalele bavua babenge kumona tshianza tshia Nzambi?

4 Ku kale, bantu ba bungi bavua ne mushindu wa kumona anyi kumvua muvua Nzambi muambuluishe bena Isalele. Yehowa uvua muenze bishima bua kupatula bantu bende mu bupika mu Ejipitu ne bua kutshimuna bakalenge ba bungi mu Buloba bulaya. (Yoshua 9:3, 9, 10) Nansha muvua bamue bakalenge bumvue ne bamone muvua Yehowa musungile bantu bende, ‘bakapunga dîyi diabu, bakadisangisha bua kuluisha Yoshua ne bena Isalele.’ (Yoshua 9:1, 2) Pavua bakalenge aba bele bena Isalele mvita, bakapeta mpunga wa kumona tshianza tshia Nzambi. Bua kuleja mudi Yehowa ne bukole bua bungi, ‘dîba diakimana ne ngondo wakimana too ne pakadisombuela bena Isalele kudi bena lukuna babu.’ (Yoshua 10:13) Kadi, Yehowa ‘wakakolesha’ mioyo ya bena lukuna ba bena Isalele bua kuluishabu bena Isalele. (Yoshua 11:20) Bena Isalele bakatshimuna bena lukuna babu bualu bavua babenge kuitaba ne: Yehowa uvua uluangena bantu bende mvita.

Tudi ne bua kukeba tshianza tshia Nzambi mu nsombelu wetu

5. Ntshinyi tshivua mukalenge mubi Ahaba mubenge kuitaba?

5 Pashishe, mukalenge mubi Ahaba uvua ne mushindu wa kumona tshianza tshia Nzambi misangu ya bungi. Eliya uvua mumuambile ne: ‘Nansha mume nansha mvula kabiena bimueneka bidimu ebi anu ku dîyi dianyi.’ (1 Bakelenge 17:1) Bualu ebu buvua mua kuenzeka anu ku tshianza tshia Nzambi, kadi Ahaba wakabenga bua kuitaba bualu ebu. Pashishe, Eliya wakalomba Yehowa, ne Nzambi wakamuandamuna pakatumaye kapia kafuma mu diulu. Ahaba uvua mumone kapia aku. Nunku, Eliya wakambila Ahaba ne: Yehowa uvua ne bua kuimanyika minanga ne kulokesha mvula mukole. (1 Bakelenge 18:22-45) Nansha muvua Ahaba mumone bishima bionso ebi, wakabenga bua kuitaba ne: uvua mumone bukole bua Yehowa. Bilejilu ebi bidi bitulongesha tshinyi? Tudi ne bua kukeba tshianza tshia Nzambi mu nsombelu wetu.

BAKAMONA TSHIANZA TSHIA YEHOWA

6, 7. Ntshinyi tshivua bena Gibeona ne Lahaba bajingulule?

6 Bena Gibeona bavua bashilangane bikole ne bisamba bivua bibanyunguluke. Bakamona tshianza tshia Nzambi. Pamutu pa bena Gibeona kuluanganabu ne bena Isalele, bakakeba nabu ditalala. Bua tshinyi? Bakamba ne: bavua bumvue lumu lua Yehowa ne lua malu onso avuaye muenze. (Yoshua 9:3, 9, 10) Bivua bimpe bua muvuabu bajingulule ne: Yehowa uvua uluangena bena Isalele.

7 Lahaba pende wakamona tshianza tshia Yehowa. Kavua muena Isalele to, kadi uvua mumvue  muvua Yehowa mupatule bantu bende mu bupika mu Ejipitu. Pavua batentekedi babidi bena Isalele baye kudiye, wakabambila ne: ‘Ndi mumanye ne: Yehowa wakanupa buloba.’ Lahaba uvua witaba ne: Yehowa uvua mua kumusungila yeye ne bena mu dîku diabu. Wakaleja ditabuja kudi Yehowa nansha muvuaye mumanye ne: kuenza nunku kuvua kumukebela njiwu.—Yoshua 2:9-13; 4:23, 24.

8. Mmunyi muvua bamue bena Isalele bajingulule tshianza tshia Nzambi?

8 Bishilangane ne mukalenge mubi Ahaba, bamue bena Isalele bavua bamone kapia kafuma mu diulu bua kuandamuna disambila dia Eliya bakajingulula ne: Nzambi ke uvua muenze bualu ebu. Bakamba ne dîyi dikole ne: ‘Yehowa udi Nzambi mulelela.’ (1 Bakelenge 18:39NWT) Buabu bobu, bivua bimueneka patoke ne: bavua bamone bukole bua Nzambi.

9. Mmunyi mutudi mua kumona Yehowa ne tshianza tshiende lelu?

9 Tudi bamone bilejilu bimpe ne bibi bidi bituambuluisha bua kumvua tshidi “kumona Nzambi” anyi kumona tshia Nzambi kumvuija. Patudi tumanya Yehowa ne ngikadilu yende, tudi tumona tshianza tshiende ne “mêsu a muoyo wetu.” (Efeso 1:18) Ebi bidi bitusaka bua kuidikija bena lulamatu ba kale ne ba lelu badi bamone mudi Yehowa muambuluishe bantu bende. Kadi tudiku ne bijadiki bidi bileja ne: Nzambi udi wambuluisha bantu bende lelu anyi?

BIJADIKI BIA MUDI TSHIANZA TSHIA NZAMBI TSHITUAMBULUISHA LELU

10. Ntshinyi tshidi tshituleja ne: Yehowa udi wambuluisha bantu bende lelu? (Tangila tshimfuanyi tshia ntuadijilu.)

10 Tudi ne bijadiki bia bungi bidi bileja ne: Yehowa udi utungunuka ne kuambuluisha bantu  lelu. Misangu ya bungi tutu tumvua ngumu ya bantu bavua balombe Nzambi bua abambuluishe mu nsombelu wabu, ne Nzambi muandamune masambila abu. (Musambu 53:2) Tshilejilu, pavua Allan uyisha mu tshidiila kampanda tshikese tshia mu Philippines, wakapetangana ne mamu mukuabu uvua mutuadije kudila. Udi wamba ne: “Mu dinda adi, mamu eu uvua mulombe Yehowa bua atuilangane ne Bantemu ba Yehowa.” Patshivuaye nsonga, uvua ulonga Bible ne Bantemu, kadi pakamuselabu wakaya kusombela mu tshidiila, ne kulekelaye kulonga Bible. Nzambi uvua muandamune disambila diende ne lukasa, bualu ebu buakamulenga ku muoyo bikole. Wakadilambula kudi Yehowa mu ngondo mikese.

Udiku ukeba mishindu iudi mua kumona tshianza tshia Yehowa mu nsombelu webe anyi? (Tangila tshikoso tshia 11-13)

11, 12. a) Mmunyi mudi Yehowa wambuluisha batendeledi bende? b) Leja muvua Yehowa muambuluishe muanetu wa bakaji kampanda.

11 Batendeledi ba Yehowa ba bungi mbamone mudi tshianza tshiende tshibambuluishe pavuabu balekele bibidilu bibi bu mudi: dinua dia makanya ne bintu bidi bikuata anyi ditangila bimfuanyi bia bantu kabayi bilamba. Bamue batu bamba ne: pavuabu batete bua kulekela bintu ebi bobu nkayabu, kabavua bakokeshe to. Kadi pavuabu balombe Yehowa diambuluisha, uvua mubapeshe “bukole budi bupite bua pa tshibidilu,” buvua bubambuluishe bua kulekela bibidilu biabu bibi ebi.—2 Kolinto 4:7; Musambu 37:23, 24.

Yehowa udi wambuluisha batendeledi bende bua kutantamena ntatu yabu

12 Yehowa udi kabidi wambuluisha batendeledi bende bua kutantamena ntatu yabu. Ke tshivua tshifikile Amy muanetu wa bakaji mukuabu. Bavua bamutume bua kuambuluisha mu dibaka dia Nzubu wa Bukalenge ne wa bamisionere mu tshidiila kampanda tshikese tshia mu mbuu wa Pacifique. Nsombelu wa muaba au uvua mushilangane ne uvuaye nende: misangu ya bungi kakuvua nzembu nansha mâyi, njila ivua ne mâyi a bungi, uvua kule ne bena mu dîku diende ne uvua musombele mu katshibambalu kakese mu nzubu wa tshilala benyi. Dimue dituku, wakamba muanetu wa bakaji mukuabu uvuabu benza nende mudimu mêyi mabi. Wakumvua bibi menemene bua tshivuaye muenze atshi. Pakapinganaye mu nzubu muende muvua mîdima, wakasambila Yehowa bua kumulomba diambuluisha. Pashishe pakapingana nzembu, wakabala tshiena-bualu kampanda tshia mu Tshibumba tshia Nsentedi tshivua tshiakula bua difila mapoloma a kalasa ka Gilada. Mu tshiena-bualu atshi bavua bakulamu bua ntatu ya buena ivuaye mupete. Udi wamba ne: “Mvua mudiumvue anu bu mvua nyukila ne Yehowa dilolo adi. Biakankolesha bikole bua kutungunuka ne mudimu wanyi.”—Musambu 44:25, 26; Yeshaya 41:10, 13.

13. Ntshijadiki kayi tshidi tshituleja ne: Yehowa mmuambuluishe batendeledi bende bua kubingisha bukenji buabu bua kuyisha?

13 Yehowa mmuambuluishe kabidi batendeledi bende bua kuakuilabu lumu luimpe ne kulujadika kumpala kua bakokeshi. (Filipoyi 1:7) Tshilejilu, pavua imue mbulamatadi mitete bua kuimanyika mudimu wa kuyisha, tuvua badibingishe ku tubadi. Pa buloba bujima, tudi batshimune bilumbu bitue ku 268 ku tubadi tunene, ne bilumbu 24 bia kudibi tuvua babitshimune ku Kabadi kanene ka manême a bantu ka ku Mputu kutuadijila mu 2000. Bidi bimueneka patoke ne: muntu nansha umue kena mua kuimanyika tshianza tshia Nzambi to.—Yeshaya 54:17; bala Yeshaya 59:1.

14. Ntshijadiki kayi tshikuabu tshidi tshituleja ne: Nzambi udi ne bantu bende?

 14 Kuyisha lumu luimpe pa buloba bujima ntshijadiki tshikuabu tshia mudi tshianza tshia Nzambi tshituambuluisha. (Matayi 24:14; Bienzedi 1:8) Batendeledi ba Yehowa ba mu bisamba bionso badi mu buobumue anu bualu Yehowa udi ubambuluisha. Buobumue ebu mbua pa buabu. Nansha bantu badi kabayi batendelela Yehowa badi bitaba ne: “Bulelela Nzambi udi munkatshi muenu.” (1 Kolinto 14:25) Tudi ne bijadiki bia bungi bidi bileja ne: Nzambi udi ne bantu bende. (Bala Yeshaya 66:14.) Kadi wewe, udiku umona tshianza tshia Yehowa mu nsombelu webe anyi?

UDIKU UMONA TSHIANZA TSHIA YEHOWA MU NSOMBELU WEBE ANYI?

15. Bua tshinyi imue misangu katuena mua kumona tshianza tshia Yehowa mu nsombelu wetu?

15 Imue misangu katuena mua kumona tshianza tshia Nzambi mu nsombelu wetu to. Bua tshinyi? Bualu dîba ditudi ne malu a bungi adi atutatshisha, tudi mua kupua muoyo ne: Yehowa uvua mutuambuluishe misangu ya bungi kumpala. Ke tshivua tshifikile Eliya. Uvua ne dikima, kadi pavua mukalenge mukaji Izebele ukeba kumushipa, wakumvua buôwa. Bua tshitupa tshîpi, wakapua muoyo muvua Yehowa mumuambuluishe kumpala. Bible udi uleja ne: Eliya wakajinga lufu. (1 Bakelenge 19:1-4) Nkuepi kuvuaye mua kupetela diambuluisha ne dikankamija? Uvua ne bua kudikebela kudi Yehowa.—1 Bakelenge 19:14-18.

16. Mmunyi mutudi mua kumona Nzambi patudi ne ntatu?

16 Yobo uvua uditatshisha bikole bua malu avua mamutonde, ne biakamupangisha bua kumona nsombelu wende muvua Yehowa umumona. (Yobo 42:3-6) Imue misangu, bidi mua kutukolela petu bua kumona Nzambi bua ntatu itudi nayi. Ntshinyi tshidi mua kutuambuluisha bua kumona malu adi Nzambi utuenzela?  Tudi ne bua kuelangana meji bua tshidi Bible wamba bua ntatu yetu. Pashishe, netumone Yehowa bu muntu mulelela, netufike ku diamba petu ne: ‘Ngakumvua lumu luebe diambedi anu ku matshi, kadi mpindieu mêsu anyi akukumona.’

Yehowa udiku wenza nebe mudimu bua kuambuluisha bantu bakuabu bua bamumone anyi? (Tangila tshikoso tshia 17, 18)

17, 18. a) Mmunyi muudi mua kumona tshianza tshia Yehowa mu nsombelu webe? b) Londa bualu budi buleja mudi Nzambi utuambuluisha lelu.

17 Mmunyi muudi mua kumona tshianza tshia Yehowa mu nsombelu webe? Tukonkononayi bilejilu bitanu. Tshia kumpala, udi mua kudiumvua ne: Yehowa mmukuambuluishe bua kupeta bulelela. Tshibidi, udi mua kuvuluka muuvua muye mu bisangilu bia bena Kristo, muteleje muyuki, ne muambe ne: “Ke tshimvua natshi dijinga menemene!” Tshisatu, pamuapa udi mumone mudi Yehowa muandamune dimue dia ku masambila ebe. Tshinayi, pamuapa uvua musue kuenzela Yehowa mudimu wa bungi ne udi mumone mudiye mukuambuluishe bua kukumbaja tshipatshila tshiebe etshi. Tshitanu, pamuapa udi mulekele mudimu uuvua wenza bualu udi ukuangata dîba dia wewe kuenzela Yehowa mudimu ne udi mumone pashishe mudi Nzambi mukumbaje mulayi wende wa ne: “Tshiakukulekela nansha kakese.” (Ebelu 13:5) Malanda etu ne Yehowa wowu makole, tudi mua kumona bipepele tshianza tshiende mu nsombelu wetu.

18 Sarah, muanetu wa bakaji wa mu Kenya udi wamba ne: “Ngakasambila bua mulongi wa Bible umvua mmona ne: kavua wanyisha dilonga dietu nende. Ngakebeja Yehowa ni mvua mua kulekela kumulongesha. Diakamue pangakamba ‘Amen,’ telefone wanyi wakadila. Mulongi wa Bible au ke uvua mumbikile bua kungebeja ni tuvua mua kuya nende mu bisangilu! Biakankemesha bikole be!” Tuetu tukeba bua kumona malu adi Nzambi utuenzela, netumone mudi tshianza tshiende tshituambuluisha. Rhonna, muanetu wa bakaji wa mu Asie udi wamba ne: bidi bikengela matuku a bungi bua kumona mudi Yehowa utuambuluisha mu nsombelu wetu. Udi usakidila ne: “Kadi paudi wenza nunku, bidi bikukemesha bua kumona mudiye ututabalela bikole.”

19. Ntshinyi tshikuabu tshitudi ne bua kuenza bua kumona Nzambi?

19 Yezu wakamba ne: bantu bikala ne bua ‘kumona Nzambi’ badi ne bua kuikala “ne muoyo mutoke.” (Matayi 5:8) Bidi biumvuija tshinyi? Bidi biumvuija ne: tudi ne bua kulama lungenyi luetu lukezuke ne kulekela kuenza bualu buonso budi bubi. (Bala 2 Kolinto 4:2.) Mu tshiena-bualu etshi, tudi bamone ne: bua kumona Nzambi, tudi ne bua kutungunuka ne kukolesha malanda etu nende. Mu tshiena-bualu tshidi tshilonda, netumone mudi ditabuja mua kutuambuluisha bua kumona tshianza tshia Yehowa mu nsombelu wetu bimpe menemene.