Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 10 2015

Enzela Yehowa mudimu kuyi ne ditanaji

Enzela Yehowa mudimu kuyi ne ditanaji

‘Mariya uvua uteleja dîyi dia Yezu. Mâta uvua ne midimu ya bungi ivua imupangisha bua kuteleja.’ —LUKA 10:39, 40.

MISAMBU: 94, 134

1, 2. Bua tshinyi Yezu uvua munange Mâta? Ntshilema kayi tshivua Mâta muenze tshidi tshileja ne: kavua mupuangane?

PAUDI wela meji bua Mâta muanabu ne Lazalo, utu umumona bu muntu wa mushindu kayi? Bible udi uleja ne: Mâta uvua mulunda muimpe wa Yezu, ne wamba kabidi ne: Yezu uvua mumunange. Bushuwa, Mâta kavua nkayende muntu mukaji uvua Yezu munange ne unemeka to. Tshilejilu, Mariya muanabu ne Mâta uvua pende mulunda wa Yezu munene. Yezu uvua munange mamuende Mariya. (Yone 11:5; 19:25-27) Kadi, bua tshinyi Yezu uvua munange Mâta?

2 Yezu uvua munange Mâta bualu uvua muena malu mimpe ne muakididi wa benyi, uvua kabidi muenji wa mudimu. Kadi Yezu uvua mumunange nangananga bualu uvua ne ditabuja dikole. Uvua witabuja malu onso avua Yezu ulongesha ne kavua ne dielakana dia ne: uvua Masiya mulaya to. (Yone 11:21-27) Nansha nanku, Mâta kavua mupuangane to. Anu bu tuetu bonso, uvua pende wenza bilema. Tshilejilu, dimue dituku pavua Yezu muye  kubatangila, Mâta wakafikila muanabu Mariya munda ne kuambilaye Yezu bua amubele. Mâta wakamba ne: “Mukalenge, kabienaku bikutonda padi muanetu mundekeele nkayanyi midimu yonso anyi? Nanku, muambila koku alue kungambuluisha.” (Bala Luka 10:38-42.) Bua tshinyi Mâta uvua muambe nanku? Diandamuna divua Yezu mumupeshe didi ditulongesha tshinyi?

MÂTA UVUA MU DITANAJI

3, 4. Mbualu kayi buvua Mariya muenze buvua Yezu muanyishe? Ndilongesha kayi divua Mâta mupete? (Tangila tshimfuanyi tshia ntuadijilu.)

3 Yezu uvua ne dianyisha bua muvua Mâta ne Mariya bamubikile kuabu, ne uvua musue kubabidila mpunga au bua kubalongesha bulelela. Diakamue Mariya wakasomba ku luseke luende, “uteleja dîyi diende.” Kavua musue kupangila bualu nansha bumue buvuaye mua kulonga kudi Mulongeshi munene to. Mâta uvua pende mua kusungula bua kuteleja Yezu. Yezu uvua mua kumutumbisha pavuaye ulekela bivuaye wenza bua kumuteleja.

4 Kadi Mâta uvua mu ditanaji. Uvua ne mudimu wa bungi wa kulongoluela Yezu biakudia bia pa buabi ne kuenza malu makuabu a bungi bua disomba diabu ne Yezu dikale dimpe menemene. Pavuaye mumone ne: Mariya kavua umuambuluisha, wakafiika munda ne kuela Yezu lusanzu. Yezu uvua mumanye ne: Mâta uvua ukeba kuenza bia bungi, nunku wakamuambila ne bulenga ne: “Mâta, Mâta, udi uditatshisha, usumpakana bua bintu bia bungi.” Wakamuleja kabidi ne: biakudia bikese, anyi mene tshintu tshimue tshivua mua kukumbana. Pashishe, Yezu wakatumbisha Mariya bua muvuaye umuteleja ne ntema yonso. Wakamba ne: “Mariya yeye mmusungule tshintu tshimpe ne kabakumunyengatshi to.” Mariya uvua mua kuikala mupue muoyo bivuaye mudie dituku adi, kadi kavua mua kuikala mupue muoyo malu avuaye mulonge kudi Yezu ne mushindu uvuaye mumuele kalumbandi to. Mupostolo Yone wakalua kufunda bidimu bipite pa 60 pashishe ne: “Yezu uvua munange Mâta, ne muanabu wa bakaji.” (Yone 11:5) Mêyi aa adi aleja ne: Mâta uvua muitabe mubelu muimpe uvua Yezu mumupeshe, ne wakenzela Yehowa mudimu ne lulamatu mu matuku ende onso a muoyo.

5. Bua tshinyi mbikole nangananga lelu bua kutamba kuimanyina pa malu adi ne mushinga wa bungi? Ndukonko kayi lutuandamuna?

5 Tudi tumona ne: lelu kudi bintu bia bungi bidi mua kutupangisha bua kuenzela Yehowa mudimu bu muvuabi mu tshikondo tshia kale. Tshibumba tshia Nsentedi tshia dia 15 ngondo wa 9 mu 1958 mu Anglais tshiakadimuija bana betu ba balume ne ba bakaji bua kubenga kulekela bintu bidi bantu bapatula bibapangisha bua kuenzela Yehowa mudimu. Bidi bimueneka ne: kuvua tshintu tshipiatshipia tshivua tshipatuka dituku dionso tshikondo atshi. Bintu bu mudi bikandakanda, tudiomba, filme, ne televizion bivua bitangalake bikole mu bantu. Tshibumba tshia Nsentedi atshi tshiakamba ne: bu mutudi tusemena bikole ku nshikidilu wa ndongoluelu wa malu eu, “pamuapa malu adi afila ditanaji neavule.” Kupita bikondo bikuabu bionso, lelu kudi bintu bia bungi bidi mua kutubueja mu ditanaji. Ntshinyi tshitudi mua kuenza bua kufuanangana bikole ne Mariya ne kutamba kuimanyina pa ditendelela dietu dia Yehowa?

KUDINYI NE KASUKI MU DIENZA MUDIMU NE BIA PA BULOBA

6. Mmunyi mudi bantu ba Yehowa benze mudimu ne bintu bidi bantu bapatule?

6 Bua kuyisha lumu luimpe, bantu ba Yehowa mbenze mudimu ne bintu bidi bantu bapatule.  Tshilejilu, kumpala kua Mvita ya kumpala ya buloba bujima ne mu tshikondo tshia mvita eyi, bakaleja filme wa “Foto-drama wa bufuki.” Bavua bayishe bantu miliyo ya bungi ba mu matunga a bungi pavuabu babaleja bimfuanyi ne filme mîpi bivua ne mekala ne mêyi umvuika. Ku ndekelu kua filme wa “Foto-drama” bavua bakula bua tshikondo tshia ditalala, dîba dikala Yezu Kristo ne bua kukokesha buloba. Panyima pa matuku, bantu ba Yehowa bakenza mudimu ne tudiomba bua kumanyisha mukenji wa Bukalenge kudi miliyo ya bantu pa buloba bujima. Lelu, tudi tuenza mudimu ne ordinatere ne Enternete bua kuyisha bantu muaba wonso udibu, nansha miaba ya kule.

Kulekedi bintu bidi kabiyi ne mushinga bikupangisha bua kuenzela Yehowa mudimu (Tangila tshikoso tshia 7)

7. a) Bua tshinyi kudina ne kasuki mu dienza mudimu ne bia pa buloba kudi ne njiwu? b) Ntshinyi tshitudi ne bua kudimukila bikole? (Tangila note.)

7 Bible udi utudimuija bua kubenga kudina ne kasuki mu dienza mudimu ne bintu bia pa buloba. Mu bintu ebi mudi kupitshisha dîba dia bungi ne bintu bidi bena mu bulongolodi ebu bapatula. (Bala 1 Kolinto 7:29-31.) Bimue bia ku bintu ebi kabitu bibi to, kadi bidi mua kutudia dîba dia bungi. Tshilejilu, tudi mua kuikala banange kupitshisha kapepe, kubala mikanda, kutangila televizion, kuya kuendakana miaba kampanda mimpe, kuya kusumba bintu ne kukeba bua kumanya biamu bipiabipia bidi bipatuke anyi bia mushinga mukole. Bantu ba bungi batu banange kuyukila ku Enternete, kutuminangana mesaje anyi kukeba bua kumanya ngumu mipiamipia nansha bipeta bia malu a manaya. Kadi, bamue badi mua kufika ku dinanga bintu ebi bikole menemene. * (Tangila note.) (Muambi 3:1, 6) Tuetu tupitshisha dîba dia bungi ku malu adi kaayi ne mushinga, tudi mua kupanga bua kutuma ntema ku bualu budi ne mushinga wa bungi, mmumue ne: ditendelela dietu dia Yehowa.—Bala Efeso 5:15-17.

8. Bua tshinyi bidi ne mushinga wa bungi bua kubenga kunanga bintu bia pa buloba?

8 Satana udi wenza muende muonso bua  kutukoka ku bintu bia pa buloba ne kutubueja mu ditanaji bua katuenzedi Yehowa mudimu. Ke tshivua Satana muenze mu bidimu lukama bia kumpala ne ke tshidiye wenza bikole menemene lelu. (2 Timote 4:10) Nunku, tudi ne bua kuikala tukonkonona mushindu utudi tumona bintu bia pa buloba ne kushintulula mmuenenu wetu padibi bikengela. Bible udi utuambila ne: katuena ne bua kunanga bintu bia pa buloba to. Kadi, tudi ne bua kulama dinanga dietu bua Yehowa dikole. Tuetu benze nunku, nebikale bipepele menemene bua kutumikila Yehowa ne kushala pabuipi nende.—1 Yone 2:15-17.

UTAMBE KUIMANYINA PA MALU ADI NE MUSHINGA WA BUNGI

9. Yezu uvua mulongeshe bayidi bende bua kutamba kuimanyina pa tshinyi? Mmunyi mudiye mushiye tshilejilu?

9 Anu muvua Yezu mulongeshe Mâta ne bulenga buonso bua kubenga kulekela bintu bia bungi bimushiya mu ditanaji, wakalongesha kabidi bayidi bende bualu bua muomumue. Wakabakankamija bua kutamba kuimanyina pa kuenzela Yehowa mudimu ne pa Bukalenge buende. (Bala Matayi 6:22, 33.) Yezu nkayende mmushiye tshilejilu tshimpe. Kavua ne bintu bia bungi to, kavua mene ne nzubu anyi tshitupa tshia buloba to.—Luka 9:58; 19:33-35.

10. Ntshilejilu kayi tshimpe tshidi Yezu mutushile?

10 Yezu kavua mulekele tshintu nansha tshimue tshimupangisha bua kuyisha to. Tshilejilu, matuku makese yeye mumane kutuadija mudimu wa diyisha, musumba wa bantu ba mu Kapênuma uvua musue bua Yezu ashale mu tshimenga tshiabu musangu mule. Ntshinyi tshiakenzaye? Wakimanyina pa mudimu uvuabu bamupeshe. Wakamba ne: “Ndi ne bua kumanyisha lumu luimpe lua Bukalenge bua Nzambi mu bimenga bikuabu, bualu bakantuma bua bualu ebu.” (Luka 4:42-44) Yezu uvua wenza ngendu mile bua kuyisha lumu luimpe ne kulongesha bantu ba bungi menemene. Uvua muntu mupuangane, kadi uvua pende utshioka ne uvua dijinga ne kuikisha bualu uvua wenza mudimu mukole.—Luka 8:23; Yone 4:6.

Yezu mmutulongeshe ne: tuetu tuditatshisha bikole bua kupeta bintu bia bungi, tudi mua kupangila bua kuenzela Yehowa mudimu

11. Ntshinyi tshivua Yezu muenze pavua muntu kampanda mumulombe bua amujikijile tshilumbu tshiende? Ndilongesha kayi divua Yezu mupeshe bayidi bende?

11 Panyima pa matuku, pavua Yezu ulongesha bayidi bende dilongesha dia mushinga mukole, muntu kampanda wakamukosa ku mêyi, umuambila ne: “Mulongeshi, ambila muanetu angabanyine panyi bumpianyi.” Yezu kakakeba bua kujikija tshilumbu tshia muntu eu to. Kavua mushale mu ditanaji bua kulongesha bayidi bende to. Kadi, wakenza mudimu ne mpunga au bua kubalongesha ne: bobu batamba kuditatshisha bua kupeta bintu bia bungi, bavua mua kupangila bua kuenzela Nzambi mudimu.—Luka 12:13-15.

12, 13. a) Ntshinyi tshivua Yezu muenze tshivua tshikemeshe bamue bena Greke mu Yelushalema? b) Ntshinyi tshivua Yezu muenze pavua Filipo mumuambile bua kumonangana ne bena Greke?

12 Yezu wakapeta ntatu ya bungi mu matuku makese avua mamushadile pa buloba. (Matayi 26:38; Yone 12:27) Uvua mumanye ne: uvua ne bua kukenga bikole ne kufua. Uvua kabidi mumanye ne: uvua ne mudimu wa bungi wa  kuenza kumpala kua kufuaye. Tshilejilu, mu Dia lumingu dia 9 ngondo wa Nisana, Yezu wakabuela mu Yelushalema mubande pa nyama wa mpunda. Musumba wa bantu wakamuakidila bu Mukalenge wabu. (Luka 19:38) Dituku diakalonda, Yezu wakaya ku ntempelo, kuipataye ne dikima bantu bavua ne lukuka bavua bapanyisha bintu ku mushinga mukole, nunku biba bantu.—Luka 19:45, 46.

13 Bamue bena Greke bavua balue mu Yelushalema bua kuenza tshibilu tshia Pasaka bakamona tshivua Yezu muenze ne biakabakemesha bikole. Ke bobu kulomba mupostolo Filipo bua kumonanganabu ne Yezu. Kadi Yezu kavua ukeba bantu bavua mua kumuambuluisha ne kumuakuila kudi baluishi bende to. Uvua mumanye tshivua ne mushinga wa bungi. Wakashala muimanyine pa tshivua Yehowa musue bua enze, mmumue ne: kufila muoyo wende bu mulambu. Ke bualu kayi wakavuluija bayidi bende ne: uvua ne bua kufua mu matuku makese, ne bonso bavua bamulonda bavua pabu ne bua kuitaba bua kufila mioyo yabu bu mulambu. Wakamba ne: “Muntu udi munange muoyo wende udi uwushipa, kadi muntu udi mukine muoyo wende pa buloba ebu neawulame bua kupeta muoyo wa tshiendelele.” Kadi Yezu wakalaya kabidi ne: ‘Tatu neambike bayidi ba Yezu bunême’ ne kubapesha muoyo wa tshiendelele. Filipo uvua ne bua kuambila bena Greke aba mukenji udi ukankamija eu.—Yone 12:20-26.

14. Nansha muvua Yezu muteke mudimu wa kuyisha pa muaba wa kumpala, ntshinyi tshikuabu tshivuaye wenza?

14 Pavua Yezu pa buloba, mudimu wende munene uvua wa kuyisha lumu luimpe. Nansha muvuaye mudifile bikole mu nsombelu wende bua kuyisha, kavua misangu yonso welangana meji anu bua mudimu eu to. Tshilejilu, uvua muye mu dimue difesto dia dibaka muvuaye mukudimune mâyi malue mvinyo. (Yone 2:2, 6-10) Uvua kabidi mudie biakudia ku nzubu ya balunda bende ne ya bantu bakuabu bavua bitaba lumu luimpe. (Luka 5:29; Yone 12:2) Bualu bua mushinga budi ne: Yezu uvua misangu ya bungi ukeba dîba dia kusambila, dia kuelangana meji ne dia kuikisha.—Matayi 14:23; Mâko 1:35; 6:31, 32.

‘UMBUSHA BUJITU BUONSO’

15. Mbualu kayi buvua mupostolo Paulo muambe budi bena Kristo ne bua kuenza? Mmunyi mudiye mushiye tshilejilu tshimpe?

15 Mupostolo Paulo uvua muambe ne: bena Kristo badi bu banyemi ba lubilu mu lubilu lule, ne bua bobu kulujikija, badi ne bua kumbusha tshintu tshionso tshidi mua kukepesha lubilu luabu anyi kubapangisha bua kunyema. (Bala Ebelu 12:1.) Paulo nkayende mmushiye tshilejilu tshimpe. Uvua mua kuikala mubanji ne mumanyike bikole bu mfumu wa tshitendelelu tshia bena Yuda, kadi wakalekela mudimu wende au bua kuimanyina pa “malu adi ne mushinga wa bungi.” Wakayisha bikole ne kuenza ngendu mu miaba ya bungi, kusangisha ne mu Suliya, mu Asie mukese, mu Makedoniya ne mu Yudaya. Paulo uvua muindile ne muoyo kuulu kuulu difutu diende dia muoyo wa tshiendelele mu diulu. Wakamba ne: “Bu mundi mupue malu adi mashale panyima muoyo, ngipatshila malu adi kumpala, ndi  ndienzeja bua kupeta tshipatshila tshia difutu.” (Filipoyi 1:10; 3:8, 13, 14) Paulo kavua musele to, biakamuambuluisha bua kudifila “ku mudimu wa Mukalenge kakuyi ditanaji.”—1 Kolinto 7:32-35.

Paulo wakalekela mudimu wende bua kuimanyina pa “malu adi ne mushinga wa bungi”

16, 17. Nansha tuetu mu dibaka anyi bajike, mmunyi mutudi mua kuidikija tshilejilu tshia Paulo? Mmunyi muvua Mark ne Claire bamuidikije?

16 Anu bu Paulo, bamue batendeledi ba Yehowa ba lelu badi basungula bua kubenga kubuela mu dibaka bua kuenza bia bungi mu mudimu wa Yehowa. (Matayi 19:11, 12) Bajike batu misangu ya bungi ne bujitu bukese bua mu dîku kupita badi mu mabaka. Kadi, nansha tuetu mu dibaka anyi bajike, tuetu bonso tudi mua ‘kumbusha bujitu buonso’ budi mua kutupangisha bua kuenzela Yehowa mudimu. Bidi mua kutulomba bua kushintulula bibidilu bietu bua kubenga kujimija dîba ne kupeta mushindu wa kudifila bikole mu mudimu wa Yehowa.

17 Tshilejilu, Mark ne Claire bavua bakolele mu ditunga dia Pays de Galles bakatuadija mudimu wa bumpanda-njila pakajikijabu kalasa. Bakatungunuka ne mudimu eu pakaselanganabu. Kadi, bavua basue kuenza bia bungi. Mark udi wamba ne: “Tuakapepeja nsombelu wetu bikole, kumbuka mu nzubu uvua ne nzubu ya bulalu isatu ne kulekela mudimu wa mêba makese utuvua tuenza bua kutuadija kuenza mudimu wa luibaku wa pa buloba bujima.” Mu bidimu 20 bishale ebi, mbaye mu miaba ya bungi ya mu Afrike bua kuambuluisha mu mudimu wa kuibaka Nzubu ya Bukalenge. Imue misangu bavua ne tumakuta tukese, kadi Yehowa uvua anu ubatabalela. Claire udi wamba ne: “Kuenzela Yehowa mudimu dituku dionso kudi kutupesha disanka dia bungi. Tudi bapete balunda ba bungi mu mudimu eu ne katuena tupangila tshintu. Katuena mua kufuanyikija malu makese atudi balekele ne disanka ditudi tupeta patudi tuenzela Yehowa mudimu wa ku dîba ne ku dîba nansha.” Bana betu ba bungi badi benza mudimu wa ku dîba ne ku dîba badi pabu badiumvua mushindu wa muomumue. *—Tangila note.

18. Nnkonko kayi itudi mua kudiela?

18 Udiku umona ne: udi mua kuikala ne disanka dia bungi mu mudimu uudi wenzela Yehowa anyi? Kudiku bintu bidi mua kukushiya mu ditanaji bua kuenza malu adi ne mushinga wa bungi anyi? Bikalabi nanku, tshiudi mua kuenza ntshinyi? Pamuapa udi mua kuakaja mushindu uudi ubala ne udilongela Bible. Tshiena-bualu tshialonda netshileje tshiudi mua kuenza.

^ tshik. 7 Bala tshiena-bualu tshia ne: ‘Mutshimbakanyi udi witabuja dîyi dionso.’

^ tshik. 17 Bala muyuki wa Hadyn ne Melody Sanderson mu tshiena-bualu tshia “Tuenze malu atudi bamanye ne: mmimpe” mu Tshibumba tshia Nsentedi tshia 1/3/2006. Mudimu wa bianza uvuabu benza mu Australie uvua ubambuluisha, kadi bakawulekela bua kuenza mudimu wa ku dîba ne ku dîba. Bala bua kumanya tshiakabafikila bobu bamane kutula makuta onso avuabu nawu pavuabu bamisionere mu Inde.