Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 9 2015

Mmu mishindu kayi mudi Yehowa mutunange?

Mmu mishindu kayi mudi Yehowa mutunange?

“Tangilayi mushindu wa dinanga didi Tatu mutuleje.”—1 YONE 3:1.

MISAMBU: 91, 13

1. Mupostolo Yone udi utukankamija bua kuela meji bua bualu kayi? Bua tshinyi?

MUPOSTOLO YONE udi utukankamija mu 1 Yone 3:1 bua kuela meji bikole bua dinanga dikole didi Yehowa nadi kutudi. Yone udi wamba mu mvese eu ne: “Tangilayi mushindu wa dinanga didi Tatu mutuleje.” Patudi tuela meji bua mushindu udi Yehowa mutunange bikole ne mudiye utuleja dinanga edi, tudi tusemena pabuipi nende ne tumunanga bikole.

2. Bua tshinyi mbikolele bamue bantu bua kumonabu ne: Nzambi mmubanange?

2 Bia dibungama, bamue bantu kabena bamona mudi Nzambi mubanange to. Badi bela meji ne: Nzambi kena utabalela bantu to. Badi mua kuikala bitaba ne: Nzambi utu anu welela bantu mikenji ne unyoka badi kabayi bamutumikila. Malongesha a dishima mmasake too ne bamue bantu bua kuela meji ne: Nzambi udi ne tshikisu ne mbikole bua kumunanga. Bakuabu badi bela meji ne: Nzambi mmunange bantu bonso nansha bobu benza  malu kayi. Kadi dilonga diebe dia Bible ndikuambuluishe bua kumanya bulelela pa bidi bitangila Yehowa. Udi mufike ku dimanya ne: dinanga nngikadilu wende munene ne mmufile Muanende bu tshia kukupikula natshi. (Yone 3:16; 1 Yone 4:8) Nansha nanku, bidi mua kukukolela bua kumona mudi Yehowa mukunange bua malu adi makufikile mu nsombelu webe.

3. Ntshinyi tshiatuambuluisha bua kumvua mudi Yehowa mutunange?

3 Bua tuetu kumvua bimpe mudi Yehowa mutunange, tudi ne bua kuanji kumanya ne: Yehowa ke udi mutufuke. Mmutupeshe muoyo. (Bala Musambu wa 100:3-5.) Ke bualu kayi Bible udi ubikila muntu wa kumpala ne: “muana wa Nzambi.” (Luka 3:38) Yezu wakatulongesha bua kubikila Yehowa ne: “Tatu wetu udi mu diulu.” (Matayi 6:9) Nunku, Yehowa n’Tatu wetu, mmutunange anu mudi tatu muimpe munange bana bende.

4. a) Yehowa n’Tatu wa mushindu kayi? b) Ntshinyi tshituakonkonona mu tshiena-bualu etshi ne mu tshidi tshilonda?

4 Mbikole bua bamue bantu kumonabu tatu kampanda bu muntu udi ne dinanga. Badi mua kuikala bavuluka malu mabi avua tatuabu ubenzela ne tshikisu patshivuabu bana. Yehowa kena mua kuenzela bana bende malu a nunku to. Yeye ke Tatu mutambe buimpe utudi nende. (Musambu 27:10) Mmutunange bikole ne udi ututabalela mu mishindu ya bungi. Patudi tudiumvua ne: Yehowa mmutunange bikole, netumunange petu bikole. (Yakobo 4:8) Mu tshiena-bualu etshi, netukonkonone mishindu inayi idi Yehowa uleja mudiye mutunange. Mu tshiena-bualu tshidi tshilonda, netukonkonone mishindu inayi itudi mua kuleja mutudi bamunange.

YEHOWA UDI NE DINANGA NE UTU UPESHANGANA BINTU

5. Ntshinyi tshidi Nzambi mupeshe bantu bonso?

5 Pavua mupostolo Paulo mu tshimenga tshia Atena mu Grèce, wakamona ne: muvua mpingu ya bungi ne bantu bavua bitabuja ne: nzambi yabu eyi ke ivua mibapeshe muoyo. Nunku wakabayisha bua “Nzambi wakafuka buloba ne bintu bionso bidipu.” Wakamba ne: Nzambi “udi upesha bantu bonso muoyo, ne mueyelu ne bintu bionso” ne “tudi ne muoyo, tudi tuenda, ne tudiku bua bualu buende.” (Bienzedi 17:24, 25, 28) Yehowa udi utupesha bintu bionso bitudi nabi dijinga bua kuikala ne muoyo ne bua muoyo utusankishe. Ela meji bua bimue bintu bidiye mutupeshe bualu mmutunange.

6. Yehowa mmutupeshe muaba wa mushindu kayi? (Tangila tshimfuanyi tshia ntuadijilu.)

6 Tshilejilu, Yehowa mmutulongoluele muaba muimpe wa tuetu kusombela. (Musambu 115:15, 16) Ku mabulunge onso adiye mufuke, buloba ke dibulunge dia pa buadi. Bena malu a sianse mbenze makebulula ne mbamone ne: kudi mabulunge a bungi. Kadi, ki mbanji kupeta dibulunge dikuabu didi ne bintu bionso bidi bantu nabi dijinga bua kuikala ne muoyo to. Yehowa ki mmutupeshe anu bintu bionso bitudi nabi dijinga bua kuikala ne muoyo to, kadi mmutuenzele kabidi buloba buimpe, bukumbane ne muaba muimpe utudi mua kusomba mu bukubi bua muoyo utusankishe. (Yeshaya 45:18) Patudi tuela meji bua muaba muimpe udi Tatu wetu Yehowa mutupeshe, tudi bushuwa tumona mudiye mutunange bikole.—Bala Yobo 38:4, 7; Musambu wa 8:3-5.

7. Mmunyi mudi mushindu udi Yehowa mutufuke uleja ne: mmutunange bikole?

7 Mushindu mukuabu udi Yehowa muleje  mudiye mutunange mpadiye mutufuke ne bukole bua kumuidikija. (Genese 1:27) Ebi bidi bileja ne: tudi mua kumvua mudiye mutunange ne kumunanga petu. Mmumanye ne: kuenza nunku ke kudi kutupetesha disanka dilelela. Tuanji kuambabi, bana kabatuku ne disanka padibu bumvua ne: baledi babu mbabanange anyi? Vuluka ne: Yezu uvua mutulongeshe ne: netuikale ne disanka tuetu pabuipi ne Tatu wetu Yehowa. (Matayi 5:3) Udi utupesha “bintu bionso bitudi tusanka nabi.” Udi bushuwa mupeshanganyi wa bintu ne mmutunange bikole.—1 Timote 6:17; Musambu 145:16.

YEHOWA UDI UTULONGESHA BULELELA

8. Bua tshinyi tudi basue bua Yehowa atulongeshe?

8 Baledi batu banange bana babu ne kabatu basue bua bantu bakuabu babapambuishe anyi babashime to. Kadi baledi ba bungi lelu kabena bitaba mikenji ya mu Bible ya tshidi tshimpe ne tshidi tshibi to. Nunku, kabena  mua kulombola bana babu bimpe to, bualu ebu budi bukebesha tunyinganyinga ne bimvundu. (Nsumuinu 14:12) Kadi Yehowa udi ulombola bana bende bimpe bualu udi ‘Nzambi wa bulelela.’ (Musambu 31:5NWT) Udi usanka bua kutulongesha bulelela pa bidi bimutangila. Udi kabidi utulongesha mutudi mua kumutendelela ne utuleja mushindu muimpe wa kuenza malu mu nsombelu wetu. (Bala Musambu wa 43:3.) Nunku, mmalu kayi adi Yehowa mutulongeshe adi aleja ne: mmutunange bikole?

Balume bena Kristo badi bidikija Yehowa padibu balongesha bana babu bulelela ne babambuluisha bua kuikalabu mu malanda mimpe ne Tatu wabu wa mu diulu (Tangila tshikoso tshia 8-10)

9, 10. a) Bua tshinyi Yehowa mmutulongeshe malu adi amutangila? b) Ntshinyi tshidiye mutulongeshe bua malu adiye mutulongoluele?

9 Tshia kumpala, Yehowa mmutuambile malu adi amutangila. Mmusue bua tumumanye. (Yakobo 4:8) Nunku mmutuambile dîna diende. Bushuwa, Bible mmutele dîna diende misangu ya bungi kupita mudiye mutele mêna makuabu onso. Yehowa mmutuleje kabidi tshidiye. Patudi tutangila bintu bidiye mufuke, tudi tujingulula ne: udi ne bukole ne meji. (Lomo 1:20) Patudi tubala Bible, tudi tujingulula mudiye muakane ne mutunange bikole. Patudi tumanya bumuntu buimpe bua Yehowa, tudi tudiumvua pabuipi nende.

Patudi tumanya bumuntu buimpe bua Yehowa, tudi tudiumvua pabuipi nende

10 Yehowa mmutulongeshe kabidi malu adiye mulongolole. Mmutuambile ne: tudi ba mu dîku diende. Mmutuleje tshitudi ne bua kuenza bua kuikala mu buobumue ne mu ditalala ne muntu yonso wa mu dîku dietu. Bible udi uleja patoke ne: Nzambi kavua mutufuke ne bukenji bua kudisunguila tshidi tshimpe ne tshidi tshibi to. (Yelemiya 10:23) Yehowa mmumanye tshidi tshimpe buetu tuetu. Tudi mua kupeta ditalala ne nsombelu muimpe anu tuetu bitabe bumfumu buende ne bamutumikile. Yehowa mmutulongeshe malu a mushinga mukole aa bualu mmutunange.

11. Ntshinyi tshidi Tatu wetu wa dinanga mutuambile bua matuku atshilualua?

11 Tatu muimpe udi wela meji bikole bua tshikala bana bende mu matuku atshilualua. Mmusue bua bikale ne nsombelu muimpe. Bia dibungama, bantu ba bungi lelu badi ne buôwa bua matuku atshilualua, ne ba bungi badi bapitshisha dîba mu dienza mudimu bua bintu bidi kabiyi bishala kashidi. (Musambu 90:10) Tudi ne dianyisha dia bungi bua mudi Tatu wetu Yehowa mutulongeshe bua kuikala ne nsombelu muimpe mpindieu ne mutulaye kabidi nsombelu mutambe buimpe mu matuku atshilualua.

YEHOWA UDI ULOMBOLA BANA BENDE NE UBANYOKA

12. Mmunyi muvua Yehowa muambuluishe Kayina ne Baluka?

12 Pavua Yehowa mumone ne: Kayina uvua ne tshiji tshia kuenza bualu bubi, wakamuambuluisha pakamuebejaye ne: ‘Bua tshinyi udi mufike munda ne mubungame nunku? Wewe mubange kuenza malu mimpe, kuakuanyishibua kabidi anyi?’ (Genese 4:6, 7NWT) Kayina wakabenga diambuluisha dia Yehowa ne wakakenga bua bualu ebu. (Genese 4:11-13) Musangu mukuabu, Yehowa wakamona ne: lungenyi lubi lua Baluka  luvua lumutshiokesha ne lumutekesha mu mikolo. Nunku Yehowa wakambila Baluka ne: lungenyi luende luvua lubi ne uvua ne bua kushintuluka. Baluka wakateleja mubelu wa Yehowa, ne wakapanduka.—Yelemiya 45:2-5.

13. Mmunyi muvua ntatu miambuluishe batendeledi ba Yehowa ba lulamatu?

13 Yehowa udi utulombola ne utunyoka bualu mmutunange. Kena anu utunyoka padibi bikengela to, kadi udi kabidi utulongesha. (Ebelu 12:6) Mu Bible mudi miyuki ya batendeledi ba Yehowa ba lulamatu bavuaye mulongeshe bua kuluabu bantu bimpe. Tshilejilu, Jozefe ne Mose ne Davidi bavua batuilangane ne nsombelu mikole menemene. Pavuabu mu ntatu eyi, Yehowa uvua nabu. Malu avuabu balonge mu bikondo bia ntatu ebi avua mabambuluishe pavua Yehowa mulue kubapesha majitu manene. Patudi tubala mu Bible bua mudi Yehowa muambuluishe bantu bende ne mubalongeshe, tudi tumvua ne: Yehowa mmutunange bulelela.—Bala Nsumuinu 3:11, 12.

14. Mmunyi mudi Yehowa utuleja dinanga patudi tuenza bualu bubi?

14 Yehowa udi utungunuka ne kutunanga nansha patudi tuenza bualu bubi. Tuetu bitabe dinyoka diende ne banyingalale, neatufuile luse ‘mu mushindu mualabale.’ (Yeshaya 55:7NWT) Bidi biumvuija tshinyi? Mêyi avua Davidi muambe bua luse lua Yehowa adi atuleja mutudi ne Tatu wa luse. Wakamba ne: ‘Udi ukubuikidila malu mabi ebe onso, udi ujikija mabedi ebe onso; udi upikula muoyo webe ku dibutuka, udi ukuteka luse lujalame ne dinanga pa mutu pebe; bu mudi luseke lua esete kule ku wesete, mbu mudiye mumbushe matombokela etu kule kutudi.’ (Musambu 103:3, 4, 12) Yehowa udi utunyoka ne utulombola mu mishindu mishilashilangane. Udiku mudiakaje bua kushintuluka anyi? Ikala mumanye ne: Yehowa udi utunyoka bualu mmutunange.—Musambu 30:5.

YEHOWA UDI UTUKUBA

15. Mmushindu kayi mukuabu udi Yehowa uleja mudiye mutunange?

15 Tatu udi ne dinanga udi ukuba bana bende ku njiwu. Ke tshidi Tatu wetu Yehowa utuenzela. Mufundi wa Misambu udi wamba bua Yehowa ne: ‘Yeye udi ulama mioyo ya bansantu bende, udi ubapandisha mu bianza bia bantu babi.’ (Musambu 97:10) Ela meji bua bualu ebu: Anu muutu wenza bua kukuba mêsu ebe ne lukasa bualu adi ne mushinga wa bungi kuudi, ke mudi Yehowa pende pabuipi bua kukuba bantu bende bualu badi ne mushinga wa bungi kudiye.—Bala Zekâya 2:8.

Yehowa udi pabuipi bua kukuba bantu bende bualu badi ne mushinga wa bungi kudiye

16, 17. Mmunyi mudi Yehowa mukube bantu bende mu bikondo bia kale ne mu matuku etu aa?

16 Umue mushindu udi Yehowa ukuba bantu bende katshia ku kale too ne lelu, nku diambuluisha dia banjelu. (Musambu 91:11) Muanjelu umue wakashipa basalayi ba bena Suliya 185000 butuku bumue ne kusungila bantu ba Nzambi. (2 Bakelenge 19:35) Mu bidimu lukama bia kumpala, banjelu  bakapatula Petelo, Paulo ne bayidi bakuabu mu buloko. (Bienzedi 5:18-20; 12:6-11) Matuku mashale aa, kuvua mvita mikole mu dimue dia ku matunga a mu Afrike. Bena mu ditunga edi bavua mu lutatu lukole bua muvuaku mvita, buivi, dinyanga bakaji ne dishipangana. Nansha muvua muena Kristo nansha umue kayi mufue, ba bungi bavua bajimije bintu biabu bionso. Kadi bakamona ne: Yehowa uvua mubanange ne uvua ubatabalela. Nansha muvuabu bakenga, bavua amu ne disanka. Pavua muleji mpala wa biro bietu bidi bilombola mudimu wa pa buloba bujima muye kutangila bana betu aba ne mubakonke bua kumanya ni bavua bimpe, bakandamuna ne: “Tudi bimpe, tudi tuela Yehowa tuasakidila!”

17 Bushuwa, bavua bashipe bamue batendeledi ba Yehowa bu mudi Stefano ne bakuabu bua lulamatu luabu. Yehowa katu misangu yonso wepula bantu bende ku malu a nunku to. Kadi, udi ukuba bantu bende mu tshibungi padiye ubadimuija bua mishindu mishilashilangane idi Diabolo wenza nayi mudimu bua kubashima. (Efeso 6:10-12) Tudi tupeta madimuija aa mu Bible ne mu mikanda idi bulongolodi bua Yehowa bupatula. Tshilejilu, badi batudimuija bua njiwu ya Enternete, ya dinanga dia makuta ne ya filme ya malu a tshiendenda ne a tshikisu, mikanda anyi manaya mabi. Bulelela, Yehowa mmutunange ne mmusue kutukuba.

DIAKALENGA DINENE

18. Udi umvua bishi bua mudi Yehowa mukunange?

18 Pavua Mose muele meji bua bidimu bionso bivuaye muenzele Yehowa mudimu, uvua mutuishibue ne: Yehowa uvua mumunange. Mose wakamba ne: ‘Uwuje mitshima yetu tente ne luse luebe lujalame ne dinda, bua tuetu tumanye mua kuikala ne musangelu ne disanka matuku etu onso.’ (Musambu 90:14) Tudi ba diakalenga bua mutudi bafike ku dimanya ne ku diumvua ne: Yehowa mmutunange. Tudi ne diakalenga dinene dia kuikala banangibue kudi Yehowa. Tudi tudiumvua anu bu mupostolo Yone wakamba ne: “Tangilayi mushindu wa dinanga didi Tatu mutuleje.”—1 Yone 3:1.