Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 9 2015

Mmunyi mutudi mua kuleja ne: tudi banange Yehowa?

Mmunyi mutudi mua kuleja ne: tudi banange Yehowa?

“Tudi ne dinanga, bualu yeye uvua mudianjile kutunanga.”—1 YONE 4:19.

MISAMBU: 56, 138

1, 2. Mmunyi mudi Yehowa mutulongeshe bua kumunanga?

MUSHINDU muimpe udi tatu mua kulongesha bana bende mpa kuikala tshilejilu kudibu. Padiye uleja bana bende dinanga, udi ubalongesha mua kunangangana. Kakuena muntu mukuabu udi mutunange bu mudi Tatu wetu Yehowa mutunange to. Nunku tudi tunangangana “bualu yeye uvua mudianjile kutunanga.”—1 Yone 4:19.

2 Mmu mushindu kayi mudi Yehowa muleje ne: “uvua mudianjile kutunanga”? Bible udi wamba ne: “Patutshivua benji ba malu mabi Kristo wakafua bua bualu buetu.” (Lomo 5:8) Tatu wetu wa dinanga Yehowa wakafila Muanende bu tshia kupikula natshi bantu bua kutusungila ku bubi ne ku lufu. Dipa dia mushinga mukole edi ndiambuluishe bua tuikale pabuipi ne Yehowa ne tumuleje dinanga. Yehowa mmutushile tshilejilu tshimpe padiye mufile mulambu wa mushinga mukole eu. Mmutulongeshe ne: tudi ne bua kunangangana pa kuangata majinga a bantu bakuabu ne mushinga ne kupeshangana bintu.—1 Yone 4:10.

3, 4. Mmunyi mutudi tuleja ne: tudi banange Nzambi?

3 Dinanga nngikadilu munene wa Yehowa. Nunku tudi tumvua bimpe bua tshinyi Yezu wakamba ne: mukenji mutambe bunene  udi ne: “Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso ne bukole buebe buonso.” (Mâko 12:30) Yehowa mmusue bua tumunange ne ‘muoyo wetu wonso.’ Netunyingalaje Yehowa tuetu banange muntu anyi tshintu tshikuabu kupita mutudi bamunange. Kadi katuena mua kudiumvua anu patupu ne: tudi bamunange to. Yehowa mmusue kabidi bua tumunange ne ‘lungenyi luetu luonso ne bukole buetu buonso.’ Ebi bidi biumvuija ne: mushindu utudi tuela meji ne malu atudi tuenza ke bidi bileja ne: tudi banange Yehowa.—Bala Mika 6:8.

4 Nunku tudi ne bua kunanga Yehowa ne bumuntu buetu buonso ne bionso bitudi nabi. Patudi tumuteka pa muaba wa kumpala mu nsombelu wetu, tudi tumuleja ne: tudi bushuwa bamunange. Mu tshiena-bualu tshishale, tuvua bamone mishindu inayi idi Yehowa muleje mudiye munange bana bende bikole. Tumonayi mutudi mua kukolesha dinanga dietu bua Yehowa ne mutudi mua kuleja ne: tudi bamunange.

LEJA YEHOWA NE: UDI NE DIANYISHA

5. Patudi tuela meji bua bionso bidi Yehowa mutuenzele, bidi bitusaka bua kuenza tshinyi?

5 Muntu yeye mukupeshe dipa kampanda, misangu ya bungi utu uleja muudi ne dianyisha bua dipa edi. Wewe wangata dipa edi ne mushinga, udi kabidi wenza nadi mudimu. Yakobo wakafunda ne: “Dipa dionso dimpe ne dipa dionso dipuangane didi difuma muulu, difumina kudi Tatu wa butoke bua mu diulu udi kayi ushintuluka anyi ukudimuka bu mundidimbi udi ukudimukangana.” (Yakobo 1:17) Tudi ne dianyisha dia bungi bua mudi Yehowa mutupeshe tshintu tshionso tshitudi natshi dijinga bua kuikala ne muoyo ne disanka. Tudi bamone mudiye mutunange bikole ne tudi basue kumuleja ne: tudi petu bamunange. Ke muudi pebe udiumvua anyi?

6. Ntshinyi tshivua bena Isalele ne bua kuenza bua Yehowa kutungunukaye ne kubabenesha?

6 Yehowa uvua mupeshe bena Isalele bintu bia bungi bimpe. Munkatshi mua bidimu nkama ya bungi, wakabalombola ku diambuluisha dia mikenji yende ne kubapesha tshintu tshionso tshivuabu natshi dijinga bua kuikalabu ne muoyo. (Dutelonome 4:7, 8) Bena Isalele bavua mua kuleja Yehowa dianyisha pa kutumikila mikenji yende. Tshilejilu, pavuabu balambula Yehowa milambu, bavua ne bua kumupesha ‘bintu bitambe buimpe bia ku bintu bidi bikola bia kumpala bia mu budimi.’ (Ekesode 23:19NWT) Bena Isalele bavua bamanye ne: Yehowa uvua ne bua kutungunuka ne kubabenesha bobu bamutumikile ne bamupeshe bintu biabu bitambe buimpe.—Bala Dutelonome 8:7-11.

7. Mmunyi mutudi mua kuenza mudimu ne “biuma” bietu bua kuleja Yehowa ne: tudi bamunange?

7 Tuetu petu tudi mua kuleja Yehowa ne: tudi bamunange patudi tumupesha “biuma” bietu. (Nsumuinu 3:9) Tudi tuenza nunku patudi tufila bintu bitudi nabi bua kumutumbisha. Tshilejilu, tudi mua kufila mapa bua mudimu wa Bukalenge udi wenzeka mu tshisumbu tshietu ne pa buloba bujima. Nansha tuetu ne bintu bia bungi anyi bikese, tuetu bonso tudi mua kufila bintu bitudi nabi bua kuleja mutudi banange Yehowa. (2 Kolinto 8:12) Kadi kudi mishindu mikuabu itudi mua kuleja Yehowa ne: tudi bamunange.

Patudi tueyemena Yehowa bikole, tudi tumuleja ne: tudi bamunange

8, 9. Mmushindu kayi mukuabu utudi tuleja Yehowa ne: tudi bamunange? Ntshinyi tshivua Mike ne bena mu dîku diende benze?

8 Yezu mmutulongeshe bua kutungunuka ne kukeba tshia kumpala Bukalenge ne kubenga kuditatshisha bua biakudia ne bia kuvuala. Tatu wetu mmutulaye bua kutupesha bitudi  nabi dijinga. (Matayi 6:31-33) Tudi beyemene Yehowa ne bamanye ne: neakumbaje mulayi wende eu. Bushuwa, wewe munange muntu bikole, udi umueyemena. Kakuyi mpata, patudi tueyemena Yehowa bikole, tudi tumuleja ne: tudi bamunange. (Musambu 143:8) Nunku mbimpe tudiebeje ne: ‘Malu andi mulongolole bua kuenza ne mushindu undi ngenza mudimu ne dîba dianyi ne makanda anyi bidiku bileja ne: ndi bulelela munange Yehowa anyi? Dituku dionso, ntuku ngeyemena Yehowa bua ankumbajile majinga anyi anyi?’

9 Muanetu wa balume Mike ne bena mu dîku diende bavua beyemene Yehowa. Patshivua Mike nsonga, uvua musue kuya kuyisha mu ditunga dikuabu. Utshivua anu ne dijinga edi nansha mukavuaye musele ne mulele bana babidi. Pavua Mike ne bena mu dîku diende babale malu a bana betu ba balume ne ba bakaji bavua bayishe muaba uvuabu dijinga dinene ne bamanyishi, bakangata dipangadika dia kupepeja nsombelu wabu. Bakapana nzubu wabu ne kuyabu kusombela mu nzubu wa mukese. Mike wakakepesha kabidi bungi bua bantu bavuaye wenzela mudimu wa disukula bintu ne kukebaye mushindu wa kuikala ulombola midimu yende eyi ku diambuluisha dia Enternete pavuaye mu ditunga dikuabu. Nunku Mike ne bena mu dîku diende bakapeta mushindu wa kuya mu ditunga dikuabu ne bakanyisha bikole mudimu wabu wa kuyisha. Mike udi wamba ne: “Tuakamona mudi mêyi a Yezu adi mu Matayi 6:33 malelela.”

ELANGANA MEJI BUA MALU ADI YEHOWA UKULONGESHA

10. Anu bu Davidi, bua tshinyi mbimpe tuetu kuelangana meji bua malu atudi tulonga bua Yehowa?

10 Mukalenge Davidi wakafunda musangu kampanda ne: ‘Diulu didi diamba butumbi bua Nzambi; bia mu diulu bidi bimanyisha mudimu wa bianza biende.’ Wakasakidila ne: ‘Mukenji wa Yehowa mmupuangane, udi ufilulula bukole. Divuluija dia Yehowa ndikumbane kudieyemena, didi divuija mupangi muena meji.’ Pavua Davidi muelangane meji bua mikenji miakane ya Yehowa ne bua bintu bimpe bidiye mufuke, uvua musemene pabuipi ne Yehowa ne mumuleje muvuaye mumunange. Davidi wakamba ne: ‘Mêyi a mukana muanyi ne meji andi ngelangana mu muoyo wanyi akusankishe, wewe Yehowa, Dibue dianyi ne Mupikudi wanyi.’—Musambu 19:1, 7, 14NWT.

11. Mmunyi mutudi mua kuenza mudimu ne dimanya didi Yehowa utupesha bua kuleja mutudi bamunange? (Tangila tshimfuanyi tshia ntuadijilu.)

11 Lelu, Yehowa udi utulongesha malu a bungi adi atuambuluisha bua kumumanya, kumanya malu adiye mulongolole, bintu bidiye mufuke ne kumanya kabidi Dîyi diende. Bulongolodi ebu budi busaka bantu bua kulonga tulasa tutumbuke tudi nangananga tubafikisha ku dijimija dinanga diabu dia Nzambi. Yehowa kena utulongesha bua tuetu kupeta dimanya patupu, kadi udi utuambuluisha bua kupeta kabidi meji. Mmusue bua tuenze mudimu ne malu atudi tulonga bua tuikale ne diakalengele ne bua tuambuluishe bantu bakuabu. (Nsumuinu 4:5-7) Tshilejilu, mmusue bua tupeteshe bantu bakuabu “dimanya  dijalame dia bulelela” ne tubambuluishe bua basungidibue. (1 Timote 2:4) Tudi tuleja mutudi banange Yehowa ne bantu netu patudi tuditatshisha bua kuyisha bantu ba bungi bua Bukalenge bua Nzambi ne malu enzelabu bantu.—Bala Musambu wa 66:16, 17.

12. Ntshinyi tshivua muanetu wa bakaji kampanda muambe bua dipa dia kudi Yehowa?

12 Bansonga badi pabu mua kuela meji bua bionso bidi Yehowa mubapeshe ne mubalongeshe. Muanetu wa bakaji Shannon utshidi uvuluka muvuaye mudiumvue mu mpungilu kampanda uvuaye mubuele pavuaye ne bidimu 11, ne muakunyende wa bakaji ne bidimu 10. Mu tshitupa tshia mpungilu wa distrike uvua ne tshiena-bualu tshia ne: “Ditshina dia Nzambi,” bavua balombe bansonga bonso pamue ne Shannon ne muakunyende wa bakaji bua kusomba muaba wa pa buawu uvuabu babalongoluele. Kumpala, bivua bitonde Shannon. Kadi biakamukemesha pavuabu bapeshe nsonga yonso mukanda wa Les jeunes s’interrogent — Réponses pratiques. Mmunyi muvua dipa edi dimpe dimusake bua kudiumvua bua Yehowa? Udi wamba ne: “Musangu au ke ungakajingulula ne: Yehowa mmuntu mulelela ne mmunnange bikole menemene. Tudi ne disanka bua mudi Nzambi wetu munene Yehowa mutupeshe ne muoyo mujima dipa edi dimpe ne dipuangane!”

ITABA DINYOKA DIA KUDI YEHOWA

13, 14. Ntshinyi tshitudi ne bua kuenza padi Yehowa utunyoka? Bua tshinyi?

13 Bible udi utuvuluija ne: ‘Yehowa udi ubela udiye munange, bu mudi tatu ubela muanende  mulume udi umusankisha.’ (Nsumuinu 3:12) Patudi tuitaba dinyoka dia kudi Yehowa ne tumulekela utulongesha, tudi tulonga mua kuenza tshidi tshimpe ne tupeta ditalala. Bushuwa, “dinyoka dionso kadiena dimueneka bu didi disankisha dîba didibu badifila, kadi didi dinyingalaja.” (Ebelu 12:11) Nansha nanku, ntshinyi tshitudi ne bua kuenza padi Yehowa utunyoka? Katuena ne bua kulengulula mibelu ya Yehowa anyi kutungunuka ne kumvua bibi patudi katuyi basue bidibu batuambila. Tuetu banange Yehowa, tudi tumuteleja ne tushintuluka padibi bikengela.

Tuetu bashintuluke ne muoyo mujima bua kusankisha Yehowa, tudi tuleja ne: tudi bushuwa bamunange

14 Mu matuku a muprofete Malaki, bena Yuda ba bungi kabavua bateleje Yehowa to. Nansha muvua milambu yabu kayiyi isankisha Yehowa, kabivua bibambila bualu to. Nunku Yehowa wakababela bikole bua bualu ebu. (Bala Malaki 1:12, 13.) Bushuwa, Yehowa wakababela njila ne njila, kadi kabakamuteleja to. Ke bualu kayi wakabambila ne: ‘Nennutumine mulawu, nenkudimune masanka enu alue milawu.’ (Malaki 2:1, 2) Bidi bimueneka patoke ne: tuetu batungunuke ne kubenga kuteleja mibelu ya Yehowa anyi bayimone ne: kayena ne mushinga, bulunda buetu nende nebufue.

Ela meji bua tshidi Yehowa musue pamutu pa kuenza tshidi bantu ba bungi ba mu bulongolodi ebu basue (Tangila tshikoso tshia 15)

15. Nngelelu kayi wa meji utudi ne bua kuepuka?

15 Bulongolodi bua Satana budi busaka bantu bua kuikala ne lutambishi ne budinangi. Ba bungi ki mbasue bua bababele anyi babaleje tshia kuenza to. Bamue badi bateleja mibelu anu bualu mbenzejibue bua kuyiteleja. Katuena ne bua kuikala bu bantu aba to. Bible udi utuambila bua ‘kulekela kuidikija malu a mu ndongoluelu wa malu eu.’ Kadi mbimpe tumanye tshidi Yehowa utulomba bua kuenza ne tuenze malu adi amusankisha. (Lomo 12:2) Udi utubela mu tshikondo tshiakanyine ku butuangaji bua bulongolodi buende. Tshilejilu, mbatuvuluije bua mutudi mua kuenzela muntu udi kayi mulume netu anyi mukaji netu malu, mutudi mua kusungula balunda, ne mutudi mua kuangata dipangadika dia mua kujikija lutetuku. Tuetu bitabe mibelu ya Yehowa ne muoyo mujima ne bashintuluke bua kumusankisha, tudi tuleja ne: tudi ne dianyisha bua bulombodi buende ne  tudi bushuwa bamunange.—Yone 14:31; Lomo 6:17.

EYEMENA YEHOWA BUA AKUAMBULUISHE NE AKUKUBE

16, 17. a) Bua tshinyi tudi ne bua kukeba bua kumanya mudi Yehowa wela meji kumpala kua tuetu kuangata mapangadika? b) Pamutu pa bena Isalele kueyemena Yehowa, bakenza bobu tshinyi?

16 Bana batekete batu beyemena baledi babu bua babambuluishe ne babakube. Nansha bantu bakulumpe badi mua kulomba diambuluisha kudi baledi babu. Badi bamona ne: nansha mudibu ne bua kudiangatshila mapangadika, baledi babu badi mua kubapesha mubelu muimpe. Yehowa Tatu wetu mmutupeshe budikadidi bua kudiangatshila mapangadika. Kadi bu mutudi tumueyemena bikole ne bamunange, tudi misangu yonso tumulomba diambuluisha ne tudienzeja bua kumanya mudiye wela meji kumpala kua tuetu kuangata dipangadika kampanda. Tuetu beyemene Yehowa, neatupeshe nyuma wende muimpe bua atuambuluishe bua kuenza tshidi tshimpe.—Filipoyi 2:13.

17 Mu matuku a muprofete Samuele, bena Peleshete bakatshimuna bena Isalele. Pamutu pa bena Isalele kuebejabu Yehowa tshivuabu mua kuenza, bakamba ne: ‘Tuyayi, tuangate mushete wa tshipungidi tshia mêyi a Yehowa ku Shilo, ulue munkatshi muetu bua kutusungilawu ku tshianza tshia badi netu lukuna.’ Dipangadika adi diakapatula bipeta kayi? ‘Bantu ba bungi bakafua, bualu bua bakashipa bena Isalele bakadi benda ku makasa binunu makumi asatu. Bakanyenga mushete wa Nzambi.’ (1 Samuele 4:2-4, 10, 11) Bena Isalele bavua bele meji ne: pavuabu bateka mushete wa tshipungidi munkatshi muabu, Yehowa uvua mua kubambuluisha ne kubakuba. Kadi kabavua balombe Yehowa diambuluisha anyi bakebe bua kumanya muvuaye wela meji to. Bakenza tshivuabu bamone ne: tshivua tshimpe ne bakakenga bikole bua bualu ebu.—Bala Nsumuinu 14:12.

18. Ntshinyi tshidi Bible ukulongesha bua dieyemena Yehowa?

18 Mufundi wa Misambu kampanda uvua munange Yehowa bikole ne umueyemena wakafunda ne: ‘Wikale ne ditekemena diebe mu Nzambi; bualu bua nemmutumbishe kabidi, bualu bua yeye udi lupandu luanyi ne Nzambi wanyi. Mutshima wanyi udi muitshikile munda muanyi, bua bualu ebu ndi nkuvuluka wewe.’ (Musambu 42:5, 6) Ke muutu udiumvua pebe bua Yehowa anyi? Utuku udiumvua pabuipi nende ne umueyemena anyi? Udi mua kulonga bua kumueyemena bikole. Bible udi utuambila ne: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’—Nsumuinu 3:5, 6.

19. Mmunyi muudi mua kuleja Yehowa ne: udi mumunange?

19 Bu mudi Yehowa mudianjile kutunanga, mmutulongeshe mutudi mua kumunanga. Tuikale tuela meji misangu yonso bua malu adiye mutuenzele ne mudiye mutunange bikole. Tumuleje ne: tudi bamunange ne muoyo wetu wonso ne anyima wetu yonso ne lungenyi luonso ne bukole buetu buonso.—Mâko 12:30.