Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 6 2015

Uvua munange bantu

Uvua munange bantu

‘Mvua mutambe kunanga bana ba bantu.’—NSU. 8:31NWT.

1, 2. Ntshinyi tshidi tshileja ne: Yezu mmunange bantu bikole?

MUANABUTE wa Nzambi ke muntu wa kumpala udi uleja mudi Yehowa ne meji male atudi katuyi mua kumvuija. Uvua meji ne “muena mudimu” munene ku luseke lua Tatuende. Tudi mua kumona disanka divuaye nadi pavuaye mumone Tatuende ‘ulongolola diulu’ ne ‘ujadika bishimikidi bia buloba.’ Kadi nansha muvua Muanabute wa Nzambi wanyisha bintu bidi kabiyi ne muoyo, ‘uvua mutambe kunanga bana ba bantu.’ (Nsu. 8:22-31NWT) Eyowa, Yezu mmunange bantu bikole katshia anu patshivuaye ne muoyo mu diulu.

2 Pashishe, bu muvua Muanabute wa Nzambi muikale ne lulamatu kudi Tatuende, mumunange ne munange ‘bana ba bantu’ bikole, wakitaba bua ‘kudivuija tshianana’ ne kuluaye muntu. Wakenza nanku bua kufila “tshia kupikula natshi bantu ba bungi.” (Filip. 2:5-8; Mat. 20:28) Uvua bushuwa munange bukua bantu. Pavua Yezu pa buloba, Nzambi wakamupesha bukole bua kuenza bishima bivua bileja muvuaye munange bantu bikole. Nunku bishima bia Yezu ebi bivua bileja malu a kukema enzeka pa buloba bujima mu katupa kîpi emu.

3. Ntshinyi tshituakonkonona mpindieu?

3 Dilua dia Yezu pa buloba diakamuambuluisha bua “kumanyisha  lumu luimpe lua Bukalenge bua Nzambi.” (Luka 4:43) Yezu uvua mumanye ne: Bukalenge ebu buvua ne bua kutumbishisha dîna dia Tatuende ne kujikija masama onso a bantu kashidi. Kakuyi mpata, malu onso avua Yezu muenze mu mudimu wende wa kuyisha avua ajadika muvuaye uditatshisha bikole bua bantu. Bua tshinyi bualu ebu budi ne mushinga kutudi? Bualu malongesha atudi tupeta neatupeteshe dishindika ne ditekemena bua matuku atshilualua. Tukonkononayi bishima binayi bia Yezu.

‘BUKOLE BUVUA NENDE BUA YEYE KUONDOPA BANTU’

4. Leja tshivua tshienzeke pavua Yezu mutuilangane ne muena nsudi.

4 Yezu uvua uyisha miaba yonso ivua bantu, ne mu Galela ke muaba uvuaye muyishe bikole. Yezu wakatuilangana ne bualu buvua buenza luse mu tshimue tshia ku bimenga bia mu Galela amu. (Mâko 1:39, 40) Kumpala kuende kuvua muntu uvua ne disama dibi dia nsudi. Munganga Luka udi umvuija mukavua disama edi dipite bukole menemene wamba muvua muntu au ne “nsudi ya bungi menemene.” (Luka 5:12) Muena nsudi eu “pakamonaye Yezu, wakatua mpala wende panshi, kumuambila ne: ‘Mukalenge, wewe musue udi mua kundengejaku.’” Kakuyi mpata uvua mumanye ne: Yezu uvua ne bukole bua kumuondopa, kadi tshivuaye musue kumanya ntshia ne: Yezu uvuaku ne dijinga dia kumuondopa anyi? Ntshinyi tshivua Yezu mua kuenza bua dilomba edi dienza ne muoyo mujima? Mmeji kayi avua nawu Yezu pavuaye mumone muntu eu uvua pamuapa ne mubidi munyanguke? Yezu uvuaku mua kufuanangana ne Bafalese bavua balengulula bantu bavua ne disama edi anyi? Ntshinyi tshiuvua wewe mua kuenza?

5. Ntshinyi tshivua tshisake Yezu bua kuambila muena nsudi ne: “Ndi musue”?

5 Bidi bimueneka ne: muena nsudi eu kavua muele lubila ne: “Tshiena muakane, tshiena muakane!” bilondeshile tshivua Mikenji ya Mose ilomba to. Yezu kavua muimanyine pa dishipa diende dia mukenji eu to. Kadi wakatangila tshivua muntu au ne dijinga diende. (Lew. 13:43-46) Katuena bamanye bimpe menemene tshivua mu meji a Yezu to, kadi tudi bamanye tshivua mu muoyo wende. Bu muvua Yezu ne luse, wakenza bualu bua dikema. Wakolola tshianza, kulengaye muena nsudi au ne kuamba ne dîyi didi dileja mudiye ne bukole ne luse ne: “Ndi musue. Lengejibua.” Pashishe “nsudi yende yakajimina.” (Luka 5:13) Bushuwa, bukole bua Yehowa buvua muaba au, kabiyi anu bua Yezu Kristo kuenzaye tshishima atshi, kadi bua kuleja muvuaye munange bantu bikole.—Luka 5:17.

6. Mbualu kayi bua mushinga budi mu bishima bivua Yezu muenze? Bidi bileja tshinyi?

6 Bukole bua Nzambi buakambuluisha Yezu Kristo bua kuenza bishima bia bungi bishilashilangane bidi bikemesha. Kavua muondope anu nsudi to, kadi uvua muondope kabidi masama a mishindu yonso ne bulema bua mishindu yonso. Bible udi utuambila ne: “Bantu bakakema bua muvuabu bamone tumama tuakula, balema benda bimpe ne bampofu bamona.” (Mat. 15:31) Bua kuleja luse lua mushindu eu, Yezu kavua dijinga ne bantu bavua mua kufila bitupa kampanda bia mubidi wabu bua kubipingaja pa muaba wa bia bantu bakuabu bivua bisama to. Wakuondopa tshitupa tshionso tshia mubidi tshivua tshisama. Uvua wondopa bantu diakamue, ne imue misangu ubondopa nansha yeye muikale ku bule. (Yone 4:46-54) Bishima bidi bikemesha ebi bidi bileja tshinyi? Bidi bileja ne: bu mudi Yezu mpindieu Mukalenge mu diulu, udi ne bukole ne dijinga dia kuondopa bantu bua kashidi. Kumanya mushindu uvua Yezu wenzela bantu malu kudi kutupesha dishindika dia ne: mu bulongolodi bupiabupia, mulayi wa buprofete wa ne: “Neafuile udi mutekete ne udi ukengela dikuatshisha luse” newukumbane. (Mus. 72:13)  Eyowa, Yezu neakumbaje dijinga didi mu muoyo wende dia kuambuluisha bonso badi bakenga.

“JUKA, AMBULA KALALU KEBE, ENDA”

7, 8. Leja muvua Yezu mufike ku dituilangana ne muntu uvua ne mubidi mutekete ku dijiba dia Beteseda.

7 Ngondo mikese yakapita Yezu mumane kutuilangana ne muena nsudi mu Galela. Wakumbuka mu Galela kuya mu Yudaya bua kuyisha ne kuambila bantu lumu luimpe lua Bukalenge bua Nzambi. Bantu bavua bitabe mukenji wa Yezu ne banyishe mushindu wende wa kuyisha bavua ne bua kuikala binunu bia bungi. Uvua ne dijinga dikole dia kuambila bapele lumu luimpe, kuyisha bena lukanu bua dilekedibua diabu, ne kusanguluja mitshima ya bavua batamba kunyingalala.—Yesh. 61:1, 2; Luka 4:18-21.

8 Pashishe ngondo wa Nisana wakakumbana. Bua kutumikila mukenji wa Tatuende, Yezu wakenza luendu mutangile mu Yelushalema bua kuenza Pasaka. Mu tshimenga atshi muvua midimu ya bungi ivua yenzeka bu muvua bantu ba bungi balua bua tshibilu tshia tshijila etshi. Ku Nord kua ntempelo kuvua dijiba dia mâyi divuabu babikila ne: Beteseda. Yezu wakatuilanganaku ne muntu uvua usama.

9, 10. a) Ntshinyi tshivua tshisaka bantu bua kuya ku dijiba dia Beteseda? b) Ntshinyi tshivua Yezu muenze ku dijiba dia mâyi? Bualu ebu budi butulongesha tshinyi? (Tangila tshimfuanyi tshia ntuadijilu.)

9 Bantu ba bungi bavua basama ne bavua balema bavua baya ku dijiba dia Beteseda. Bavua bayaku bua tshinyi? Pamuapa bavua bitabuja ne: muntu udi usama yeye mubuele mu dijiba padi mâyi avuanduluka, uvua ne bua kuondopibua mu tshishima. Ela meji muvua bantu mua kuikala badiumvua kuntu aku. Bantu bavua ne bua kuikala bashikile mu lungenyi, bikale ne kanyinganyinga ne kabayi ne ditekemena. Kadi ntshinyi tshivua tshisake Yezu bua kuya kuntu aku, pende muikale mupuangane, kayi mua kusama? Luse ke luvua lusake Yezu bua kusemena pabuipi ne muntu uvua mutuadije kusama bidimu bia bungi Yezu kayi muanji kulua pa buloba.—Bala Yone 5:5-9.

10 Udiku mua kumona mu lungenyi dishikila divua nadi muntu uvua usama au pavua Yezu mumuebeje ni uvua musue kumvua bimpe anyi? Muntu au wakamuandamuna diakamue. Uvua musue kuondopibua kadi kavua ne mushindu to, bualu kavua ne muntu uvua mua kumuambuluisha bua kumuela mu dijiba dia mâyi. Yezu wakamuambila bua kuenzaye bualu buvuaye kayi mua kuenza, mmumue ne: bua kuambula kalalu kende ne kuenda. Muntu au wakatumikila dîyi dia Yezu, kuambulaye kalalu kende ne kutuadija kuenda. Bualu ebu budi kadiosha ka tshienza Yezu mu bulongolodi bupiabupia. Tshishima etshi tshidi tshileja kabidi mudi Yezu ne luse. Uvua wenda ukeba bantu bavua dijinga ne diambuluisha. Tshilejilu tshia Yezu etshi tshidi ne bua kutusaka bua kutungunuka ne kukeba bantu ba mu teritware wetu badi malu mabi adi enzeka mu bulongolodi ebu matonde.

“NNGANYI UDI MUNDENGE KU BILAMBA?”

11. Mmunyi mudi Mâko 5:25-34 uleja mudi Yezu umvuila bantu badi basama luse?

11 Bala Mâko 5:25-34. Munkatshi mua bidimu 12, mukaji eu uvua ne bundu bua bungi. Disama diende divua dimupangisha mua kuenza amue malu mu nsombelu wende ne malu a ntendelelu. Nansha muvuaye “mukenge bikole ku bianza bia baminganga, mutule bionso bivuaye nabi,” nsombelu wende uvua mulue mubi bikole. Kadi dimue dituku, mukaji eu wakalongolola mushindu mukuabu bua kumvuaye bimpe. Wakadienzeja bua ikale pabuipi ne Yezu. Wakabuela munkatshi mua bantu, kulengaye tshilamba tshia Yezu. (Lew. 15:19, 25) Yezu wakajingulula ne: bukole buvua bupatuke munda muende, ke yeye kuebeja bua kumanya uvua mumulenge.  Mukaji au “wakalua wenda uzakala ne buôwa kudiela kumpala kuende, e kumuambila malu onso.” Bu muvua Yezu mumanye ne: Tatuende Yehowa ke uvua muondope mukaji eu, wakamuambila ne bulenga buonso ne: “Muananyi wa bakaji, ditabuja diebe ndikuondope. Ndaku mu ditalala, umvue bimpe ku disama diebe dibi.”

Yezu wakaleja ku diambuluisha dia bishima biende ne: udi ututabalela ne uditatshisha bua ntatu yetu (Tangila tshikoso tshia 11 ne 12)

12. a) Bilondeshile malu atudi bakonkonone, ntshinyi tshiudi mua kuamba bua Yezu? b) Yezu mmutushile tshilejilu kayi?

12 Yezu udi ne bulenga bua bungi! Tudi tumona ne: Yezu uvua uditatshisha bikole bua bantu badi basama. Satana mmusue kutuitabijija ne: ki mbatunange ne katuena ne mushinga. Yezu wakaleja patoke ku diambuluisha dia bishima biende ne: udi ututabalela ne uditatshisha bua ntatu yetu. Bulelela, tudi ne Mukalenge ne Muakuidi munene udi uditeka pa muaba wa bakuabu! (Eb. 4:15) Bidi mua kutukolela bua kumvua mudi bantu badi ne disama dia munanunanu badiumvua, nangananga tuetu katuyi banji kusama disama adi. Tudi ne bua kumanya ne: Yezu wakaditeka pa muaba wa bantu bavua basama nansha muvuaye kayi usama. Mbimpe tshilejilu tshia Yezu tshitusake bua kuenza muetu muonso bua kumuidikija.—1 Pet. 3:8.

“YEZU WAKAPUEKESHA BINSONJI”

13. Dijula Lazalo ku lufu diakaleja ne: Yezu uvua ne ngikadilu kayi?

13 Kanyinganyinga kavua naku bantu bakuabu kavua katonde Yezu. Malu avua bantu benza pavua Lazalo mulunda wa Yezu mufue, akafikisha Yezu ku ‘dishikunkila’ ne ku ‘dipampakana.’ Uvua mudiumvue nunku nansha muvuaye mumanye ne: ukavua pa kujula Lazalo ku lufu. (Bala Yone 11:33-36.) Yezu kavua mumvue bundu bua kuleja muvuaye ne kanyinganyinga kakole to. Bantu bavua muaba au bakamona muvua Yezu munange Lazalo ne bena mu dîku diabu.  Yezu uvua muleje muvuaye ne luse pakenzaye mudimu ne bukole buvua Nzambi mumupeshe bua kujula mulunda wende ku lufu.—Yone 11:43, 44.

14, 15. a) Ntshinyi tshidi tshileja ne: Yehowa udi ne dijinga dikole dia kumbushila bantu ntatu? b) Bua tshinyi tshiambilu tshia ne: “Nkita idi ne bafue badi Nzambi uvuluka” tshidi tshitusankisha?

14 Bible udi uleja mudi Yezu muikale ‘tshimfuanyi tshilelela tshia bumuntu menemene’ bua Mufuki. (Eb. 1:3) Nunku bishima bia Yezu bidi bijadika ne: yeye ne Tatuende badi ne dijinga dia kumbusha kanyinganyinga kadi masama ne lufu bikebesha. Dijinga edi didi dimuenekela mu bilejilu bikese bia bantu bavuabu bajule ku lufu bidi mu Bible. Yezu wakamba ne: ‘Dîba didi dilua didi bantu bonso badi mu nkita [idi ne bafue badi Nzambi uvuluka, note] bapatuka.’—Yone 5:28, 29.

15 Tshiambilu tshia Yezu tshia ne: “Nkita idi ne bafue badi Nzambi uvuluka” ntshikumbane bualu tshidi tshileja mudi Nzambi uvuluka malu. Nzambi Wa Bukole Buonso udi mufuke diulu ne buloba udi mua kuvuluka kalu ne kalu kuonso ka bafue betu batudi banange ne kuvuluka kabidi tshidibu ne ngikadilu yabu. (Yesh. 40:26) Kabiena anu ne: udi mua kubavuluka patupu to, kadi yeye ne Muanende mbasue kubavuluka. Dibishibua dia Lazalo ku lufu ne dia bantu bakuabu badi Bible utela nkadiosha ka tshienzeka pa buloba bujima mu bulongolodi bupiabupia.

BISHIMA BIA YEZU NE WEWE

16. Bena Kristo ba bungi ba lelu badi batungunuka ne kuikala ne lulamatu nebikale ne diakalenga kayi?

16 Tuetu batungunuke ne kuikala ne lulamatu, tudi mua kumona tshimue tshia ku bishima bitambe bunene tshitu katshiyi tshianji kuenzeka, mmumue ne: tshishima tshia kupanduka ku dikenga dinene. Diakamue padi mvita ya Armagedone ijika, bishima bikuabu nebienzeke bua kupetesha bantu makanda a mubidi. (Yesh. 33:24; 35:5, 6; Buak. 21:4) Fuanyikija umona bantu kabatshiyi kabidi ne maneta a mêsu, makombo, mabaya a kuenda nawu, tukalu tua balema, tuamu tua kumvua natu ne bikuabu! Bushuwa, Yehowa neenze bua bantu bapanduka ku Armagedone bikale ne makanda a mubidi. Bantu bonso bapanduka nebikale ne mudimu wa kuenza. Nebikale ne disanka dia kuvuija buloba bujima budi dipa dia kudi Nzambi mparadizu.—Mus. 115:16.

17, 18. a) Bishima bia Yezu bivua ne tshipatshila kayi tshinene? b) Bua tshinyi udi ne bua kuenza muebe muonso bua kubuela mu bulongolodi bupiabupia bua Nzambi?

17 Mushindu uvua Yezu muondope masama a bantu udi ukankamija bena mu musumba munene lelu, ukolesha ditekemena diabu dimpe dia kuondopibua ku masama abu onso. (Buak. 7:9) Mushindu uvua Muanabute wa Nzambi muondope bantu uvua uleja muvuaye udiumvua ne muvuaye munange bantu bikole. (Yone 10:11; 15:12, 13) Luse lua Yezu ludi luleja mudi Yehowa uditatshisha bikole bua mutendeledi wende yonso.—Yone 5:19.

18 Bantu bonso badi batua mikemu, bakenga bikole ne bafua. (Lomo 8:22) Tudi dijinga ne bulongolodi bupiabupia bua Nzambi muikala bantu mua kuondopibua ku masama abu onso bilondeshile mulayi wende. Malaki 4:2 udi utuleja bualu budi butusaka bua kuitaba ne: bantu bondopabu ‘nebanaye bu bana ba ngombe palupukabu mu tshikumbi,’ basanka bua mudibu bumbuke ku bupika bua dipanga bupuangane. Mbimpe dianyisha dikole ditudi nadi kudi Nzambi ne ditabuja ditudi nadi mu milayi yende bitusake bua kuenza tshionso tshidi tshikengela mpindieu bua kubuela mu bulongolodi bupiabupia. Bidi bitukolesha bua kumanya ne: bishima bivua Yezu muenze patshivuaye pa buloba bivua kadiosha ka disulakana dia kashidi diapeta bantu mu katupa kîpi emu mu bukokeshi bua Masiya.