Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 6 2015

Udi muvuluke anyi?

Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

Bena Kristo badi ne bua kusambila Yezu Kristo anyi?

Tòo. Yezu nkayende uvua mutulongeshe bua kusambila Yehowa, ne mmutushile tshilejilu mu bualu ebu pavuaye usambila Tatuende. (Mat. 6:6-9; Yone 11:41; 16:23) Bia muomumue, bayidi bende ba kumpala bavua basambila Nzambi, kadi ki n’Yezu to. (Bien. 4:24, 30; Kolos. 1:3)1/1, dibeji dia 14.

Ntshinyi tshitudi ne bua kuenza tshidimu tshionso bua kudilongolola bua kuvuluka lufu lua Yezu?

Bumue bua ku malu atudi mua kuenza nkulonda programe wa dibala dia Bible udi upetangana ne bualu ebu. Tudi kabidi mua kudienzeja bua kuvudija mudimu wetu wa buambi mu tshikondo etshi. Tudi mua kuela meji bikole bua ditekemena didi Nzambi mutupeshe.—15/1, dibeji dia 14-16.

Ntshinyi tshivua tshifikile bena buloko babidi bena Ejipitu bavua bambile Jozefe tshilota tshivuabu kabayi bumvue?

Jozefe wakambila mufidi wa maluvu wa Palô ne: bavua ne bua kumupingaja ku mudimu wende. Bua muenji wa mampa, tshilota tshiende tshivua tshiumvuija ne: Palô uvua ne bua kumushipa ne kumukudika ku mutshi. Diumvuija dia bilota ebi diakakumbana. (Gen. 40:1-22)1/2, dibeji dia 12-14.

Ndipa kayi divua bana betu ba mu Japon kabayi belele meji divuabu bapete?

Bavua bapete Evanjeliyo wa Matayi muangatshila mu Bible wa Nkudimuinu wa bulongolodi bupiabupia. Mukanda eu ngua kufila mu mudimu wa buambi, ne bantu ba bungi bavua kabayi bibidilangane ne Bible bavua bawangata.—15/2, dibeji 3.

Nnsombelu kayi ivua mu bidimu lukama bia kumpala ivua miambuluishe bua lumu luimpe kuyalu kumpala?

Ditalala dia bena Lomo anyi Pax Romana divua dileja ne: kakuvua bimvundu bia bungi to. Bayidi ba kumpala bavua mua kuenza ngendu mu njila mimpe ya bungi. Bavua bakula tshiena Greke miaba ya bungi, biambuluisha bua kuyisha too ne bena Yuda bavua bamuangalake mu ampire mujima. Bayidi bavua benza mudimu ne mikenji ya bena Lomo bua kubingisha lumu luimpe.15/2, dibeji dia 20-23.

Bua tshinyi bena Kristo balelela kabatu benza Pasaka?

Yezu uvua muambile bayidi bende bua kuvuluka lufu luende, kadi ki ndibishibua diende ku lufu to. (Luka 22:19, 20)1/3, dibeji dia 8.

Bidimu bishale ebi, bua tshinyi mikanda yetu kayena itamba kuimanyina pa mundidimbi ne bualu buena dîna?

Bible udi wamba ne: bamue bantu bavua mundidimbi wa bualu kampanda bunene. Tudi ne tshilejilu mu Galatiya 4:21-31. Kadi ki mbimpe menemene bua kuela meji anyi kuleja dikumbana dia mundidimbi wa bualu kampanda to. Tudi ne bua kukeba malongesha atudi tupetela kudi bantu ne malu avua menzeke adi mu Bible. (Lomo 15:4)—15/3, dibeji dia 17-18.

Bua tshinyi papirise uvuabu bangule mu mushiki wa butshiafu wa kale mu Ejipitu uvua ne mushinga wa pa buawu?

Mu bidimu bishale ebi, kapese kavuabu bangule kavua ne bitupa bia Evanjeliyo wa Yone. Kavua mua kuikala kakavua ne bidimu ndambu panyima pa Yone mumane kufunda mukanda wende, ne malu avuamu adi ajadika ne: mbatufundilawu, aleja mudi Bible mukanda wa kueyemena.1/4, dibeji dia 10-11.

Bua tshinyi kuipata muenji wa bubi udi kayi unyingalala nkumuleja dinanga?

Bible udi uleja malu a kuenza bua kuipata muntu, adi mua kupatula bipeta bimpe. (1 Kol. 5:11-13) Kuenza nunku kudi kutumbisha dîna dia Nzambi, kulama tshisumbu tshikezuke ne kudi mua kufikisha muenji wa bubi ku dishintuluka.—15/4, dibeji dia 29-30.