Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 5 2015

 MU BINTU BIETU BIA KALE

Wakamona dinanga mu tshikondo tshia Kafeteriya

Wakamona dinanga mu tshikondo tshia Kafeteriya

KUDIA pamue ku mêsa a Yehowa kutu anu bualu bua disanka. Padi bantu ba Nzambi badisangisha bua kudia biakudia bia mu nyuma, kudia kabidi biakudia bia ku mubidi kutu kuvudija disanka diabu.

Mu ngondo wa 9 mu 1919, Balongi ba Bible bakenza mpungilu wa matuku 8 mu Cedar Point, mu Ohio, mu États-Unis. Bavua ne bua kupesha bantu bavua balua mu mpungilu biakudia ne muaba wa kulala ku nzubu ya tshilala benyi, kadi bantu bakalua ba bungi kupita muvuabu batekemene. Bu muvua bantu bapite bungi, biakatonda bafidi ba biakudia, ke bobu kumbukabu ba bungi. Mulombodi wa tshibambalu tshia biakudia wa ku nzubu wa tshilala benyi wakapanga tshia kuenza, kulombaye diambuluisha kudi bana betu bavua balue, ne ba bungi bakitaba bua kuambuluisha. Muanetu wa bakaji Sadie Green uvua umue wa kudibu. Wakavuluka wamba ne: “Uvua musangu wanyi wa kumpala wa kuenza mudimu wa kuabanyina bantu biakudia, kadi tshivua tshikondo tshimpe.”

Sierra Leone, mu 1982

Mu bidimu biakalonda, bakalongolola bua kupesha bantu biakudia mu mpungilu, ne bena budisuile ba bungi bavua babanyina bana betu ba balume ne ba bakaji biakudia ne disanka. Kuenza mudimu ne bena Kristo bakuabu kuvua kabidi kuambuluishe bansonga ba bungi bua kudifundila bipatshila bia mu nyuma. Gladys Bolton uvua muenze mudimu wa difila biakudia mu mpungilu wa mu 1937, wakamba ne: “Ngakapetangana ne bantu ba miaba mishilashilangane ne meme kumanya muvuabu batantamena ntatu yabu. Tshikondo atshi ke tshingakapeta dijinga dia kulua mpanda-njila.”

Beulah Covey uvua mubuele mu mpungilu au wakamba ne: “Didifila dia bana betu bua kuenza mudimu diakenza bua midimu yenzeke bimpe.” Kadi mudimu eu uvua ne yawu ntatu. Pakafika muanetu Angelo Manera mu Dodger Stadium mu Los Angeles, mu Californie mu 1969, wakumvua ne: bavua bamusungule bua kuenza mudimu wa difila biakudia mu kafeteriya. Wakamba ne: “Bivua bintonde bikole.” Kuenza mudimu wa dilongolola biakudia bua mpungilu au kuvua kulomba kabidi kuenza munkoloji wa metre 400 bua kubueja milonda ivua ifikisha luya mu tshikuku bua ngesu ipete mudilu.

Frankfurt, Allemagne, mu 1951

Mu Sierra Leone mu 1982, bena budisuile bavua benza mudimu mukole wa kudima bisosa ne kulongolola muaba wa kufidila biakudia. Mu 1951 mu Frankfurt, mu Allemagne, bana betu bakasomba tshiamu kampanda  tshivua tshifila luya bua kusabisha ngesu 40 ya kulamba nayi. Bavua bapesha bantu 30000 biakudia mu dîba dimue. Bua kupepejila bantu 576 bavua basukula malonga mudimu, bantu bavua balua mu mpungilu ne tuele tuabu ne nsomo. Mu Rangoun, mu Birmanie bantu bavua balamba bavua belela bana betu bavua bafumine mu matunga makuabu ndungu mukese mu biakudia.

“BADI BADIA BIMANE KUULU”

Kuela mulongo mu munya mukole bua kuangata biakudia mu mpungilu uvua muenzeke mu États-Unis mu 1950 kuvua kuambuluishe Annie Poggensee. Wakamba ne: “Mvua muteleje ne ntema yonso diyukidilangana divua pankatshi pa bana betu ba bakaji babidi ba ku Mputu bavua baluile mu buatu.” Yonso wa kudibu uvua ulonda muvua Yehowa mumuambuluishe bua kufikaye mu mpungilu au. Annie wakamba ne: “Kakuvua muntu uvua ne disanka bu bana betu ba bakaji babidi aba to, nansha muvuabu bimane mu mulongo mu munya mukole, kabivua bibambila bualu to.”

Seoul, Corée, mu 1963

Mu mpungilu minene ya bungi, bavua basa ntenta, bateka mêsa manene a kuulu, bienza bua ne: bana betu badie lukasa ne bashile bakuabu muaba. Mmunyi muvuabu mua kudisha bantu binunu bia bungi mu tshikondo tshia dikisha? Muntu kampanda uvua kayi Ntemu wakamba ne: “Etshi tshitendelelu ntshia pa buatshi. Badi badia bimane kuulu.”

Bamfumu ba basalayi ne banene bakuabu bakakema bua mushindu uvuabu balongolole malu bimpe. Pavua mutangidi wa tshiluilu tshia États-Unis mumone mutuvua balongolole difila dia biakudia mu mpungilu uvua muenzeke mu Yankee Stadium mu tshimenga tshia New York, wakalomba Faulkner, munene wa tshiluilu tshia mvita tshia mu Grande-Bretagne bua kuluaye kutangila pende. Nunku, yeye ne mukajende bakalua mu mpungilu wa mu 1955 wa ne: “Bukalenge butshimunyi” (Angl.) uvua muenzeke mu Twickenham, mu Angleterre. Wakamba ne: uvua mumone dinanga mu tshikondo tshia kafeteriya.

Munkatshi mua bidimu bia bungi, bena budisuile bavua babanya biakudia bimpe bia mushinga mukese bua kuambuluisha bavua babuela mu mpungilu. Kadi mudimu mukole eu uvua ulomba bena budisuile ba bungi bua kuwenza mu mêba a bungi, bapangila bitupa bia programe anyi mene yonso mujima. Ku ndekelu kua bidimu bia 1970, bakashintulula malu bua biakudia bia kuabanyina bantu mu mpungilu miaba ya bungi. Pashishe mu 1995, bakalomba bantu bavua babuela mu mpungilu bua kuluabu ne biakudia biabu. Kuenza nunku kuvua kuambuluishe bana betu bavua balamba biakudia ne babipesha bantu bua kulondabu programe yonso ne kupeta dîba dia kuyukila ne bena Kristo nabu. *

Yehowa udi wanyisha bikole bana betu badi benze mudimu mukole bua kuenzela bena Kristo nabu mudimu abu. Bamue badi mua kumvua bibi padibu bavuluka disanka divuabu nadi tshikondo tshivuabu benza mudimu ku kafeteriya. Nansha nanku bualu bua mushinga budi ne: Dinanga ditshidi anu bualu bunene budi busankisha bantu mu mpungilu yetu.Yone 13:34, 35.

^ tshik. 12 Bushuwa, bena budisuile badi ne mpunga ya bungi ya kuenza mudimu mu bibambalu bikuabu bia mu mpungilu.