Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 5 2015

Nkonko ya babadi

Nkonko ya babadi

Goga wa ku Magoga udibu batele mu mukanda wa Yehezekele nnganyi?

Munkatshi mua bidimu bia bungi, mikanda yetu ivua yumvuija ne: Goga wa ku Magoga ndîna didibu bapeshe Satana Diabolo bobu bamane kumuipata mu diulu. Diumvuija edi divua dimanyine pa tshidi mukanda wa Buakabuluibua uleja. Udi uleja Satana Diabolo bu mulombodi wa mvita ya buloba bujima idibu bela bantu ba Nzambi. (Buak. 12:1-17) Nunku tuvua tuela meji ne: Goga ndîna dikuabu dia buprofete dia Satana.

Kadi diumvuija edi ndijule imue nkonko ya mushinga. Bua tshinyi? Tukonkononayi bualu ebu: Patudi tuakula bua tshikondo tshidibu batshimuna Goga, Yehowa udi wamba bua Goga ne: ‘Nenkufile kudi nyunyi ya muulu ne kudi nyama ya mu mpata bu biakudia biayi.’ (Yeh. 39:4) Pashishe Yehowa udi usakidila ne: ‘Mu dituku adi mene nempe Goga muaba wa kujikibua mu Isalele, ne mu muaba wawa nebajike Goga ne tshisumbu tshiende tshionso tshia bantu.’ (Yeh. 39:11) Kadi mmunyi mudi ‘nyunyi ya muulu ne nyama ya mu mpata’ mua kudia tshifukibua tshia mu nyuma? Mmunyi mudibu mua kupesha Satana ‘muaba wa kujikibua’ pa buloba? Bible udi uleja patoke ne: nebele Satana mu “tshina tshidi katshiyi ne ndekelu” bua bidimu 1000, kadi kena wamba ne: nebamudie anyi ne: nebamujike to.—Buak. 20:1, 2.

Tudi balonge ne: ku ndekelu kua bidimu 1000, nebapatule Satana mu tshina tshidi katshiyi ne ndekelu ne “neapatuke bua kupambuisha bisamba bidi ku matumba anayi a buloba, Goga ne Magoga, bua kubasangishaye pamue bua mvita.” (Buak. 20:8) Kadi mmunyi mudi Satana mua kupambuisha Goga bikalaye yeye muine muikale Goga? Nunku, “Goga” udibu bakuila mu mêyi buprofete a Yehezekele anyi mu mukanda wa Buakabuluibua ki n’Satana to.

Kadi mpindieu Goga wa ku Magoga nnganyi? Bua kuandamuna lukonko elu, tudi ne bua kukeba mu Bible bua kumanya udi ubunda bantu ba Nzambi. Bible udi wakula bua dibunda bantu ba Nzambi kudi ‘Goga wa ku Magoga’ ne kudi ‘mukalenge wa ku Nord’ ne kudi “bakalenge ba pa buloba.” (Yeh. 38:2, 10-13; Dan. 11:40, 44, 45; Buak. 17:14; 19:19) Bidi bileja ne: dibabunda edi ndishilangane anyi? Kabiena mua kuikala nanku to. Kakuyi mpata, Bible udi wakula bua dibunda dimue dimue adi mu mêna mashilangane. Bua tshinyi tudi tuamba nanku? Bualu Bible udi utuleja ne: bisamba bionso bia pa buloba nebiditue mu dibunda dia ndekelu diafikisha ku mvita ya Armagedone.Buak. 16:14, 16.

Patudi tufuanyikija mvese yonso eyi idi itangila  dibunda dia ndekelu dia bantu ba Nzambi, bidi bimueneka ne: dîna Goga wa ku Magoga ki ndîna dia Satana to, kadi didi dileja bisamba bidisange. Bisamba bidisange ebi nebabilombole kudi ‘mukalenge wa ku Nord’ wa mu tshimfuanyi anyi? Katuena ne bijadiki to. Kadi bidi bimueneka ne: bualu ebu budi bupetangana ne tshidi Yehowa wamba bua Goga ne: ‘Wewe neufume ku muaba webe wa ku mfudilu kua Nord, wewe ne bantu ba bungi, bonso buabu babande pa nyima pa tubalu, tshisumbu tshinene tshia bantu ne tshisumbu tshinene tshia masalayi.’Yeh. 38:6, 15.

Bia muomumue, muprofete Danyele uvuaku pende mu tshikondo tshivua Yehezekele ne muoyo, udi wamba bua mukalenge wa ku Nord ne: ‘Ngumu ya ku luseke lua Est ne lua ku Nord neyimukuatshishe buôwa, neapatuke muwulangane ne tshiji tshikole bua kubutulaye ba bungi. Pashishe, neashimike ntenta yende ya bukalenge pankatshi pa mâyi manene ne mukuna wa tshijila ne wa butumbi. Kadi neafike ku nshikidilu kua muoyo wende, kayi ne muntu wa kumukuatshisha.’ (Dan. 11:44, 45) Bualu ebu budi bupetangana ne tshidi mukanda wa Yehezekele wamba bua midimu ya Goga.Yeh. 38:8-12, 16.

Dibunda dia ndekelu edi nedifikishe ku tshinyi? Danyele udi utuambila ne: ‘Ku tshikondo atshi Mikaele mukalenge wa banjelu [Yezu Kristo], mulami [katshia ku 1914] wa bana benu, neajuke [ku Armagedone]. Makenga [dikenga dinene] neikalaku, katshia tshisamba tshia bantu tshiabanga too ne ku tshikondo atshi makenga bu nunku kaakadi manji kumueneka; kadi mu tshikondo atshi bana benu bonso badi ne mêna abu mafunda mu mukanda wa muoyo nebapande.’ (Dan. 12:1) Tshienzedi etshi tshia Yezu udi muleji mpala wa Nzambi ntshileja kabidi mu Buakabuluibua 19:11-21.

Kadi “Goga ne Magoga” udibu bakuila mu Buakabuluibua 20:8 nnganyi? Mu tshikondo tshia diteta dia ndekelu ku ndekelu kua bidimu 1000, bantu batombokela Yehowa nebaleje lungenyi lua kushipangana lua muomumue ne lua ‘Goga wa ku Magoga,’ mbuena kuamba ne: bisamba bidi bibunda bantu ba Nzambi ku ndekelu kua dikenga dinene. Bisumbu bionso bibidi ebi bidi ne tshipeta tshia muomumue etshi: lufu lua tshiendelele. (Buak. 19:20, 21; 20:9) Bidi bimueneka mpindieu ne: bantu bonso bikala bantomboji ku ndekelu kua bidimu tshinunu nebababikile ne: “Goga ne Magoga.”

Bu mutudi balongi ba tshisumi ba Dîyi dia Nzambi, tudi bindile ne muoyo kuulu kuulu bua kumanya wikala mua kuenza mudimu bu ‘mukalenge wa ku Nord’ mu matuku makese kumpala eku. Kadi nansha koku nganyi wikala mua kulombola bisamba bidisange ebi, tudi batuishibue ne: malu abidi aa neenzeke: 1) nebatshimune ne nebabutule Goga wa ku Magoga ne biluilu biende, ne 2) Mukalenge wetu Yezu Kristo udi ukokesha mpindieu, neakube bantu ba Nzambi ne neabalombole mu buloba bupiabupia mudi ditalala ne bukubi bulelela.Buak. 7:14-17.