Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 4 2015

Malanda ebe ne Yehowa mmalelela anyi?

Malanda ebe ne Yehowa mmalelela anyi?

“Semenayi pabuipi ne Nzambi ne yeye neasemene pabuipi nenu.”—YAK. 4:8.

1. Bua tshinyi tudi ne bua kulama malanda etu ne Yehowa makole?

UKADI mudilambule kudi Nzambi ne mutambule bua kuikala Ntemu wa Yehowa anyi? Biobi nanku, udi ne tshintu tshia mushinga mukole, mmumue ne: malanda ebe ne Nzambi. Kadi, bulongolodi bua Satana ne mubidi wetu mupange bupuangane bidi biluisha malanda aa. Bena Kristo bonso badi batuilangana ne nsombelu eu. Ke bualu kayi malanda etu ne Yehowa adi ne bua kuikala makole menemene.

2. a) Umvuija muaku malanda. (Tangila note.) b) Mmunyi mutudi mua kukolesha malanda etu ne Yehowa?

2 Buebe wewe, malanda ebe ne Yehowa mmalelela anyi? Udi musue kuakolesha anyi? Yakobo 4:8 udi ukuleja muudi mua kuenza nanku, wamba ne: “Semenayi pabuipi ne Nzambi ne yeye neasemene pabuipi nenu.” Mona ne: mvese eu udi uleja malu abidi. * Patudi tuenza malu kampanda bua kusemena kudi Nzambi, yeye pende udi usemena kutudi. Padi malu aa enzeka pa tshibidilu, malanda etu ne  Yehowa neakole ku kakese ku kakese. Nunku, netumone mudi malanda etu nende mikale malelela menemene. Tudi tupeta dishindika dia buena divua nadi Yezu pakambaye ne: ‘Udi muntume udiku bulelela, ndi mumumanye.’ (Yone 7:28, 29) Kadi, mmalu kayi masunguluke audi ne bua kuenza bua kusemena pabuipi ne Yehowa?

Mmunyi muudi mua kuyukila ne Nzambi? (Tangila tshikoso 3)

3. Mmunyi mutudi mua kuyukila ne Yehowa?

3 Kuikala ne tshibidilu tshia kuyukila ne Yehowa mbualu bua mushinga mukole budi butusemeja pabuipi nende. Mmunyi muudi mua kuyukila ne Nzambi? Mmunyi muutu uyukila ne mulunda webe kampanda udi musombele kule? Pamuapa nutu nufundilangana anyi nuyukila ku telefone misangu ya bungi. Udi uyukila ne Yehowa paudi ne tshibidilu tshia kumusambila. (Bala Musambu wa 142:2.) Yehowa udi uyukila nebe paudi ne tshibidilu tshia kubala Dîyi diende difunda ne kuelelanganapu meji. (Bala Yeshaya 30:20, 21.) Tumonayi mpindieu mudi diyukidilangana didi pankatshi petu ne Yehowa edi dikolesha malanda etu nende, diavuija malelela menemene.

YEHOWA UDI UYUKILA NEBE KU DIAMBULUISHA DIA DILONGA DIEBE DIA BIBLE

4, 5. Mmunyi mudi Yehowa uyukila nebe ku diambuluisha dia Dîyi diende? Fila tshilejilu.

4 Kakuyi mpata udi witaba ne: Bible udi ne mukenji wa Nzambi bua bantu bonso. Kadi Bible udiku kabidi uleja muudi mua kusemena pabuipi ne Yehowa anyi? Eyowa. Mushindu kayi? Paudi ubala Bible ne umulonga pa tshibidilu, utangila bienzedi biebe ne tshidiye wamba, pashishe welangana meji mudi bualu abu butangila nsombelu webe, udi upetesha Yehowa mushindu wa kuyukila nebe ku diambuluisha dia Dîyi diende. Kuenza nunku nekukuambuluishe bua kukolesha malanda ebe nende.—Eb. 4:12; Yak. 1:23-25.

5 Tshilejilu, bala ne elangana meji bua mêyi a Yezu a ne: “Lekelayi kudibutshila biuma pa buloba.” Wewe mumone ne: nsombelu webe mmumane kuimanyina pa diteka malu a Bukalenge pa muaba wa kumpala, neudiumvue muanyishibue kudi Yehowa. Kadi wewe mumone ne: bidi bikengela kupepeja nsombelu webe bua kudifila bikole ku malu a Bukalenge, Yehowa mmukuleje muaba uudi mua kuakaja bua umone mua kusemena pabuipi nende menemene.—Mat. 6:19, 20.

6, 7. a) Ntshinyi tshidi dilonga dia Bible dienzela dinanga ditudi nadi bua Yehowa ne didiye pende nadi buetu tuetu? b) Patudi tudilongela Bible, tudi ne bua kuikala ne tshipatshila kayi?

6 Kulonga Dîyi dia Nzambi kudi kutuleja malu makuabu a bungi atudi mua kuakaja bua kukolesha malanda etu ne Nzambi. Kudi kabidi  kukolesha dianyisha dietu bua mishindu mimpe idi Yehowa wenza malu, idi itusaka bua kumunanga bikole menemene. Padi dinanga dietu bua Nzambi dikola, udi pende utunanga bikole, nunku bidi bikolesha malanda etu nende.—Bala 1 Kolinto 8:3.

7 Kadi bua tuetu kusemena pabuipi ne Yehowa, bidi ne mushinga bua kulonga Bible ne tshipatshila tshimpe. Yone 17:3 udi wamba ne: “Bualu ebu budi bumvuija muoyo wa tshiendelele: bafike ku dikumanya wewe, Nzambi umuepele mulelela, ne yeye uuvua mutume, Yezu Kristo.” Nunku tshipatshila tshietu ki ntshia kupeta dimanya patupu to, kadi ntshia kufika ku “dimanya” Yehowa bimpe bu Muntu mulelela.—Bala Ekesode 33:13; Mus. 25:4.

8. a) Bilondeshile 2 Bakelenge 15:1-5, ntshinyi tshitudi mua kudiebeja bua mushindu uvua Yehowa muenzele mukalenge Uziya malu? b) Mmunyi mudi kumanya Yehowa bimpe mua kumbusha dielakana ditudi mua kuikala nadi bua mushindu udiye wenza malu?

8 Tuetu bafike ku dimanya Yehowa bimpe menemene, kabiakututonda patudi tubala imue miyuki ya mu Bible kadi katuyi tumvua bua tshinyi uvua muenze malu mushindu au. Tshilejilu, mmunyi muudi umvua bua mushindu uvua Yehowa muenzele Uziya mukalenge wa mu Yuda malu? (2 Bak. 15:1-5) Mona ne: nansha ‘mutshivua bantu bafila milambu ya kuosha pa kapia ne musenga wa manananshi pa mutu pa mikuna,’ Uziya yeye wakatungunuka ne ‘kuenza malu mimpe ku mêsu kua Yehowa.’ Kadi ‘Yehowa wakasamisha mukalenge ne disama dia nsudi too ne ku dituku dia lufu luende.’ Bua tshinyi? Muyuki eu ki mmutokeshe bualu ebu to. Bualu ebu budiku mua kututonda anyi kutusaka bua kudiebeja bikala Yehowa uvua munyoke Uziya kakuyi bualu anyi? Tuetu bamanye bimpe mutu Yehowa wenza malu, katuakuela meji nanku to. Kumanya mudiye wenza malu kudi kukongoloja kabidi kumanya ne: Yehowa utu misangu yonso ubela ne “kulumbulula kuakane.” (Yel. 30:11) Dimanya dia nunku didi ditujadikila ne: nansha tuetu katuyi bamanye bua tshinyi Yehowa uvua muenzele Uziya malu mushindu au, tudi mua kuitaba ne: dilumbuluisha diende divua diakane.

9. Mmalu kayi adi atuambuluisha bua kumanya bua tshinyi Yehowa uvua muase Uziya nsudi?

9 Kudi malu makuabu a bungi atudi mua kupeta miaba mikuabu mu Bible bua muyuki eu. Mu muyuki wa muomumue udi mu 2 Kulondolola 26:3-5, 16-21, tudi tumvua ne: nansha muvua Uziya muenze malu mimpe bua tshikondo kampanda, panyima pa matuku ‘wakadisua mu mutshima wende, wakenza malu mabi.’ Wakateta ne dikamakama dionso bua kuenza midimu ya buakuidi ivuaye kayi ne bukenji bua kuenza. Bakuidi makumi muandamukulu ne umue bakamutandisha ne kudienzejabu bua kumubela. Ntshinyi tshiakenza Uziya? Wakaleja muvuaye mulue muena lutambishi. ‘Wakakuatshila bakuidi tshiji.’ Kabiena bitukemesha bua muvua Yehowa mumuase disama dia nsudi to.

10. Bua tshinyi katuena ne bua kuikala anu ne dijinga dia kukeba misangu yonso diumvuija dia malu adi Yehowa wenza? Mmunyi mutudi mua kukolesha dieyemena dietu bua njila ya buakane ya Yehowa?

10 Netuambe tshinyi bua miyuki mikuabu ya mu Bible idibu balonde malu ayi mu tshikoso kabayi baambe onso too ne mu katoba? Newele buakane bua Nzambi mpata anyi? Anyi newele meji ne: Bible udi ne malu a bungi adi atujadikila ne: Yehowa utu anu wenza malu ne buakane, ne yeye ke udi mumanye tshidi tshimpe ne tshibi? (Dut. 32:4) Patudi tumanya Yehowa bimpe bu Muntu mulelela, dinanga dietu ne dianyisha dietu bua mushindu udiye wenza malu nebikole, bituambuluisha bua kubenga kukeba diumvuija dia bualu buonso budiye wenza. Ikala mushindike ne: wewe udilongela ne welangana meji pa Bible udi ukuambuluisha bua kuyukila ne Nzambi, dianyisha diebe nedikole. (Mus. 77:12, 13) Kuenza nunku, nekokoleshe malanda ebe ne Yehowa, kuavuija malelela menemene.

 DISAMBILA DIDI DIKUAMBULUISHA BUA KUYUKILA NE YEHOWA

11-13. Mmunyi mutudi bamanye ne: Yehowa utu uteleja masambila? (Tangila tshimfuanyi tshia ntuadijilu.)

11 Tudi tusemena pabuipi ne Yehowa mu disambila. Tudi tumutumbisha, tumuela tuasakidila ne tukeba bulombodi buende. (Mus. 32:8) Kadi bua malanda ebe ne Yehowa kuikalawu malelela, udi ne bua kuikala mushindike ne: utu uteleja masambila.

12 Bamue bantu batu bamba ne: disambila ditu anu diambuluisha muntu mu lungenyi. Batu bamba ne: wewe wela meji ne: mbandamune disambila diebe, bidi anu nanku bualu udi mupatule mêyi avua mu lungenyi luebe, muleje bualu buebe ne mutume meji ebe bua kupeta tshiuvua ukeba. Pa kumbusha dikuambuluisha dia disambila mushindu eu, mmunyi muudi mumanye ne: Yehowa udi uteleja masambila audi wenza ne muoyo mujima?

13 Tukonkonone bualu ebu: pavua Yezu ne muoyo mu diulu, uvua mumone muvua Yehowa wandamuna masambila a batendeledi bende pa buloba. Pashishe, pavuaye wenza mudimu wende pa buloba, uvua wambila Tatuende wa mu diulu malu ende ku diambuluisha dia disambila. Bu yeye mumanye ne: Yehowa kavua bushuwa uteleja masambila, uvuaku mua kuikala musambile tshikondo kampanda butuku bujima anyi? (Luka 6:12; 22:40-46) Bu yeye mumanye ne: disambila didi diambuluisha mu lungenyi patupu, uvuaku mua kuikala mulongeshe bayidi bende bua kusambila anyi? Bidi bimueneka ne: Yezu uvua mumanye ne: disambila ndiyukidilangana dilelela ne Yehowa. Musangu mukuabu, Yezu wakambila ne: “Tatu wanyi, ndi nkuela tuasakidila bua muudi munteleje. Bulelela ndi mumanye ne: Utu anu unteleja.” Tudi petu mua kuikala bashindike ne: Yehowa utu ‘umvua milombu’ yetu.—Yone 11:41, 42; Mus. 65:2.

14, 15. a) Kulomba malu masunguluke mu masambila etu kudi kutuambuluisha mushindu kayi? b) Mmunyi muvua masambila a muanetu wa bakaji kampanda mamuambuluishe bua kukolesha malanda ende Yehowa?

14 Paudi ulomba malu masunguluke mu masambila ebe, udi ujingulula bimpe mandamuna a Yehowa nansha mudiwu mua kuikala makole bua kuajingulula. Padi Yehowa wandamuna masambila ebe, neumumone bu Muntu mulelela. Bualu bukuabu, wewe wambila Yehowa yebe yonso ya munda, neasemene pabuipi nebe menemene.

 15 Tuangate tshilejilu tshia Kathy. * Nansha muvuaye wenza mudimu wa buambi ngondo yonso, kavua anu muwunange to. Udi wamba ne: “Tshivua musue mudimu wa buambi to. Ndi nsua kuamba ne: tshivua muwunange menemene to. Pangakangata pansio ku mudimu, mukulu kampanda wakangambila ne: mvua mua kulua mpanda-njila wa pa tshibidilu; kumpeshaye ne formilere. Meme kuangata dipangadika dia kuenza mudimu wa bumpanda-njila, kadi mvua kabidi ndomba Yehowa dituku dionso mu disambila bua angambuluishe bua kunanga mudimu wa buambi.” Yehowa uvuaku muandamune masambila ende anyi? Udi wamba ne: “Ndi mpindieu mu tshidimu tshisatu tshia mudimu wanyi wa bumpanda-njila. Bu mundi mpitshisha mêba a bungi mu mudimu wa buambi ne mmanya malu a bungi kudi bana betu ba bakaji, ndi muakaje ku kakese ku kakese mushindu wanyi wa kuyisha. Lelu, tshiena musue patupu mudimu wa buambi to, kadi ndi muwunange be! Bualu bukuabu budi ne: malanda anyi ne Yehowa mmasheme bikole kupita muvuawu kumpala.” Bulelela, masambila a Kathy avua mamuambuluishe bua kuvuija malanda ende ne Yehowa malelela.

TUENZE TSHIETU TSHITUPA

16, 17. a) Tudi ne bua kuenza tshinyi bua kulama malanda etu ne Yehowa mimpe ne makole? b) Netukonkonone tshilumbu kayi mu tshiena-bualu tshidi tshilonda?

16 Kudia malanda makole ne Yehowa mbualu butudi ne bua kuipatshila matuku etu onso a muoyo. Tuetu basue bua Nzambi asemene pabuipi netu, tudi ne bua kuenza malu atuambuluisha bua kusemena pabuipi nende. Bua nanku, tuenzayi muetu muonso bua kuikala ne tshibidilu tshia kuyukila ne Nzambi ku diambuluisha dia dilonga dia Bible ne dia disambila. Nunku, malanda etu makole ne Yehowa neatuambuluishe bua kutantamena ntatu.

Kudia malanda makole ne Yehowa mbualu butudi ne bua kuipatshila matuku etu onso a muoyo (Tangila tshikoso tshia 16, 17)

17 Kadi lutatu lunene ludi mua kumueneka, lua ne: tudi mua kumona ntatu yetu itungunuka nansha mutudi tuenza masambila ne muoyo mujima. Mu bikondo bia nunku, dieyemena dietu kudi Yehowa didi mua kuteketa. Tudi mua kutuadija kudiebeja bua kumanya bikala Yehowa uteleja bushuwa masambila etu anyi bikalaye yeye muine netu mu malanda. Mmunyi mutudi mua kupita ne tshilumbu etshi batuishibue ne: malanda etu ne Nzambi mmalelela? Netukonkonone tshilumbu etshi mu tshiena-bualu tshidi tshilonda.

^ tshik. 2 Badi bumvuija muaku malanda bu mushindu udi bantu babidi benzelangana malu ne badiumvua bua umue ne mukuabu. Nunku bonso badi benza malu mu buobumue.

^ tshik. 15 Tudi bashintulule dîna.

Manya malu makuabu

BIBLE—NKUDIMUINU WA BULONGOLODI BUPIABUPIA

Udi mua kuenza tshinyi bua kusemena pabuipi ne Nzambi?

Udi bushuwa mua kudia bulunda busheme ne Nzambi.