Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 3 2015

‘Neushale mutabale’ anyi?

‘Neushale mutabale’ anyi?

“Nunku nushale batabale, bualu kanuena bamanye dituku ne dîba.”—MAT. 25:13.

1, 2. a) Ntshinyi tshivua Yezu muambe tshivua ne bua kuenzeka mu matuku a ku nshikidilu? b) Nnkonko kayi ituandamuna?

BIVUA ne bua kuikala bualu buimpe bua kusomba pa Mukuna wa Olive, mutangile ntempelo wa mu Yelushalema pavua Yezu wakula bua umue wa ku milayi yende ya buprofete ivua ikoka ntema. Petelo, Andele, Yakobo ne Yone bakateleja Yezu ne ntema ya bungi pavuaye wakula bua mulayi wa buprofete uvua ne bua kukumbana mu matuku atshivua alua. Wakabambila malu a bungi avua ne bua kuenzeka mu matuku a ku nshikidilu wa ndongoluelu mubi wa malu eu, mu tshikondo tshivuaye ne bua kuikala ukokesha mu Bukalenge bua Nzambi. Wakabambila ne: mu tshikondo tshikala malu aa enzeka, ‘mupika wende wa lulamatu udi mudimuke’ uvua ne bua kuikala muleji mpala wende pa buloba, upesha bena mudimu bende biakudia bia mu nyuma bidibu nabi dijinga mu tshikondo tshiakanyine.—Mat. 24:45-47.

2 Pashishe, Yezu wakabapesha tshilejilu tshia nsongakaji dikumi itshivua tumama mu mulayi wa buprofete umue umue eu. (Bala Matayi 25:1-13.) Tuandamunayi nkonko eyi: 1) Mbualu kayi bunene budi mu tshilejilu  etshi? 2) Mmunyi mudi bela manyi ba lulamatu batumikile mubelu udi mu tshilejilu etshi? Mbipeta kayi bidibu bapete? 3) Mmunyi mudi tshilejilu tshia Yezu etshi mua kuambuluisha yonso wa kutudi lelu?

MBUALU KAYI BUDI MU TSHILEJILU TSHIA YEZU?

3. Mmu mushindu kayi uvua mikanda yetu yumvuija tshilejilu tshia nsongakaji dikumi itshivua tumama? Ntshinyi tshivua tshilue kumueneka?

3 Tuvua bamone mu tshiena-bualu tshishale ne: mu bidimu bia bungi bishale ebi, mupika wa lulamatu mmufike ku diumvuija ku kakese ku kakese mvese kayi utamba kuimanyina pa ngumvuilu wa mu tshimfuanyi wa mêyi a buprofete, kadi utamba kuimanyina pa mushindu utudi mua kuyitumikila. Ku kale mikanda yetu ivua ifila diumvuija disunguluke dia mu tshimfuanyi too ne bua tumalu tukese tua mu tshilejilu tshia Yezu tshia nsongakaji dikumi itshivua tumama, bu mudi miendu, manyi, bintu bia kuelela manyi ne bikuabu. Kadi kabienaku bimueneka ne: tuvua tuenda tulekela bualu bupepele ne butuvua ne bua kuenza ne lukasa bua mu tshilejilu etshi anyi? Anu bu mutuabimona, diandamuna dia lukonko elu didi ne mushinga wa bungi.

4. Mu tshilejilu etshi, mmunyi mutudi mua kumanya: a) musedianganyi? b) nsongakaji itshivua tumama?

4 Tuanjayi kukonkonona bualu bunene budi Yezu muambe mu tshilejilu etshi. Tshia kumpala, tuakule bua bantu badibu bakuile mu tshilejilu etshi. Musedianganyi nnganyi? Bidi bimueneka patoke ne: Yezu uvua wakula buende yeye. Bidi nanku, bualu musangu mukuabu wakadiamba muvuaye musedianganyi. (Luka 5:34, 35) Kadi nsongakaji itshivua tumama mbanganyi? Yezu udi wamba mu tshilejilu etshi ne: nsongakaji itshivua tumama ivua ne bua kuikala midilongolole ne miendu yayi miteme pavua musedianganyi ufika. Tangila malu a muomumue avua Yezu mulombe “kasumbu kakese” ka bayidi bende bela manyi: “Nudisuike mikaba mu tshimonu, miendu yenu ikale miteme, nuenu bine nuikale bu bantu badi bindile mfumu wabu udi ufuma ku tshibilu tshia dibaka.” (Luka 12:32, 35, 36) Bualu bukuabu, nyuma muimpe uvua musake mupostolo Paulo ne mupostolo Yone bua kufuanyikija bayidi ba Kristo bela manyi ne bakaji batshidi tumama. (2 Kol. 11:2; Buak. 14:4) Bidi bimueneka patoke ne: Yezu uvua mufile tshilejilu tshidi mu Matayi 25:1-13 etshi bua kubela ne kudimuija bayidi bende bela manyi.

5. Mmunyi muvua Yezu muleje tshikondo tshivua tshilejilu tshiende etshi ne bua kukumbana?

5 Tuakulayi mpindieu bua tshikondo. Ntshikondo kayi tshivua mubelu wa Yezu ne bua kukumbana? Yezu udi utuleja patoke tshikondo etshi ku ndekelu kua tshilejilu etshi padiye wamba ne: “Musedianganyi wakafika.” (Mat. 25:10) Anu mutuvua balonge mu Tshibumba tshia Nsentedi tshia dia 15 ngondo wa 7 mu 2013, mulayi wa buprofete wa Yezu udi mu Matayi nshapita wa 24 ne wa 25 udi ne miaba muanda mukulu idi yakula bua “dilua” diende; mu mvese yonso eyi, mbenze mudimu ne muaku wa muomumue wa mu tshiena Greke. Mu mvese eyi, Yezu uvua wakula bua tshikondo tshia dikenga dinene paluaye bua kukumbaja mudimu wa dilumbuluisha ne kubutula ndongoluelu mubi wa malu eu. Bidi bimueneka mpindieu ne: tshilejilu etshi tshidi tshikumbana mu matuku a ku nshikidilu, kadi dikumbana diatshi dinene nedienzeke mu tshikondo tshia dikenga dinene.

6. Bilondeshile tshikavua Yezu muambe, mmubelu kayi munene udi mu tshilejilu tshiende?

6 Mmubelu kayi munene udi mu tshilejilu etshi? Tuvulukayi tshikavua Yezu muambe. Uvua ufuma ku diakula bua mupika wa lulamatu udi mudimuke. Mupika eu uvua ne bua kuikala kasumbu kakese ka bantu balume bela manyi bavua ne bua kulombola bayidi ba Kristo mu matuku a ku nshikidilu. Yezu wakadimuija bantu balume aba ne: bavua ne bua kushala ne lulamatu. Pashishe, wakafila tshilejilu etshi bua kudimuija bayidi bende bela manyi bonso ba mu matuku a ku nshikidilu bua ‘kushalabu batabale,’ tshianana bavua ne bua kujimija ditekemena diabu dilenga. (Mat. 25:13) Tukonkononayi mpindieu tshilejilu etshi ne tumone mudi bela manyi batumikile mubelu udimu.

 MMUNYI MUDI BELA MANYI BATUMIKILE MUBELU WA MU TSHILEJILU ETSHI?

7, 8. a) Nngikadilu kayi ibidi ivua miambuluishe nsongakaji midimuke itshivua tumama bua kuikalayi midiakaje? b) Mmunyi mudi bela manyi baleje ne: mbadilongolole?

7 Tshilejilu tshia Yezu tshidi tshileja ne: nsongakaji midimuke itshivua tumama ivua midilongolole bua dilua dia musedianganyi bishilangane ne nsongakaji mipote. Bua tshinyi? Bualu ivua ne ngikadilu ibidi eyi: didilongolola ne budimu. Nsongakaji itshivua tumama eyi ivua ne bua kushala mitabale butuku bua kuindila difika dia musedianganyi, ivua ne bua kulama miendu yayi miteme ne kushalayi midimuke munkatshi mua mêba a bungi too ne pavuaye ufika. Nsongakaji itanu itshivua tumama eyi ivua bushuwa midilongolole bishilangane ne mipote, bualu ivua miambule manyi makuabu mu bintu bikuabu ne miendu yayi. Bela manyi ba lulamatu mbalejaku pabu ne: mbadilongolole anyi?

8 Eyowa mbadilongolole. Mu matuku a ku nshikidilu aa bena Kristo bela manyi mbenze malu anu bu nsongakaji midimuke itshivua tumama padibu badilongolole bua kukumbaja mudimu wabu ne lulamatu too ne ku ndekelu. Badi bangata kuenzela Nzambi mudimu ne lulamatu ne mushinga wa bungi, badianjile kumanya ne: kuenza mudimu eu nekubalombe bua kudipangisha bintu bia ku mubidi bia bungi bia mu bulongolodi bua Satana. Mbadifile kudi Yehowa bua kumuenzela yeye nkayende mudimu ki mbualu mbamanye dituku dialua nshikidilu anyi bua tshikondo kampanda tshikosa to, kadi mbualu mbanange Yehowa ne Muanende ne badi ne lulamatu kudibu. Mbalame muoyo wabu mutoke, babenga kulonda lungenyi lua mu bulongolodi ebu bubi ne dinanga dia bintu bia ku mubidi, malu a bikadilu bibi ne lungenyi lua budinangi bidimu. Nunku mbadilongole, batungunuka ne kukenka bu miendu kabayi ne buôwa bua dilua dia Musedianganyi didi dimueneka bu didi dinenga.—Filip. 2:15.

9. a) Ntshinyi tshivua Yezu muambe bua dijinga dia bantu dia kubungila ne tulu? b) Ntshinyi tshivua bela manyi benze pavuabu bumvue lubila lua ne: ‘Ke mubakianganyi eu!’? (Tangila kabidi note.)

9 Ngikadilu muibidi udi muambuluishe nsongakaji itshivua tumama eyi bua kuikalayi midilongolole mbudimu. Bivuaku mua kuenzeka bua muena Kristo muela manyi pa nkayende kubungila mu tshikondo tshile tshia kushala mutabale butuku anyi? Eyowa. Tangila tshidi Yezu wamba bua nsongakaji dikumi itshivua tumama: “yonso yakabanga kubungila e kulala tulu” pavua musedianganyi umueneka bu uvua unenga. Yezu uvua mumanye bimpe ne: butekete bua mubidi budi mua kutekesha dijinga dia muntu dia kuenza mudimu ne muoyo mujima ku budisuile. Bela manyi ba lulamatu mbatumikile didimuija adi ne badi benza muabu muonso bua kushala badimuke ne batabale. Mu tshilejilu etshi, nsongakaji yonso ivua miumvue lubila lua butuku lua ne: ‘Ke mubakianganyi eu!’ (MML) Kadi anu nsongakaji ivua midimuke ke ivua minanukile too ne ku nshikidilu. (Mat. 25:5, 6; 26:41) Ntshinyi tshitudi mua kuamba bua bela manyi ba lulamatu lelu? Mu matuku a ku nshikidilu, mbumvue pabu lubila lukole elu lua ne: ‘Ke mubakianganyi eu!’ mbuena kuamba ne: ukadi pa kufika. Mbananukile pabu, badilongolole bimpe bua dilua dia Mubakianganyi. * Kadi tshitupa tshia ndekelu tshia tshilejilu etshi tshidi tshiakula bua tshikondo kampanda tshisunguluke. Mushindu kayi?

DIFUTU BUA NSONGAKAJI MIDIMUKE NE DINYOKA BUA NSONGAKAJI MIPOTE

10. Diyukidilangana didi pankatshi pa nsongakaji itshivua tumama midimuke ne mipote ndijule lukonko kayi?

10 Pamuapa tshitupa tshikole tshia tshilejilu etshi tshidi pabuipi ne ku ndekelu mu diyukidilangana  divua pankatshi pa nsongakaji itshivua tumama mipote ne midimuke. (Bala Matayi 25:8, 9.) Diyukidilangana diabu edi didi dijula lukonko elu: “Mu miyuki ya bantu ba Nzambi, ndîba kayi divua bena Kristo ba lulamatu mua kubenga kuambuluisha bamue bantu bavua balomba diambuluisha?” Tudi tupeta diandamuna dia lukonko elu patudi tukonkonona kabidi bualu bua tshikondo. Vuluka ngumvuilu mutokesha wa ne: Yezu, Musedianganyi udi ulua pabuipi ne ku ndekelu kua dikenga dinene bua kulumbuluisha bantu. Kabienaku mua kumueneka mpindieu ne: tshitupa tshia tshilejilu etshi tshidi tshimanyina pa tshikala mua kuenzeka kumpala kua dilumbuluisha edi kuenzekadi anyi? Bidi bimueneka nanku, bualu tshikondo atshi bela manyi nebikale bamane kupeta tshitampi tshiabu tshia ndekelu.

11. a) Ntshinyi tshienzeka kumpala kua dikenga dinene kutuadija? b) Pavua nsongakaji midimuke miambile mipote bua kuya kukeba bapanyishi ba manyi, ivua misue kuyambila tshinyi?

11 Nanku, kumpala kua dikenga dinene kutuadija, bela manyi bonso ba lulamatu badi pa buloba nebikale bamane kupeta tshitampi tshia ndekelu. (Buak. 7:1-4) Kutuadijila ku dîba adi, dibikidibua diabu ndijadikibue. Kadi, elabi meji bua bidimu bia bungi kumpala kua dikenga dinene kutuadija. Ntshinyi tshienzekela bela manyi bavua bapangile bua kushala batabale, bavua bajimije muoyo wabu mutoke? Nebajimije difutu diabu dia kuya mu diulu. Kakuyi mpata, kabakupeta tshitampi tshia ndekelu kumpala kua dikenga dinene kutuadija to. Tshikondo atshi, bantu bakuabu ba lulamatu nebikale mua kuedibua manyi bua kupingana pa muaba wabu. Padi dikenga dinene dituadija, nebitonde bela manyi badi bapote pamonabu dibutuka dia Babilona Munene. Misangu mikuabu, anu pa dîba adi ke pajingululabu ne: kabavua badilongolole bua difika dia Musedianganyi. Bu muikala dîba dimane kupita, ntshinyi tshikala mua kuenzeka bobu balombe diambuluisha? Tshilejilu tshia Yezu tshidi tshitupesha diandamuna didi dibungamija. Nsongakaji midimuke yakabenga kupesha eyi ivua mipote manyi ayi, kuyambilayi bua iye kukeba bapanyishi ba manyi. Kadi vuluka ne: bakavua “mundankulu.” Bavuaku mua kupeta bapanyishi ba manyi dîba adi anyi? Tòo. Dîba dikavua dipite.

12. a) Mu tshikondo tshia dikenga dinene, mbualu kayi bubi buafikila bela manyi bonso bavua bajimije muoyo wabu mutoke kumpala kua tshitampi tshia ndekelu? b) Ntshinyi tshiafikila bela manyi badi bu nsongakaji mipote itshivua tumama?

12 Bia muomumue, mu tshikondo tshia dikenga dinene, bela manyi ba lulamatu kabakuambuluisha muela manyi yonso uvua mupange lulamatu to. Kakuakuikala diambuluisha nansha dimue. Dîba nedikale dimane kupita. Kadi ntshinyi tshiabafikila ndekelu wa bionso? Yezu udi umvuija tshivua tshienzeke pavua nsongakaji mipote midiendeshe patupu bua kuya kukeba manyi ne: “Musedianganyi wakafika, nsongakaji itshivua tumama ivua midilongolole yakabuela nende mu tshibilu tshia dibaka, bakakanga tshiibi.” Padi Kristo ulua mu butumbi buende pabuipi ne ku ndekelu kua dikenga dinene, neasangishe bela manyi bende ba lulamatu bua kuya nabu mu diulu. (Mat. 24:31; 25:10; 1 Tes. 4:17) Bushuwa, nebakangile bela manyi bavua kabayi ne lulamatu tshiibi, bavua benze malu bu nsongakaji mipote itshivua tumama. Nebikale bu badi bela mbila bamba ne: “Mukalenge, mukalenge, tunzuluile koku!” Kadi nebapete diandamuna bu diapeta bantu ba bungi badi bu mbuji mu tshikondo tshia dilumbuluisha atshi dia ne: “Ndi nnuambila bulelela ne: tshiena munumanye to.” Bibi be!—Mat. 7:21-23; 25:11, 12.

13. a) Bua tshinyi katuena mua kuamba ne: bayidi ba Kristo ba bungi bela manyi nebapange lulamatu? b) Bua tshinyi tudi mua kumona didimuija didi mu mêyi a Yezu bu mushindu udiye uleja dieyemena didiye nadi? (Tangila tshimfuanyi tshia ntuadijilu.)

13 Bilondeshile malu atudi bamone aa, ntshinyi tshitudi mua kuamba? Yezu uvuaku usua kuamba ne: bela manyi ba bungi nebapange lulamatu ne kubapinganabu kudi bakuabu anyi? Tòo. Vuluka ne: uvua ufuma ku didimuija ‘mupika wende wa lulamatu udi mudimuke’ bua kubenga kulua mupika mubi. Kabiena bileja ne: ke tshivua dijinga  diende to. Bia muomumue, mu tshilejilu etshi mudi didimuija dinene. Anu bu muvua nsongakaji itanu mipote itshivua tumama ne mikuabu itanu midimuke, muela manyi yonso udi ne bukenji bua kusungula bua kuikala mudilongolole ne mudimuke anyi bua kuikala mupote ne mupange lulamatu. Nyuma muimpe wakasaka mupostolo Paulo bua kuamba bualu bua muomumue pakafundilaye bena Kristo nende bela manyi. (Bala Ebelu 6:4-9; fuanyikija ne Dutelonome 30:19.) Mona ne: didimuija divua Paulo mufile divua dikole, kadi wakasakidila mêyi mimpe avua aleja muvuaye ne dishindika dia ne: “malu mimpe menemene” mmindile bena Kristo nende balume ne bakaji. Bia muomumue, didimuija didi mu tshilejilu tshia Yezu didi ne mêyi mimpe adi aleja dieyemena didiye nadi. Kristo mmumanye ne: muela manyi wende yonso udi mua kushala ne lulamatu ne kupeta difutu dimpe.

MMUNYI MUDI TSHILEJILU ETSHI MUA KUAMBULUISHA “MIKOKO MIKUABU” YA KRISTO?

14. Ntshinyi tshidi tshituleja ne: tshilejilu tshia nsongakaji dikumi itshivua tumama tshidi kabidi tshiambuluisha “mikoko mikuabu”?

14 Bu muvua tshilejilu tshia Yezu tshia nsongakaji dikumi itshivua tumama tshitangila bayidi bende bela manyi, tudiku mua kuamba ne: katshiena tshiambuluisha “mikoko mikuabu” ya Kristo anyi? (Yone 10:16) Tòo, nansha kakese. Vuluka ne: mubelu udi mu tshilejilu etshi mmupepele, udi wamba ne: “Nushale batabale.” Bualu ebu budi butangila anu bela manyi anyi? Musangu mukuabu Yezu wakamba ne: “Tshindi nnuambila, ndi ntshiambila bantu bonso ne: Nushale batabale.” (Mâko 13:37) Yezu udi ulomba bayidi bende bonso bua kulongololabu mioyo yabu bua kuenza mudimu ne lulamatu ne kushala batabale. Nunku bena Kristo badi balonda tshilejilu tshia bela manyi mu bualu ebu, bidikija tshilejilu tshiabu tshimpe ne bateka mudimu wa Nzambi pa muaba wa kumpala mu nsombelu wabu. Yonso wa kutudi udi ne bua kumanya ne: nsongakaji mipote itshivua tumama ivua milombe ivua midimuke manyi ayi. Dilomba diayi divua kadiyi ne mushinga edi didi dituvuluija ne: muntu nansha umue kena mua kuikala ne lulamatu pa muaba wetu anyi kushala mu bulelela pa muaba wetu peshi kushala mutabale pa muaba wetu to. Tuetu bonso netubadile Mulumbuluishi muakane udi Yehowa muteke malu. Tudi ne bua kuikala badiakaje. Udi ulua mu katupa kîpi emu!

Dilomba ndambu wa manyi didi dituvuluija ne: kakuena muntu nansha umue udi mua kuikala ne lulamatu pa muaba wetu anyi udi mua kushala mutabale pa muaba wetu

15. Bua tshinyi bena Kristo balelela bonso mbindile ne muoyo kuulu kuulu dibaka dia Kristo ne mukajende?

15 Malu manene a mu tshilejilu tshia Yezu adi kabidi mua kuambuluisha bena Kristo bonso. Amba tumone, nnganyi wa kutudi udi kayi musanke bua dibaka dikala mua kuenzeka? Bela manyi nebikale mu diulu; panyima pa mvita ya Armagedone, nebalue mukaji wa Kristo. (Buak. 19:7-9) Muntu yonso wikala pa buloba neapete masanka adi afumina ku dibaka dienzeka mu diulu edi bualu didi tshijadiki tshia mbulamatadi mupuangane bua bantu bonso. Nansha tuetu ne ditekemena dia kuya mu diulu anyi dia kushala pa buloba, tuenzayi muetu muonso bua kumanya dilongesha dinene didi mu tshilejilu tshia nsongakaji dikumi itshivua tumama. Tulejayi mutudi badiakaje pa kulongolola mioyo yetu ne kushala ne lulamatu, badimuke misangu yonso bua tuetu kupeta malu mimpe adi Yehowa mutulongoluele mu matuku atshilualua.

^ tshik. 9 Mu tshilejilu etshi, kudi lupolo ludi lupita pankatshi pa lubila lua ne: ‘Ke mubakianganyi eu!’ (mvese 6) ne dilua anyi difika dia mubakianganyi (mvese wa 10). Mu matuku a ku nshikidilu, bela manyi badimuke mbajingulule tshimanyinu tshia dikalaku dia Yezu. Nunku mbamanye ne: udi ‘apa,’ mmumue ne: udi ukokesha bu Mukalenge wa bukole. Badi batuilangana ne ntatu padibu bananukila too ne ku dilua anyi difika diende.