Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2015

 MU BINTU BIETU BIA KALE

“Tshikondo tshia mushinga mukole”

“Tshikondo tshia mushinga mukole”

MU TSHIDIMU tshia 1870, mu Pittsburgh (Allegheny), mu tshimenga tshia Pennsylvanie mu États-Unis, kasumbu kakese ka bantu kakatuadija kukebulula malu a mu Bible. Muanetu Charles Taze Russell ke uvua ulombola kasumbu aka, bakonkonona tshiena-bualu tshia mulambu wa tshia bupikudi wa Yezu ne kujingululabu mushinga udi nawu mulambu eu mu malu avua Yehowa mulongolole. Bakasanka bikole pakamanyabu ne: mulambu eu udi unzuluila bantu njila wa lupandu, too ne bantu bavua kabayi banji kumvua bualu bua Yezu. Dianyisha divuabu nadi diakabasaka bua kuvuluka lufu lua Yezu tshidimu tshionso.—1 Kol. 11:23-26.

Muanetu Russell wakatuadija kupatula Tshibumba tshia Nsentedi tshia Siona tshivua tshitamba kuakula bua dilongesha dia mu Bible dia mulambu Yezu udi upikula bua kuleja mudi Nzambi munange bantu. Tshibumba tshia Nsentedi tshiakabikila tshikondo tshia Tshivulukilu tshia lufu lua Kristo ne: “Tshikondo tshia mushinga mukole,” ne tshiakakankamija babadi bua kuvuluka lufu lua Kristo mu Pittsburgh anyi miaba mikuabu. “Muaba uvua bantu babidi anyi basatu bavua ne ditabuja dia mushinga edi” anyi mene muntu umue, bonso buabu bavua “mu buobumue ne Mukalenge mu mioyo yabu.”

Ku tshidimu tshionso, bantu ba bungi bavua balua mu Pittsburgh mu Tshivulukilu. Bavua bafunda mu dibeji dia dibikila ne: “Netunuakidile ne disanka dionso.” Bushuwa, Balongi ba Bible ba mu Pittsburgh bavua ne disanka dia kuakidila bena Kristo nabu ku nzubu yabu ne kubadisha. Mu 1886, bakenza “Tshisangilu tshinene” munkatshi mua matuku ndambu mu tshikondo tshia Tshivulukilu. Tshibumba tshia Nsentedi tshiakamba ne: “Luayi ne mioyo yenu miule tente ne dinanga bua Mfumu ne bua bana babu ne bua bulelela buende.”

Tablo wa muvuabu bapitshisha bimanyishilu bia Tshivulukilu muaba wa kutendelela mu Londres

Munkatshi mua bidimu bia bungi, Balongi ba Bible ba mu Pittsburgh bavua balongolola mpungilu bua bantu bavua bitaba mulambu udi upikula bavua balua mu Tshivulukilu. Bu muvua bungi bua Balongi ba Bible buenda buvula, miaba ya didisangishila bua kuenza Tshivulukilu ivua payi ivula pa buloba bujima ne bungi bua bavua babuelamu. Muanetu Ray Bopp wa mu tshisumbu tshia Chicago wakavuluka ne: mu bidimu bia 1910, bivua bilomba mêba a bungi bua kupitshisha diampa ne mvinyo kudi bantu nkama ya bungi bualu bantu pa kuamba buonso bavua badia bimanyishilu.

Mbimanyishilu kayi bivuabu benza nabi mudimu? Nansha muvuabu bamanye ne: Yezu uvua muenze mudimu ne mvinyo mu tshikondo tshia Didia dia Mukalenge, munkatshi mua tshikondo kampanda, Tshibumba tshia Nsentedi tshivua tshilomba bantu bua kuenza mudimu ne mâyi a tumuma tua mvinyo tubishi anyi tutumpa bua kubenga kulenduisha bantu bavua “batekete mu mibidi yabu.” Kadi, bavua balongolola mvinyo bua bantu bavua bamona ne: “bivua bikengela kuenza mudimu ne mvinyo ukadi muenze matuku a bungi.” Panyima pa matuku, Balongi ba Bible bakajingulula ne: mvinyo mukunze uvua kayi musambakaja ne tshintu ke uvua mukumbane bua kuikala tshimfuanyi tshia mashi a Yezu.

Bavua bapitshisha dibeji edi ne kreyon mu buloko buonso bua kuangata bungi bua bena buloko bavua babuele mu Tshivulukilu mu Nicaragua

Kuvuluka lufu lua Yezu kuvua kupetesha bantu mpunga wa kuelangana meji bikole. Kadi mu bikuabu bisumbu, bana betu bavua ne dibungama pavuabu bajikija  kuenza Tshivulukilu, bavua bumbuka kakuyi muntu wakuisha mukuabu. Kadi mu 1934, mukanda wa Yehowa (Angl.) wakamba ne: katuena ne bua kuenza Tshivulukilu “mu dibungama” bua bisama bia lufu lua Yezu to, kadi tudi ne bua kutshienza “mu disanka” bualu udi ukokesha bu Mukalenge katshia mu 1914.

Bana betu badisangishe mu kamponya ka mudimu mu tshimenga tshia Mordovie, mu Russie, bua kuenza Tshivulukilu mu 1957

Bualu kampanda bunene buakenzeka mu 1935 buvua bushintulule mushindu wa kuenza Tshivulukilu mu bidimu bivua bilonda, bualu bavua bumvuije patoke tshivua “tshisumbu tshinene tshia bantu” (MNZ), anyi “musumba munene wa bantu” wa mu Buakabuluibua 7:9. Too ne tshikondo atshi, batendeledi ba Yehowa bavua bamba muvua tshisumbu etshi tshikale tshia bena Kristo bavua ne tshisumi tshikese. Lelu, bena mu musumba munene mbamanyike bu batendeledi ba lulamatu badi ne ditekemena dia kupeta muoyo mu mparadizu pa buloba. Pakumvua muanetu Russell Poggensee diumvuija edi, ne yeye mumane kudikonkonona, wakitaba ne: “Yehowa ki mmujule ditekemena dia kuya mu diulu munda muanyi ku diambuluisha dia nyuma wende muimpe to.” Muanetu Poggensee ne bana betu bakuabu ba lulamatu bakalekela kudia diampa ne mvinyo, kadi bakatungunuka ne kubuela mu Tshivulukilu.

Mu “tshikondo tshia mushinga mukole” etshi, bavua balongolola mudimu wa diyisha wa pa buawu bua bantu bonso baleje dianyisha bua mulambu udi upikula. Tshibejibeji tshia Bulletin tshia mu 1932 tshiakalomba bena Kristo bua kabikadi “bansantu ba Tshivulukilu,” mmumue ne: bantu badi badia diampa ne banua mvinyo kadi kabayi “benji ba mudimu balelela,” mbuena kuamba ne: kabayi bayisha mukenji wa bulelela. Mu 1934, tshibejibeji tshia Bulletin tshiakakeba bantu bakuabu bua kuikalabu “bambuluishi” pakebejatshi ne: “Kudiku mushindu wa kupeta bambuluishi 1000 badi mua kuditua mu mudimu eu tshikondo tshia Tshivulukilu anyi?” Tshibejibeji tshia Mumanyishi tshiakamba bua bela manyi ne: “Disanka diabu didi mua kukumbana anu padibu bamanyisha mukenji wa Bukalenge.” Mu kupita kua bidimu, bualu bua muomumue ebu buvua kabidi mua kukumbanyina aba bavua ne ditekemena dia kupeta muoyo pa buloba. *

Pavua Harold King nkayende mu buloko wakafunda tusala ne misambu bua Tshivulukilu

Bua bantu ba Yehowa bonso, Tshivulukilu mbutuku bua tshijila bua mu tshidimu. Batu batshienza nansha mu bikondo bikole. Mu 1930, muanetu wa bakaji Pearl English ne muanabu wa bakaji Ora bakenza luendu lua kilometre mitue ku 80 bua kubuela mu Tshivulukilu. Pavua misionere Harold King mu buloko bua nkayende mu Chine, wakenza tusala ne misambu bua Tshivulukilu ne kuenzaye kabidi diampa dienza ne bukula bua losa ne mvinyo wa tumuma tufike. Kumbukila ku Mputu wa ku Est too ne mu Amerike wa pankatshi ne mu Afrike, bena Kristo ba dikima bavua anu benza Tshivulukilu tshia lufu lua Yezu nansha pavuabu mu bikondo bia mvita anyi pavuabu bakandike midimu yabu. Nansha tuetu muaba kayi anyi mu nsombelu kayi, tutu tudisangisha bua kutumbisha Yehowa Nzambi ne Yezu Kristo mu tshikondo tshia mushinga mukole tshia Tshivulukilu.

^ tshik. 10 Tshibejibeji tshia Bulletin ke tshivuabu balue kubikila pashishe ne: Mumanyishi, lelu tudi tutshibikila ne: Mudimu wetu wa Bukalenge.