Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2015

Lama tshisumi tshiebe bua mudimu wa buambi

Lama tshisumi tshiebe bua mudimu wa buambi

KUYISHA lumu luimpe mmudimu mutambe bunene udi wenzeka pa buloba lelu. Bu muudi mutendeledi wa Yehowa, udi bushuwa umona kuenza mudimu wa kuvuija bantu bayidi bu diakalenga dinene. Kadi, udi mujadike ne: bampanda-njila ne bamanyishi ba lumu luimpe batu imue misangu bapeta ntatu bua kushala ne tshisumi mu mudimu wa buambi.

Ntshinyi tshidi mua kukuambuluisha bua kulama tshisumi tshiebe bua mudimu wa diyisha?

Imue misangu bitu bikolela bamue bamanyishi bua kupeta muntu wa kuyisha padibu bayisha ku nzubu ne ku nzubu. Pamuapa bualu bantu ba bungi ba muaba udibu kabatu basomba ku mabu to. Padibu bapeta bantu, badi mua kubenga mukenji wa Bukalenge anyi kubipata ne tshikisu. Bamue bamanyishi batu badiumvua kabayi bakumbane bualu badi ne muaba munene wa kuyisha kadi batshina ne: kabakukumbaja mudimu wabu. Bamue bana betu bakadi bayishe bidimu bia bungi kupita muvuabu batekemene ne mbatekete mu mikolo.

Bidiku mua kutukemesha bua mudi bantu ba Yehowa bonso bapeta ntatu idi mua kukepesha tshisumi tshiabu mu mudimu wa buambi anyi? Tòo. Nansha nanku tudiku ne bua kutekemena bua bikale bipepele bua kumanyisha mukenji wa Nzambi udi usungila bantu mu bulongolodi budi mu bianza bia “mubi” Satana Diabolo anyi?—1 Yone 5:19.

Nansha wewe mua kupeta ntatu ya mushindu kayi paudi uyisha lumu luimpe, ikala mushindike ne: Yehowa udi mua kukuambuluisha bua kuyitantamena. Kadi, ntshinyi tshiudi mua kuenza bua kuvudija tshisumi tshiebe bua mudimu wetu wa kuyisha? Tumonayi amue malu atudi mua kuenza.

AMBULUISHA BANTU BAPIABAPIA

Tshidimu tshionso bantu binunu bivule batu batambula ne balua Bantemu ba Yehowa. Biwikale mudilambule kudi Nzambi ne mutambule matuku mashale aa, kakuyi mpata neusanke bua malu mimpe akuambila aba bakadi bayishe matuku a bungi kukupita. Kadi, biwikala muambi wa lumu luimpe kukadi bidimu bia bungi, kuenaku umona ne: mbimpe bua wewe  kuambuluisha bantu bapiabapia pa kubalongesha anyi?

Yezu uvua mumanye ne: bayidi bende bavua dijinga ne buludiki bua kuluabu bamanyishi bimpe, wakabaleja mua kuenza mudimu eu. (Luka 8:1) Lelu eu bidi bikengela kabidi kulongesha bakuabu bua balue bamanyishi bimpe.

Katuena ne bua kuamba ne: mumanyishi mupiamupia neadipetele dimanya dia mua kuyisha padiye uya mu buambi to. Bidi bikengela bamulongeshe kudi mulongeshi muimpe udi ne bulenga. Bidi bikengela kulongesha mumanyishi mupiamupia 1) mua kulongolola ne kuamba mêyi a mbangilu, 2) mua kutuadija muyuki ne muntu ku nzubu peshi mu njila, 3) mua kufila mikanda, 4) mua kupinganyina bantu bavua banyishe ne 5) mua kutuadija dilonga dia Bible. Bipeta bimpe nebimueneke bikala muntu udibu balongeshe muteye ntema ne muidikije mushindu udi muntu udi umuambuluisha uyisha. (Luka 6:40) Kakuyi mpata, mumanyishi mupiamupia neanyishe bua kuikala ne muntu udi umuteleja ne umuambuluisha padiku dijinga. Kuela mumanyishi eu kalumbandi ne kumuleja malu mimpe a kuenza nekumuambuluishe kabidi.—Muam. 4:9, 10.

YUKILA NE UNUDI NUYISHA NENDE

Nansha wewe uditatshisha bua kupeta bantu ba kuyukila nabu mu buambi, amue matuku muntu unudi mua kuyukila nende bikole mu mudimu eu, ngewu unudi nuyisha nende. Vuluka ne: Yezu uvua mutume bayidi bende “ku babidi ku babidi” bua kuyisha. (Luka 10:1) Pavuabu benza mudimu eu babidi, bavua mua kukoleshangana ne kusakishangana. Nunku dîba dinudi nupitshisha mu buambi ne muntu unudi nuyisha nende didi dinupesha mpunga wa ‘kukankamijangana.’—Lomo 1:12.

Ngamue malu kayi anudi mua kuyukidilangana? Umue wa kunudi uvuaku mupete matuku mashale aa bualu kampanda budi bukolesha anyi? Udiku mupete bualu kampanda bua mushinga mu didilongela diebe peshi mu dilonga dienu dia mu dîku anyi? Uvuaku mumvue bualu kampanda mu bisangilu buvua bukukoleshe anyi? Imue misangu mumanyishi unudi nuyisha nende ki ngewu uwutu uyisha nende pa tshibidilu to. Udiku mumanye muvuaye mupete bulelela anyi? Ntshinyi tshivua tshimujadikile ne: etshi mbulongolodi bua Yehowa? Mmidimu kayi ikadiye muenze ne mmalu kayi mimpe akadiye mupete? Pamuapa udi mua kumuambila pebe malu mimpe aukadi mupete. Nansha bantu banudi nuyisha mua kuitaba anyi kubenga, kuyisha ne muntu mukuabu kudi kupetesha mpunga muimpe wa ‘kutungunuka ne kukoleshangana.’—1 Tes. 5:11.

KULEKEDI TSHIBIDILU TSHIEBE TSHIA KUDILONGELA

Tshidi mua kutuambuluisha bua kulama tshisumi bua mudimu wa buambi nkuikala ne tshibidilu tshia kudilongela. ‘Mupika wa lulamatu udi mudimuke’  udi utupatuila malu a bungi pa biena-bualu bishilashilangane. (Mat. 24:45) Nunku, biena-bualu biudi mua kulonga bua kudia biakudia bia mu nyuma bidi bia bungi. Tumone tshilejilu tshia tshiena-bualu kampanda tshimpe bua didilongela Bible: Bua tshinyi mudimu wa diyisha Bukalenge udi ne mushinga wa bungi? Kazubu kadi mu tshiena-bualu etshi kadi kaleja tumue tubingila.

Kukonkonona malu adibu baleje mu kazubu aka kudi mua kukusaka bua kutungunuka ne kuyisha ne tshisumi. Kuenaku mua kudifundila tshipatshila tshia kulonga mua kumanya tubingila tukuabu tuudi mua kukumbaja ku tudi mu kazubu aka anyi? Pashishe welangane meji pa tubingila etu ne pa mvese idi ikolesha tubingila etu.

IKALA WITABA NGENYI IDIBU BAFILA

Bulongolodi bua Yehowa budi butuleja pa tshibidilu amue malu a kuenza bua kutuambuluisha bua kulengeja nyishilu wetu. Tshilejilu, pa kumbusha kuyisha ku nzubu ne ku nzubu, tudi mua kufunda mikanda, kuyisha ku telefone, kuyisha mu njila peshi miaba idi bantu ba bungi, ne kuyisha lumu luimpe padi mpunga umueneka ne miaba idi bantu bendela mushinga. Tudi kabidi mua kudilongolola bua kuya kuyisha mu teritware mutubu kabayi batamba kuyisha.

Utuku witaba ngenyi eyi anyi? Ukadiku mutete bua kutumikila imue ya kudiyi anyi? Bantu ba bungi bavua benze nunku bavua bapete bipeta bimpe. Tukonkononayi bilejilu bisatu.

Tshilejilu tshia kumpala ntshia muvua bualu kampanda buvuabu baleje mu tshimue tshia ku biena-bualu bia mu Mudimu wetu wa Bukalenge bua mushindu wa kutuadija malonga a Bible bupatule bipeta bimpe. Tshiakasaka muanetu wa bakaji mukuabu diende April bua kutuadija kulonga ne bena mudimu babu basatu. Wakakema ne  kusanka pavua bonso basatu bitabe dilomba diende ne batuadije kubuela mu bisangilu.

Tshilejilu tshibidi ntshia diabanya bibejibeji bietu. Bavua batukankamije bua kukeba bantu badi biena-bualu kampanda bisunguluke bia mu bibejibeji bietu mua kukoka ntema yabu. Mutangidi wa tshijengu kampanda wa mu États-Unis wakamba ne: uvua mupeshe balombodi ba biapu bionso bia dienza nkata ya mashinyi bia muaba uvuaye Réveillez-vous ! uvua wakula bua dienza nkata. Yeye ne mukajende bavua bafile kabidi Réveillez-vous ! wa “ Mieux comprendre son médecin ” mu biro bipite pa 100 bia badoktere bia muaba uvuabu. Udi wamba ne: “Kuya miaba eyi kuvua ne mushinga wa bungi bua tuetu kudimanyisha ne kufila bibejibeji. Tuetu bamane kuibidilangana ne bantu ba muaba eu, biakatuambuluisha bua kuikala kupetangana nabu misangu ya bungi.”

Tshilejilu tshisatu ntshia kuyisha ku telefone. Muanetu wa bakaji mukuabu diende Judy wakafundila biro bietu bia mudimu wa pa buloba bujima bua kuleja dianyisha bua dikankamija dia kuyisha ku telefone. Wakaleja ne: mamuende uvua ne bidimu 86 ne tusamasama tua bungi uvua pa tshibidilu ulonga ne mamu kampanda wa bidimu 92 ku telefone ne uvua mupete disanka dia bungi.

Ngenyi ya mua kuyisha idibu batupeshe mu mikanda yetu itu bushuwa ipatula bipeta bimpe. Enza nayi mudimu. Idi mua kukuambuluisha bua kuikala ne disanka ne tshisumi bua mudimu wa diyisha.

DIFUNDILA BIPATSHILA BIUDI MUA KUKUMBAJA

Kuenza mudimu wetu wa buambi bimpe kakuena kumuenekela ku bungi bua mikanda itudi tuabanya, bungi bua malonga a Bible atudi tulombola peshi bungi bua bantu batudi bambuluishe bua kulua batendeledi ba Yehowa to. Amba tumone, mbantu bungi kayi bavua Noa muambuluishe bua kuluabu batendeledi ba Yehowa pa kumbusha bena mu dîku diende? Kadi, uvua mumanyishi muimpe. Tshidi ne mushinga ntshia ne: tuenzele Yehowa mudimu ne lulamatu.—1 Kol. 4:2.

Bamanyishi ba bungi mbamone ne: bua kuvudija tshisumi tshiabu bua mudimu wa buambi, badi ne bua kudifundila bipatshila bidibu mua kukumbaja. Mbimue bipatshila kayi bidibu mua kudifundila? Mbaleje bipatshila bikese mu kazubu kadi mu dibeji edi.

Keba diambuluisha dia Yehowa bua mudimu webe wikale wa disanka ne wupatule bipeta bimpe. Paudi ukumbaja bipatshila biebe, newikale ne disanka bua muudi mubikumbaje ne bua kumanya ne: udi muenze tshionso tshiuvua ne bua kuenza bua kuyisha lumu luimpe.

Bushuwa, kuyisha lumu luimpe kudi mua kuikala lutatu. Kadi, kudi malu audi mua kuenza bua kuikala mumanyishi wa Bukalenge wa tshisumi. Ikala uyukila ne muntu uudi uyisha nende, ikala ne tshibidilu tshimpe tshia kudilongela, londa ngenyi idi mupika wa lulamatu ufila ne difundila bipatshila biudi mua kukumbaja. Kupita bionso, vuluka ne: Nzambi mmukupeshe diakalenga ditambe bunene dia kumanyisha lumu luimpe bu Ntemu wende. (Yesh. 43:10) Ndisankapu kayi diwikala nadi bua kutungunuka ne kulama tshisumi tshiebe bua mudimu wa diyisha!