Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2015

Idikija dikima dia Yezu ne dijingulula diende dia malu

Idikija dikima dia Yezu ne dijingulula diende dia malu

“Nansha munudi kanuyi banji kumumona, nudi bamunange. Nansha munudi kanuyi numumona mpindieu, nudi nuleja ditabuja kudiye.”—1 PET. 1:8.

1, 2. a) Ntshinyi tshitudi mua kuenza bua kupeta lupandu? b) Ntshinyi tshidi mua kutuambuluisha bua kushala mu njila mu luendu luetu bua kupeta lupandu?

PATUDI tulua bayidi ba Kristo, tudi tutuadija luendu. Luendu elu ludi mua kutufikisha ku muoyo, pa buloba anyi mu diulu. Yezu wakamba ne: Muntu “udi unanukila too ne ku nshikidilu [nshikidilu wa muoyo udiye nawu mpindieu peshi wa ndongoluelu mubi wa malu eu] neasungidibue.” (Mat. 24:13) Eyowa, tuetu bashale ne lulamatu mu nsombelu wetu, netupete lupandu. Kadi tudi ne bua kuikala ne budimu patudi mu luendu elu bua kubenga kubuela mu ditanaji anyi kujimina. (1 Yone 2:15-17) Tudi mua kuenza tshinyi bua kushala mu njila mu luendu luetu?

2 Yezu udi Tshilejilu kutudi ke udi mutushile njila wa kulonda. Mbakule bua nsombelu wende mu Bible. Patudi tulonga malu aa, tudi tumanya bimpe tshidi Yezu. Tudi tumunanga ne tuleja ditabuja kudiye. (Bala 1 Petelo 1:8, 9.) Vuluka ne: mupostolo Petelo wakaleja ne: Yezu mmutushile tshilejilu bua tuetu kulonda mu makasa ende bimpe bimpe. (1 Pet. 2:21) Tuetu balonde mu makasa ende bimpe, netufike ku “tshipatshila” tshia ditabuja dietu, mmumue ne: netupete  lupandu. * Mu tshiena-bualu tshishale tuvua bamone mutudi mua kuidikija tshilejilu tshia Yezu pa kuikala ne budipuekeshi ne luse. Tumone mpindieu mutudi mua kulonda mu makasa ende pa kuikala ne dikima ne dijingulula dia malu.

YEZU UDI NE DIKIMA

3. Dikima ntshinyi? Mmunyi mutudi mua kudipeta?

3 Dikima mmushindu kampanda wa kuleja dieyemena udi mua kutukolesha ne kutukuatshisha. Batu bumvuija kuikala ne dikima bu “kutantamena buluishi,” “kuimanyina buakane,” ne “kutuilangana ne dikengeshibua muikale ne bunême peshi ne ditabuja.” Dikima ditu dienda pamue ne ditshina, ditekemena ne dinanga. Mushindu kayi? Ditshina dia Nzambi didi ditupesha dikima bua kubenga kutshina bantu. (1 Sam. 11:7; Nsu. 29:25) Ditekemena dilelela didi dituambuluisha bua kubenga kuimanyina pa ntatu itudi nayi ne bua kuindila malu atshilualua ne dieyemena. (Mus. 27:14) Dinanga didi didifila bua bakuabu didi ditusaka bua kuleja dikima nansha padidi ditukebela ntatu. (Yone 15:13) Tudi tupeta dikima patudi tueyemena Nzambi ne tulonda mu makasa a Muanende.—Mus. 28:7.

4. Mmunyi muvua Yezu muleje dikima pavuaye mu ntempelo “munkatshi mua balongeshi”? (Tangila tshimfuanyi tshia ntuadijilu.)

4 Nansha patshivua Yezu ne bidimu 12, wakimanyina buakane ne dikima dionso. Mona tshivua tshienzeke pavua Yezu ‘mu ntempelo musombe munkatshi mua balongeshi.’ (Bala Luka 2:41-47.) Balongeshi abu bavua bamanye bimpe Mikenji ya Mose ne bilele bia bantu bivua biyinyange. Kadi Yezu kakabatshina ne kushala mupuwe to; uvua “ubela nkonko.” Bushuwa kavua ubela nkonko ya buana to. Tudi mua kudifuanyikijila Yezu wela nkonko ivua yelesha balongeshi banene abu meji ne ibakemesha, bapanga tshia kuamba, batuadija kumuteleja. Bu balongeshi abu batete kuela Yezu nkonko bua kumuteya bavua bapangila. Bantu bonso bavua bateleja mandamuna avua ashindika bulelela bua mu Dîyi dia Nzambi, kusangisha ne balongeshi, bavua “bakema bikole bua lungenyi luende ne mandamuna avuaye ufila.”

5. Mmu mishindu kayi muvua Yezu muleje dikima mu mudimu wende wa buambi?

5 Yezu wakaleja dikima mu mishindu mishilashilangane mu mudimu wende wa buambi. Wakela bamfumu ba bitendelelu patoke bua muvuabu bapambuisha bantu ne malongesha a dishima. (Mat. 23:13-36) Wakakandamena lungenyi lubi lua panu. (Yone 16:33) Wakatungunuka ne kuyisha nansha muvuabu bamukengesha kudi baluishi bende. (Yone 5:15-18; 7:14) Wakakezula ntempelo misangu ibidi kayi ne buôwa, kuipataye bantu bavuamu bavua banyanga ntendelelu mukezuke.—Mat. 21:12, 13; Yone 2:14-17.

6. Mmunyi muvua Yezu muleje dikima dituku dia ndekelu divuaye ne muoyo pa buloba?

6 Kuidikija dikima divua nadi Yezu kumpala kua makenga kudi kukolesha ditabuja dietu. Tumone muvuaye muleje dikima dituku dia ndekelu divuaye ne muoyo pa buloba. Uvua mumanye mulongolongo wa malu avuabu ne bua kuenza kudi muntu uvua umutungila. Kadi pavuabu benza Pasaka, Yezu wakambila Yudasa ne: “Enza tshiudi usua kuenza lukasa.” (Yone 13:21-27) Pavuabu mu budimi bua Getesemane, Yezu wakadimanyisha kudi basalayi bavua balue bua kumukuata kayi ne buôwa. Nansha muvua muoyo wende mu njiwu, wakakuila bayidi bende bua kubakuba. (Yone 18:1-8) Pavuabu bamuela nkonko ku Tshilumbuluidi tshinene, wakaleja ne dikima muvuaye Kristo ne Muana wa Nzambi nansha muvuaye mumanye ne: muakuidi munene uvua ukeba bualu bua kumushipelabu. (Mâko 14:60-65)  Yezu wakashala anu ne lulamatu lukole too ne ku lufu pa mutshi wa makenga. Kumpala kua kukulaye muoyo, wakela lubila lua ditshimuna wamba ne: “Bualu buakumbanyi.”—Yone 19:28-30.

IDIKIJA DIKIMA DIA YEZU

7. Nuenu bansonga, nutu numvua bishi bua munudi ne dîna dia Yehowa? Bua kuleja ne: nudi ne dikima, nudi mua kuenza tshinyi?

7 Mmunyi mutudi mua kuidikija dikima dia Yezu? Mu kalasa. Bansonga wetu, nudi nuleja munudi ne dikima panudi nudimanyisha munudi Bantemu ba Yehowa nansha bikala kuenza nanku kusaka balongi benu anyi bantu bakuabu bua kunutondesha nsombelu. Nunku nudi nuleja ne: nudi nusanka bua kuikala ne dîna dia Yehowa. (Bala Musambu wa 86:12.) Badi mua kunusaka bua kuitaba ne: dilongesha dia ne: bintu mbidienzekele ndilelela. Kadi nudi ne bijadiki bilelela bidi binufikisha ku dieyemena tshidi Bible wamba bua bufuki. Nudi mua kuenza mudimu ne broshire wa Cinq questions à se poser sur l’origine de la vie bua kufila diandamuna didi dituisha bantu badi basue kumanya “bualu bua ditekemena didi munda muenu.” (1 Pet. 3:15) Pashishe, nenuikale ne disanka panudi numanya ne: nudi babingishe bulelela bua mu Dîyi dia Nzambi.

8. Mmalu kayi adi atusaka bua kuyisha ne dikima?

8 Mu buambi. Bu mutudi bena Kristo balelela, tudi ne bua kutungunuka ne ‘kuakula ne dikima ku bukokeshi bua Yehowa.’ (Bien. 14:3) Mmalu kayi adi atusaka bua kuyisha ne dikima? Tudi bamanye ne: malu atudi tuyisha mmalelela bualu mmimanyine mu Bible. (Yone 17:17) Tudi tuitaba ne: “tudi benzejanganyi ba mudimu ne Nzambi” ne nyuma muimpe udi utuambuluisha. (1 Kol. 3:9; Bien. 4:31) Tudi bamanye ne: patudi tuyisha ne tshisumi, tudi tuleja mutudi balamate Yehowa ne banange bantu netu. (Mat. 22:37-39) Tuetu ne dikima, kabakutupuwisha to. Ku lukuabu luseke, tudi badisuike bua kuela patoke malongesha a dishima a bitendelelu adi apangisha bantu bua kumona bulelela. (2 Kol. 4:4) Netutungunuke ne kuyisha lumu luimpe nansha bantu babenga, batuseka anyi batuluisha.—1 Tes. 2:1, 2.

9. Mmunyi mutudi mua kuleja dikima patudi tutuilangana ne ntatu?

9 Patudi tutuilangana ne ntatu. Kueyemena Nzambi kudi kutupetesha ditabuja ne dikima bua kutantamena ntatu. Padi muntu utudi banange ufua, tudi tubungama kadi katuena tujimija ditekemena to. Tudi tutekemena bua “Nzambi wa busambi buonso” atukoleshe. (2 Kol. 1:3, 4; 1 Tes. 4:13) Tuetu bapete disama dikole anyi batapike bibi, bidi mua kutusama kadi katuena mua kuenza malu adi afikisha ku dinyanga ditabuja to. Tudi tubenga luondapu luonso ludi lubengangana ne mêyi manene a mu Bible. (Bien. 15:28, 29) Tuetu ne kanyinganyinga, ‘mioyo yetu idi mua kutupisha,’ kadi bu mutudi tueyemena Nzambi udi ‘pabuipi ne bantu badi ne mitshima itamba kunyingalala,’ katuena tulekela ditabuja to. *1 Yone 3:19, 20; Mus. 34:18.

YEZU UDI NE DIJINGULULA DIA MALU

10. Dijingulula dia malu ntshinyi? Mmunyi mudi mutendeledi wa Yehowa udi ne dijingulula dia malu wakula ne wenza malu?

10 Dijingulula dia malu mbukokeshi bua kutapulula tshidi tshimpe ne tshidi tshibi ne pashishe kusungula njila muimpe wa kulonda. (Eb. 5:14) Batu bumvuija dijingulula dia malu ne: “mbukokeshi bua kuangata mapangadika mimpe mu malu a mu nyuma.” Mutendeledi wa Nzambi udi ne dijingulula dia malu utu wakula ne wenza malu mu mushindu udi usankisha Nzambi. Muntu wa nunku udi usungula mêyi adi akolesha bakuabu pamutu pa adi abatapa ku muoyo. (Nsu. 11:12, 13) Kena “ukuata tshiji lubilu”  nansha. (Nsu. 14:29) ‘Udi utangija mpala wende mu njila mululame,’ mulamate tshidi tshimpe mu luendu luende bua kupeta muoyo. (Nsu. 15:21) Ntshinyi tshitudi mua kuenza bua kupeta dijingulula dia malu? Tudi ne bua kulonga Dîyi dia Nzambi ne kutumikila malu atudi tulonga. (Nsu. 2:1-5, 10, 11) Mbimpe nangananga kukonkonona tshilejilu tshia Yezu, muntu uvua ne dijingulula dia malu kupita bantu bonso.

11. Mmunyi muvua Yezu muleje mu mêyi ende muvuaye ne dijingulula dia malu?

11 Yezu wakaleja muvuaye ne dijingulula dia malu mu malu onso avuaye muambe ne avuaye muenze. Mu mêyi ende. Uvua ne busunguluji pavuaye uyisha lumu luimpe, uvua usungula “mêyi malenga” avua akemesha bantu bavua bamuteleja. (Luka 4:22; Mat. 7:28) Misangu ya bungi uvua ulekela Dîyi dia Nzambi diakula pa muaba wende, uvua ubala, utela peshi uleyidila mvese ivua mikumbane bua kushindika lungenyi luende. (Mat. 4:4, 7, 10; 12:1-5; Luka 4:16-21) Yezu uvua kabidi umvuija Mifundu minsantu mu mushindu uvua ulenga mioyo ya bantu bavua bamuteleja. Pavuaye uyukila ne bayidi bende babidi mu njila batangile ku Emause panyima pa dibishibua diende, “wakabumvuija malu avua amutangila a mu Mifundu minsantu.” Bayidi bakalua kuamba pashishe ne: “Mioyo yetu kayivua itema pavuaye wakula netu mu njila utujinguluila bimpe Mifundu minsantu anyi?”—Luka 24:27, 32.

12, 13. Mbilejilu kayi bidi bileja ne: Yezu kavua ukuata tshiji lukasa ne uvua ne meji mimpe?

12 Mu lungenyi luende ne mu meji ende. Dijingulula dia malu diakambuluisha Yezu bua kukanda lungenyi luende, dimuvuija “kayi ukuata tshiji lubilu.” (Nsu. 16:32) Uvua “mupuekele mu mutshima.” (Mat. 11:29) Uvua misangu yonso uleja bayidi bende lutulu nansha pavuabu benza bilema. (Mâko 14:34-38; Luka 22:24-27) Uvua mushale mupuwe nansha pavuabu bamuenzela malu mabi.—1 Pet. 2:23.

13 Dijingulula dia malu divua diambuluishe kabidi Yezu bua kuikala ne meji mimpe. Kavua wimanyina anu pa malu avua mafunda mu Mikenji ya Mose to; kadi uvua umona lungenyi luvua mu Mikenji ayi ne wenza malu mu diumvuangana ne lungenyi alu. Tuangate tshilejilu tshia muyuki udi mu Mâko 5:25-34. (Bala.) Mukaji kampanda uvua ne disama dia mashi apueka wakadifinya munkatshi mua bantu, kulengaye tshilamba tshia Yezu ne kumvuaye bimpe. Bilondeshile Mikenji ya Mose, uvua ne bukoya, nunku kavua ne bua kulenga muntu nansha umue to. (Lew. 15:25-27) Kadi bu muvua Yezu mujingulule ne: mu “malu a mushinga mukole a mu Mikenji” muvua “luse ne ditabuja,” kavua mukanyine mukaji eu bua muvuaye mulenge tshilamba tshiende to. (Mat. 23:23) Kadi wakamuambila ne bulenga ne: “Muananyi wa bakaji, ditabuja diebe ndikuondope. Ndaku mu ditalala, umvue bimpe ku disama diebe dibi.” Bidi bienza disanka bua muvua dijingulula dia malu disake Yezu bua kumuleja bulenga bua nunku.

14. Yezu wakasungula bua kuenza tshinyi? Ntshinyi tshivuaye muenze bua kushala mu njila eu?

14 Mu nsombelu wende. Yezu wakaleja muvuaye ne dijingulula dia malu pavuaye musungule nsombelu muimpe ne mushale mumulamate. Wakadifila mu diyisha dia lumu luimpe, kuvuijaye mudimu eu mudimu munene mu nsombelu wende. (Luka 4:43) Yezu wakashala kabidi mu njila eu pavuaye muangate mapangadika avua mamuambuluishe bua kutuishila mêsu pa mudimu wende ne kuwukumbaja bimpe. Wakasungula ne meji bua kuikala ne nsombelu mupepele bua kufilaye dîba diende ne makanda ende mu mudimu wa diyisha. (Luka 9:58) Wakajingulula muvuabi ne mushinga bua kulongesha bantu bakuabu bua kutungunuka ne mudimu eu panyima pa lufu luende. (Luka 10:1-12; Yone 14:12) Wakalaya bayidi bende ne: uvua ne bua kubambuluisha mu mudimu eu “too ne ku  nshikidilu kua ndongoluelu wa malu eu.”—Mat. 28:19, 20.

IDIKIJA DIJINGULULA DIA MALU DIA YEZU

Ujingulule malu adi asankisha bantu ne usungule mêyi bilondeshile majinga abu (Tangila tshikoso tshia 15)

15. Mmunyi mutudi mua kuleja dijingulula dia malu mu mêyi etu?

15 Tumone mushindu mukuabu utudi mua kuidikija Yezu. Mu mêyi etu. Patudi tuyukila ne bena Kristo netu, tudi tuamba mêyi adi abakolesha pamutu pa adi abatekesha. (Ef. 4:29) Patudi tuakula ne bantu bakuabu bua Bukalenge bua Nzambi, tudi tutuisha mêyi etu ne “mukele.” (Kolos. 4:6) Tudi tudienzeja bua kujingulula majinga adi nawu bantu batudi tuyukila nabu ne malu adi abasankisha, pashishe tudi tusungula mêyi adi mua kubambuluisha. Tudi tuvuluka ne: mêyi malenga adi mua kukangula biibi ne mioyo ya bantu. Kabidi, patudi tumvuija bantu malu atudi tuitabuja, tudi tulekela Bible wakula pa muaba wetu. Nunku tudi tumutela bu nshindamenu wa malu atudi tuamba ne tumubala dîba dionso didibi bikengela. Tudi tuitaba ne: mukenji wa mu Bible udi ne bukole kupita tshionso tshitudi mua kuamba tshidi tshifumina kutudi.—Eb. 4:12.

16, 17. a) Mmunyi mutudi mua kuleja ne: katuena tukuata tshiji lubilu ne tudi ne nkatshinkatshi? b) Ntshinyi tshitudi mua kuenza bua kutuishila mêsu pa mudimu wetu wa buambi?

16 Mu lungenyi luetu ne meji etu. Dijingulula dia malu didi dituambuluisha bua kukanda lungenyi luetu, dituvuija ‘katuyi tukuata tshiji lubilu.’ (Yak. 1:19) Padi bantu bakuabu batunyingalaja, tudi tudienzeja bua kujingulula tshidibu basue kuamba mu mêyi abu ne bienzedi biabu. Dimanya dia nunku didi mua kutuyisha tshiji ne kutuambuluisha bua ‘kulekeleela muntu bubi.’ (Nsu. 19:11) Dijingulula dia malu didi dituambuluisha kabidi bua kuikala ne nkatshinkatshi. Nunku tudi tudienzeja bua kuikala ne nkatshinkatshi mu malu atudi tutekemena bua bena Kristo netu batuenzele, tuvuluka ne: badi mua kuikala mu ntatu itudi katuyi bamanye bimpe. Tudi tuitaba bua kubateleja ne tuitaba mmuenenu wabu padibi bikumbana.—Filip. 4:5.

17 Mu nsombelu wetu. Bu mutudi bayidi ba Yezu, tudi tumona ne: katuena mua kupeta diakalenga dikuabu dipite edi ditudi nadi dia kuyisha lumu luimpe to. Tudi tutungunuka mu njila wetu patudi tuangata mapangadika adi atuambuluisha bua kushala batuishile mêsu pa mudimu utudi nawu. Tudi tuteka malu a mu nyuma pa muaba wa kumpala bikale ne nsombelu mupepele bua kudifila bikole mu mudimu wa diyisha udi ne mushinga kumpala kua nshikidilu kulua.—Mat. 6:33; 24:14.

18. Ntshinyi tshitudi mua kuenza bua kushala mu njila mu luendu lutudi tuenza bua kupeta lupandu? Udi mudisuike bua kuenza tshinyi?

18 Kabienaku bitusankisha bua kukonkonona imue ngikadilu ya Yezu mimpe anyi? Ela meji masanka atuapeta patudi tulonga ngikadilu yende mikuabu ne tumanya tshitudi mua kuenza bua kumuidikija. Nunku, tuikale badisuike bua kulonda mu makasa ende bimpe bimpe. Tuetu benze nunku, netushale mu njila mu luendu lutudi tuenza bua kupeta lupandu ne netusemene pabuipi ne Yehowa, Muntu udi Yezu muidikije bimpe menemene.

^ tshik. 2 Bena Kristo bavua ne ditekemena dia kuya mu diulu ke bavuabu bafundile mêyi adi mu 1 Petelo 1:8, 9. Kadi mêyi aa adi atangila kabidi aba badi ne ditekemena dia kupeta muoyo pa buloba.

^ tshik. 9 Bua kumanya bilejilu bia mua kuleja dikima mu ntatu, bala Tshibumba tshia Nsentedi tshia dia 1/12/2000 dibeji dia 24-28; Réveillez-vous ! wa dia 22/4/2003 dibeji dia 18-21; ne wa dia 22/1/1995 dibeji dia 11-15.