Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo 2 2015

Dipa divua bena Japon kabayi belele meji

Dipa divua bena Japon kabayi belele meji

MU TSHISANGILU tshia pa buatshi tshivuabu benze mu tshimenga tshia Nagona mu Japon mu dia 28/4/2013, muanetu Anthony Morris wa mu Kasumbu Kaludiki wakenza dimanyisha divua dikemeshe bateleji bua dipatuka dia mukanda mupiamupia wa mu tshiena Japon uvua ne tshiena-bualu tshia ne: Bible—Evanjeliyo wa Matayi. Bantu bapite pa 210000 bavua mu tshisangilu atshi anyi bavua balonda programe au ku Enternete bakatuta bikashi mutantshi mule.

Mukanda wa Evanjeliyo wa Matayi eu udi ne mabeji 128, mbawangatshile mu Bible wa Nkudimuinu wa bulongolodi bupiabupia wa mu tshiena Japon ne udi wa pa buende. Muanetu Morris wakaleja ne: bavua bawenze “bua kukumbaja dijinga divuaku mu mudimu wa buambi mu Japon.” Mmalu kayi adimu? Mbawenze bua tshinyi? Ntshinyi tshivua bantu benze pavuabu bawupete?

MMALU KAYI ADI MU MUKANDA EU?

Bavua benze mukanda wa Matayi eu mu mushindu uvua bateleji kabayi belele meji. Bena Japon batu bafunda mikanda yabu mu bule anyi mu butshiama; ndambu wa mikanda yabu ne yetu idibu bapatule matuku mashale aa mmifunde mu butshiama. Kadi mifundu ya mu mukanda mupiamupia eu idi mu bule, mmufunda mu mushindu utu bena Japon batamba kufunda mu mikanda yabu. Babadi ba bungi bena Japon badi bamona mfundilu eu bu mupepele bua kubala. Kabidi mêyi a ku mutu kua mabeji mbaabueje munda mua bidibu bafunde menze bu tumitu tua bualu bua babadi bamone bipepele malu manene.

Bana betu ba balume ne ba bakaji ba mu Japon bakabala diakamue malu a mu mukanda eu wa Matayi. Muanetu wa bakaji mukuabu udi ne bidimu 80 ne bia mu njila wakamba ne: “Nkadi mubale mukanda wa Matayi misangu ya bungi, kadi mfundilu wa mu bule ne mitu ya bualu mbingambuluishe bua kumvua Muyuki wa Yezu wa pa Mukuna bimpe menemene.” Muanetu wa bakaji mukuabu utshidi nsonga wakafunda ne: “Ndi mubale mukanda wa Matayi eu wonso mujima. Ntu muibidilangane ne mfundilu wa mu butshiama, kadi bena Japon ba bungi batu basue mfundilu wa mu bule.”

MBAWENZE BUA KUYISHA BENA MU JAPON

Bua tshinyi mukanda umue wa mu Bible eu mmukumbaje dijinga divuaku bua mudimu wa buambi mu Japon? Nansha mudi bena mu Japon ba bungi kabayi bibidilangane ne Bible, mbasue kuwubala. Evanjeliyo wa Matayi eu neapeteshe bantu batu kabayi banji kumona Bible mushindu wa kupetabu tshitupa tshia mêyi a Nzambi etshi ne kutshibala.

Bua tshinyi tuvua basungule mukanda wa Matayi? Bua bena Japon ba bungi, padibu bakula bua “Bible” badi bavuluka Yezu Kristo. Nunku tuvua basungule mukanda wa Matayi bualu udi uleja mulongolongo wa bankambua ba Yezu ne wakula bua diledibua diende, muyuki wende wa pa Mukuna muende lumu ne milayi yende idi yakula bua matuku a ku nshikidilu: biena-bualu bikala mua kusankisha bena Japon ba bungi.

Bamanyishi ba Bukalenge ba mu Japon bakatuadija kuabanya mukanda mupiamupia eu ne tshisumi tshionso ku nzubu ne ku nzubu ne pavuabu bapinganyina bantu. Muanetu wa bakaji mukuabu wakafunda ne:  “Mpindieu ndi mupete mishindu mikuabu ya kupesha bantu ba mu teritware wetu Dîyi dia Nzambi. Mvua mupeshe muntu mukanda wa Matayi eu dilolo dia dituku dituvua benze tshisangilu tshia pa buatshi atshi.”

NTSHINYI TSHIVUA BANTU BENZE PAVUABU BAWUPETE?

Mmunyi mutu bamanyishi bapesha bantu mukanda wa Matayi? Bena Japon ba bungi batu bibidilangane ne biambilu bu mudi: “tshiibi tshikese,” kukupila ‘ngulube mabue a busanga’ ne “kanuditatshishi bua dituku didi dilonda.” (Mat. 6:34; 7:6, 13) Badi bakema padibu bamanya ne: Yezu Kristo ke uvua muambe mêyi aa. Padi bantu ba bungi bamona mêyi aa mu Evanjeliyo wa Matayi, batu bamba ne: “Ntu musue kubala Bible musangu nansha umue.”

Pavua bamanyishi bapinganyina bantu bavuabu bapeshe mukanda wa Matayi, misangu ya bungi bantu aba bavua bamba ne: bakavua bawubale tshitupa anyi wonso mujima. Tatu mukuabu wa bidimu 60 ne bia mu njila wakambila mumanyishi kampanda ne: “Ndi muwubale wonso mujima misangu ya bungi ne uvua munkoleshe. Wewe mua kusua, ndongeshe malu makuabu a mu Bible.”

Mukanda wa Matayi mmuenza bua kuyisha muaba udi bantu ba bungi. Pavua Ntemu kampanda uyisha muaba uvua bantu ba bungi, wakapesha nsongakaji mukuabu uvua muangate mukanda wa Matayi adrese wende wa ku Enternete. Dîba dimue pashishe, nsongakaji eu wakamutumina mesaje umuambila ne: ukavua mubale tshitupa tshia mukanda wa mu Bible au ne uvua musue kumanya malu a bungi. Lumingu lumue pashishe, wakatuadija kulonga Bible ne matuku makese kutuadijaye kubuela mu bisangilu.

Bakatumina bisumbu bia mu Japon mukanda wa Bible—Evanjeliyo wa Matayi 1600000, ne ngondo yonso Bantemu batu babanya mikanda eyi binunu bia bungi mu buambi. Mêyi a mbangilu a mu mukanda eu adi aleja dijinga didi nadi badi bawupatule padibu bamba ne: “Tudi batekemene ne muoyo mujima ne: kubala mukanda eu nekunusake bua kunanga Bible bikole.”