Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2015

Bua tshinyi tutu tuenza didia dia dilolo dia Mukalenge?

Bua tshinyi tutu tuenza didia dia dilolo dia Mukalenge?

“Tungunukayi ne kuenza nunku bua kumvuluka.”—1 KOL. 11:24.

1, 2. Ntshinyi tshivua Yezu muenze mu butuku bua mu dia 14 ngondo wa Nisana mu 33? (Tangila tshimfuanyi.)

BUTUKU bukadi buile, kadi ngondo udi ukenkesha mu Yelushalema. Tudi mu butuku bua mu dia 14 ngondo wa Nisana mu 33. Yezu ne bapostolo bende bakadi basekelele Pasaka bua kuvuluka muvuabu bapatule bena Isalele mu bupika mu Ejipitu kukavua bidimu 1 500. Yezu udi mpindieu ujadika didia dia pa buadi ne bapostolo bende ba lulamatu 11, dikala mua kubavuluija lufu luikalaye mua kufua kumpala kua dituku adi kujika. *Mat. 26:1, 2.

2 Yezu udi wenza disambila ne upitshisha diampa kadiyi diela luevele kudi bapostolo bende wamba ne: “Angatayi nudie.” Udi wangata dikopo dia mvinyo usakidila kabidi Nzambi ne wamba ne: “Nuayi bonso buenu.” (Mat. 26:26, 27) Yezu kakupitshisha biakudia bikuabu kudibu to. Kadi, neikale ne malu a bungi a kuambila bayidi bende ba lulamatu mu butuku bua pa buabu ebu.

3. Nnkonko kayi ituandamuna mu tshiena-bualu etshi?

3 Eu ke mushindu uvua Yezu mujadike Tshivulukilu tshia lufu luende tshitudi tubikila kabidi ne: “Didia dia dilolo dia Mukalenge.”  (1 Kol. 11:20) Bua tshivulukilu etshi, bamue badi mua kudiebeja ne: Bua tshinyi tudi ne bua kuvuluka lufu lua Yezu? Diampa ne mvinyo bidi bileja tshinyi? Mmunyi mutudi mua kudilongolola bua Tshivulukilu? Nnganyi udi ne bua kudia diampa ne kunua mvinyo? Ntshinyi tshidi bena Kristo ne bua kuenza bua tshidi Mifundu yamba bua ditekemena didibu nadi?

TSHITUTU TUVULUKILA LUFU LUA YEZU

4. Lufu lua Yezu ndutuenzele tshinyi?

4 Bu mutudi ndelanganyi ya Adama, tudi bapiane bubi ne lufu. (Lomo 5:12) Muntu mupange bupuangane nansha umue kena mua kupesha Nzambi tshintu tshidi mua kumupikula yeye anyi bantu bakuabu to. (Mus. 49:6-9) Kadi anu Yezu ke wakafuta ku diambuluisha dia lufu luende mushinga wa tshia kupikula natshi udi mukumbane, mmumue ne: mubidi wende mupuangane ne mashi ende avua maye panshi. Pavua Yezu muleje Nzambi mushinga wa tshia kupikula natshi, wakenza bua tupikudibue ku bubi ne lufu ne bua tupete dipa dia muoyo wa tshiendelele.—Lomo 6:23; 1 Kol. 15:21, 22.

5. a) Ntshinyi tshidi tshituleja ne: Nzambi ne Kristo mbanange bantu? b) Bua tshinyi tudi ne bua kubuela mu Tshivulukilu tshia lufu lua Yezu?

5 Kulongolola bua kufila tshia kupikula natshi kudi kuleja mudi Nzambi munange bantu. (Yone 3:16) Mulambu wa Yezu ntshijadiki tshia mudiye pende mutunange. Ke bualu kayi, patshivua Yezu “muena mudimu” wa Nzambi mu diulu kumpala kua kuluaye pa buloba, uvua ‘mutambe kunanga bana ba bantu.’ (Nsu. 8:30, 31, NWT) Dianyisha dietu kudi Nzambi ne kudi Muanende didi ne bua kutusaka bua kubuela mu Tshivulukilu tshia lufu lua Yezu, ne patudi tuenza nunku tudi tutumikila dîyi dituma dia ne: “Tungunukayi ne kuenza nunku bua kumvuluka.”—1 Kol. 11:23-25.

TSHIDI DIAMPA NE MVINYO BILEJA

6. Mmunyi mutudi ne bua kumona diampa ne mvinyo bia mu Tshivulukilu?

6 Pavua Yezu mujadike Tshivulukilu, kavua mushintulule diampa ne mvinyo mu tshishima bilue mubidi ne mashi ende bilelela to. Kadi, wakamba bua diampa ne: “Etshi tshidi tshileja mubidi wanyi.” Wakamba bua mvinyo ne: “Etshi tshidi tshileja ‘mashi anyi a tshipungidi’ adi ne bua kuya panshi bua bantu ba bungi.” (Mâko 14:22-24) Nunku bidi bimueneka patoke ne: bavua ne bua kumona diampa ne mvinyo bu bimanyinu peshi bifuanyikijilu.

7. Diampa divuabu benze nadi mudimu mu Tshivulukilu divua dileja tshinyi?

7 Mu tshikondo tshia mushinga mukole tshia mu 33 atshi, Yezu wakenza mudimu ne diampa kadiyi diela luevene divua dishale mu biakudia bia Pasaka. (Ekes. 12:8) Mu Mifundu, luevene lutu imue misangu luleja dinyanguka peshi bubi. (Mat. 16:6, 11, 12; Luka 12:1) Nunku, bivua bikumbane muvua Yezu muenze mudimu ne diampa kadiyi diela luevene, bualu divua dikumbane bua kuleja mubidi wende uvua kawuyi ne bubi. (Eb. 7:26) Nunku, diampa dia mushindu eu ke ditutu tuenza nadi mudimu mu Tshivulukilu.

8. Dikopo dia mvinyo dia mu Tshivulukilu ditu dileja tshinyi?

8 Mvinyo uvua Yezu muenze nende mudimu mu dia 14 ngondo wa Nisana mu 33 uvua uleja mashi ende anu mudibi bua dikopo dia mvinyo dia mu Tshivulukilu tshia matuku etu aa. Mashi ende akedibua panshi ku Gologota, muaba uvua pambelu pa Yelushalema “bua kujimija mibi ya bantu.” (Mat. 26:28; 27:33) Bu mudi diampa ne mvinyo bia mu Tshivulukilu bileja mulambu wa Yezu wa mushinga mukole uvuaye mufile bua bantu bena butumike, ne bu mutudi tuanyisha bualu buimpe budibu batulongoluele ebu, mbimpe yonso wa kutudi ikale mudilongolole bua kubuela mu Didia dia dilolo dia Mukalenge ditu dienzeka tshidimu tshionso.

IMUE MISHINDU YA KUDILONGOLOLA

9. a) Bua tshinyi bidi ne mushinga bua kutungunuka ne kulonda programe wa dibala dia Bible bua Tshivulukilu? b) Udi umvua bishi bua tshia kupikula natshi?

9 Tuetu batungunuke ne kulondesha programe  wa dibala dia Bible bua Tshivulukilu udi mu kakanda ka Tukonkononayi Mifundu dituku dionso, tudi mua kuelangana meji bua tshivua Yezu muenze kumpala kua kufuaye. Kuenza nunku kudi mua kutuambuluisha bua kulongolola muoyo wetu bua Didia dia dilolo dia Mukalenge. * Muanetu wa bakaji mukuabu wakamba ne: “Tudi bindile Tshivulukilu ne muoyo umue. Mu tshidimu tshionso, tshidi tshilua muanda wa pa buawu. Ndi mvuluka . . . , meme muimane mu madilu, ntangila tatuanyi mulale panshi, meme e kujingulula mu mutshima wanyi bulenga bua tshia-bupikudi. . . . Bushuwa, mvua mumanye mua kumvuija mvese yonso idi yakula bualu buatshi! Kadi, dituku adi dimvua mudiele nkonko pa lufu, mutshima wanyi wakuwujibua tente ne disanka bua malu akumbajibua ku diambuluisha dia tshia-bupikudi atshi tshia mushinga mukole.” Bushuwa, patudi tudilongolola bua Tshivulukilu, mbimpe tuelangane meji bua mudi mulambu wa Yezu mutupikule ku mulawu wa bubi ne lufu.

Enza mudimu ne bintu bidibu batupatuile bua kulongolola muoyo webe bua Tshivulukilu (Tangila tshikoso tshia 9)

10. Mmunyi mudi kudilongolola bua Tshivulukilu kuikale ne buenzeji pa mudimu wetu wa diyisha?

10 Kudilongolola bua Tshivulukilu kudi kabidi kulomba kuvudija mudimu wetu wa buambi mu mushindu kampanda, pamuapa pa kulua mpanda-njila muambuluishi mu tshikondo tshia Tshivulukilu. Patudi tubikila balongi betu ba Bible ne bantu bakuabu mu Didia dia dilolo dia Mukalenge, netupete disanka dia kuakula bua Nzambi, bua Muanende ne bua masanka adibu balamine bantu badi basankisha Yehowa ne bamutumbisha.—Mus. 148:12, 13.

11. Mmunyi muvua bamue bena mu Kolinto badie bimanyinu bia mu Tshivulukilu mu mushindu udi kawuyi mukumbane?

11 Paudi udilongola bua Didia dia dilolo dia Mukalenge, ukonkonone tshivua mupostolo Paulo mufundile bena Kristo ba mu Kolinto. (Bala 1 Kolinto 11:27-34.) Paulo wakaleja ne: muntu yonso udi udia diampa ne unua dikopo dia mvinyo mu mushindu udi kawuyi muakanyine ‘mmupile bua bualu bua mubidi ne mashi bia Mukalenge.’ Nunku, muela manyi udi ne bua “kudikonkonona bua kumona ni mmukumbane” ne pashishe kudia bimanyinu. Yeye kayi muenze nanku, udi “udia ne unua dilumbuluisha diende nkayende.” Bua dienza malu mu mushindu mubi, bantu ba bungi ba mu Kolinto bavua ‘batekete, bavua ne masama, ne bantu ndambu bavua balale tulu mu lufu [lua mu nyuma].’ Pamuapa, bamue bavua badie ne banue bikole kumpala kua Tshivulukilu peshi munkatshi muatshi,  bualu buvua bubafikishe ku dipanga kushala batabale mu lungenyi ne mu nyuma. Kudia bimanyinu mu mushindu wa nunku udi kawuyi mukumbane kudi kufikisha Nzambi ku dibenga muntu.

12. a) Paulo uvua mufuanyikije Tshivulukilu ne tshinyi? Ndidimuija kayi divuaye mupeshe bantu bavua ne bua kudia? b) Muntu utu udia bimanyinu yeye muenze bubi bunene udi ne bua kuenza tshinyi?

12 Paulo uvua mufuanyikije Tshivulukilu ne didia ne bantu bakuabu ne wakadimuija bavua badia ne: “Kanuena mua kunua dikopo dia Yehowa ne dikopo dia bademon popamue; kanuena mua kudia ku ‘mêsa a Yehowa’ ne ku mêsa a bademon popamue.” (1 Kol. 10:16-21) Muntu udi udia bimanyinu mu Didia dia dilolo dia Mukalenge yeye muenze bubi bunene, udi ne bua kukeba diambuluisha dia mu nyuma. (Bala Yakobo 5:14-16.) Muela manyi eu yeye muleje ‘mamuma adi aleja mudiye mukudimune mutshima,’ nunku kena upetula mulambu wa Yezu yeye mudie bimanyinu bia mu Tshivulukilu to.—Luka 3:8.

13. Bua tshinyi mbimpe kusambila bua ditekemena didi Nzambi mutupeshe?

13 Padi yonso wa kutudi udilongolola bua Tshivulukilu, nebikale bimpe yeye muelangane meji mu disambila bua ditekemena didi Nzambi mutupeshe. Kakuena mutendeledi wa Yehowa udi mudilambule kudiye ne udi muyidi wa lulamatu wa Muanende udi musue kuleja mudiye kayi ne kanemu bua mulambu wa Yezu pa kudia bimanyinu mu Tshivulukilu yeye kayi bushuwa ne tshijadiki tshia mudiye muena Kristo muela manyi. Nunku, mmunyi mudi muntu mua kumanya bikalaye mukumbane anyi kayi mukumbane bua kudia bimanyinu?

NNGANYI UDI NE BUA KUDIA DIAMPA NE KUNUA MVINYO

14. Bu mudi bela manyi bikale mu tshipungidi tshipiatshipia, ntshinyi tshidibu benza mu Tshivulukilu?

14 Bantu badi badia diampa ne banua mvinyo mu Tshivulukilu mu mushindu udi muakanyine mbajadike ne muoyo mujima ne: badi mu tshipungidi tshipiatshipia. Yezu wakamba bua mvinyo ne: “Etshi tshidi tshileja tshipungidi tshipiatshipia tshienza ne mashi anyi.” (1 Kol. 11:25) Nzambi ukavua muambe ku diambuluisha dia muprofete Yelemiya ne: uvua ne bua kuenza tshipungidi tshipiatshipia tshivua tshishilangane ne tshipungidi tshia Mikenji tshivuaye mudie ne bena Isalele. (Bala Yelemiya 31:31-34.) Nzambi uvua muenze tshipungidi tshipiatshipia ne bena Isalele wa mu nyuma. (Gal. 6:15, 16) Tshipungidi etshi ntshijadika ne mulambu wa Kristo ne tshidi tshienza mudimu bua mashi ende avua medibue panshi. (Luka 22:20) Yezu ke Mutuangaji wa tshipungidi tshipiatshipia, ne bena Kristo bela manyi ba lulamatu badimu badi bapeta bumpianyi bua mu diulu.—Eb. 8:6; 9:15.

15. Mbanganyi badibu babueje mu tshipungidi tshia Bukalenge? Bobu bashale ne lulamatu nebapete diakalenga kayi?

15 Bantu badi bakumbane bua kudia diamba ne kunua mvinyo mu Tshivulukilu mbamanye ne: mbababueje mu tshipungidi tshia Bukalenge. (Bala Luka 12:32.) Aba bavua balue bayidi ba Yezu bela manyi ne bavua bamulamate, babanyangane nende makenga ende, bavua ne bua kukokesha nende mu diulu. (Filip. 3:10) Bu mudi bela manyi ba lulamatu bikale mu tshipungidi tshia Bukalenge, nebakokeshe ne Kristo bu bakalenge mu diulu bua kashidi. (Buak. 22:5) Bantu ba mushindu eu mbakumbane bua kudia bimanyinu mu Didia dia dilolo dia Mukalenge.

16. Fila diumvuija dia Lomo 8:15-17 mu tshikoso.

16 Anu aba badi nyuma muimpe mujadikile mudibu bana ba Nzambi ke badi ne bua kudia diampa ne kunua mvinyo mu Tshivulukilu. (Bala Lomo 8:15-17.) Mona ne: Paulo mmuenze mudimu ne muaku wa mu tshiena Alama “Aba” udi umvuija “Oh, tatu!” Muana uvua mua kuenza mudimu ne muaku eu bua kuambila tatuende bualu, bualu mmuaku udi umvuija miaku ibidi eyi: muaku “papa” udi uleja malanda makole ne muaku “tatu” udi uleja kanemu. Aba badi bapete “nyuma wa diangatshibua bu bana” badi bana ba Nzambi  balela ku nyuma. Nyuma wende udi umanyishangana ne nyuma wabu, ubajadikila ne: badi bana ba Yehowa bela manyi. Ki nganu ne: bualu mbasue kushiya nsombelu wabu wa pa buloba to. Mbajadike ne: nebikale bapianyi ne Yezu mu Bukalenge bua mu diulu bobu bashale ne lulamatu too ne lufu. Lelu, nkushale anu bantu bakese ba mu bantu 144 000 badi balonda Kristo mu makasa badi “bedibue manyi kudi Wa Tshijila” Yehowa. (1 Yone 2:20; Buak. 14:1) Ku diambuluisha dia nyuma wende badi bamba ne: “Aba, Tatu wanyi!” Bushuwa, badi mu malanda makole ne Nzambi.

ENZA MALU BILONDESHILE DITEKEMENA DIEBE

17. Bela manyi badi ne ditekemena kayi? Mmunyi mudibu badimanya ne: mbela manyi?

17 Wewe muikale muena Kristo muela manyi, ditekemena dia kuya mu diulu mbualu bua mushinga pawudi usambila pa nkayebe. Padi Bible wakula bua ‘mulayi wa kusedibua’ kudi Mulume wa mu diulu Yezu Kristo, udi umona bu badi bakuambila wewe, ne udi windila ne muoyo mujima bua kuikala munkatshi mua “mukaji” wa Kristo. (2 Kol. 11:2; Yone 3:27-29; Buak. 21:2, 9-14) Padi Nzambi uleja mu Dîyi diende mudiye munange bana bende ba mu nyuma, udi udiambila ne: “Au mmeme.” Kabidi padi Dîyi dia Yehowa dileja bana bende bela manyi malu a kuenza, nyuma muimpe udi ukusaka bua kutumikila ne kuamba mu muoyo webe ne: “Ebu bualu budi bunkumbanyina meme.” Nunku, nyuma wa Nzambi ne webe bidi bimanyishangana ne: udi ne ditekemena dia kuya mu diulu.

18. “Mikoko mikuabu” idi ne ditekemena kayi? Udi umvua bishi bua ditekemena adi?

18 Ku lukuabu luseke, biwikala munkatshi mua “musumba munene wa bantu” wa “mikoko mikuabu,” Nzambi mmukupeshe ditekemena dia kupeta muoyo pa buloba. (Buak. 7:9; Yone 10:16) Udi musue kupeta muoyo wa kashidi mu mparadizu, ne udi usanka paudi welangana meji pa tshidi Bible wamba bua muikala muoyo pa buloba mu matuku atshilualua. Udi utekemena ne muoyo kuulu kuulu bua kupeta ditalala dia bungi, muikale munkatshi mua bena mu dîku diebe ne mua bantu bakane bakuabu. Udi windila ne muoyo mujima tshikondo tshikala biyola bia nzala, bupele, makenga, masama ne lufu kabitshiyi bitatshisha bantu to. (Mus. 37:10, 11, 29; 67:6; 72:7, 16; Yesh. 33:24) Udi ujinga bua kuakidila ne muoyo mujima bantu babishabu ku lufu muikale ne ditekemena dia muoyo wa kashidi pa buloba. (Yone 5:28, 29) Udi ne dianyisha dia bungi kudi Yehowa bua mudiye mukupeshe ditekemena dia kupeta muoyo pa buloba. Nansha muudi kuyi udia bimanyinu, udi ubuela mu Tshivulukilu bua kuleja dianyisha bua mulambu wa Yezu Kristo udi upikula.

NEUBUELAMU ANYI?

19, 20. a) Ntshinyi tshiudi ne bua kuenza bua ditekemena didi Nzambi mukupeshe kukumbanadi? b) Udi musue kubuela mu Didia dia dilolo dia Mukalenge bua tshinyi?

19 Nansha wewe muikale ne ditekemena dia kuya mu diulu anyi dia kushala pa buloba, didi mua kukumbana anu wewe muleje ditabuja kudi Yehowa Nzambi, kudi Yezu Kristo ne mu tshia kupikila natshi. Wewe mubuele mu Tshivulukilu, neupete diakalenga dia kuela meji pa ditekemena diebe ne pa mushinga mukole udi nawu lufu lua Yezu. Nunku, enza bua wikale pebe munkatshi mua bantu miliyo babuela mu Didia dia dilolo dia Mukalenge mu Ditanu dia 3 ngondo 4 wa 2015 panyima pa dibuela dia dîba ku Nzubu wa Bukalenge anyi muaba mukuabu.

20 Kubuela mu Tshivulukilu kudi mua kuvudija dianyisha diebe bua mulambu wa Yezu udi upikula. Kuteleja ne ne ntema muyuki nekukusake bua kuleja dinanga kudi bantu nebe pa kubambila malu audi mulonge bua dinanga dia Yehowa ne malu mimpe adiye mulongoluele bantu. (Mat. 22:34-40) Nunku enza muebe muonso bua wikale mu Didia dia dilolo dia Mukalenge.

^ tshik. 1 Bua bena Ebelu, dituku divua dituadija padi dîba dibuela ne dijika padi dîba dibuela dituku didi dilonda.

^ tshik. 9 Bala kakanda ka Mua kulonga Dîyi dia Nzambi, tshitupa tshia 16.

Manya malu makuabu

BIBLE—NKUDIMUINU WA BULONGOLODI BUPIABUPIA

Lumingu lua ndekelu lua muoyo wa Yezu pa buloba (Tshitupa 1)

Tangila karte ka yelushalema ne miaba ivua mimunyunguluke, kabidi ne mushonyi udi ukonkongola tshikondo tshia kumbukila ku dia 8 ngondo wa Nisana too ne ku 11 ngondo wa Nisana, tshidimu tshia 33 bikondo bietu ebi C.E.

BIBLE—NKUDIMUINU WA BULONGOLODI BUPIABUPIA

Lumingu lua ndekelu lua muoyo wa Yezu pa buloba (Tshitupa 2)

Tangila mushonyi udi wangata tshikondo tshia kumbukila mu dia 12 ngondo wa Nisana too ne mu dia 16 ngondo wa Nisana, tshidimu tshia 33 bikondo bietu ebi.