Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 1 2015

Bakadifila ne muoyo mujima mu New York

Bakadifila ne muoyo mujima mu New York

KUKADI bidimu ndambu, Cesar ne mukajende Rucio bavua ne nsombelu muimpe mu Californie muvua Cesar wenza mudimu wa mêba a bungi mu tshiapu tshia biamu bia diela luya, bia diela lupepele ne bia diela mashika ne Rocio uvua wenza mudimu wa bu doktere wa mêba makese. Bavua ne nzubu wabu ne kabavua ne bana to. Kadi, bualu kampanda buakenzeka buvua bushintulule nsombelu wabu. Mbualu kayi abu?

Mu ngondo wa 10 wa 2009, Betele wa mu États-Unis wakatumina bisumbu bionso bia mu ditunga edi mukanda ukeba bena budisuile bua kuwuja formilere bua kuenza mudimu wa didiundisha nzubu ya Betele mu Wallkill mu New York ne bavua ne bua kuenza mudimu ku Betele bua tshitupa tshîpi. Bavua bakeba nansha bantu bakavua ne bidimu bipite pa bitu Betele ulomba. Cesar ne Rocio badi bamba ne: “Bua bidimu bietu, tuvua bamanye ne: edi divua diakalenga dituvua bapete bua musangu umue mu nsombelu wetu dia kuenza mudimu ku Betele. Katuvua mua kulekela tshintu nansha tshimue tshitupangisha mpunga eu to.” Bena dibaka aba bakatuma diakamue formilere yabu.

Bamue bena budisuile badi benza mudimu ku Warwick

Tshidimu tshijima ne tshitupa tshiakapita kabayi banji kubikila Cesar ne Rocio ku Betele. Nansha nanku, bakenza amue malu bua kukumbajabu tshipatshila tshiabu pa kupepeja nsombelu wabu. Cesar udi wamba ne: “Tuakashiya karaje ketu ka mashinyi nzubu bua kubueja mufutshidi mu nzubu wetu. Tuakapatuka mu nzubu utuvua banange bikole uvua ne metre 50 ku nseke yonso utuvua bikake kukavua bidimu bibidi patupu ne kubuela mu nzubu uvua ne metre 6 nseke yonso. Mashintuluka aa akatuambuluisha bua kuikala badiakaje bua kuitaba dibikila dia ku Betele pavuadi ne bua kulua.” Ntshinyi tshiakenzeka pashishe? Rocio udi wamba ne: “Ngondo mujima panyima pa tuetu bamane kubuela mu kazubu kakese, tuakapeta dibikila bua kuya kuenza mudimu bu badisuile ku Wallkill bua tshitupa tshîpi. Tuakamona patoke ne: patuvua bapepeje nsombelu wetu, tuvua bapeshe Yehowa tshintu kampanda tshivuaye mua kubenesha.”

4) Jason, Cesar, ne William

LUNGENYI LUABU LUA DIDIPANGISHA MALU LUDI LUBENESHIBUA

Anu bu Cesar ne Rocio, bana betu ba balume ne ba bakaji nkama ya bungi mbadipangishe amue malu bua kuya kuenza mudimu wa dibaka udi wenzeka mu  tshimenga tshia New York. Ba bungi ba kudibu badi bambuluisha mu mudimu wa didiundisha bibambalu bia ku Wallkill ne bakuabu ba bungi badi ne diakalenga dia kuambuluisha mu dibaka dia biro bidi bilombola mudimu wa pa buloba bujima bia mu Warwick. * Bena mabaka ba bungi mbashiye nzubu yabu mimpe, midimu yabu mimpe ne bashiye too ne bimuna biabu bua kuya kuenzela Yehowa mudimu ne muoyo mujima. Yehowa mmubeneshaku lungenyi lua didipangisha amue malu elu anyi? Eyowa.

2)Way

Tshilejilu, Way muena malu a nzembu ne Debra ba mu Kansas badi ne bidimu bitue ku 60 bakapana nzubu wabu ne bintu biabu bia bungi ne kuya ku Wallkill bua kuenza mudimu bu bena ku Betele badi kabayi basombele mu nzubu ya Betele. * Nansha mudi kuenza nunku kubalombe bua kushintulula amue malu mu nsombelu wabu, mbamone ne: bivua bimpe bua muvuabu badipangishe amue malu. Debra udi wamba bua mudimu udibu bamupeshe ku Betele ne: “Imue misangu ntu ndiumvua anu bu udi wibaka nzubu itubu batuzolela mu mikanda yetu bua kutuleja muikala Mparadizu.”

Melvin ne Sharon ba mu Caroline du Sud bakapana nzubu wabu ne bintu biabu bua kuambuluishabu ku Warwick. Nansha muvuabi kabiyi bipepele bua kudipangisha amue malu, bena dibaka aba bakadiumvua bapete diakalenga dia kuenza mudimu wa mushinga eu. Badi bamba ne: “Kumanya ne: tudi tuenza bualu kampanda buikala mua kuambuluisha bulongolodi bua pa buloba bujima kudi kutupetesha disanka dia bungi.”

3) Kenneth

Kenneth uvua wenza mudimu wa dibaka ukadi muangate pansio ne Maureen ba mu Californie bakadi ne bidimu mu 50 bakaya mu Warwick bua kuambuluisha mu mudimu wa dibaka udiku. Bua kuya, bakumvuangana ne muanetu wa bakaji mukuabu wa mu tshisumbu bua abalamine nzubu ne bakalomba dîku diabu bua dibambuluishe bua kulama tatuende wa Ken ukavua mukulakaje. Badiku banyingalala bua malu adibu badipangishe bua kuya kuenza mudimu ku Betele anyi? Tòo. Ken udi wamba ne: “Tudi tupeta masanka a bungi. Kadi kakuenaku ntatu anyi? Bushuwa idiku, kadi tudi ne nsombelu muimpe ne tudi tulomba ne muoyo mujima bana betu bakuabu bua benze pabu mudimu eu.”

KUTANTAMENA NTATU

Ba bungi ba ku bantu badi bitabe bua kuya kuenza mudimu bavua ne bua kutantamena imue ntatu. Tshilejilu, William ne Sandra badi ne bidimu mu 60 bavua ne nsombelu muimpe mu Pennsylvanie. Bavua ne tshiapu tshivua tshienza biamu bia mashinyi ne bavua bangate bantu 17 ku mudimu. Tshisumbu tshivuabu ntshia katshia patshivuabu bana ne balela babu ba bungi bavua basombele mu tshimenga atshi. Nunku pakamueneka mpunga wa kuenza mudimu ku Wallkill bua matuku makese, bavua bamanye ne: bavua ne  bua kushiyangana ne bantu pa kuamba bonso ne bintu bivuabu basue. William udi wamba ne: “Kakuyi mpata, lutatu lunene lutuvua bapete ndua kushiya muaba muimpe utuvua basue eu.” Kadi panyima pa bena dibaka aba bamane kusambila bikole, bakangata dipangadika didi kadiyi dibanyingalaja dia kuya. William udi wamba ne: “Katuena mua kufuanyikija disanka dia kuenza mudimu pamue ne dîku dia Betele ne tshintu tshikuabu to. Meme ne Sandra tudi ne disanka dia bungi kupita dituvua nadi kumpala.”

Bamue balume ne bakaji babu badi benza mudimu ku Wallkill

Bavua babikile Ricky uvua wenza mudimu wa dilombola mudimu wa luibaku mu Hawaï bua kuambuluishaye mu mudimu udi wenzeka ku Warwick bu muena ku Betele udi musombele pambelu. Mukajende Kendra uvua musue bua itabe dibikila. Kadi, bualu bunene buvua bubatatshisha mbua mushindu wa kulama Jacob, muanabu wa balume uvua ne bidimu 11. Bavua bela meji bikalabi bimpe bua kuyabu mu tshimenga tshia New York ne bikala muanabu mua kuibidilangana ne muaba uvua mushilangane bikole ne uvuaye kumpala eu.

Ricky udi wamba ne: “Bumue bua ku malu a mushinga buvua bua kupeta tshisumbu tshivua ne bansonga bavua bakole mu nyuma. Tuvua basue bua Jacob ikale ne balunda bimpe ba bungi.” Anu muvuabu bela meji, tshisumbu tshivuabu baye tshivua ne bansonga bakese kadi ne bena ku Betele ba bungi. Ricky udi uleja ne: “Pakajika bisangilu bietu bia kumpala muaba au, tuakebeja Jacob muvuaye udiumvua bua tshisumbu tshipiatshipia atshi, nangananga bua muvuamu kamuyi nsonga nansha umue wa mulongo wende. Wakangambila ne: ‘Papa, kusamishi mutu to. Bena ku Betele bansonga ke bikala balunda banyi.’”

Jacob ne baledi bende badi ne disanka bua mudibu ne bena ku Betele mu tshisumbu tshiabu

Bushuwa, bansonga ba ku Betele bakadia bulunda ne Jacob. Ntshinyi tshiakenzeka? Ricky udi wamba ne: “Butuku kampanda, mvua mpitshila ku nzubu wa bulalu wa muananyi ne meme kumona miendu itshivua mitemesha. Mvua mutekemene ne: nemmukuate unaya manaya a ku ordinatere, kadi uvua ubala Bible. Pamvua mumuebeje tshivuaye wenza, wakangambila ne: ‘Ndi nsonga wa ku Betele ne ndi ne bua kubala Bible mujima mu tshidimu tshimue.’” Bushuwa, Ricky ne Kendra bavua ne disanka ki nganu bualu Ricky udi wenza mudimu wa dibaka ku Warwick to, kabidi bualu diumbuka diabu ndiambuluishe bua muanabu kukolaye mu nyuma.—Nsu. 22:6.

KABAYI BADITATSHISHA BUA TSHIKALABU MATUKU ATSHILUALUA

5) Luis ne Dale

Mudimu wa dibaka ku Wallkill ne Warwick neujike ndekelu wa bionso, nunku bantu bavuabu babikile bua kuambuluisha mu mudimu eu mbamanye ne: mudimu wabu wa kuambuluisha ku Betele ngua tshitupa tshîpi. Bana betu ba balume ne ba bakaji aba badiku baditatshisha bikole bua muaba wikalabu ne bua kuya peshi bua tshikalabu ne bua kuenza anyi? Nansha kakese! Ba bungi badi ne lungenyi lua buena lua balume babidi ne bakaji babu badi bafumine mu Florida, badi ne  bidimu mu 50. John uvua wenza mudimu wa dilombola midimu ya luibaku ne mukajende Carmen badi benza mudimu bu bena budisuile ku Warwick bua tshitupa tshîpi badi bamba ne: “Tudi badimuene mudi Yehowa utukumbajila too ne mpindieu malu kampanda masunguluke atudi nawu dijinga. Tudi tuela meji ne: Yehowa ki mmutubikile muaba eu mpindieu anu bua kulua kutulekela pashishe to.” (Mus. 119:116) Luis udi wenza mudimu wa diasa biamu bia dijima nabi midilu ku nzubu ne mukajende Quenia badi benza mudimu ku Wallkill. Badi bamba ne: “Tukadi bamone mudi tshianza tshia Yehowa tshitupeshe bintu bia ku mubidi bitudi nabi dijinga. Nansha mutudi katuyi bamanye mushindu,  dîba ne muaba, tudi batuishibue ne: neatungunuke ne kututabalela.”—Mus. 34:10; 37:25.

‘MASANKA, KANUYI NUKENGELA BINTU BIKUABU KABIDI’

6) John ne Melvin

Ba bungi ba ku bantu badi bambuluishe mu mudimu wa dibaka ku New York bavua mua kuikala ne malu avua mua kubasaka bua kubenga kuya kuenza mudimu bu badisuile. Kadi, bakateta Yehowa anu mudiye utulomba tuetu bonso bua kuenza wamba ne: ‘Nuntete mpindieu, numone bingikala tshiyi mununzuluile biibi bia mu diulu, munulokeshile masanka, kanuyi nukengela bintu bikuabu kabidi.’—Mal. 3:10.

Neutetaku pebe Yehowa ne kupeta masanka a kudiye anyi? Konkonona mu disambila tshiudi mua kuenza bua kuambuluisha mu mudimu munene udi wenzeka, mu New York anyi mikuabu miaba idibu bibaka nzubu wa malu a Bukalenge, ne neudimuene muikala Yehowa mua kukufuta.—Mâko 10:29, 30.

1) Gary

Dale udi enjenyere mu malu a luibaku ne Cathy ba mu Alabama mbanange bikole mudimu eu. Badi bena budisuile ku Wallkill ne badi bamba ne: “Wewe ne dikima dia kushiya muaba muimpe uudi, neupete diakalenga dia kumona mudi nyuma wa Yehowa wenza mudimu.” Ntshinyi tshiudi ne bua kuenza bua kuikala mudiakaje? Dale udi wamba ne: “Pepeja nsombelu webe, pepeja kabidi, pepeja kabidi bikole. Kuakudijinga nansha kakese.” Gary wa mu Caroline du Nord udi ne bidimu 30 mu mudimu wa dilombola midimu ya luibaku. Yeye ne mukajende Maureen badi bamba ne: dimue dia ku mabenesha adibu bapete mu Warwick ndia “kupetangana ne kuenza mudimu ne bena Kristo netu ba bungi balume ne bakaji badi bapitshishe dîba diabu mu dienzela Yehowa mudimu ku Betele.” Gary udi usakidila ne: “Bua kuenza mudimu ku Betele, udi ne bua kuikala ne nsombelu mupepele, bualu ke nsombelu mutambe buimpe mu ndongoluelu wa malu eu.” Jason udi wenza midimu ya nzembu ne Jennifer ba mu Illinois badi bamba ne: kuenza midimu ya Betele ku Wallkill “mbumue bua ku malu audi mua kupeta adi asua kupetangana menemene ne aa enzeka mu bulongolodi bupiabupia.” Jennifer udi wamba pende ne: “Bidi bienza disanka dia bungi paudi umvua ne: Yehowa udi wanyisha tshintu tshionso tshiudi wenza ne mudimu uudi wenza udi ne mushinga wa kashidi ku mêsu kuende. Yehowa udi ukubenesha kupita ne muuvua wela meji.”

^ tshik. 6 Bala mukanda wa Annuaire de Témoins de Jéhovah 2014 dibeji dia 12-13.

^ tshik. 7 Bena ku Betele badi basombele pambelu benza mudimu bua mêba makese badi badifutshila nzubu ne badikumbajila majinga abu eku benza mudimu ku Betele dituku dimue anyi kupita apu.